‘Wha Rọ Uzuazọ Re Wha Ruẹse Zọ’
‘Wha Rọ Uzuazọ Re Wha Ruẹse Zọ’
“Me fi uwhu gbe uzuazọ, oghale gbe eka họ kẹ owhai; fikiere wha rọ uzuazọ, re whai avọ emọ rai a ruẹse zọ.”—IZIEWARIẸ 30:19.
1, 2. Edhere vẹ a rọ ma ohwo evaọ uwoho Ọghẹnẹ?
JỌ “MA ma ohwo rọ uwoho mai, re o tho omai.” A kere ẹme nana nọ Ọghẹnẹ omariẹ ọ ta na fihọ uzou ọsosuọ Ebaibol na. Emuhọ 1:26, 27 o ta nọ “Ọghẹnẹ ọ rehọ uwoho riẹ ma ohwo, evaọ uwoho oma Ọghẹnẹ ọ rọ ma ae.” Fikiere, ohwo ọsosuọ na o wo ohẹriẹ no emama efa kpobi nọ e rrọ otọakpọ. O tho Ọnọma riẹ, ọ rẹ sae raro kele Ọghẹnẹ evaọ iroro-ejẹ, edhesẹ uyoyou, uvi-ẹdhoguo, areghẹ gbe ogaga. O wo obroziẹ-iroro nọ u re fi obọ họ kẹe ru oware nọ o rẹ kẹe erere gbe onọ o rẹ were Ọsẹ obọ odhiwu riẹ. (Ahwo Rom 2:15) Evaọ uzẹme, Adamu o wo ufuoma iroro-ejẹ. Nọ Jihova o rri oghẹrẹ nọ ọ ma ọmọ otọakpọ riẹ, ọ tẹ ta kpahe iẹe nọ: “[O] re wowoma.”—Emuhọ 1:31; Olezi 95:6.
2 Wọhọ emọ uyẹ Adamu, uwoho Ọghẹnẹ a rọ ma omai re. O make rrọ ere na, kọ ma wo ufuoma nọ ma sae rọ salọ onọ ma re ru? Dede nọ Jihova o wo ẹgba nọ ọ sae rọ riẹ kpahe oware nọ o te via evaọ obaro, ọ rẹ ma oware nọ omomọvo mai o ti ru gbe iyẹrẹ nọ i re noi ze fihotọ họ. O fi otatha họ kẹ emọ otọakpọ riẹ re o kpọ iruẹru rai vievie he. Re u fi obọ họ kẹ omai riẹ epanọ u ro wuzou re ma rehọ uvẹ iroro-ejẹ mai ru oware nọ u fo, joma kaki wuhrẹ oware jọ no orẹwho Izrẹl ze.—Ahwo Rom 15:4.
Ufuoma Ẹsalọ nọ Emọ Izrẹl a Wo
3. Ovẹ họ orọ ọsosuọ evaọ Izi Ikpe na, kọ ẹvẹ emọ Izrẹl nọ i wo ẹrọwọ a rọ salọ nọ a re koko uzi na?
3 Jihova ọ ta kẹ emọ Izrẹl nọ: “Mẹ ỌNOWO Ọghẹnẹ ra, ọnọ [ọ] rehọ owhẹ no otọ Ijipti ze, no uwou-igbo nọ whọ jarọ.” (Iziewariẹ 5:6) Evaọ 1513 B.C.E., a rehọ edhere igbunu siwi orẹwho Izrẹl no igbo Ijipti, fikiere a rẹ sae vro ẹme Jihova na ha. Orọ ọsosuọ evaọ Izi Ikpe na, Jihova ọ rehọ ẹkwoma Mosis nọ ọ rrọ ọtota riẹ whowho nọ: ‘Wha gọ edhọ họ rekọ mẹ ọvo.’ (Ọnyano 20:1, 3) Orẹwho Izrẹl a salọ nọ a re yo ẹme evaọ oke oyena. U no rai eva ze rehọ ẹwẹ rai kpobi gọ Jihova.—Ọnyano 20:5; Ikelakele 25:11.
4. (a) Eme Mosis o ru vẹ kẹ emọ Izrẹl nọ a rẹ sae jọ salọ onọ u je rai? (b) Esalọ vẹ o rọ kẹ omai nẹnẹ?
4 Oware wọhọ ikpe 40 e vrẹ no, Mosis ọ tẹ rehọ unu owhawha kareghẹhọ oge ọfa ọrọ emọ Izrẹl kpahe ẹsalọ nọ a rẹriẹ ovao dhe. “Me se odhiwu gbe akpọ re a jọ isẹi kẹ owhai nẹnẹ na nọ, me fi uwhu gbe uzuazọ, oghale gbe eka họ kẹ owhai; fikiere wha rọ uzuazọ, re whai avọ emọ rai a ruẹse zọ.” (Iziewariẹ 30:19) Epọvo na re, ma rẹ sae rrọ hayo salọ nẹnẹ. Ẹhẹ, ma rẹ sae salọ inọ ma rẹ gọ Jihova avọ ẹrọwọ onọ o rẹ lẹliẹ omai wo uzuazọ ebẹdẹ bẹdẹ, hayo inọ ma be gọe he avọ irẹro okpẹtu nọ o ti noi ze te omai. Roro kpahe iriruo ivẹ erọ ahwo nọ a salọ oghẹrẹ owojẹ rai sa.
5, 6. Eme Joshua ọ salọ, kọ didi oware u no rie ze?
5 Evaọ 1473 B.C.E., Joshua o su emọ Izrẹl ruọ Ẹkwotọ Eyaa na. Evaọ ẹme uduotahawọ nọ ọ ta taure o te ti whu, Joshua ọ ta kẹ orẹwho Izrẹl soso nọ: “Otẹrọnọ wha rẹ gọ ỌNOWO ho, wha salọ eva ẹdẹ inẹnẹ na ọnọ wha gwọlọ nọ wha rẹ gọ, jọ edhọ nọ esẹ rai e jẹ gọ eva abọdekọ ethẹ na, hayo edhọ ahwo Amọ nọ wha be ria eva otọ rai.” Kẹsena ọ tẹ ta kpahe uviuwou riẹ nọ: “Rọ kẹ omẹ avọ uwou mẹ ỌNOWO na ma rẹ gọ.”—Joshua 24:15.
6 Eva oke ọsosuọ, Jihova ọ ta udu họ Joshua awọ nọ o wo udu avọ oma ukruga, inọ jọ ọ rẹriẹ ovao no ekoko Uzi Ọghẹnẹ hẹ. Ukpoye, ọ ta kẹ Joshua nọ ẹkwoma obe Uzi na nọ ọ rẹ roma totọ se taso tuvo ọ te sai ro wo obokparọ evaọ idhere riẹ. (Joshua 1:7, 8) Ere o ginẹ jọ. Oware nọ Joshua ọ salọ na o wha eghale ze. Ọ ta nọ: “Eware iwoma kpobi nọ ỌNOWO na ọ yeya riẹ rọ kẹ uwou Izrẹl, ọvuọvo nọ o ru gba ha ọ rọ họ, ai kpobi e gba re.”—Joshua 21:45.
7. Eva edẹ Aizaya, didi oware emọ Izrẹl jọ a salọ, kọ eme o no rie ze?
7 Wo ohẹriẹ, roro kpahe uyero emọ Izrẹl nọ oware wọhọ ikpe 700 e vrẹ no. Eva oke yena, emọ Izrẹl buobu a je ru iruemu-ẹwho ahwo egedhọ. Wọhọ oriruo, eva ẹdẹ urere ẹgbukpe, ahwo a re koko wariẹ họ emẹjẹ nọ a wọ koghẹrẹ koghẹrẹ emu-awere gbe udi-awere fihọ. Onana o jọ ehaa omakugbe gheghe he. O jọ ehaa egagọ nọ a rẹ jọ rehọ orro kẹ edhọ ivẹ jọ. Aizaya ọruẹaro na o kere oghẹrẹ nọ Ọghẹnẹ o rri uruemu ababọ ẹrọwọ nana fihotọ inọ: “Whai enọ e se ỌNOWO na, nọ ugbehru ẹri mẹ na o thọrọ ẹro, enọ e rẹ wọ emẹjẹ fihọ hẹrẹ [ẹdhọ] Efe enọ i re ku udi vọ egho kẹ edhọ ‘Otatha.’ ” A wo orọwọ inọ a tẹ be kpẹwẹ “ẹdhọ efe” gbe “ẹdhọ Otatha” ekakọ rai e jẹ mai woma, orọnikọ nọ a te wo ọjẹrehọ Jihova ha. Dede na, uzẹme riẹ họ, ọwọsuọ rai gbe oware nọ a rehọ aruro salọ oye o wha okpẹtu nọ o bi te ai na ze. Jihova ọ ta kẹ ai nọ: “Me re ti zihe akọ-ọpia họ otatha rọkẹ owhai, whai kpobi a re ti kie kpotọ kẹ okpeahwo na; keme nọ ome se owhai wha yo ho, okenọ omẹ ta ẹme kẹ owhai wha kezọ họ; rekọ wha te ru oware nọ uyoma eva aro mẹ, wha tẹ jẹ sanọ oware nọ o were omẹ hẹ.” (Aizaya 65:11, 12) Fikinọ a salọ thọ ọraha o ro te ai yọ ẹdhọ Otatha gbe ọrọ Efe e sae whaha okpẹtu na ha.
Ẹsalọ Onọ U Woma
8. Wọhọ epanọ o rrọ Iziewariẹ 30:20, eme o gwọlọ re a salọ onọ uwoma?
8 Okenọ Mosis ọ ta udu họ emọ Izrẹl awọ nọ a salọ uzuazọ, o dhesẹ eware esa nọ u fo nọ a re ru kẹ ai: “Wha you ỌNOWO na Ọghẹnẹ rai, je yo uru riẹ, jẹ dhẹ gbalọ iẹe.” (Iziewariẹ 30:20) Joma kiẹ eware esa nana riwi unọjọ utọjọ re ma ruẹse riẹ onọ ma rẹ salọ.
9. Ẹvẹ ma sai ro dhesẹ uyoyou nọ ma wo kẹ Jihova?
9 Ẹkwoma Jihova Ọghẹnẹ mai na nọ ma re you: Uyoyou nọ ma wo kẹ Jihova o lẹliẹ omai salọ nọ ma rẹ gọe. Fikinọ ma be gaviezọ kẹ oriruo unuovẹvẹ orọ edẹ Aizaya, ma bi mugba kẹ odawọ kpobi nọ o rẹ sae wọ omai thuzi ọfariẹ-ogbe jẹ whaha oghẹrẹ uzuazọ uyero nọ o rẹ sai ru omai kie ruọ isiuru efe ole akpọ na. (1 Ahwo Kọrint 10:11; 1 Timoti 6:6-10) Ma dhẹ gbalọ Jihova je bi koko ijaje riẹ. (Joshua 23:8; Olezi 119:5, 8) Taure emọ Izrẹl a tẹ te ruọ Ẹkwotọ Eyaa na, Mosis ọ ta udu họ ai awọ nọ: “Ri, me wuhrẹ owhai ijaje gbe izi, wọhọ epanọ ỌNOWO na Ọghẹnẹ mẹ o je kẹ omẹ, re wha ru ai eva otọ nọ wha be te rua re wha woi. Koko ai re wha ru ai; keme oyena udhesẹ areghẹ gbe eriariẹ rai eva aro ahwo . . . nọ a [ti] yo ijaje nana.” (Iziewariẹ 4:5, 6) Enẹna họ okenọ ma re ro dhesẹ uyoyou nọ ma wo kẹ Jihova ẹkwoma oreva riẹ nọ ma rẹ rọ karo evaọ uzuazọ mai. Ọ te ginẹ ghale omai otẹrọnọ ma ru ere.—Matiu 6:33.
10-12. Eme ma wuhrẹ no ọkiẹriwo oware nọ o via evaọ edẹ Noa na ze?
10 Ẹkwoma uru Ọghẹnẹ nọ ma re yo: Noa ọ jọ “ọvuẹovuẹ ẹrẹreokie.” (2 Pita 2:5) Unwenọ ahwo kpobi nọ a jọ taure Ẹvo Ologbo na ọ tẹ ze a kpọ iroro rai rri ovuẹ ẹrẹreokie na ha, a ‘gaviezọ’ kẹ unuovẹvẹ Noa ha. Eme o no rie ze? ‘Ẹvo na ọ ze ọ tẹ rehọ ai kpobi vrẹ.’ Jesu ọ kẹ unuovẹvẹ inọ evaọ edẹ mai na, epọvo na “ẹtha Ọmọ ohwo” ọ rẹ te jọ. Oware nọ o via evaọ edẹ Noa o rrọ unuovẹvẹ ulogbo kẹ ahwo nọ a salọ nọ a rẹ gaviezọ kẹ ẹme Ọghẹnẹ hẹ nẹnẹ.—Matiu 24:39.
11 Ahwo nọ a bi se ovuẹ unuovẹvẹ nọ idibo Ọghẹnẹ ọgbọna a bi whowho ẹkoko u fo nọ a vuhu oware nọ aghẹmeeyo kẹ unuovẹvẹ na o te wha ze. Pita ukọ na ọ ta kpahe ise-ẹkoko itieye na nọ: “A kekaro kiemuku uzẹme nana, nnọ, fiki ẹme Ọghẹnẹ ihru e rọ rọ anhwọ ọgbọ, gbe otọ-oyaya nọ a rọ-ame ru no ame ze: fiki ere ẹvo nọ o ku akpọ oke ọyena ọ tẹ raha iẹe: Rekọ jẹruọ ẹme ọvo na, a rọ ruẹrẹ ihru gbe akpọ nọ erọ enẹna kpahe kẹ erae, enọ a ruẹrẹ kpahe bọ ẹdẹ oziẹobro gbe ẹraha otu nọ ekare erọ Ọghẹnẹ.”—2 Pita 3:3-7.
12 Oware nọ Noa avọ uviuwou riẹ a salọ u wo ohẹriẹ no orọ ahwo nana. “Fiki orọwọ Ọghẹnẹ ọ rọ vẹvẹ Noa unu, kpahọ eware eka nọ a rẹ te ruẹ hẹ, o je yo ẹme nọ o ro ku okọ.” Unuovẹvẹ na nọ a ru lele o wha usiwo se uviuwou riẹ. (Ahwo Hibru 11:7) Joma hai kaki yo jẹ roma kpotọ ru lele ẹme nọ Ọghẹnẹ ọ ta.—Jemis 1:19, 22-25.
13, 14. (a) Fikieme u je wuzou re ma ‘dhẹ gbalọ Jihova’? (b) Ẹvẹ ma rẹ rọ kuvẹ kẹ Jihova “ọmebẹ mai” re ọ ma omai?
13 Ẹkwoma Jihova nọ ma rẹ dhẹ gbalọ: Re ma ‘rrọ uzuazọ re ma ruẹse zọ,’ orọnikọ ma re you Jihova je ru onọ ọ ta ọvo ho rekọ o gwọlọ nọ ma rẹ ‘dhẹ gbalọ iẹe,’ koyehọ, ma rẹ dadamu oreva riẹ uruo. Jesu ọ ta nọ: “Evaọ akothiho rai wha re ti ro wo uzuazọ rai.” (Luk 21:19) Eva uzẹme, oware nọ ma salọ evaọ ẹme nana u re dhesẹ oghẹrẹ nọ udu mai o rrọ. Itẹ 28:14 o ta nọ: “Oghale u re te ohwo nọ ọ rẹ dhẹozọ ỌNOWO na ẹsikpobi; rekọ ohwo nọ o re wo udu ogaga o re kie ruọ uye.” Enẹ o jọ kẹ Fẹro ọrọ Ijipti oke anwae. Okenọ Iye Ikpe na i je te Ijipti unọjọ utọjọ, Fẹro o ru udu gaga ukpenọ ọ dhozọ Ọghẹnẹ. Jihova ọ gba Fẹro họ owojẹ aghẹmeeyo ho rekọ ọ kẹ osu omoya yena uvẹ salọ onọ u je rie. Oware nọ ọ salọ kpobi kẹhẹ, oreva Jihova u rugba wọhọ epanọ Pọl ukọ na o dhesẹ oghẹrẹ nọ Jihova o rri Fẹro: “Mẹ kpare owhẹ kpehru re mẹ ruẹse jọ oma ra dhesẹ ogaga mẹ via, re a ruẹse whowho odẹ mẹ eva akpọ na kpobi.”—Ahwo Rom 9:17.
14 Ikpe-udhusoi buobu nọ i lele i rie nọ a siwi emọ Izrẹl no obọ Fẹro no, Aizaya ọruẹaro na o whowho nọ: “O ỌNOWO, whẹ họ Ọsẹ mai, mai họ ọviẹẹ, whẹ họ ọmebẹ mai, mai kpobi họ iruo abọ ra.” (Aizaya 64:8) Nọ ma be rehọ ẹkwoma ewuhrẹ omobọ ohwo gbe efihiruo Ẹme Ọghẹnẹ ru re Jihova ọ ma omai wọhọ ọmebẹ na, ma vẹ te rehọ ẹmẹrera whẹ ohwo okpokpọ na homa. Ma vẹ te jọ ahwo nọ a wo omurokpotọ viere, nọ u ti rue ei lọhọ re ma bi gba Jihova keme ma ginẹ gwọlọ ru ei eva were.—Ahwo Ẹfẹsọs 4:23, 24; Ahwo Kọlọsi 3:8-10.
‘Wha Rehọ Ae Wuhrẹ Ai’
15. Wọhọ epanọ o rrọ Iziewariẹ 4:9, eware ivẹ vẹ Mosis ọ kareghẹhọ emọ Izrẹl nọ a re ru?
15 Nọ a kẹle Ẹkwotọ Eyaa na no, Mosis ọ tẹ ta kẹ emọ Izrẹl nọ i kokohọ nọ: “Ajokpa nọ wha rẹ yọrọ oma, re wha sẹro [uzuazọ] rai ziezi, ogbẹrọ erehe eware nọ ibiaro rai e ruẹ na e vẹte thọrọ owhai ẹro, i veje ti no owhai eva evaọ edẹ uzuazọ rai; wha rehọ ae wuhrẹ emọ rai gbe emọ-emọ rai.” (Iziewariẹ 4:9) Re a ruẹsi wo ẹvi gbe eghale Jihova evaọ ẹkwotọ nọ a be te reuku riẹ na, o gwọlọ nọ emọ Izrẹl a re ru eware ivẹ jọ gba evaọ aro Jihova Ọghẹnẹ rai. A rẹ kareghẹhọ eware iwoma nọ Jihova o ru kẹ ai no, a vẹ jẹ rehọ ai wuhrẹ ige nọ e rrọ obaro tha. Wọhọ idibo Ọghẹnẹ nẹnẹ, ma re ru epọvo na otẹrọnọ ma gwọlọ ‘salọ uzuazọ re ma ruẹse zọ.’ Eme Jihova o ru kẹ omai nọ ma rẹro ruẹ no?
16, 17. (a) Eme inievo nọ i nwrotọ no isukulu Giliad na a ru no evaọ iruo usiuwoma ota Uvie na? (b) Oriruo vẹ ọrọ ahwo nọ a yọrọ ajọwha evaọ iruo odibọgba na whọ riẹ?
16 Oma u re mu omai urirẹ nọ ma te muẹrohọ oghẹrẹ nọ Jihova ọ rọ ghale iruo usiuwoma ota gbe ilele-iruo mai na no. Anwẹnọ a rọ to Isukulu Ebaibol ọ Giliad ọrọ Watchtower na họ evaọ 1943, imishọnare a be rọ kobaro evaọ iruo ilele-iruo na evaọ erẹwho buobu. Rite inẹnẹ, ahwo ọsosuọ nọ a nwrotọ no isukulu na ze a gbẹ be rehọ ọwhọ ta usiuwoma Uvie na, dede nọ a kpako no yọ owho o gbẹ be lẹliẹ ejọ ru epanọ a gwọlọ daoma te he. Mary Olson nọ o nwrotọ no isukulu Giliad na ze evaọ 1944 yọ obọdẹ oriruo jọ. Ọ kaki ru iruo imishọnare evaọ Uruguay, kẹsena o te kpohọ Colombia, yọ enẹna ọ rrọ obọ Puerto Rico. Dede nọ ẹbẹbẹ owho ọ be lẹliẹ iẹe ru te epanọ ọ gwọlọ họ, oniọvo nana ọ gbẹ be yọrọ ajọwha usiuwoma ota riẹ. Fikinọ o wuhrẹ ẹvẹrẹ Spain, ọ ma omaa nọ o re ro lele iwhowho uvie nọ e rrọ ẹkwotọ na kpohọ usiuwoma ota koka koka.
17 Nancy Porter, ọnọ ọ rrọ aye-uku enẹna, ọnọ o nwrotọ no isukulu Giliad evaọ 1947, ọ gbẹ rrọ iruo imishọnare evaọ Bahamas. Oniọvo-ọmọtẹ nana yọ imishọnare ọfa nọ ọ gbẹ be yọrọ ajọwha riẹ ẹsikpobi evaọ iruo usiuwoma ota na. Oniọvo na Porter ọ ta evaọ ikuigbe uzuazọ nọ o yeri inọ: “Re me wuhrẹ amọfa uzẹme nọ o rrọ Ebaibol na họ ehri oghọghọ mẹ.” * Ọ ta re inọ: “O lẹliẹ omẹ wo emamọ omaa orọ iruẹru abọ-ẹzi nọ u ru uzuazọ uyero mẹ koko oma họ jẹ dọmu.” Nọ Porter avọ inievo efa nọ e be yọrọ ẹrọwọ rai a te rri kpemu, oware nọ Jihova o ru kẹ ai no o rẹ thọrọ ai ẹro ho. Kọ ẹvẹ omai re? Kọ ma be hai rri kpemu jẹ kẹ uyere nọ ma tẹ kareghẹhọ idhere nọ Jihova ọ rọ ghale iruo Uvie na no evaọ okegbe mai?—Olezi 68:11.
18. Eme ma rẹ sai wuhrẹ nọ ikuigbe uzuazọ imishọnare nọ ma re se ze?
18 Oware nọ inievo nana nọ e gbodibo kri no na a ru no gbe onọ a gbe bi ru o vọ omai eva kiọkọ. O rẹ jọ ehri uduotahawọ kẹ omai kpobi nọ ma tẹ be hai se ikuigbe uzuazọ inievo nana keme nọ ma te se kpahe oware nọ Jihova o ru kẹ idibo nana nọ i wo ẹrọwọ na, o rẹ bọ ọtamuo nọ ma be rọ gọ Jihova ga. Kọ whọ be hai se je roro didi kpahe ikuigbe itiena nọ a kere fihọ Uwou-Eroro Na?
19. Ẹvẹ eyewọ Ileleikristi a sae rọ rehọ ikuigbe uzuazọ nọ a yeri nọ e rrọ Uwou-Eroro Na ru iruo ziezi?
19 Mosis ọ kareghẹhọ emọ Izrẹl inọ jọ a hae kareghẹhọ eware kpobi nọ Jihova o ru kẹ ai no, inọ jọ e thọrọ ai ẹro vievie he evaọ edẹ uzuazọ rai kpobi. O te je fibae nọ: “Wha rehọ ae wuhrẹ emọ rai gbe emọ-emọ rai.” (Iziewariẹ 4:9) Ikuigbe eware nọ e ginẹ via i re te ohwo udu. Emaha nọ e be rro ze a gwọlọ emamọ oriruo. Inievo-emetẹ nọ e re rọo ho a rẹ sai wuhrẹ no oriruo inievo-emetẹ nọ e kpako no ze, enọ a gbiku uzuazọ rai fihọ Uwou-Eroro Na. Nọ inievo-emetẹ gbe emezae a tẹ be jọ ẹkwotọ ọfa gbodibo evaọ orẹwho rai o rẹ kẹ ai uvẹ ziezi nọ a rẹ rọ jọ owhreze evaọ iruo usiuwoma ota na. Whai eyewọ Ileleikristi, kọ wha gbẹ rehọ ikuigbe inievo nọ i wo ẹrọwọ nọ a nwrotọ no isukulu Giliad ze no gbe inievo efa nọ wha riẹ rọ ta udu họ emọ rai awọ re a salọ uzuazọ ọrọ iruo odibọgba oke-kpobi?
20. Eme ma re ru hrọ re ma ruẹse ‘salọ uzuazọ’?
20 Nọ o rrọ ere na, kọ ẹvẹ mai omomọvo ọ sae rọ ‘salọ uzuazọ’? Ẹkwoma obọdẹ okẹ orọ ufuoma iroro-ejẹ na nọ ma re ro ru iruo ziezi, ro dhesẹ kẹ Jihova nọ ma you rie gbe ẹgba mai kpobi nọ ma rẹ rọ gbodibo kẹe te epanọ ọ kẹ omai uvẹ orọ odibọgba na kri te. Keme wọhọ epanọ Mosis ọ ta, Jihova “họ uzuazọ kẹ owhai gbe edẹ i krẹkri.”—Iziewariẹ 30:19, 20.
[Oruvẹ-obotọ]
^ edhe-ẹme 17 Ri “Joyous and Thankful Despite Heartbreaking Loss,” evaọ Uwou-Eroro Na June 1, 2001, ẹwẹ-obe avọ 23-27 (ọrọ Oyibo).
Kọ Whọ Sae Kareghẹhọ?
• Eme who wuhrẹ no oriruo ahwo nọ e salọ ọvuọ oghẹrẹ owojẹ rai nọ ma ta ẹme kpahe na ze?
• Nọ ma tẹ gwọlọ ‘salọ uzuazọ,’ oghẹrẹ owọ vẹ ma rẹ jẹ hrọ?
• Iruo ivẹ vẹ a ta udu họ omai awọ nọ ma rugba?
[Enọ Uwuhrẹ]
[Uwoho nọ o rrọ ẹwẹ-obe avọ 24]
“Me fi uwhu gbe uzuazọ” họ aro rai
[Uwoho nọ o rrọ ẹwẹ-obe avọ 27]
Uru Ọghẹnẹ nọ a gaviezọ kẹ u siwi Noa avọ uviuwou riẹ
[Uwoho nọ o rrọ ẹwẹ-obe avọ 28]
Mary Olson
[Uwoho nọ o rrọ ẹwẹ-obe avọ 28]
Nancy Porter