Oruvẹ no Obe Avivẹ Orọ Ilezi Ze
Ẹme Jihova Ọ Rrọ Uzuazọ
Oruvẹ no Obe Avivẹ Orọ Ilezi Ze
WỌHỌ idibo Jihova, ma re rẹro edawọ. Pọl ukọ na o kere nọ: “Ahwo kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.” (2 Timoti 3:12) Eme o ti fi obọ họ kẹ omai thihakọ edawọ gbe ukpokpoma, re ma ruẹsi kru ẹgbakiete mai kẹ Ọghẹnẹ?
Obe avivẹ orọ ilezi nọ a ghale kpohọ abasoi na o kẹ omai obufihọ yena. Ilezi avọ 42 rite 72 i dhesẹ nọ ma tẹ gwọlọ thihakọ edawọ rite urere, ma re fi eva mai kpobi họ Jihova je wuhrẹ epanọ ma rẹ rọ hẹrẹ esiwo riẹ. Oware nọ onana u wuhrẹ omai o rro kẹhẹ! Wọhọ abọfa ọrọ Ebaibol na, ovuẹ nọ o rrọ Obe Avivẹ orọ Ilezi na o ginẹ vọ “avọ iruo” makọ rite inẹnẹ.—Ahwo Hibru 4:12.
JIHOVA “HỌ ORIA ADHẸZỌ GBE OGAGA MAI”
Ohwo Livai jọ ọ rrọ igbo. Avọ ọkora inọ ọ be sae nyae gọ Jihova evaọ aruẹri riẹ hẹ, ọ tẹ tuduhọ omobọ riẹ awọ inọ: “O ẹzi mẹ, eme a je fi owhẹ họ otọ, eme who je dhizu evaọ eva mẹ? Fievahọ Ọghẹnẹ.” (Olezi 42:5, 11; 43:5) Ẹme nọ ọ rrọ owọ Ebaibol nana nọ o rehọ oma via unuẹse buobu na o gba awọ Ilezi 42 gbe 43 ekru. Olezi avọ 44 yọ olẹ ayare kẹ Juda—orẹwho nọ o jọ awa, keme o wọhọ nnọ Asiria ọ jẹ gwọlọ jowọ ẹmo bru iei evaọ edẹ Hẹzikaya Ovie na.
Olezi avọ 45 yọ ole kpahe ehaa-orọo ovie, o jọ ole eruẹaruẹ nọ o kie kpahe Ovie Mesaya na. Ilezi esa nọ i lele i rie i dhesẹ Jihova wọhọ “oria adhẹzọ gbe ogaga mai,” “ovie ologbo eva akpọ na kpobi,” gbe “adhẹzọ mai nọ o re nuhẹ hẹ.” (Olezi 46:1; 47:2; 48:3) Olezi avọ 49 ọ riẹ ẹme na dhesẹ woma kẹhẹ, inọ uvumọ ohwo ‘ọ rẹ sae ta oniọvo ho’! (Olezi 49:7) Emọ Kora họ enọ a ta nnọ a kere Ilezi eree ọsosuọ erọ obe avivẹ na. Asaf họ ọnọ o kere ọrọ avọ izii, koyehọ Olezi avọ 50.
Enọ Ikereakere nọ A Kẹ Iyo Rai:
44:19—Eme họ “oria erao-ijihẹ” na? O wọhọ nnọ ọso-ilezi na ọ jẹ ta kpahe ogege-ẹmo, oria nọ enọ a kpe a re jo zihe ruọ emuore kẹ erao-ijihẹ.
45:13, 14a—Ono họ “ọmọtẹ” ovie nọ a bi ti ‘su bru ovie na’? Ọye họ ọmọtẹ “Ovie ebẹdẹ bẹdẹ” na, Jihova Ọghẹnẹ. (Eviavia 15:3) O dikihẹ kẹ ukoko Ileleikristi 144,000 nọ a kẹ orro no na, enọ Jihova ọ rehọ wọhọ emọ riẹ ẹkwoma ẹzi riẹ nọ o ro wholo ai. (Ahwo Rom 8:16) A te rehọ “ọmọtẹ” Jihova nana, “nọ a ruẹrẹ kpahe wọhọ ọva nọ ọ be hẹrẹ ọzae” na bru ọzae riẹ—Ovie Mesaya na.—Eviavia 21:2.
45:14b, 15—Amono ‘emetẹ nọ e riẹ ezae he’ na a dikihẹ kẹ? Ae họ “otu obuobu” eg’Ọghẹnẹ uzẹme na, enọ i ku oma gbe je bi fi obọ họ kẹ okiọkotọ nọ a wholo na. Nọ o rọnọ a ‘no uye ulogbo na ze’ oma kọkọ na, a te jọ otọakpọ evaọ okenọ ehaa-orọo Ovie Mesaya na i ti ro te oba evaọ obọ odhiwu. (Eviavia 7:9, 13, 14) Eva oke yena, a ti wo “oghọghọ avọ evawere.”
45:16—Edhere vẹ emọ e te rọ rehọ oria esẹ ovie na? Okenọ a yẹ Jesu, o wo esẹ-ode otọakpọ. A ti zihe ruọ emọ riẹ okenọ ọ te kpare ai no uwhu ze evaọ etoke Esuo Odu Ikpe riẹ. Ejọ rai a te jọ usu enọ a ro mu wọhọ “emọ-ivie eva akpọ na kpobi.”
50:2—Fikieme a ro dhesẹ Jerusalẹm inọ “ọ gba kiete”? Orọnikọ fiki ewoma okpẹwho na ha. Ukpoye, a dhesẹ i rie ere fikinọ Jihova ọ rehọ iẹe ruiruo, ọ tẹ jẹ whẹ erru họ iẹe ẹkwoma okpẹwho na nọ o ru fihọ oria etẹmpol riẹ gbe ẹwho-oviede ọrọ ivie riẹ nọ o wholo.
Eware nọ Ma Jariẹ Wuhrẹ:
42:1-3. Wọhọ epanọ ame o re si ugbosu uru evaọ oria otọ oyaya na, ere Jihova o si ohwo Livai na uru. Fikinọ ọzae na ọ jẹ sae gọ Jihova evaọ aruẹri Riẹ hẹ, o da riẹ gaga te epanọ ‘irui riẹ i ro zihe ruọ emuore te aso te uvo’—emu ọ gbẹ jẹ ruọ iẹe oma ha. Kọ u gbe fo re ma wo ovuhumuo odidi nọ ma re ro kuomagbe ibe eg’Ọghẹnẹ mai gọ Jihova?
42:4, 5, 11; 43:3-5. Otẹrọnọ oware jọ o so riẹ ze nọ ma gbẹ be sai ro kpohọ iwuhrẹ Ileleikristi na evaọ umutho oke jọ họ, nọ ma tẹ be kareghẹhọ oghọghọ nọ ma jẹ hae jọ iwuhrẹ itieye na wo evaọ oke nọ u kpemu, o rẹ kẹ omai uduotahawọ. Dede nọ onana o sai ru omai jọ ọkora evaọ oke ọsosuọ, o sae jẹ kareghẹhọ omai inọ Ọghẹnẹ họ adhẹzọ mai gbe nnọ u fo re ma rẹroso ẹe kẹ ufuoma.
46:1-3. Makọ idabolo nọ i re zere omai kẹhẹ, ma re wo udufihọ vọvọ inọ “Ọghẹnẹ họ oria adhẹzọ gbe ogaga mai.”
50:16-19. Ohwo nọ o re gu ọrue je ru eware iyoma ọ rẹ sae jọ ohwo ẹro Ọghẹnẹ hẹ.
50:20. Ukpenọ ma re gu ethobọ amọfa evaọ ẹgbede, u fo nọ ma rẹ kpairoro vrẹ ai.—Ahwo Kọlọsi 3:13.
“ỌGHẸNẸ ỌVO ẸZI MẸ Ọ FỌ BE HẸRẸ”
Olẹ ayare nọ Devidi ọ lẹ okenọ ọ raha uzi kugbe Batshẹba no u mu ẹko ilezi nana họ. Olezi avọ 52 rite 57 i dhesẹ nnọ Jihova o ti siwi enọ i gbolo ehwa rai kẹe jẹ be hẹrẹ esiwo riẹ. Wọhọ epanọ a dhesẹ evaọ Olezi avọ 58 rite 64 na, Devidi o ru Jihova fihọ adhẹzọ riẹ evaọ etoke uye riẹ kpobi. Ọ so nọ: “Ọghẹnẹ ọvo ẹzi mẹ ọ fọ be hẹrẹ, keme eva riẹ ẹruore mẹ ọ rọ.”—Olezi 62:5.
Usu okpekpe nọ ma re wo kugbe Osiwi mai o rẹ wọ omai “suile oruaro kẹ odẹ riẹ!” (Olezi 66:2) A jiri Jihova wọhọ ọkokẹ owoma evaọ Olezi avọ 65, wọhọ Ọghẹnẹ nọ o re siwi ahwo riẹ evaọ Olezi avọ 67 gbe ọrọ avọ 68, jẹ wọhọ Ọnọ ọ rẹ thọ ahwo riẹ evaọ Olezi avọ 70 gbe ọrọ avọ 71.
Enọ Ikereakere nọ A Kẹ Iyo Rai:
51:12—“Ẹzi ajọwha” ono Devidi ọ yare nnọ a rọ rehọ iẹe vi hayo dikihẹ? Orọnikọ onana o ta kpahe ẹzi ọfuafo Jihova nọ o re ro fi obọ họ kẹ Devidi hi, rekọ ẹzi Devidi omariẹ—iroro eva riẹ. Ọ be yare Ọghẹnẹ inọ ọ kẹe isiuru nọ o re ro ru oware nọ u kiehọ.
53:1—Ẹvẹ ohwo nọ ọ vro nnọ Ọghẹnẹ ọ rrọ họ ọ jẹ rọ “ogheghẹ”? Ugheghẹ nọ a jọ etenẹ fodẹ na orọnikọ u dhesẹ ohwo nọ ọ kare areghẹ hẹ. Uruemu nọ a jọ Olezi 53:1-4 dhesẹ na o kẹ imuẹro nnọ ugheghẹ nana yọ orọ ogbekuo uruemu.
58:3-5—Edhere vẹ irumuomu a rọ wọhọ araomuomu? Erue nọ a bi gu fihọ amọfa uzou e wọhọ obi araomuomu. A rẹ nua uruemu ezi ọrọ ahwo nọ a be ta raha na. “Wọhọ ọwiwhẹ odiezọ nọ o re yo ẹme he,” irumuomu na a rẹ gaviezọ kẹ ohrẹ hẹ.
58:7—Ẹvẹ irumuomu na a rẹ rọ “rayẹ wọhọ ame nọ o bi hwẹ kufiẹ”? Ẹsejọhọ Devidi o je roro kpahe ame ikiekpotọ jọ evaọ Ẹkwotọ Eyaa na. Dede nọ okposo ọ rẹ lẹliẹ ame ukiekpotọ otiọye na vọhọ, o rẹ raha oke re ame otiọye na o te su kpọ họ. Devidi ọ jẹ lẹ nọ jọ ọraha o te irumuomu na ababọ oke oraha.
68:13—Ẹvẹ ‘ibekpe erueruẹ e rẹ rọ jọ fuafo wọhọ idọlọ-efuafo, jẹ wọhọ idọlọ-oro nọ e be rọ’? Oghẹrẹ irueruẹ jọ e riẹ nọ ekọlọ rai e whoma họ ekọlọ-iburu, nọ ibekpe rai i re kerẹ nwranwranwra. Ọre o te lo mu ibekpe rai, i ve muhọ elo wọhọ ẹmẹro ọnwranwra. Ẹsejọhọ Devidi ọ jẹ rehọ egbaẹmo Izrẹl nọ e kparobọ bi no ẹmo ze dhesẹ erueruẹ otiọye na—nọ o wo ẹgba ora yọ o bi lo nwranwranwra. Wọhọ epanọ egba eriariẹ Ebaibol jọ e ta, a sae jẹ rehọ onana dhesẹ okwakwa erru nọ ọwena o ru, okwakwa-oka orọ obokparọ, nọ a wọ rehọ wọhọ egbo-ẹmo. Epanọ o rọ kpobi, Devidi o je dhesẹ obọ nọ Jihova o fihọ kẹ ahwo riẹ nọ a rọ kparobọ vi ewegrẹ rai.
68:18—Amono a jọ “ekẹ eva udevie ahwo”? Enana a jọ usu ahwo nọ a mu evaọ okenọ a fi Ẹkwotọ Eyaa na kparobọ. Uwhremu na a rehọ ezae itieye na mu re a fi obọ họ kẹ ahwo Livai na evaọ iruo rai.—Ẹzra 8:20.
68:30—Eme ayare na inọ jọ a “whọku erao nọ e be ria udevie ikpoko na” u dhesẹ? Nọ ọ jẹ ta kpahe ewegrẹ ahwo Jihova evaọ edhere ẹwoho wọhọ erao ijihẹ, Devidi ọ rọ yare Ọghẹnẹ inọ jọ ọ whọku ai, hayo bru ai abọ họ re a siọ eyoma ba eru.
69:23—Eme họ otofa ‘ọthọ ewegrẹ nọ a re ru nuhẹ’? Iriẹ nọ e rrọ ọthọ na i re fi obọ họ kẹ ohwo ru iruo egaga, iruo wọhọ ẹwọ eware egbẹgbẹdẹ. Ọthọ ohwo o te bi nuhu u dhesẹ nnọ o wo ẹgba ha. Devidi ọ lẹ nnọ a mi ewegrẹ riẹ ogaga.
Eware nọ Ma Jariẹ Wuhrẹ:
51:1-4, 17. U du fo re uzi nọ ma thọ o hẹriẹ omai no Jihova Ọghẹnẹ hẹ. Ma te kurẹriẹ, ma rẹ sai fi eva họ ohrọoriọ riẹ.
51:5, 7-10. Ma tẹ thọ uzi, ma rẹ sae lẹ se Jihova kẹ erọvrẹ fiki uzioraha nọ ma riuku riẹ. Ma rẹ jẹ lẹ sei re o ru omai fo, zihe omai ze, fi obọ họ kẹ omai si iroro emuemu nọ ọ rrọ udu mai no, re ọ jẹ kẹ omai emamọ ẹzi.
51:18. Izieraha Devidi i fi ewoma orẹwho na soso họ ọza. Fikiere ọ tẹ lẹ kẹ evezi Ọghẹnẹ kpahe Zayọn. Ma tẹ thọ uzi ulogbo jọ, o rẹ wha ekela se odẹ Ọghẹnẹ gbe ukoko na. U re woma re ma lẹ se Ọghẹnẹ re ọ kpọ eyoma nọ uzioraha mai o wha ze vi.
52:8. Ma rẹ sae jọ wọhọ “ure olivi orọrọ eva uwou Ọghẹnẹ”—bikẹle Jihova je wo ẹvi evaọ iruo riẹ—ẹkwoma ẹme nọ ma re yo kẹe gbe unevaze nọ ma rẹ rọ jẹ ọwhọkuo riẹ rehọ.—Ahwo Hibru 12:5, 6.
55:4, 5, 12-14, 16-18. Ẹgwae omuomu ọrọ Absalọm ọmọ obọ riẹ gbe evivie nọ Ahitofẹl, ọkiroro riẹ nọ o fi eva họ o vivie i rie, o wha ọkora ologbo se Devidi. Rekọ, oyena u whrehe evaifihọ nọ Devidi o wo kpahe Jihova ha. Ma rẹ kuvẹ re edada iroro i whrehe eva nọ ma fihọ Ọghẹnẹ hẹ.
55:22. Ẹvẹ ma re ro gbolo owha mai kẹ Jihova? Ma rẹ sai ru onana (1) ẹkwoma olẹ nọ ma rẹ lẹ sei kpahe oware nọ o be kẹ omai uye, (2) ẹkwoma Ebaibol na gbe ukoko riẹ nọ ma re fi eva họ kẹ ọkpọvio gbe uketha, gbe (3) ẹkwoma eruo oware nọ ẹgba mai u te nọ ma sai ro ru ẹbẹbẹ na vori.—Itẹ 3:5, 6; 11:14; 15:22; Ahwo Filipai 4:6, 7.
56:8. Orọnikọ Jihova ọ riẹ kpahe uyero mai ọvo ho rekọ ọ riẹ epanọ o be nyawo omai te.
62:11. Ọghẹnẹ ọ rẹ rẹroso ẹgba nọ o re no oria jọ ze he. Ọye họ uzedhe ehri ogaga. ‘Obọ riẹ ogaga o rrọ.’
63:3. “Uyoyou obọrobọ [Ọghẹnẹ] u vi uzuazọ” keme ababọ riẹ, uzuazọ u re wo aro ho. U re woma re ma mu usu kugbe Jihova.
63:6. Oke aso—nọ oria kpobi ọ rrọ fọfọ—o sae jọ emamọ oke nọ ma re ro roro-didi.
64:2-4. Iguẹgu iyoma e rẹ sae raha emamọ odẹ nọ ohwo o wo. U fo re ma gaviezọ kẹ iguẹgu itieye na hayo vaha ae he.
69:4. Re ma ruẹse yọrọ udhedhẹ, o rẹ sae jọ oware areghẹ kẹ omai ẹsejọ re ma “hwa” zihe ẹkwoma unu nọ ma re wou, ma tẹ maki roro nnọ ma ruthọ họ.
70:1-5. Jihova o re yo olẹ mai kẹ obufihọ okpakpata. (1 Ahwo Tẹsalonika 5:17; Jemis 1:13; 2 Pita 2:9) Ọghẹnẹ ọ rẹ sae kuvẹ kẹ odawọ, ghele na ọ te kẹ omai areghẹ nọ ma re ro yeri kugbe uyero na gbe ẹgba nọ ma re ro thihakọ riẹ. Ọ te kẹ omai uvẹ re ẹdawọ nọ u vi ẹgba mai u te omai hi.—1 Ahwo Kọrint 10:13; Ahwo Hibru 10:36; Jemis 1:5-8.
71:5, 17. Devidi o wuhrẹ aruọwha gbe ẹgba ẹkwoma Jihova nọ o fi udu họ evaọ oke uzoge riẹ—makọ taure ọ tẹ te họre Goliat, ọgwara ohwo Filistia na. (1 Samuẹle 17:34-37) U re woma re emaha na a rẹroso Jihova evaọ oware kpobi nọ a bi ru.
“Jọ Akpọ Kpobi Ọ Vọ Avọ Oruaro Riẹ”
Ole urere ọrọ obe avivẹ ilezi nọ a gba ekru na, Olezi avọ 72, o kie kpahe esuo Solomọn, nọ u dhesẹ epanọ uzuazọ o te jọ evaọ otọ esuo Mesaya. Eghale nọ a jọ etẹe dhesẹ i gbunu kẹhẹ—udhedhẹ nọ o te vọ oria kpobi, ekuhọ okienyẹ gbe ozighi, emuore nọ ọ te vọ otọakpọ! Kọ ma te jọ usu ahwo nọ a te reawere eghale Uvie enana gbe efa? Ma te reawere rai otẹrọnọ, wọhọ ọso-ilezi na, ma be rẹroso Jihova, ru ei họ oria adhẹzọ gbe ogaga mai.
“Elẹ Devidi” e rehọ eme nana kuhọ: “Oghale u te Ọnowo, ỌGHẸNẸ Izrẹl, ọnọ ọye ọvo o re ru eware nọ i re gbunu. Oghale u te odẹ oro riẹ bẹdẹ bẹdẹ; jọ akpọ kpobi ọ vọ avọ oruaro riẹ! Ami, Ami.” (Olezi 72:18-20) Joma rehọ udu kpobi jiri Jihova je jiri odẹ oruaro riẹ.