Uwuhrẹ Kpahe Omorro Gbe Omurokpotọ

OWARE jọ nọ o via eva etoke esuo Devidi Ovie na u dhesẹ ohẹriẹ nọ o rrọ uvi omurokpotọ gbe omorro. O jọ okenọ Devidi o fi Jerusalẹm kparobọ je ru ei fihọ okpẹwho esuo riẹ no. Devidi o wo eriwo inọ Jihova họ Ovie Izrẹl, fikiere o te ru ọruẹrẹfihotọ re a wọ Etehe-Ọvọ na ziọ okpẹwho na, onọ u re dhesẹ nọ Ọghẹnẹ ọ rrọ kugbe ai. Onana u wuzou gaga kẹ Devidi te epanọ o ro dhesẹ oghọghọ nọ o da riẹ eva fia evaọ iraro ahwo na kpobi yọ o bi lele izerẹ nọ e wọ Etehe-Ọvọ na. Ahwo Jerusalẹm a ruẹ ovie rai nọ ọ be “rehọ eva riẹ kpobi gbile.”—2 Samuẹle 6:11-16; 1 Iruẹru-Ivie 15:15, 16, 29.

Dede na, Maekal aye Devidi o ku oma gbe oghọghọ na ha. O je rri no unwido ze, yọ ukpenọ eva e were iẹe fiki oghẹrẹ nọ Devidi o bi ro jiri Jihova, ọ tẹ “jẹ e kufiẹ evaọ eva riẹ.” (2 Samuẹle 6:16) Eme ọ wọ Maekal dhesẹ uruemu nana? Ababọ avro, o rri omariẹ kpehru gaga fikinọ ọye yọ ọmọ ovie ọsosuọ Izrẹl, Sọl, ọ tẹ jẹ rrọ aye ovie avivẹ Izrẹl. O sae jọnọ o roro inọ ọzae riẹ, nọ ọ rrọ ovie na, ọ hai hrẹ oma riẹ kpotọ te epanọ o re ro lele ahwo gheghe gbeha oghẹrẹ utioye he. Eriwo omorro yena u dhesẹ oma via evaọ oghẹrẹ nọ o ro yere Devidi okenọ o kpozi obọ uwou no. Ọ rehọ oma ẹkoko ta nọ: “Ri epanọ ovie Izrẹl ọ rọ adhẹẹ kẹ omariẹ nẹnẹ, nọ ọ jẹ jọ udevie emetẹ idibo riẹ ba oma fihọ, wọhọ epanọ ohwo-evere ọ rẹ ba oma fihọ!”—2 Samuẹle 6:20.

Eme Devidi o ru kpahe ẹkoko-ose yena? Devidi ọ whọku Maekal ẹkwoma ẹme nọ ọ kpahe kẹe inọ Jihova ọ siọ ọsẹ riẹ, Sọl, wọhọ ovie Izrẹl jẹ rehọ ọye omariẹ mu uvie na. Devidi o fibae nọ: “Me re ti ru oma mẹ kuẹku vienẹ, mẹ vẹ te jọ aro ra kuẹku; rekọ emetẹ eyena nọ whọ ta na, eye e rẹ te kẹ omẹ adhẹẹ.”—2 Samuẹle 6:21, 22.

Ẹhẹ, o jọ ọtamuo Devidi inọ ọ rẹ ruabọhọ gọ Jihova avọ omurokpotọ. Eriwo Devidi nana u fi obọ họ kẹ omai wo otoriẹ oware nọ o soriẹ nọ Jihova o ro dhesẹ iẹe inọ ọ rrọ “ohwo nọ ọ dhẹ ruọ omẹ ẹro.” (Iruẹru 13:22; 1 Samuẹle 13:14) Eva uzẹme, Devidi ọ jẹ raro kele oriruo uvi omurokpotọ nọ Jihova Ọghẹnẹ o fihotọ. O nwani fo kẹhẹ, ẹme na “me re ti ru oma mẹ kuẹku” nọ Devidi ọ rọ kpahe ẹme kẹ Maekal na u no ẹme Hibru ọvona ze nọ a ro dhesẹ oghẹrẹ nọ Ọghẹnẹ o bi rri hayo yerikugbe ahwo-akpọ. Dede nọ Jihova họ ohwo nọ ọ mai kpehru evaọ ehrugbakpọ na, Olezi 113:6, 7 u dhesẹ i rie nọ “o bi [hrẹ oma kpotọ, NW ] riwi ihru gbe akpọ[.] Ọ kpare iyogbere no otọ, ọ tẹ jẹ wọ enọ ohọwo u re kpe no enwo.”

Nọ Jihova o wo omurokpotọ na, o rrọ igbunu kẹ omai hi inọ o mukpahe “ẹro oyoma” ọrọ otu omorro. (Itẹ 6:16, 17) Fikinọ o dhesẹ omorro je wo ọjẹkufiẹ kẹ ovie nọ Ọghẹnẹ o ro mu, a mi Maekal uvẹ ọghọ nọ o re ro yẹ ọmọ kẹ Devidi. O yẹ ọmọ re o te whu hu. Oware nọ ma wuhrẹ no onana ze o rro kẹhẹ! Ohwo kpobi nọ ọ gwọlọ aruoriwo Ọghẹnẹ ọ rẹ nya lele uthubro nana: “Whai kpobi a rehọ oma-urokpotọ gọẹgọ kẹ ohwo ohwo; keme ‘Ọghẹnẹ o re hrẹ obroma-oro, rekọ ọ vẹ rọ aruoriwo kẹ enọ e roma-kpotọ.’ ”—1 Pita 5:5.