Enọ Ahwo nọ A s’Ebe

Eme ọ be lẹliẹ “efe erẹwho na kpobi” ziọ “uwou” egagọ uzẹme?—Hagai 2:7.

Jihova ọ rehọ ẹkwoma Hagai ọruẹaro na ta nọ: “Me [re] ti nyuhu erẹwho kpobi, efe erẹwho na kpobi e vẹ te ze, me ve ti ru uwou onana, o vẹ te vọ avọ eru ọnwranwra.” (Hagai 2:7) Kọ enuhu ‘erẹwho na kpobi’ ọye ọ be lẹliẹ “efe” erẹwho na—ahwo udu-oruọzewọ—nọ a je bi dede egagọ uzẹme rehọ? Uyo na họ ijo.

Joma ta ẹme kpahe oware nọ u bi nuhu erẹwho na gbe oware nọ enuhu nana u bi su kpohọ. Ebaibol na e ta nọ “erẹwho akpọ na a . . . rọ ẹguae oyoma ẹgba kugbe; nọ ahwo a jẹ rọ eware idiodi eroro?” (Olezi 2:1) Epanọ a rẹ rọ ruabọhọ udu-esuo rai họ “eware idiodi” nọ a rrọ “eroro” na. Oware ovuọvo u re nuhu ai te oware jọ nọ u re fi iguegue họ isuẹsu rai hi.

Usiuwoma Uvie Ọghẹnẹ nọ Isẹri Jihova a be jọ akpọ na soso ta họ uzedhe oware nọ o be wha eguegue otiọye na họ erẹwho na. Eme o gbẹ jọ ere he, kpakiyọ Uvie Ọghẹnẹ orọ Mesaya nọ Jesu Kristi ọ rrọ Ovie riẹ “ọ rẹte whọlọ ivie [ahwo-akpọ] na kpobi ọ vẹte rehọ ai ze oba.” (Daniẹl 2:44) Ovuẹ ẹdhoguo nọ ma be ta ẹme te evaọ usiuwoma ota mai na u bi nuhu erẹwho na. (Aizaya 61:2) Enuhu na o bi dhe ẹgẹga nọ iruo usiuwoma ota na o be d’owọ muotọ viere jẹ kẹre haro na. Eme enuhu nọ a ruẹaro riẹ evaọ Hagai 2:7 na u dikihẹ kẹ?

Eva Hagai 2:6, ma se nọ: “ỌNOWO ogbaẹmo na ọ ta nọ: Mẹ rẹ te wariẹ nọ, ukiọkọ omojọ, me ve ti nuhu ihru gbe akpọ gbe abade je gbe etọ eyaya.” Nọ ọ jẹ wariẹ eme enana, Pọl ukọ na o kere nọ: “Ọya eya nọ, ‘Ẹsiẹvo o gbe kiọkọ o rọnọ akpọ na ọvo me re ti nuhẹ hẹ rekọ te odhiwu te.’ Onana nọ a ta na, ‘Ukiọkọ ẹsiẹvo,’ koyehọ u dhesẹ nọ a reti si o nọ u re nuhẹ na no, wọhọ o nọ a ma, re o nọ u wo enuho ho na oruẹse kiọkọ.” (Ahwo Hibru 12:26, 27) Ẹhẹ, a re ti nuhu eyero akpọ nana kpobi no, o gbẹ tẹ jọ ofa ha, kẹsena akpọ ọkpokpọ Ọghẹnẹ ọ vẹ te rehọ ẹta riẹ.

Ahwo udu-oruọzewọ a be ziọ egagọ uzẹme, orọnikọ fiki erẹwho na nọ a nuhu hu. Oware ovona nọ o be lẹliẹ erẹwho na nuhu na u bi si ahwo udu-oruọzewọ bru Jihova gbe egagọ riẹ ze na, oyehọ usiuwoma nọ a be jọ akpọ na soso ta kpahe Uvie Ọghẹnẹ nọ a ro mu na. Ewhowho “usiuwoma ebẹdẹ bẹdẹ na” o bi si ahwo udu-oruọzewọ ziọ egagọ uzẹme.—Eviavia 14:6, 7.

Usiuwoma Uvie na yọ ovuẹ ẹdhoguo gbe orọ esiwo. (Aizaya 61:1, 2) Usiuwoma uvie na nọ a be ta evaọ akpọ na soso u bi ru ẹjiroro ivẹ gba: u bi nuhu erẹwho na, u te bi je ru nọ efe erẹwho na hayo ahwo udu-oruọzewọ a bi ro no erẹwho na ze kẹ oruaro Jihova.