Aghare Nọ “Oware Ohẹhẹ” O Wo

PITA ukọ na o kere nọ: “Whai ezae na ere re, wha rọ iroro lele eyae rai yeri, he tete aye na wọhọ oware ohẹhẹ.” (1 Pita 3:7) Kọ fikinọ Ikereakere na o dhesẹ eyae wọhọ “oware ohẹhẹ” o tẹ lẹliẹ eyae na rrọ kuẹku? Joma rri oware nọ ohwo nọ ẹzi ọ wọ kere eme nana o wo họ udu.

Otofa ubiẹme Griki nọ a jọ etenẹ fa “tete” na họ “rri ghaghae, rehọ adhẹẹ kẹ.” Fikiere, ọzae nọ ọ rrọ Oleleikristi o re tete aye riẹ, rehọ ororokẹ lele ei yeri wọhọ okwakwa ohẹhẹ nọ o rrọ ghaghae. Onana u dhesẹ nnọ eyae na a rrọ kuẹku vievie he. Wọhọ oriruo, roro kpahe ukpẹ nọ Tiffany ọ rehọ eglase ru. A rẹ sai rri ukpẹ nana nọ o wo erru gaga na wọhọ oware ohẹhẹ. Kọ fikinọ ukpẹ na o jọ hẹhẹhẹ o tẹ lẹliẹ jọ kuẹku ? Vievie! Evaọ 1997 ukpẹ eglase nọ Tiffany ọ rehọ obọ riẹ ru na a zẹ riẹ enaira ima 360! Epanọ o hẹhẹ te u ru rie ghare na, orọnikọ u ru ei kuẹku hu.

Epọvo na re, re a tete aye wọhọ oware ohẹhẹ orọnikọ u re ru aye fihọ kuẹku hayo yẹyẹ hẹ. Re a rehọ “iroro” lele aye yeri u dhesẹ nọ ọzae o re roro kpahe eria nọ aye ọ jọ goma gbe eria nọ ọ jọ yẹlẹ, eware nọ e rẹ were iẹe gbe enọ e rẹ dhae eva, gbe eware nọ o se gboja. Ọzae nọ ọ rẹ rẹrote aye o re roro kpahe ohẹriẹ nọ o rrọ udevie riẹ avọ aye riẹ. O re roro kẹe re ‘oware ovo o siọ elẹ nọ ọ be lẹ ba ebrudhe.’ (1 Pita 3:7) Ọzae nọ o tete aye riẹ hẹ yọ o bi fi usu riẹ nọ o wo kugbe Ọghẹnẹ họ ọza. U re vevẹ, Ebaibol o rri eyae kuẹku hu. Ukpoye, o kẹ rai ọghọ.

[Ọnọ o wo uwoho nọ o rrọ ẹwẹ-obe avọ 32]

© Christie’s Images Limited 1997