Ọghẹnẹ Ọ be Daezọ Enọ E Kpako No

O RRỌ oware igbunu hu ma te roro epanọ a be jọ oria kpobi gboja kẹ ekpako soso nẹnẹ. Ikpe buobu nọ i kpemu, Ebaibol na e ta nọ eva “edẹ urere” akpọ muomu nana, ahwo a ti “you oma-obọrai, . . . wo eva egaga.” (2 Timoti 3:1-3) Ubiẹme Griki nọ a fa “eva egaga” na họ re a jọ ababọ uyoyou—uvi uyoyou nọ o rẹ jọ udevie iviuwou. Wọhọ epanọ a ginẹ ruẹaro riẹ fihọ Ebaibol na, a gbẹ be ruẹ obọ uyoyou utioye nẹnẹ hẹ.

Wo ohẹriẹ no enọ e rẹ lahiẹ ekpako soso, Jihova Ọghẹnẹ o rri enọ e kpako no ghaghae, ọ tẹ be jẹ rẹro te ai. Roro kpahe epanọ a dhesẹ onana evaọ Ebaibol.

“Ọnọ Ọ be Sẹro Eyae Uku”

Ọdawẹ nọ Jihova Ọghẹnẹ o wo kẹ enọ e kpako no u dhesẹ oma via evaọ Ikereakere Hibru na. Wọhọ oriruo, eva Olezi 68:5, Devidi o dhesẹ Ọghẹnẹ wọhọ “ọnọ ọ be sẹro eyae uku,” nọ e rẹ mae jọ enọ e kpako no. * A jọ Ebaibol efa sa-sa fa ubiẹme Hibru ọsosuọ nọ a jọ etenẹ se ‘ọsẹro’ na “ọthuke” hayo “ọthothọ.” O rrọ vevẹ inọ Jihova ọ be daezọ eyae-uku. Evaọ uzẹme, Ebaibol na e ta nọ o rẹ kpare ofu Jihova nọ a tẹ lahiẹ eyae-uku. (Ọnyano 22:22-24) Eyae-uku—gbe ahwo kpobi nọ a wo ẹrọwọ nọ a kpako no—a rrọ ghaghae gaga evaọ aro Ọghẹnẹ gbe idibo riẹ. Itẹ 16:31(NW ), u dhesẹ eriwo Jihova Ọghẹnẹ avọ orọ idibo riẹ nọ o ta nọ: “Eza uzou yọ etu-uvie adhẹẹ nọ a te woi evaọ edhere ẹrẹreokie.”

 O rrọ oware igbunu hu, adhẹẹ rọkẹ ekpako na o jọ ugogo abọjọ ọrọ Uzi nọ Jihova o jie kẹ emọ Izrẹl. A jie kẹ emọ Izrẹl nọ: “Wha rẹ kparoma kẹ ọnọ ọ dhẹ eza uzou no, wha vẹ rehọ adhẹ kẹ ọkpọkuọzae, wha vẹ dhẹ ozọ Ọghẹnẹ rai: Keme Mẹ họ ỌNOWO na.” (Iruo-Izerẹ 19:32) Fikiere, adhẹẹ nọ a rẹ rọ kẹ ekpako evaọ Izrẹl o jẹhọ usu nọ ohwo o re wo kugbe Jihova Ọghẹnẹ. Ohwo ọ sae ta nọ o you Ọghẹnẹ hẹ nọ ọ tẹ be lahiẹ enọ e kpako no.

Ileleikristi a rrọ otọ Uzi Mosis na ha. Dede na, a rrọ otọ “uzi Kristi,” onọ u wobọ kpahe uruemu rai, gbe uyoyou avọ ọdawẹ nọ a re dhesẹ kẹ esẹgbini gbe enọ e kpako no. (Ahwo Galesha 6:2; Ahwo Ẹfẹsọs 6:1-3; 1 Timoti 5:1-3) Yọ orọnikọ fikinọ a juzi kẹ Ileleikristi inọ a wo uyoyou a bi ro dhesẹ uyoyou ho rekọ fikinọ u no rai udu ze. Pita ukọ na ọ kẹ uduotahawọ nọ: “Whai ohwo ọ rehọ uvi uyoyou you ohwo no eva ze.”—1 Pita 1:22.

Jemis olele na o dhesẹ ẹjiroro ọfa nọ ma jẹ sẹro enọ e kpako no. O kere nọ: “Egagọ efuafo nọ a rẹ jọ zue-oma obaro Ọghẹnẹ gbe Ọsẹ na ha, ena: nnọ, a re riwẹ imiwhrori avọ eyaukuotọ nọ uye o rẹbẹ, je riwi oma-obọriẹ kare epe eva akpọ na.” (Jemis 1:27) Jemis ọ ta obọdẹ ẹme jọ nọ o duobọte omai udu. Ọ kareghẹhọ omai epanọ inievo ezi nana a ghare te evaọ aro Jihova.

Fikiere, re ma se enọ e kpako no ba ẹlahiẹ ọvo u te he. Ukpoye, ma re je dhesẹ uvi ọdawẹ kẹ ai ẹkwoma iruo ezi nọ ma re ru kẹ ai. (Rri ẹkpẹti na “Uyoyou nọ O Rrọ Iruo,” eva ẹwẹ-obe avọ 6-7.) Jemis o kere nọ: “Orọwọ nọ u wo iruo ho u whu no re.”—Jemis 2:26.

Sasa Ai Oma ‘Nọ Uye O tẹ Rrọ Ai Ẹbẹ’

Oware ofa jọ o riẹ nọ ma re wuhrẹ no eme Jemis na ze. Muẹrohọ inọ Jemis ọ ta kẹ Ileleikristi nọ a rẹrote eyao uku “nọ uye o rẹbẹ.” Ẹme Griki nọ a fa “uye” na u dhesẹ edada, hayo uye-oruẹ nọ u re te omai fiki ẹbẹbẹ hayo itunyẹ uzuazọ. Avro ọ riẹ hẹ, ibuobu evaọ usu enọ e kpako no a be ruẹ oghẹrẹ uye utioye na. Ejọ rai e rrọ goli. Efa e rrọ ọkora fiki ebẹbẹ nọ owho o rẹ wha ze. Makọ enọ e be daoma ziezi evaọ odibọgba rai kẹ Ọghẹnẹ a rẹ sai wo elọhoma ẹsejọ. Jọ ma ta ẹme kpahe Jọn, * owhowho-uvie nọ ọ gbodibo avọ ẹrọwọ vrẹ ikpe udhuvẹ no, ọnọ ọ rehọ ikpe esa urere odibọgba riẹ ru iruo odibọgba obọdẹ ọrọ oke-kpobi. Enẹna Jọn ọ kpako te ikpe udhone gbọ no, ọ ta nọ ẹsejọ ọ be hai wo elọhoma. O fibae nọ: “Ẹsibuobu me re roro kpemu jẹ kareghẹhọ eware buobu nọ e jẹ hae thọ omẹ obọ, i bu wo umuo ho. Ẹsikpobi mẹ rẹ ta kẹ oma mẹ nọ mẹ hae riẹ ru woma viere.”

Ahwo otiọye na a rẹ sai wo omosasọ nọ a tẹ riẹ inọ, dede nọ Jihova ọ rrọ gbagba orọnikọ ọ be nwane gwọlọ ẹgbagba mi omai hi. Dede nọ ọ riẹ kpahe ethobọ mai, Ebaibol na e ta nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ?” (Olezi 130:3) Ẹhẹ, Jihova o re rri vrẹ ethobọ mai jẹ riẹ oware nọ o rrọ omai udu. Ẹvẹ ma rọ riẹ onana?

 Ọghẹnẹ ọ rehọ ẹgba ẹzi kẹ Devidi Ovie nọ ọ jọ ogbori ethobọ gbe sebaẹgba ohwo-akpọ họ ro kere eme Olezi 139:1-3 na inọ: “O ỌNOWO, whẹ ọnọ ọ gwọlọ omẹ whọ tẹ riẹ omẹ! Whọ riẹ oke ẹkeria mẹ gbe oke etovrẹ mẹ; whọ riẹ ẹjiroro eva mẹ no anwọ abae ze. Whọ gwọlọ ada mẹ via gbe oke ekiẹzẹ mẹ.” Ẹme nọ a jọ etenẹ fa ‘gwọlọ via’ rono ẹvẹrẹ Hibru ọsosuọ ze na họ “wawo oware via,” onọ o wọhọ oghẹrẹ nọ ọwhẹrẹ ọ rẹ “yẹyẹ” ehọrọ no ibi ekakọ nọ ọ gwọlọ rehọ na. Evaọ otọ ekpakpọ ẹzi Ọghẹnẹ, Devidi ọ kẹ omai imuẹro inọ Jihova ọ riẹ oghẹrẹ nọ ọ rẹ rọ yẹyẹ jẹ kareghẹhọ iruo iwoma mai.

Nọ ma tẹ be yọrọ ẹrọwọ mai, Ọsẹ obọ odhiwu mai nọ ọ vọ avọ ohrọ na ọ rẹ kareghẹhọ je rri iruo ezi mai ghaghae. Evaọ uzẹme, Ebaibol na e ta nọ o te jọ kẹe wọhọ ababọ ẹrẹreokie re iruo mai gbe uyoyou nọ ma be rehọ fiki odẹ riẹ dhesẹ i voi ẹro.—Ahwo Hibru 6:10.

“Eware Anwae Evrẹ No.”

Ebaibol na e ta nọ o jọ ẹjiroro Ọghẹnẹ hẹ re ahwo a wo ẹbẹbẹ owho. Ahwo-akpọ a mu  uye owho họ ẹruẹ nọ ọsẹgboni ọsosuọ mai, Adamu avọ Ivi a wọso Ọnọma rai no. (Emuhọ 3:17-19; Ahwo Rom 5:12) Enẹ o te jọ bẹdẹ bẹdẹ hẹ.

Wọhọ epanọ ma muẹrohọ no na, ebẹbẹ buobu nọ ma be rẹro ruẹ nẹnẹ na—onọ o kẹre te olahiẹ enọ e kpako no na—e kẹ imuẹro inọ “edẹ urere” erọ eyero ọnana ma be rria na. (2 Timoti 3:1) O rrọ ẹjiroro Ọghẹnẹ re o si ebẹbẹ nọ uzioraha o wha ze no, onọ o kẹre te ebẹbẹ owho gbe uwhu. Ebaibol na e ta nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4.

Evaọ akpọ ọkpokpọ Ọghẹnẹ, akọriọ gbe edada nọ owho o rẹ wha ze e te gbẹ jariẹ ofa ha. Oware ovona o te via kẹ olahiẹ enọ e kpako no na. (Maeka 4:4) Makọ ahwo nọ a whu no dede nọ e rrọ ekareghẹhọ Ọghẹnẹ a ti zihe ziọ uzuazọ, a ve ti je wo uvẹ nọ a te rọ rria otọakpọ aparadase bẹdẹ bẹdẹ. (Jọn 5:28, 29) Eva oke yena, u ve ti vẹro vi epaọ anwẹdẹ kpobi inọ Jihova Ọghẹnẹ ọ be ginẹ sẹro enọ e kpako no gbe ahwo kpobi nọ a yo-ẹme kẹe.

[Oruvẹ-obotọ]

[Ẹkpẹti/Iwoho nọ e rrọ ẹwẹ-obe avọ 6, 7]

Uyoyou nọ O Rrọ Iruo

Evaọ udevie Isẹri Jihova, ekpako ukoko a rẹ kobaro evaọ ẹruorote enọ e kpako no. A se ohrẹ Pita ukọ na gboja gaga, onọ o ta nọ: “Wha sẹro uthuru Ọghẹnẹ nọ orọ owhai obọ.” (1 Pita 5:2) Re a rẹrote enọ e kpako no evaọ ugogo idhere jọ yọ abọjọ ẹruọsa ọrọ uthuru Ọghẹnẹ. Kọ eme onana o gwọlọ?

O rẹ gwọlọ odiri gbe iweze unuẹse buobu ẹsejọ avọ ẹme nọ a rẹ ta kugbe evaọ oma ọjaja re a sae riẹ kpahe eware nọ ohwo nọ ọ kpako no ọ gwọlọ. O sae jọnọ a gwọlọ ohwo nọ o re fi obọ họ kẹ ai dẹ eware, ru uwou rai fihọ fuafo, wọ ai kpohọ iwuhrẹ Ileleikristi, se Ebaibol gbe ebe Ileleikristi na, gbe eware efa buobu. Nọ o tẹ lọhọ, a rẹ ma emamọ omaa jẹ nya lele omaa obufihọ nọ a ruẹrẹhọ. *

Kọ ẹvẹ o rẹ jọ otẹrọnọ oware jọ o ruọ oniọvo jọ nọ ọ kpako no oja gaga evaọ ukoko na, ma rehọ iẹ nọ ọ gwọlọ obufihọ ugho? U fo re a kake kiẹ riwi tao sọ o wo emọ hayo imoni nọ e rẹ sai fi obọ họ. Onana o rẹ rọwo kugbe ẹme nọ ọ rrọ 1 Timoti 5:4: “Otẹrọnọ aye-uku o wo emọ hayo emọ-iruọmọ, jọ a kaki wuhrẹ iruo egagọ rai [nọ] i te rai erukẹ uviuwou rai, gbe ejọ nọ a re ru kẹ esẹ gbe ini rai; keme onana họ onọ Ọghẹnẹ o re miẹ.”

O sae jọnọ ọnọ ọ kpako no na ọ gwọlọ ohwo nọ o re fi obọ họ kẹe ru ekiakiẹ sọ o te ọnọ o re wo erere no ọruẹrẹfihotọ nọ egọmeti o re ro fi obọ họ kẹ ahwo nọ a kpako no ze. Ẹsejọhọ ahwo jọ evaọ ukoko na a rẹ sai fi obọ họ. Nọ obufihọ utiona u gbe bi no uvumọ oria ze he, ekpako ukoko na a sae jiroro sọ ohwo na o te epanọ ukoko na u re ro fi obọ họ kẹe. Evaọ edhere jọ, a kuvẹ kẹ oghẹrẹ obufihọ utionana evaọ ukoko Ileleikristi ikpe-udhusoi ọsosuọ keme Pọl ukọ na o kere se Timoti ibe-oruiruo riẹ nọ: “Ohwo nọ ọ re kpako te udhukpe-osa ha, hayo ọnọ o kpo orọwo thọ ẹsiẹvo wa no, u fo re a kele iei gbe aye-uku hu; ọ rẹ jọ aye nọ a rẹ ta ẹme ezi kpaha fiki iruo iwoma riẹ, wọhọ ohwo nọ ọ yọrọ emọ ziezi, ọnọ ọ rẹ ghọ erara, ọnọ ọ wozẹ awọ erezi na, je fiobọhọ kẹ enọ e rọ udevie uye, ọnọ ọ kpare uzuazọ riẹ kẹ ewoma-oruo eva edhere kpobi.”—1 Timoti 5:9, 10.

[Oruvẹ-obotọ]

[Uwoho nọ o rrọ ẹwẹ-obe avọ 5]

Dọkas ọ rẹrote eyae-uku nọ ọbẹwẹ ọ jọ oma.—Iruẹru 9:36-39.