Iweze nọ I Nwene Eriwo Ohwo

“OMA u je mu omẹ re mẹ ta kẹ ahwo uviuwou mẹ kpahe ‘ijẹle’ ivẹ jọ nọ Ọghẹnẹ o vi se omẹ.” Ere uvi-ọzae jọ o kere kpahe iweze emetẹ ivẹ erọ Isẹri Jihova jọ. Aye riẹ nọ ọ jọ ikpe 45 o whu ku ei eka jọ nọ i kpemu taure emetẹ nana a te ti weze bru ei. Akpọ o dhe rie ọvẹ. Emọ riẹ nọ e kpako no a sasa e riẹ oma, rekọ obonọ a be rria u thabọ no uwou ọsẹ na. Uvumọ ogbẹnyusu hayo ahwo nọ a gbẹ be rria kẹle oma a ri weze bru ei hi.

Ọzae na ọ ta kẹ emetẹ ivẹ na okenọ a weze bru ei nọ: “Eva e be dha omẹ kẹ Ọghẹnẹ, mẹ be lẹ sei hi.” Dede na, emetẹ na a weri kugbei jẹ kẹe omobe-ovẹvẹ nọ a kere no Ebaibol ze onọ uzoẹme riẹ o ta nọ Didi Ẹruore Ọ Rrọ kẹ Iyoyou Mai nọ I Whu No? O se omobe na owọwọ yena je wo omosasọ noi ze.

Nọ omoke jọ o vrẹ no, emetẹ ivẹ na a tẹ wariẹ weze bru ei. A riẹ epanọ uweri o da riẹ oma fia te evaọ iweze ọsosuọ rai fikiere a tẹ wariẹ zihe ze te ruẹ epanọ ọ rrọ enẹna. Ọzae na o kere uwhremuna nọ: “Akpọ o gb’omẹ unu inọ erara ivẹ jọ nọ mẹ riẹ hẹ a daezọ mẹ, je wo ọdawẹ kpahe epanọ oma o rrọ omẹ.” Eme nọ a lele i rie ta no Ebaibol na ze e kẹ riẹ uduotahawọ gaga. Emetẹ ivẹ na a tẹ ta kẹe nọ a te wariẹ zihe ze. Eva e were ọzae na gaga te epanọ o ro kere eme nọ e rrọ obehru na evaọ ileta nọ o vi kpohọ Ọgwa Uvie Isẹri Jihova nọ ọ rrọ okegbe riẹ.

Taure ọ tẹ te kwa kpohọ oria nọ o kẹle ọmọ riẹ jọ, ọzae na o kpohọ ewuhrẹ Isẹri Jihova, uviuwou omọvo emetẹ na jọ o te je zizie iei kpohọ obọ uwou nyai lele ai re ememu. Ọzae na o kere nọ: “Mẹ be kwa no okegbe na, rekọ emetẹ ivẹ nana gbe egagọ rai i ti no omẹ iroro ho, a te thọrọ omẹ ẹro evaọ elẹ mẹ gbe he. Ẹhẹ, enẹna me muhọ ẹlẹ no—mẹ be hae lẹ ẹsikpobi. Me nwene no. Emetẹ ivẹ yena a fi obọ họ kẹ omẹ gaga evaọ abọ nana, oware nọ a ru na o da omẹ ẹro fia, o rẹ thọrọ omẹ ẹro vievie he.”