‘Wha Nyai Ru Ilele Jẹ Họ ae Ame’
‘Wha Nyai Ru Ilele Jẹ Họ ae Ame’
“Fikiere wha wuhrẹ ahwo erẹwho kpobi, wha họ ae ame . . . wha wuhrẹ ai, re a ru eware kpobi nọ mẹ vuẹ owhai.”—MATIU 28:19, 20.
1. Didi eyaa orẹwho Izrẹl o ya eva aro Ugbehru Saena?
OWARE wọhọ ikpe 3,500 nọ e vrẹ, orẹwho jọ soso o yeyaa kẹ Ọghẹnẹ. Nọ a kokohọ aro Ugbehru Saena, emọ Izrẹl a ta vevẹ inọ: “Onọ ỌNOWO na ọ ta kpobi ma re ruẹ.” No umuo oke yena vrẹ, Izrẹl o te zihe ruọ ahwo nọ a roma mudhe kẹ Ọghẹnẹ, “efe-agheghọ” riẹ. (Ọnyano 19:5, 8; 24:3) A rẹro nnọ ọ te thae uke a vẹ jẹ rria “otọ nọ ameivie-eruẹ gbe ọnyọ i je re suo” no ige ruọ ige.—Iruo-Izerẹ 20:24.
2. Didi usu ahwo a rẹ sae reawere riẹ kugbe Ọghẹnẹ nẹnẹ?
2 Rekọ, wọhọ epanọ Asaf ọso-ilezi na ọ ta, emọ Izrẹl “a koko ọvọ Ọghẹnẹ hẹ, a rọo lele ijaje Ọghẹnẹ hẹ.” (Olezi 78:10) A koko eyaa nọ esẹ rai a ya kẹ Jihova ha. Uwhremu na, orẹwho na u te ku usu oghaghae yena nọ a wo kugbe Ọghẹnẹ na fiẹ. (Ọtausiwoma Na 5:4; Matiu 23:37, 38) Fikiere, Ọghẹnẹ ọ tẹ rẹriẹ ovao “bru ahwo Egedhọ, re ọ jọ udevie rai ha ahwo ro mu kẹ isẹri ise kẹ odẹ riẹ.” (Iruẹru 15:14) Yọ evaọ edẹ urere nana, o bi koko “otu obuobu jọ [họ], nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu,” enọ e be rehọ oghọghọ bo nọ: “Usiwo orọ Ọghẹnẹ mai nọ ọ keria akaba uvie je te Omogodẹ na!”—Eviavia 7:9, 10.
3. Didi owọ ohwo ọ rẹ jẹ hrọ re ọ ruẹse reawere usu okpekpe kugbe Ọghẹnẹ?
3 Re ohwo ọ jọ usu enọ e be reawere usu oghaghae yena kugbe Ọghẹnẹ, ọ rẹ roma mudhe kẹ Jihova, ọ vẹ jẹ jọ ẹgbede rehọ ame-ọhọ dhesẹ iẹe via. Ere oruo yọ ẹmeoyo kẹ uzi nọ Jesu o jie kẹ ilele riẹ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Emọ Izrẹl a gaviezọ kẹ isase “obe ọvọ na.” (Ọnyano 24:3, 7, 8) Fikiere, a riẹ oware nọ Jihova ọ gwọlọ mi ai. Epọvo na re nẹnẹ, o roja re ohwo o wo eriariẹ egbagba erọ oreva Ọghẹnẹ nọ o rrọ Ebaibol na taure ọ tẹ te jẹ owọ ame-ọhọ.
4. Eme ohwo o re ru hrọ re ọ sai te kẹ ame-ọhọ? (Ku ẹkpẹti nọ ọ rrọ obehru na gbei.)
4 O rrọ vevẹ, Jesu ọ gwọlọ nnọ ilele riẹ a re wo eriariẹ nọ u re ru nọ ẹrọwọ rai ọ jẹ jọ uvi ẹrọwo re a tẹ te họ-ame. Orọnikọ ọ ta kẹ ilele riẹ re a nyai ru ilele ọvo ho rekọ re a je wuhrẹ ae ‘re a ru eware kpobi nọ ọ vuẹ rai.’ (Matiu 7:24, 25; Ahwo Ẹfẹsọs 3:17-19) Fikiere, taure ohwo o te ti te kẹ ame-ọhọ, o re wuhrẹ Ebaibol na te emerae buobu, makọ ukpe ovo hayo ivẹ dede, ọ jẹ be te jiroro ame-ọhọ o gbẹ jọ nọ oware ugidi hi, a vẹ ruẹ nọ ọ riẹ oware nọ o bi ru. Evaọ oke ame-ọhọ na, enọ e be te họ-ame na a re yo Ee kẹ enọ ivẹ nọ i wuzou. Nọ Jesu o fiẹgba họ nnọ ‘Ee mai o rẹ jọ Ee, Ijo mai o vẹ jọ ijo’ na, u ti fi obọ họ re ma kiẹ otofa enọ ame-ọhọ ivẹ nana riwi.—Matiu 5:37.
Ekurẹriẹ gbe Omaromudhe
5. Ugogo eware ivẹ vẹ onọ ọsosuọ ame-ọhọ na u fi ẹgba họ?
5 A rẹ jọ onọ ọsosuọ ame-ọhọ na nọ ọnọ ọ gwọlọ họ-ame na sọ o kurẹriẹ no uzuazọ nọ o je yeri vẹre no ọ tẹ jẹ rehọ uzuazọ riẹ mudhe kẹ Jihova no re o ru oreva riẹ. Onọ nana u fi ẹgba họ eware ivẹ jọ nọ i wuzou nọ ohwo o re ru re ọ tẹ te họ-ame, koyehọ, ekurẹriẹ gbe omaromudhe.
6, 7. (a) Fikieme ekurẹriẹ o rọ roja kẹ enọ e gwọlọ họ-ame kpobi? (b) Didi inwene ohwo o re ru hrọ nọ o te kurẹriẹ no?
6 Fikieme ohwo o re ro kurẹriẹ hrọ re ọ tẹ te họ-ame? Pọl ukọ na ọ ta ẹme na vevẹ: “Mai kpobi a . . . je yeri okejọ [lele] urusio iwo mai.” (Ahwo Ẹfẹsọs 2:3) Re ma te ti wo eriariẹ egbagba erọ oreva Ọghẹnẹ, ma jẹ rria lele ẹgwọlọ akpọ na, eriwo gbe itee akpọ na. Setan, ọghẹnẹ akpọ nana, ọye ọ jẹ kpọ oghẹrẹ nọ ma je yeri uzuazọ. (2 Ahwo Kọrint 4:4) Rekọ, nọ ma te riẹ oreva Ọghẹnẹ no, ma tẹ gbae mu inọ ma rẹ “gbẹ sai yere uzuazọ uwo avọ urusio ahwo akpọ na ofa ha, rekọ [orọ eruo] oreva Ọghẹnẹ.”—1 Pita 4:2.
7 Uzuazọ okpokpọ nana o rẹ wha irere buobu ze. Maero, u re rovie edhere nọ ma re ro wo usu oghaghae kugbe Jihova, onọ Devidi ọ ta nnọ o wọhọ uzizie nọ a rẹ rọ rueva “uwoudhu-egagọ” gbe “ugbehru ẹri” Ọghẹnẹ—onọ o rrọ ọghọ ologbo. (Olezi 15:1) O rrọ oware areghẹ inọ orọnikọ ohwo kpobi Jihova o re zizie he, rekọ ‘enọ i re yeri uzuazọ ugbogbo ho, nọ i re ru oware nọ u kiete, jẹ ta uzẹme evaọ udu rai.’ (Olezi 15:2) Ma te rri oghẹrẹ uzuazọ nọ ma je yeri taure ma tẹ te riẹ uzẹme na, ẹnyate itee nana o sae gwọlọ nọ ma ru inwene jọ evaọ uruemu mai. (1 Ahwo Kọrint 6:9-11; Ahwo Kọlọsi 3:5-10) Oware nọ o rẹ wọ ohwo ru inwene itieye na họ ekurẹriẹ—ẹda nọ o rẹ da ohwo fiki oghẹrẹ uzuazọ nọ ohwo o yeri no vẹre gbe uvi ọtamuo nọ ohwo o re wo inọ o re ru eva were Jihova. Onana u re ru ohwo nwene uzuazọ riẹ—si obọ no uzuazọ oriobọ, onọ o rrọ orọ akpọ na, o ve yeri uzuazọ nọ o rẹ were Ọghẹnẹ.—Iruẹru 3:19.
8. Ẹvẹ ma rẹ rọ rehọ oma mai mudhe, kọ didi obọ u wo kpahe ame-ọhọ?
8 A rẹ jọ abọ avivẹ onọ ọsosuọ ame-ọhọ na nọ enọ e gwọlọ họ-ame na sọ a rehọ oma rai mudhe kẹ Jihova no re a ru oreva riẹ. Omaromudhe yọ owojẹ nọ o roja re ohwo ọ tẹ te họ-ame. Olẹ a re ro ru ei, nọ ma rẹ jọ ta eva mai inọ ma gwọlọ rehọ uzuazọ mai kẹ Jihova evaọ odẹ Kristi. (Ahwo Rom 14:7, 8; 2 Ahwo Kọrint 5:15) Jihova o ve zihe ruọ Olori mai gbe Ọnọ o wo mai, yọ wọhọ Jesu, o rẹ were omai re ma ru oreva Ọghẹnẹ. (Olezi 40:8; Ahwo Ẹfẹsọs 6:6) Ẹsiẹvo ohwo ọ rẹ yeyaa ilogbo erọ omaromudhe kẹ Jihova na. Rekọ, nọ o rọnọ idhereno ma rẹ jọ rọ olẹ rehọ oma mai mudhe na, unu nọ ma rẹ rọ tae via evaọ ẹgbede evaọ ẹdẹ ame-ọhọ na u re dhesẹ kẹ ahwo kpobi inọ ma rehọ oma mai mudhe kẹ Ọsẹ obọ odhiwu mai no.—Ahwo Rom 10:10.
9, 10. (a) Eme eruo oreva Ọghẹnẹ o gwọlọ? (b) Ẹvẹ ahwo Nazi dede a ro dhesẹ nnọ a vuhu omaromudhe mai kẹ Ọghẹnẹ mu?
9 Eme o gwọlọ re ma lele oriruo Jesu evaọ eruo oreva Ọghẹnẹ? Jesu ọ ta kẹ ilele riẹ nọ: “Ohwo nọ ọ guọlọ nọ o re lele omẹ, jọ ọ vro oma riẹ re ọ tọlọ uruveghe riẹ ọ rọ kpahe omẹ.” (Matiu 16:24) Ọ jọ etenẹ fodẹ eware esa nọ o gbahọ nnọ ma re ru. Orọ ọsosuọ, ma rẹ “vro oma” mai. Koyehọ, ma rẹ siọ iroro gbe isiuru oriobọ sebaẹgba mai, ma ve lele ohrẹ gbe ọkpọvio Ọghẹnẹ. Orọ avivẹ, ma rẹ “tọlọ uruveghe” mai. Evaọ edẹ Jesu, uruveghe, hayo ure oja, o jọ oka omovuọ gbe uye-oruẹ. Wọhọ Ileleikristi, u re no omai eva ze inọ ma rẹ ruẹ uye fiki emamọ usi na. (2 Timoti 1:8) Dede nọ akpọ na ọ rẹ maki se omai ẹkoko jẹ rehọ omai jijehwẹ, wọhọ Kristi, ma rẹ ‘daezọ omovuọ họ,’ ma rẹ wereva inọ ma bi ru Ọghẹnẹ eva were. (Ahwo Hibru 12:2) Orọ urere, ma rẹ “rọ kpahe” Jesu.—Olezi 73:26; 119:44; 145:2.
10 O rrọ oware isiuru inọ makọ otu ọwọsuọ jọ dede a riẹ epanọ oma nọ Isẹri Jihova a ro mudhe nnọ Ọghẹnẹ ọvo a rẹ gọ u wuzou te. Wọhọ oriruo, evaọ ega uye Buchenwald evaọ etoke esuo Hitler obọ Germany, a ta kẹ Isẹri nọ e se nnọ a rẹ vro ẹrọwọ rai inọ a whobọhọ eme nana: “Mẹ gbẹ rrọ Ọmọ-Uwuhrẹ Ebaibol nọ ọ rehọ oma riẹ kpobi kẹ no yọ mẹ te raha eyaa nọ mẹ yaa kẹ Jihova vievie he.” Onana họ edikihẹ idibo Ọghẹnẹ kpobi nọ i wo ẹrọwọ, enọ e rehọ oma mudhe kẹe no!—Iruẹru 5:32.
Edhesẹvia Wọhọ Omọvo Isẹri Jihova
11. Didi uvẹ-ọghọ ọnọ ọ họ-ame no o re wo?
11 A rẹ jọ abọ ọsosuọ ọrọ onọ avivẹ na nọ ọnọ ọ gwọlọ họ-ame na sọ ọ riẹ nnọ ame-ọhọ riẹ u dhesẹ i rie via wọhọ omọvo Isẹri Jihova. Ọ tẹ họ-ame no, yọ o zihe ruọ ọgbodibo nọ a ro mu no ọnọ a se odẹ Jihova fihọ uzou. Onana o rrọ ọghọ ologbo gbe owha-iruo ulogbo. Onana o rẹ jẹ lẹliẹ ọnọ ọ họ-ame no na wo ẹruore esiwo ebẹdẹ bẹdẹ, thakpinọ ọ gọ Jihova te urere.—Matiu 24:13.
12. Didi owha-iruo u lele ọghọ ọrọ odẹ Jihova nọ a se kpahe omai?
12 Uzẹme, o rrọ ọghọ ologbo re a rehọ odẹ Ọghẹnẹ erumeru na, Jihova, se ohwo. Maeka ọruẹaro na ọ ta nọ: “Ahwo na kpobi a be nya evaọ ọvuọ odẹ ẹdhọ riẹ, rekọ evaọ odẹ [Jihova, NW ] Ọghẹnẹ mai ma rẹ rọ nya bẹdẹ bẹdẹ.” (Maeka 4:5) Rekọ, owha-iruo u lele ọghọ nana. Ma rẹ daoma rria uzuazọ nọ o rẹ wha orro se odẹ nọ a se kpahe omai na. Wọhọ epanọ Pọl ọ kareghẹhọ Ileleikristi obọ Rom, ohwo o gbe bi ru epanọ ọ be ta ha, odẹ Ọghẹnẹ u re zihe “ruọ ọliọose.”—Ahwo Rom 2:21-24.
13. Fikieme idibo Jihova nọ e rehọ oma mudhe no a ro wo owha-iruo nọ a re ro se isẹi kpahe Ọghẹnẹ rai?
13 Ohwo o te zihe ruọ omọvo Isẹri Jihova, yọ ọ rọwo no inọ o re se isẹri kpahe Ọghẹnẹ riẹ. Jihova o zizie orẹwho Izrẹl nọ o rehọ oma mudhe kẹe no re a jọ isẹri riẹ re a ruẹsi se isẹi kẹe inọ ọ rrọ Ọghẹnẹ ebẹdẹ bẹdẹ. (Aizaya 43:10-12, 21) Rekọ orẹwho na u kie, a sai ru iruo nana gba ha, uwhremu na Jihova ọ tẹ se ae. Nẹnẹ, uvi Ileleikristi a wo uvẹ-ọghọ nọ a bi ro se isẹi kẹ Jihova. Ma bi ru ere keme ma you rie ma te je wo isiuru inọ ma re ru odẹ riẹ fo. Ẹvẹ ma re ro ruru unu kpakiyọ ma riẹ uzẹme na kpahe Ọsẹ obọ odhiwu mai gbe ẹjiroro riẹ? O rrọ omai oma wọhọ epanọ o jọ kẹ Pọl ukọ na ọnọ ọ ta nọ: “Ohwa-omẹ ohọre. Ure yoma kẹ omẹ mẹ gbẹ ta usiuwoma ha!”—1 Ahwo Kọrint 9:16.
14, 15. (a) Ẹvẹ ukoko Jihova u bi ro fi obọ họ kẹ omai wo ẹnyaharo abọ-ẹzi? (b) Didi eruẹrẹfihotọ e riẹ nọ i bi fi obọ họ kẹ omai evaọ abọ-ẹzi?
14 Onọ avivẹ na o rẹ jẹ kareghẹhọ ọnọ ọ be te họ-ame na owha-iruo riẹ nọ ọ rẹ rọ roma kpotọ lele ukoko Jihova nọ ẹzi riẹ ọ be kpọ. Orọnikọ mai ọvo a be gọ Ọghẹnẹ hẹ, yọ ma gwọlọ obufihọ, uketha, gbe uduotahawọ orọ “imoni” na. (1 Pita 2:17; 1 Ahwo Kọrint 12:12, 13) Ukoko Ọghẹnẹ u bi fi obọ họ gaga evaọ orro abọ-ẹzi mai. O be kẹ omai ebe buobu nọ a kere no Ebaibol ze nọ i bi fi obọ họ kẹ omai rro evaọ eriariẹ egbagba, jiroro areghẹ evaọ okenọ ma tẹ rrọ ẹbẹbẹ, je wo usu okpekpe kugbe Ọghẹnẹ. Wọhọ oniọmọ nọ ọ rẹ ruẹ nnọ a rẹrote jẹ ko ọmọ riẹ ziezi, ‘ọrigbo nọ o wo ẹrọwọ avọ areghẹ na’ ọ be kẹ emuore abọ-ẹzi evaọ ẹruoke rọkẹ ẹnyaharo abọ-ẹzi mai.—Matiu 24:45-47; 1 Ahwo Tẹsalonika 2:7, 8.
15 Eva iwuhrẹ koka koka, a bi wuhrẹ jẹ tudu họ ahwo Jihova awọ re a jọ uvi Isẹri Jihova. (Ahwo Hibru 10:24, 25) Isukulu Odibọgba Esuo-Ọghẹnẹ na i bi wuhrẹ omai re ma riẹ ẹme ta evaọ ẹgbede, yọ Ewuhrẹ Odibọgba na o bi wuhrẹ omai epanọ ma sai ro dhesẹ ovuẹ usiuwoma na ziezi kẹ amọfa. Ẹkwoma iwuhrẹ ukoko mai gbe ebe mai nọ ma re wuhrẹ kẹ omobọ mai, ma rẹ sae ruẹ nnọ ẹzi Jihova o bi ruiruo, be kpọ ukoko riẹ. Ẹkwoma eruẹrẹfihotọ nana, Ọghẹnẹ o bi dhesẹ eria nọ enwoma e rrọ kẹ omai, wuhrẹ omai re ma jọ uvi egbodibo, je fi obọ họ kẹ omai jaja aro vi evaọ abọ-ẹzi.—Olezi 19:7, 8, 11; 1 Ahwo Tẹsalonika 5:6, 11; 1 Timoti 4:13.
Oware nọ O rẹ Wọ Omai Họ-Ame
16. Eme ọ rẹ wọ omai roma mudhe kẹ Jihova?
16 Enọ ivẹ erọ ame-ọhọ na e be kareghẹhọ enọ e gwọlọ họ-ame epanọ ame-ọhọ o wuzou te gbe ewha-iruo nọ i re lele iei. Kọ, eme ọ rẹ wọ ae jiroro ame-ọhọ? Ma re zihe ruọ ilele nọ e họ-ame no, orọnikọ fikinọ ohwo jọ ọ gba omai họ họ, rekọ fikinọ Jihova o “si” omai gboma. (Jọn 6:44) Nọ o rọnọ “Ọghẹnẹ họ uyoyou” na, ọ be rehọ uyoyou su ehrugbakpọ na, orọnikọ ọgbahọ họ. (1 Jọn 4:8) Eware nọ i bi si omai kẹle Jihova họ ekwakwa ẹwo riẹ gbe edhere nọ o bi ro yeri kugbe omai. Jihova o si obọ no ọmọvo riẹ fiki mai ọ tẹ jẹ kẹ omai ẹruore obaro owowoma. (Jọn 3:16) Fikiere, oma o rẹ wọ omai re ma rehọ uzuazọ mai mudhe kẹe.—Itẹ 3:9; 2 Ahwo Kọrint 5:14, 15.
17. Eme ma roma mudhe kẹ hẹ?
17 Jihova omariẹ ma rẹ roma mudhe kẹ, orọnikọ oware jọ nọ ahwo a rọwo hayo iruo jọ họ. Iruo nọ Ọghẹnẹ ọ kẹ ahwo riẹ u re nwene, rekọ oma nọ a ro mudhe kẹe o gbẹ rrọ epọvo na. Wọhọ oriruo, oware nọ ọ ta kẹ Abraham inọ o ru u wo ohẹriẹ gaga no onọ ọ ta kẹ Jerimaya nọ o ru. (Emuhọ 13:17, 18; Jerimaya 1:6, 7) Ghele na, aikpobi a ru uzedhe iruo nọ Ọghẹnẹ ọ kẹ rai keme a you Jihova jẹ gwọlọ ru oreva riẹ dẹdẹ. Evaọ etoke urere nana, ilele Jesu nọ e họ-ame no kpobi a be dawo oma kpobi re a ru iruo nọ Kristi ọ kẹ rai gba, koyehọ re a whowho emamọ usi Uvie na je ru ilele. (Matiu 24:14; 28:19, 20) Ma tẹ be rehọ udu kpobi ruiruo yena u re dhesẹ nnọ ma you Ọsẹ obọ odhiwu mai gbe nnọ ma ginẹ roma mudhe kẹe no udu kpobi ze.—1 Jọn 5:3.
18, 19. (a) Eme ma be rehọ ẹkwoma ame-ọhọ mai ta evaọ ẹgbede? (b) Eme ma te ta kpahe evaọ uzoẹme nọ o rrọ aro na?
18 Ababọ avro, ame-ọhọ o re rovie edhere fihọ kẹ eghale buobu, rekọ o rrọ oware nọ ma re rri vovori hi. (Luk 14:26-33) O rrọ ọtamuo nọ o rẹ karo kẹ ewha-iruo efa kpobi. (Luk 9:62) Evaọ oke ame-ọhọ mai, yọ ma be jọ ẹgbede ta nnọ: “Nọ Ọghẹnẹ na ọna, Ọghẹnẹ mai bẹdẹ bẹdẹ. Ọ rẹ te jọ osu mai bẹdẹ.”—Olezi 48:14.
19 Uzoẹme nọ o rrọ aro na o te kiẹ enọ efa nọ a rẹ sae nọ kpahe ame-ọhọ. Kọ uvi ẹjiroro jọ o rẹ sai ru ohwo nọ o je si uke kpemu inọ ọ be họ-ame he? Kọ u wo epanọ ohwo ọ rẹ kpako te? Ẹvẹ ahwo kpobi a sai ro ru ọvuọ ẹkabọ rai rọ ruẹ nnọ oke ame-ọhọ na yọ oke ọghọ?
Kọ Whọ Sae k’Iyo Nana Vevẹ?
• Fikieme u ro fo nnọ ohwo o re kurẹriẹ re ọ tẹ te họ-ame?
• Eme omaromudhe kẹ Ọghẹnẹ o gwọlọ?
• Didi ewha-iruo i lele odẹ Jihova nọ a se fihọ omai uzou?
• Eme ọ rẹ wọ omai jiroro ame-ọhọ?
[Enọ Uwuhrẹ]
[Ẹkpẹti/Uwoho nọ o rrọ ẹwẹ-obe avọ 23]
Enọ Ivẹ Ame-Ọhọ
Fiki idhe Jesu Kristi, kọ who kurẹriẹ no izieraha ra no jẹ roma mudhe kẹ Jihova no re who ru oreva riẹ?
Kọ who wo otoriẹ inọ omarọkẹ gbe ame-ọhọ ra u dhesẹ owhẹ via wọhọ omọvo Isẹri Jihova nọ ọ rrọ usu kugbe ukoko Ọghẹnẹ nọ ẹzi riẹ ọ be kpọ?
[Uwoho nọ o rrọ ẹwẹ-obe avọ 24]
Omaromudhe yọ obọdẹ eyaa nọ a rẹ yaa kẹ Jihova evaọ olẹ
[Uwoho nọ o rrọ ẹwẹ-obe avọ 26]
Iruo usiuwoma ota mai i bi dhesẹ omai inọ ma roma mudhe kẹ Ọghẹnẹ