Kẹnoma Kẹ Egagọ Erue!
Kẹnoma Kẹ Egagọ Erue!
“Wha nya no udevie rai no, re wha jẹ hẹriẹ oma no ai no, ere Ọnowo ọ tai, wha rọ obọ te oware u gbegbe ovo ho.”—2 AHWO KỌRINT 6:17.
1. Didi uyero abọ-ẹzi ahwo oruọzewọ buobu a rrọ?
AHWO oruọzewọ buobu a riẹ uzẹme na kpahe Ọghẹnẹ hẹ gbe oware nọ o rrọ obaro na kẹ ahwo-akpọ. Fikinọ a be sai duku iyo enọ kpahe eware abọ-ẹzi nọ e be kẹ ae idhọvẹ na ha, a te reghe no, a gbẹ riẹ onọ a re ru hu. Ima ahwo buobu a rrọ igbo erọ ugbẹrọwọ, iruẹru egagọ gbe ehaa nọ e rẹ dha Ọnọma na eva. Ẹsejọhọ who wo erivẹ gbe imoni nọ e rọwo uwuhrẹ ebrerae ehẹle, Ọghẹnẹ esanerọvo, ẹwẹ nọ o re whu hu, hayo oghẹrẹ iwuhrẹ erue efa.
2. Eme isu egagọ erue a ru no, kọ eme o no rie ze?
2 Eme ọ wha ababọ-otoriẹ abọ-ẹzi nana nọ o vọ oria kpobi na ze? E ja ta ha, egagọ—maero kọ egagọ gbe isu egagọ nọ i bi wuhrẹ ahwo iwuhrẹ nọ e wọso Ẹme Ọghẹnẹ. (Mak 7:7, 8) Fikiere, a viẹ ahwo buobu họ no bi roro nọ Ọghẹnẹ uzẹme na a be gọ kpakiyọ eware nọ e be dhae eva a bi ru. Egagọ erue e be ginẹ wha uyero oja nana ze.
3. Ono họ ohwo nọ ọ karo evaọ ẹwhaharo egagọ erue, kọ ẹvẹ a dhesẹ i rie evaọ Ebaibol na?
3 Omama jọ nọ a rẹ ruẹ hẹ o rrọ emu egagọ erue. Pọl ukọ na ọ ta kpahe iẹe nọ: “Ọghẹnẹ akpọ nana o wuhu iroro enọ e rọwo ho di no, re a siọ elo oruaro usiuwoma Kristi ba ẹruẹ, ọnọ avọ Ọghẹnẹ a rọ ẹruọvo.” (2 Ahwo Kọrint 4:4) Setan Ẹdhọ na họ “ọghẹnẹ akpọ nana,” orọnikọ omọfa ha. Ọye họ ohwo nọ ọ karo evaọ ẹwhaharo egagọ erue. Pọl o kere nọ: “Setan oma riẹ ọ rẹ rehọ oma riẹ ru elo ukọ-odhiwu. O sae rọ oware ugbunu hu, otẹrọnọ iruiruo riẹ a rehọ oma ru iruiruo ẹrẹreokie.” (2 Ahwo Kọrint 11:14, 15) Setan o re ru oware uyoma wọhọ ẹsenọ o rrọ uwoma, jẹ viẹ ahwo họ rọwo erue.
4. Eme Uzi nọ Ọghẹnẹ o jie kẹ ahwo Izrẹl anwae o ta kpahe eruẹaro erue?
4 Agbẹta nọ Ebaibol na i ro brukpe egagọ erue na! Wọhọ oriruo, Uzi Mosis na o vẹvẹ idibo Ọghẹnẹ unu inọ a yọrọ oma kẹ eruẹaro erue. Ohwo kpobi nọ ọ be wha iwuhrẹ erue gbe egagọ eghẹnẹ erue haro “a re kpe ei, keme o [bi] wuhrẹ emukpahọ ỌNOWO na.” A jie uzi kẹ emọ Izrẹl nọ a “voro emuomu no udevie rai.” (Iziewariẹ 13:1-5) Ẹhẹ, Jihova o rri egagọ erue wọhọ umuomu.—Izikiẹl 13:3.
5. Didi unuovẹvẹ u fo nọ ma rẹ gaviezọ kẹ nẹnẹ?
5 Jesu Kristi avọ ikọ riẹ a dhesẹ evedha nọ Jihova o wo kpahe egagọ erue via. Jesu ọ vẹvẹ ilele riẹ unu nọ: “Wha sẹro oma rai obọ eruẹaro erue, e nọ e rẹ gọ ẹgọ iwu igodẹ bru owhai tha rekọ eva rai erao ijihẹ.” (Matiu 7:15; Mak 13:22, 23) Pọl o kere nọ “Ọghẹnẹ [o] re muofu . . . kẹ enọ e riẹ riẹ hẹ gbe e nọ i bi ruẹ umuomu gbe ahwo nọ a rẹ rehọ umuomu raha uzẹme.” (Ahwo Rom 1:18) U wuzou gaga re ma gaviezọ kẹ unuovẹvẹ enana jẹ kẹnoma kẹ ohwo kpobi nọ ọ rẹ nyẹ uzẹme orọ Ẹme Ọghẹnẹ yaotọ hayo vaha iwuhrẹ erue!—1 Jọn 4:1.
Wha Dhẹ no “Babilọn Ologbo Na”
6. Ẹvẹ a jọ Ebaibol dhesẹ “Babilọn ologbo na”?
6 Rri epanọ Ebaibol na i dhesẹ egagọ erue evaọ obe Eviavia. A dhesẹ i rie wọhọ ogberẹ nọ ọ da idi bẹ nọ ọ be ta họ ivie buobu gbe ahwo nọ a rrọ otọ rai obọ. Aye ẹwoho nana o bi bru-ẹnwae kugbe ivie buobu, jẹ be da azẹ eg’Ọghẹnẹ uzẹme. (Eviavia 17:1, 2, 6, 18) O wo odẹ nọ o rrọ aruezo riẹ nọ u fo uruemu otọtọ riẹ. Odẹ na họ “Babilọn ologbo na, oni igberẹ, avọ eware aghọ akpọ na.”—Eviavia 17:5.
7, 8. Ẹvẹ egagọ erue i bi ro bru-igberẹ, kọ eme o bi no igberẹ-ibro riẹ ze?
7 Oghẹrẹ nọ Ikereakere na i dhesẹ Babilọn Ologbo na o nwani fo egagọ erue akpọ-soso. Dede nọ idu egagọ buobu nọ e rrọ akpọ na a nwani kuomagbe wọhọ ukoko ovo orọ akpọ-soso ho, oghẹrẹ iruẹru gbe ẹjiroro ọvona aikpobi a wo. Wọhọ epanọ a rehọ aye ogberẹ dhesẹ iẹe eva obe Eviavia na, egagọ erue i wo abọ ologbo evaọ egọmeti. Wọhọ aye nọ o koko eyaa orọo riẹ hẹ, egagọ erue i bru-igberẹ no ẹkwoma oma nọ a bi bru kugbe otu esuo egọmeti. Jemis olele na o kere nọ: “Whai nọ a re fievahọ họ! Wha gbẹ riẹ nọ ohwo nọ ọrọ ogbẹnyusu akpọ na yọ avọ Ọghẹnẹ a rọ egrẹ? Fikiere kohwo kohwo nọ ọ guọlọ nọ o re mu akpọ na ogbẹnyusu, ọye ọvo o ru oma riẹ ọwegrẹ Ọghẹnẹ.”—Jemis 4:4.
8 Ọguakugbe egagọ erue avọ egọmeti o wha uye-oruẹ ulogbo se ohwo-akpọ no. Ọkiotọ iruẹru egọmeti jọ evaọ Africa, Dr. Xolela Mangcu ọ ta nọ “ikuigbe eware nọ e rrọ akpọ via e vọ avọ ikpakpe otu nọ ọguakugbe egagọ avọ egọmeti ọ wha ze.” Obe-usi jọ o ta kẹlena inọ: “Egagọ họ ugogo oware nọ o be wha . . . ohọre gbe azẹ-okpe nọ ọ mai yoma kparobọ ze.” Uzuazọ ima ahwo buobu u lele ohọre nọ egagọ e wha ze no. Babilọn Ologbo na ọ tubẹ rehọ ukpokpoma te je kpe uvi idibo Ọghẹnẹ no, nọ o wọhọ ẹsenọ ọ be da azẹ rai.—Eviavia 18:24.
9. Ẹvẹ a dhesẹ evedha nọ Jihova o wo kpahe egagọ erue evaọ obe Eviavia?
9 Oware nọ o be te via kẹ Babilọn Ologbo na u dhesẹ vevẹ inọ Jihova o mukpahe egagọ erue. Eviavia 17:16 o ta nọ: “Izei ikpe nọ whọ ruerẹ na, ae gbe arao na, a re ti mukpahe ogberẹ na; a re ti fi ei họ ababọ avọ ẹbẹba, a rẹ te raha oma riẹ no, a vẹ rehọ erae mahe iẹ.” Orọ ọsosuọ, arao ojihẹ ologbo o ti kpei jẹ re iwo oma riẹ. Kẹsena, a vẹ te mahe ehẹhẹ riẹ nọ ọ re kiọkọ kpobi. Oye họ oware nọ egọmeti akpọ na a ti ru egagọ erue kẹlena. Ọghẹnẹ họ ohwo nọ ọ te kọ ubi nana họ egọmeti akpọ na eva. (Eviavia 17:17) A te raha Babilọn Ologbo nọ ọ rrọ uvie-ulogbo egagọ erue akpọ-soso na. ‘A te whọlọ iẹe fihọ otọ riẹriẹriẹ.’—Eviavia 18:21.
10. Owọ vẹ u fo nọ ma rẹ jẹ kpahe egagọ erue?
10 Owọ vẹ u fo nọ Ileleikristi uzẹme a rẹ jẹ kpahe Babilọn Ologbo na? Ebaibol na e ta vevẹ nọ: “Ahwo mẹ, wha nya siẹ e ba, ogbẹrọ ere he, wha ti lele iei ru umuemu riẹ je lele iei ruẹ uye riẹ.” (Eviavia 18:4) Ahwo nọ a gwọlọ esiwo a re no egagọ erue hrọ, enẹ họ oke o gbẹ rrọ. Okenọ Jesu Kristi ọ jọ otọakpọ, ọ ta nọ evaọ edẹ urere na unu ọvo ahwo buobu a te rọ ta nọ ae yọ ilele riẹ. (Matiu 24:3-5) Ọ te ta kẹ ahwo otiọye na nọ: “Mẹ riẹ owhai vievie he; wha nya no omẹ no, whai irumuomu.” (Matiu 7:23) Jesu Kristi nọ a ro mu Ovie no enẹna o wo oware ovo nọ o bi ru kugbe egagọ erue he.
Oghẹrẹ Vẹ Whọ rẹ rọ Kẹnoma?
11. Eme u fo nọ ma re ru rọ kẹnoma kẹ egagọ erue?
11 Ileleikristi uzẹme a rẹ kẹnoma kẹ egagọ erue, siọ iwuhrẹ egagọ erue kpobi. Onana u dhesẹ nọ ma rẹ whaha iruẹru rai kpobi evaọ iredio, etẹlivisiọne, gbe ebe egagọ kpobi nọ e be wha iwuhrẹ erue haro kpahe Ọghẹnẹ gbe Ẹme riẹ, Ebaibol na. (Olezi 119:37) U te je fo nọ ma re si oma no ẹkeriotọ omakugbe hayo arozaha omasehọ kpobi nọ ukoko jọ nọ u wobọ kpahe egagọ erue o ruẹrẹhọ. U te no ere no, ma rẹ rehọ oghẹrẹ ovuovo tha egagọ erue uke he. (1 Ahwo Kọrint 10:21) Eware itienana nọ ma rẹ whaha o rẹ thọ omai nọ ‘ohwo ọvo ọ gbe rọ rehọ eriariẹ ifofe gbe ẹghẹ viẹ omai họ họ, erọ uwuhrẹ ahwo akpọ avọ izi akpọ na, nọ e rrọ erọ Kristi hi.’—Ahwo Kọlọsi 2:8.
12. Ẹvẹ ohwo ọ sai ro bru usu kpobi no egagọ erue?
12 Kọ ẹvẹ o rẹ jọ otẹrọnọ ohwo nọ ọ rrọ egagọ erue enẹna, a te je kere odẹ riẹ fihọ iẹe, ọ gwọlọ zihe ruọ omọvo Isẹri Jihova? Wọhọ epanọ o rẹ mae jọ, ileta nọ ohwo o re kere inọ a si odẹ riẹ no egagọ itieye na oye o rẹ kẹ imuẹro inọ ọ gbẹ gwọlọ jọ abọjọ egagọ erue he. U wuzou gaga re ohwo na ọ ginẹ jowọ owhawha omasino utioye na re abọ iruẹru egagọ erue ọvuọvo e siọ ohwo otioye ba egbeku. U fo re egagọ nọ o bi kiuke ku na gbe ahwo kpobi a ruẹ owojẹ ọnọ ọ gwọlọ jọ Osẹri na vevẹ inọ o gine bru usu no egagọ yena no.
13. Uthubro vẹ Ebaibol na ọ kẹ kpahe epanọ u wuzou te re a kẹnoma kẹ egagọ erue?
13 Pọl ukọ na o kere nọ: “Wha ku oma rai gbe egedhọ họ. Keme didi okugbe ẹrẹreokie avọ umuomu a wo i? Hayo didi okuomagbe evevẹ avọ ebi a wo i? Didi atamu ọ rọ udevie Kristi avọ Belial? Hayo eme enọ e rọwo avọ enọ e rọwoho a wo kugbe? Didi ọrọwokugbe ọ rọ uwou Ọghẹnẹ avọ o rọ ẹdhọ? . . . Fikiere wha nya no udevie rai no, re wha jẹ hẹriẹ oma no ai no, ere Ọnowo ọ tai, wha rọ obọ te oware ugbegbe ovo ho.” (2 Ahwo Kọrint 6:14-17) Nọ ma tẹ be kẹnoma kẹ egagọ erue họ ma be nya lele uthubro nana. Kọ uthubro Pọl na u dhesẹ re inọ ma re ru oware ovuọvo kakaka kugbe ahwo nọ a rrọ egagọ erue he?
“Wha Rehọ Areghẹ Su Oma Rai”
14. Kọ o gwọlọ nọ ma re si oma no ahwo nọ ma gbẹ rrọ ẹrọwọ ọvo ho riẹriẹriẹ? Ru ei vẹ.
14 Kọ u dhesẹ nọ Ileleikristi uzẹme a re ru oware ovuovo kugbe ahwo nọ a rrọ egagọ erue he? Kọ u dhesẹ nọ ma rẹ nwani si ma no ahwo nọ ma gbẹ rrọ ẹrọwọ ọvo ho riẹriẹriẹ? Uyo na họ ijo. Evaọ usu izi ivẹ nọ e mae rrọ na, orọ avivẹ o ta nọ: “You omọfa epanọ who you oma ra.” (Matiu 22:39) Uyoyou ma bi gine dhesẹ kẹ erivẹ mai na nọ ma tẹ be ta usiuwoma Uvie na kẹ ai. Uyoyou nọ ma wo kẹ ai u re dhesẹ oma via re nọ ma te bi wuhrẹ Ebaibol kugbe ai je ru ai riẹ epanọ u wuzou te re a si oma no egagọ erue.
15. Re a ta nọ ma “rọ erọ akpọ na ha” eme u dhesẹ?
15 Dede nọ ma be ta usiuwoma na kẹ erivẹ mai, wọhọ ilele Jesu ma “rọ erọ akpọ na ha.” (Jọn 15:19) Eva etẹnẹ ikere na, “akpọ” na o dikihẹ kẹ ahwo-akpọ nọ a hẹriẹ oma no Ọghẹnẹ. (Ahwo Ẹfẹsọs 4:17-19; 1 Jọn 5:19) Oghẹrẹ nọ ma rọ rrọ erọ akpọ na ha họ, oma nọ ma si no iruemu, ẹmeunu, gbe iruẹru riẹ nọ e rẹ dha Jihova eva. (1 Jọn 2:15-17) Ofariẹ, rọwokugbe ehri-uzi nọ o ta nọ “usu uyoma o rẹ raha uruemu ezi,” ma rẹ whaha usu onya kugbe ahwo nọ a be rria lele itee Oleleikristi hi. (1 Ahwo Kọrint 15:33) Re a se erọ akpọ na ba ẹjọ u dhesẹ nọ ohwo ọ rẹ “kare epe eva akpọ na.” (Jemis 1:27) Fikiere, re ma si oma no akpọ na orọnikọ u dhesẹ nọ ma rẹ kẹnoma no amọfa riẹriẹriẹ hẹ.—Jọn 17:15, 16; 1 Ahwo Kọrint 5:9, 10.
16, 17. Ẹvẹ u fo nọ Ileleikristi a re yerikugbe ahwo nọ a riẹ uzẹme Ebaibol na ha?
16 Nọ o rrọ ere na, kọ ẹvẹ u fo nọ ma re yerikugbe ahwo nọ a riẹ uzẹme Ebaibol na ha? Pọl o kere se ukoko obọ Kọlọsi nọ: “Wha rehọ areghẹ su oma rai udevie ahwo nọ a rọ ukoko-Kristi hi, wha vẹ jẹ rọ uvẹ rai ru emamọ oware. Jọ ẹme rai ọ vọ avọ aruoriwo, jẹ hẹ mere wọhọ uwhei kẹse kẹse, re wha riẹ epanọ ohwo o re yo kẹ ohwo.” (Ahwo Kọlọsi 4:5, 6) Pita ukọ na o kere nọ: “Jọ eva ra rọ adhẹẹ kẹ Kristi rọ Ọnowo. Kẹse kẹse hẹ thọ-oma vẹra re whọ ta unu ra vevẹ kẹ kohwo kohwo nọ o se owhẹ re who gbe-iku ẹruore nọ ọrọ eva ra kẹe, otẹrọ ere dede, rọ udhedhẹ avọ oma-urokpotọ ruei.” (1 Pita 3:15) Pọl ọ hrẹ Ileleikristi inọ a “siọ ẹme oyoma ohwọvo ba ẹta, jẹ siọ ẹwhọ ba, a vẹ jọ wowou, a ve he dhesẹ uvi evaidhedhẹ kẹ ahwo kpobi.”—Taitọs 3:2.
17 Wọhọ Isẹri Jihova, ma re fu uke hayo dhuaro kẹ amọfa ha. Ma rẹ rehọ eme ẹkoko dhesẹ ahwo egagọ efa gbe he. Ukpoye, ma rẹ ma ẹme te o tẹ make rọnọ ohwo nọ ma be ta usiuwoma kẹ, ọrivẹ, hayo ibe-oruiruo ọ be kpahe eme iyoma kẹ omai.—Ahwo Kọlọsi 4:6; 2 Timoti 2:24.
“He Lele Oghẹrẹ Eme Oma Ojaja” Na
18. Didi oghẹrẹ uyero otọtọ abọ-ẹzi o rẹ jọ kẹ ahwo nọ a zihe kpohọ egagọ erue?
18 Nọ ohwo o te wuhrẹ uzẹme Ebaibol na no, o rẹ jọ oware enwoma gaga nọ o te zihe kpohọ egagọ erue! Ebaibol na i dhesẹ enwoma nọ i re no owojẹ utioye na ze nọ o ta nọ: “A tẹ rehọ fiki ẹriẹ Ọnowo gbe Osiwi mai Jesu Kristi dhẹ va oma-uzue akpọ na abọ no, a tẹ jẹ wariẹ kieruọ ovri rai, a jẹ ga obọ vi ai, u re yoma kẹ ae oke uwhremu na vi ọsosuọ. . . . Epanọ uzẹme itẹ na orọ ere o via kẹ ae na, nnọ, Arakọ na o zihe bru eware obọ riẹ nọ ọ kpa no jegbe esi nọ a họ fuafo uno ọ tẹ be rọ oma thoviẹ oluhu.”—2 Pita 2:20-22.
19. Fikieme u je wuzou re ma fi ẹro hotọ kẹ oware kpobi nọ o rẹ sai fi edikihẹ abọ-ẹzi mai họ ọza?
19 Ma re fi ẹro hotọ gaga kẹ oware kpobi nọ o rẹ sae wha enwoma se omai evaọ abọ-ẹzi. Avro ọ riẹ hẹ sọ enwoma itienana e ginẹ rrọ! Pọl ukọ na ọ vẹvẹ omai unu nọ: “Ẹzi ọ be ta vevẹ nọ, oke uwhremu ejọ e rẹ te hẹriẹ no orọwọ na no, a vẹ te kezọ kẹ izi ọviẹhọ avọ uwuhrẹ [ikọ-imuomu].” (1 Timoti 4:1) “Oke uwhremu” na ma be rria na. Ahwo nọ a kẹnoma kẹ egagọ erue he a rẹ sai ‘fi ai kpenẹ avọ enẹ, ofou uwuhrẹ ọ rẹ wọ ai kpobonẹ kpobonẹ, fiki ẹghẹ ahwo gbe ẹghẹ ọwhariọ, eva uruemu ẹghẹ eviẹhọ.’—Ahwo Ẹfẹsọs 4:13, 14.
20. Ẹvẹ ma sae rọ thọ oma mai no okpomahọ oyoma ọrọ egagọ erue?
20 Ẹvẹ ma sae rọ thọ oma mai no okpomahọ oyoma ọrọ egagọ erue? Roro kpahe eware kpobi nọ Jihova ọ kẹ omai no. Ma wo Ẹme Ọghẹnẹ, Ebaibol na. (2 Timoti 3:16, 17) Jihova ọ tẹ jẹ rẹhọ ẹkwoma “odibo oruọzewọ, nọ o wo areghẹ” na ruẹrẹ emu abọ-ẹzi buobu họ no. (Matiu 24:45) Nọ ma be nyaharo evaọ uzẹme na, kọ u gbe fo re ma wo isiuru kẹ ‘emu ọgaga nọ ọ rrọ kẹ enọ e kpako no’ je wo isiuru nọ ma re ro koko oma họ eria nọ ma rẹ jọ wuhrẹ uzẹme abọ-ẹzi? (Ahwo Hibru 5:13, 14; Olezi 26:8) Jọ o jọ ọtamuo mai inọ ma re wo erere vọvọ no eruẹrẹfihotọ Jihova ze re ma sai “lele oghẹrẹ eme oma ojaja” nọ ma yo no na. (2 Timoti 1:13) Ere ma te sae rọ kẹnoma kẹ egagọ erue.
Eme Who Wuhrẹ No?
• Eme họ “Babilọn Ologbo na”?
• Eme ma re ru hrọ re ma ruẹse kẹnoma kẹ egagọ erue?
• Enwoma vẹ kpahe edikihẹ abọ-ẹzi mai u fo nọ ma rẹ whaha?
[Enọ Uwuhrẹ]
[Uwoho nọ o rrọ ẹwẹ-obe avọ 18]
Kọ whọ riẹ oware nọ a ro dhesẹ “Babilọn Ologbo na” wọhọ ogberẹ aye?
[Uwoho nọ o rrọ ẹwẹ-obe avọ 19]
Ọraha o bi ti te “Babilọn Ologbo na”
[Uwoho nọ o rrọ ẹwẹ-obe avọ 21]
Ma rẹ rehọ udu “udhedhẹ avọ oma-urokpotọ” lele ahwo nọ ma gbẹ rrọ orọwọ ovo ho yeri