Ewo Otoriẹ Ebaibol na Uvẹ Omawere nọ U Rovie Fihọ kẹ Owhẹ

EME obọdẹ gbe erọ uzẹme nọ i no obọ Ọghẹnẹ ze eye e rrọ Ebaibol na. O vuẹ omai kpahe ẹjiroro uzuazọ, oware nọ ahwo-akpọ a be rọ ruẹ uye, gbe obaro ahwo-akpọ. U re wuhrẹ omai epanọ ma rẹ rọ ruẹ evawere, epanọ ma re ro mu egbẹnyusu, gbe epanọ ma re ro ku ebẹbẹ họ ziezi. Maero, ma rẹ jariẹ wuhrẹ kpahe Ọnọma gbe Ọsẹ obọ odhiwu mai, Jihova. Eriariẹ itieye na e rẹ kẹ omai evawere jẹ lẹliẹ omai wo ẹruore evaọ uzuazọ.

A jọ Ebaibol na rehọ ewuhrẹ eriariẹ Ọghẹnẹ ro dhesẹ emu nọ a rẹ re. Jesu ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Matiu 4:4; Ahwo Hibru 5:12-14) Wọhọ epanọ emamọ emu nọ ma rẹ re kẹdẹ kẹdẹ o roja re ma ruẹse jọ uzuazọ na, ere ese Ebaibol na ẹsikpobi o roja kẹ omai re ma sai wo erere no eyaa Ọghẹnẹ ọrọ uzuazọ ebẹdẹ bẹdẹ ze.

O rẹ were omai re ma re emu keme ere a ma omai, gbe fikinọ o rẹ lẹliẹ eva vọ mai. Dede na, u wo oware ofa jọ nọ ma rẹ rọ kuọ oma mai nọ ma tẹ gwọlọ wo evawere. Jesu ọ ta nọ: “Eva e were ahwo nọ a vuhu ẹgwọlọ abọ-ẹzi rai mu.” (Matiu 5:3, NW ) Evawere e lọhọ keme ma rẹ sai ru ẹgwọlọ yena gba ẹkwoma ewo otoriẹ Ebaibol na.

Uzẹme, otujọ a ruẹ nnọ o rrọ use-abọ re a wo otoriẹ Ebaibol na. Wọhọ oriruo, whọ sae gwọlọ obufihọ fiki eria Ebaibol jọ nọ e ta kpahe uruemu-unuakpọ nọ whọ riẹ hẹ hayo eria jọ nọ a jọ rehọ oze ta ẹme. Eruẹaruẹ e tẹ jẹ riẹ nọ a rehọ eme ididi kere, enọ whọ rẹ sai wo otoriẹ rai hi ajokpanọ whọ kiẹ eria  efa Ebaibol na nọ e ta kpahe ẹme ọvona. (Daniẹl 7:1-7; Eviavia 13:1, 2) O make rrọ ere na, whọ rẹ sai wo otoriẹ Ebaibol na. Ẹvẹ oyena o sai ro mu owhẹ ẹro?

Omawere nọ U Rovie Fihọ kẹ Ahwo Kpobi

Ebaibol na yọ Ẹme Ọghẹnẹ. Ọghẹnẹ ọ jọ eva riẹ fodẹ oreva riẹ kẹ omai. Kọ Ọghẹnẹ ọ rẹ kẹ omai obe nọ o rrọ gaga nọ a rẹ sai wo otoriẹ riẹ vievie he hayo onọ umutho ahwo jọ nọ e riobe ọvo a re wo otoriẹ riẹ? Ijo, Jihova o re ru ere he. Kristi Jesu ọ ta nọ: “Whai ọvẹ ọ rọ ọsẹ, nọ ọmọzae riẹ ọ rẹ te yare eri, kọ ọ rẹ kẹe oriọvọ rọ eri; hayo ọ tẹ yare iẹ eke, kọ ọ rẹ kẹe akpakpasimagha? Whai enọ i yoma wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te re?” (Luk 11:11-13) Fikiere, o rẹ sai mu owhẹ ẹro inọ whọ sai wo otoriẹ Ebaibol na gbe nnọ whọ tẹ rehọ eva efuafo yare Ọghẹnẹ, ọ te kẹ owhẹ obufihọ nọ whọ gwọlọ re who wo otoriẹ Ẹme riẹ. Evaọ uzẹme, emaha dede a rẹ sai wo otoriẹ ugogo iwuhrẹ Ebaibol na!—2 Timoti 3:15.

Dede nọ o gwọlọ omodawọ re a sai wo otoriẹ Ebaibol na, ma rẹ sai wo ọbọga noi ze otẹrọnọ ma wo otoriẹ riẹ. Nọ ọ kparoma ze no, Jesu ọ roma via kẹ ilele ivẹ riẹ jọ jẹ ta kẹ ae kpahe eruẹaruẹ Ebaibol na. Ikuigbe Luk e ta nọ: “Ọ tẹ rehọ Mosis muhọ ze ruọ eruẹaro kpobi, o te dhesẹ eware kpobi nọ a kere kpahe iẹ kẹ ae.” Eme o no rie ze? Owọwọ yena, nọ a je roro kpahe oware nọ a wuhrẹ mi ei, ilele na a tẹ ta kẹ ohwohwo nọ: “Kọ eva mai egbẹ ghariẹ okenọ ọ jẹ ta eme ko mai eva edhere, nọ o dhesẹ ikerakere na kẹ omai?” (Luk 24:13-32) Ẹme Ọghẹnẹ nọ a wo otoriẹ riẹ o kẹ rai omawere keme o bọ ẹrọwọ rai ga kpahe eyaa Ọghẹnẹ, o tẹ jẹ kẹ ae ẹruore kpahe obaro na.

Ukpenọ o rẹ jọ oware nọ u re fou ehoo, ewo otoriẹ Ebaibol na o rrọ oware isiuru avọ erere, o rẹ were oma wọhọ epanọ emamọ emu ọ rẹ were oma na. Eme who re ru hrọ re whọ sai wo otoriẹ utioye na? Uzoẹme nọ o rrọ aro na u dhesẹ epanọ whọ rẹ sai ro wo isiuru kpahe “eriariẹ Ọghẹnẹ.”—Itẹ 2:1-5.

[Uwoho nọ o rrọ ẹwẹ-obe avọ 4]

Wọhọ ọsẹ oyoyou, Jihova ọ rẹ kẹ omai ẹzi ọfuafo re u fi obọ họ kẹ omai wo otoriẹ Ebaibol na