Dhozọ Jihova —Re Who Wo Evawere!
Dhozọ Jihova —Re Who Wo Evawere!
“Oghale u te ọnọ ọ be dhẹozọ ỌNOWO.”—OLEZI 112:1.
1, 2. Eme ozodhẹ Jihova o rẹ sae wha ze?
OHWO o re mu were eva ha. Uvi evawere o roma hwa ẹsalọ oware nọ o gba, eruo oware nọ u woma, gbe ekurẹriẹ no oware uyoma. Jihova ọnọ Ọ Ma omai ọ kẹ omai Ẹme riẹ Ebaibol na re u wuhrẹ omai epanọ ma rẹ rọ reawere uzuazọ nọ o mai woma kpaobọ. Ẹkwoma ọkpọvio Jihova nọ ma rẹ gwọlọ jẹ nya lele, rọ ere dhesẹ ozodhẹ Ọghẹnẹ, ma rẹ sai gine wo evevọwẹ gbe evawere.—Olezi 23:1; Itẹ 14:26.
2 Ma te jọ uzoẹme nana ta kpahe iriruo ahwo oke Ebaibol gbe erọ oke mai na nọ i dhesẹ epanọ uvi ozodhẹ Ọghẹnẹ o rẹ rọ kẹ ohwo ẹgba mugba kẹ otunyẹ eyoma oruo gbe udu nọ a re ro ru oware nọ u fo. Ma te ruẹ nọ ozodhẹ Ọghẹnẹ o rẹ sae wọ omai kpọ idhere mai vi jẹ kẹ omai evawere wọhọ epanọ o via kẹ Devidi na. Ma te jẹ ruẹ nọ ozodhẹ Jihova ginọ ukuoriọ oghaghae nọ esẹgbini a rẹ sae kẹ emọ rai. Ẹhẹ, Ẹme Ọghẹnẹ ọ ta udu họ omai awọ nọ: “Oghale u te ọnọ ọ be dhẹozọ ỌNOWO.”—Olezi 112:1.
Ẹwariẹ Wo Evawere nọ A Kufiẹ
3. Eme o fi obọ họ kẹ Devidi wariẹ wo edikihẹ riẹ nọ ọ raha uzi no?
3 Wọhọ epanọ ma wuhrẹ evaọ uzoẹme nọ u kpemu na, ozodhẹ Ọghẹnẹ o kare Devidi evaọ isiasa nọ e viodẹ, o tẹ wọe raha uzi. Dede na, oghẹrẹ owọ nọ ọ jẹ kpahe ọkpọvio Jihova u dhesẹ nọ ọ ginẹ jọ ohwo nọ o wo ozodhẹ Ọghẹnẹ. Adhẹẹ gbe ozodhẹ nọ o wo kẹ Ọghẹnẹ o wọ riẹ rọwo iruthọ riẹ, kpọ idhere riẹ vi, jẹ wariẹ wo emamọ usu kugbe Jihova. Dede nọ iruthọ riẹ e wha uye sei gbe amọfa, uvi ekurẹriẹ riẹ u ru nọ Jihova ọ jẹ rọ tha ae uke jẹ ghale iẹe ẹsikpobi. Oriruo Devidi ọ rẹ sae jọ ọbọga kẹ Ileleikristi nẹnẹ nọ a te kie ruọ uzioraha ulogbo.
4. Ẹvẹ ozodhẹ Ọghẹnẹ o sae rọ lẹliẹ ohwo wariẹ wo evawere?
4 Muẹrohọ oriruo Sonja. * Dede nọ ọ jọ ọtausiuwoma oke-kpobi, Sonja o mu ekpehre egbẹnyusu onọ o wha riẹ ze nọ o ro wobọ evaọ uruemu nọ u fo kẹ Ileleikristi hi, kẹsena a te si ei no ukoko. Nọ o bru omariẹ kpiroro, Sonja ọ tẹ daoma re ọ ruẹ nọ ọ kpọ usu riẹ vi kugbe Jihova. Omoke jọ o vrẹ nọ, a tẹ wariẹ rehọ iẹe ziọ ukoko na. Etoke nana kpobi, Sonja o gbabọkẹ isiuru nọ ọ gwọlọ rọ gọ Jihova ha. Uwhremu na ọ tẹ wariẹ ruọ iruo ọkobaro oke-kpobi na. Kẹsena, ọ tẹ te rọo uvi ọzae Oleleikristi jọ nọ ọ rrọ ọkpako ukoko, yọ enẹna avọ iẹe a be rehọ evawere gọ Jihova evaọ ukoko na. Dede nọ o da Sonja gaga nọ o kie no ukoko Ileleikristi na ubroke, eva e be were iẹe inọ ozodhẹ nọ o wo kẹ Ọghẹnẹ u ru nọ o ro zihe ziọ ukoko na.
U Woma re A Ruẹ Uye Ukpenọ A rẹ Thọ Uzi
5, 6. Dhesẹ isiava nọ uvẹ o jọ kẹ Devidi nọ ọ hẹ sai ro kpe Sọl gbe oware nọ o gbe ro dhobọ tei hi.
5 Eva uzẹme, o rẹ mai woma re ozodhẹ Ọghẹnẹ o whaha ohwo nọ o gbe ro kie ruọ uzioraha ha. O jọ enẹ kẹ Devidi. Eva okejọ, Sọl avọ ahwo idu-esa erọ ogbaẹmo riẹ nọ a je le Devidi a ruọ eghogho utho—eghogho nọ Devidi avọ ahwo riẹ a dhere. Ahwo Devidi a ta udu họ iẹe awọ inọ o kpe Sọl. A jẹ jọ udu rai roro nọ, kọ ogbẹrọnọ Jihova ọ rehọ ọwegrẹ Devidi họ iẹe obọ na? Ababọ edo, Devidi ọ tẹ bẹbẹ te Sọl oma o je bru ozọ-ewu riẹ. Fikinọ Devidi o wo ozodhẹ Ọghẹnẹ, omoware yena nọ o ru na dede o lẹliẹ udu brukpei. Devidi o te go ahwo riẹ nọ okpakpa o jọ oma na họ akotọ, ta nọ: “ỌNOWO na ọ rẹ ghọ, re me ru olori mẹ oware onana, ọnọ ỌNOWO na o wholo.” *—1 Samuẹle 24:1-7.
6 Oke ofa jọ, Sọl o wo họ evuẹ nọ oke u kpo no, tei te ahwo riẹ kpobi “a jọ owezẹ, keme ỌNOWO na ọ rehọ owezẹ udidi rọ kẹ ae.” Devidi avọ Abishai ọmọ oniọvo riẹ nọ ọ kare ozodhẹ a tẹ bẹbẹ ruọ udevie evuẹ na, a te dikihẹ akotọ Sọl nọ ọ rrọ owezẹ. Abishai ọ gwọlọ nọ o re kpei no ẹsiẹsiẹ. Rekọ Devidi ọ tẹ whaha Abishai, nọ inọ: “Ono ọ rẹ sai kpe ọnọ ỌNOWO na o wholo no re ọ jọ ababọ afuẹwẹ?”—1 Samuẹle 26:9, 12.
7. Eme o ru nọ Devidi ọ gbẹ rọ raha uzi hi?
7 Fikieme Devidi o gbe ro kpe Sọl ho dede nọ uvẹ u rovie fihọ kẹe isiava nọ ọ hẹ sai ro ru ere? Fikinọ ozodhẹ nọ o wo kẹ Jihova o ga vi onọ o wo kẹ Sọl. Fiki emamọ ozodhẹ Ọghẹnẹ, o jọ Devidi oma nọ ọ rẹ tubẹ ruẹ uye nọ o tẹ gwọlọ ere viukpenọ ọ rẹ raha uzi. (Ahwo Hibru 11:25) O fi udu kpobi họ nọ Jihova ọ be sẹro ahwo Riẹ gbe ọye omariẹ. Devidi ọ riẹ nọ ẹmeoyo gbe eva nọ o re fihọ Ọghẹnẹ o rẹ wha evawere gbe eghale buobu ze, rekọ o te wo orivo kẹ Ọghẹnẹ ọ rẹ sai wo aruoriwo Riẹ hẹ. (Olezi 65:4) Devidi ọ tẹ jẹ riẹ nọ Ọghẹnẹ o ti ru eyaa Riẹ gba, onọ ọ te rọ rehọ iẹe mu ovie je mi Sọl uvie na eva edhere nọ Ọ gwọlọ gbe oke nọ O fihọ.—1 Samuẹle 26:10.
Ozodhẹ Ọghẹnẹ O rẹ Wha Evawere Ze
8. Ẹvẹ owojẹ Devidi okenọ ọ jọ otọ ọwọsuọ o rọ rrọ oriruo kẹ omai?
8 Wọhọ Ileleikristi, ma rẹ sai rẹro ẹkoko se, ukpokpoma, gbe oghẹrẹ edawọ efa. (Matiu 24:9; 2 Pita 3:3) Ẹsejọ, ebẹbẹ e rẹ sai tube no obọ ibe Ileleikristi mai ze. Rekọ, ma riẹ nọ Jihova ọ be ruẹ eware kpobi, yo elẹ mai, yọ evaọ ẹruoke ọ te kpọ eware vi rọwokugbe oreva riẹ. (Ahwo Rom 12:17-21; Ahwo Hibru 4:16) Fikiere, ukpenọ ma rẹ dhozọ ahwo nọ a be wọso omai, ma rẹ dhozọ Ọghẹnẹ je fievahọ iẹe inọ o ti siwi omai. Wọhọ Devidi, ma re ru kele he yọ ma re si obọ no ute ẹrẹreokie mai hi re ma se uye ba ẹruẹ. Ukuhọ riẹ ma ti wo evawere. Rekọ eva oghẹrẹ vẹ?
9. Kẹ oriruo epanọ ozodhẹ Ọghẹnẹ o sai ro su kpohọ evawere ghelọ ukpokpoma.
9 Imishọnare jọ nọ o kri no evaọ Africa ọ ta nọ: “Mẹ kareghẹhọ oni jọ avọ ọmọtẹ ikpe-ikpegbọ riẹ nọ a se inọ a rẹ dẹ ekade ivotu hu fiki edikihẹ seomaba-edhehọ Oleleikristi rai. Ogbotu ahwo na a rehọ e rai je ijehwẹ kẹsena a te le ai kpo. Eva edhere nọ a je kpo, oni na ọ jẹ daoma whrehe ọmọtẹ riẹ oviẹ, ọnọ ọ jẹ nọ mi oni riẹ re ọ riẹ oware nọ a jẹ rọ rehọ ai je ijehwẹ. A ghọghọ fiki oware nọ o via na ha, rekọ a wo emamọ obruoziẹ-iroro. Uwhremu na, eva e were rai gaga inọ a yo ẹme kẹ Ọghẹnẹ. O hẹ jọnọ a dẹ ekade ivotu na, eva e hae te were ogbotu na gaga. Ahwo na a hae te ha udi kẹ ai je lele ai ghọghọ kpo. Rekọ ọmọtẹ na avọ oni riẹ a hae ti wo evawere vievie he, nọ a te jọ udu riẹ inọ a fi ute rai hotọ.” Ozodhẹ nọ a wo kẹ Ọghẹnẹ o thọ rai no oyena.
10, 11. Iyẹrẹ iwoma vẹ u no ozodhẹ Ọghẹnẹ nọ aye jọ o wo ze?
10 Ozodhẹ Ọghẹnẹ u re je su kpohọ evawere nọ ohwo ọ tẹ rẹriẹ ovao dhe edawọ nọ i kpomahọ adhẹẹ rọkẹ uzuazọ. Okenọ Mary o ro dieva ọmọ avesa riẹ họ, edọkita ọ tẹ jẹ ta udu họ iẹe awọ nọ ọ kpare eva na. Ọ ta kẹe nọ: “Uzuazọ ra o rrọ ọza.” O te je fibae nọ, “oma na o sai kru owhẹ ẹsiẹvo, who ve whu no asohẹrioke. Ọmọ na o ti whu no re. Yọ whọ tẹ maki yẹ ọmọ na dede, ọ te sae jọ oma kọkọ họ.” Mary o bi wuhrẹ Ebaibol kugbe Isẹri Jihova rekọ ọ re họ-ame he. Mary ọ ta nọ: “Ghele na, mẹ gba riẹ mu no inọ mẹ rẹ gọ Jihova, yọ o jọ ọtamuo mẹ inọ oghẹrẹ kpobi nọ o rrọ me re yo ẹme kẹe.—Ọnyano 21:22, 23.
11 Eva etoke nọ o ro dihọ na, Mary ọ roma kẹ uwuhrẹ Ebaibol gbe ẹruorote uviuwou riẹ ziezi. Ukuhọ riẹ o te yẹ ọmọ na. Mary ọ ta nọ: “Eyẹ na ọ dina jọ gaga kẹ omẹ vi orọ emọ ivẹ ọsosuọ mẹ, rekọ ẹbẹbẹ ologbo ọ jariẹ hẹ.” Ozodhẹ Ọghẹnẹ u fi obọ họ kẹ Mary yọrọ emamọ obroziẹ-iroro, u lehie he ọ tẹ họ-ame. Nọ ọmọ na ọ jẹ whẹro ze, o wuhrẹ ozodhẹ Jihova yọ enẹna o bi ru iruo eva uwou ogha Isẹri Jihova jọ.
‘Wo Eri Eva ỌNOWO Na’
12. Ẹvẹ ozodhẹ Ọghẹnẹ o rọ kẹ Devidi ọbọga?
12 Orọnikọ ozodhẹ nọ Devidi o wo kẹ Jihova o whaha iẹe oware uyoma uruo ọvo ho. O kẹ riẹ uduowha jẹ jowọ avọ areghẹ evaọ otọ iyero ebẹbẹ. Ẹgbukpe gbe emera ene Devidi avọ ahwo riẹ a dhere Ziklag, akotọ orẹwho Filistia okenọ a jẹ dhẹ kẹ Sọl. (1 Samuẹle 27:5-7) Evaọ emu Devidi avọ ahwo riẹ, ogbaẹmo-ọraha ahwo Amalẹk a tẹ mahe okpẹwho na je mu eyae, emọ, gbe uthuru rai kpobi. Nọ a zihe ze jẹ ruẹ oware nọ o via, Devidi avọ ahwo riẹ a tẹ viẹ. Ẹsiẹsiẹ na, uweri u te zihe ruọ ofu kẹsena ahwo na a tẹ ta nọ a rẹ rehọ itho fi Devidi. Dede nọ oware na o kẹ riẹ uye, Devidi o kru udu ga. (Itẹ 24:10) Ozodhẹ nọ o wo kẹ Ọghẹnẹ o wọ riẹ lẹ se Jihova, je “wo eri eva ỌNOWO na.” Avọ obufihọ Ọghẹnẹ, Devidi avọ ahwo riẹ a te le ahwo Amalẹk mu je mi ai eware rai kpobi zihe.—1 Samuẹle 30:1-20.
13, 14. Ẹvẹ ozodhẹ Ọghẹnẹ u ro fi obọ họ kẹ Oleleikristi jọ jẹ uvi iroro?
13 Idibo Ọghẹnẹ a be rẹriẹ ovao dhe iyero nọ o jẹ gwọlọ evaifihọ Jihova gbe uduowha nọ a rẹ rọ jowọ areghẹ. Joma rehọ Kristina wọhọ oriruo. Isẹri Jihova a wuhrẹ Ebaibol na kugbei okenọ ọ jọ uzoge. Rekọ ọ gwọlọ jọ ohwo nọ o re kporo epiano eva arozaha ẹgbede yọ ọ joma le ute yena tobọ no. Ofariẹ, ọ riẹ nọ ọ te siọ usiuwoma ba ẹta ha fikiere ozọ nọ ọ rẹ rọ họ-ame u te je mu ei fiki owha-iruo nọ u re lele ame-ọhọ. Nọ Kristina ọ be ruabọhọ uwuhrẹ Ẹme Ọghẹnẹ na, ọ tẹ be ruẹ ẹgba nọ u wo. O te je wuhrẹ ozodhẹ Jihova jẹ ruẹ nọ Jihova o rẹro nọ idibo Riẹ a rẹ rehọ eva, ẹzi, gbe iroro rai kpobi you rie. (Mak 12:30) Onana o wọ riẹ nọ ọ rọ roma mudhe kẹ Jihova jẹ họ-ame.
14 Kristina ọ yare Jihova kẹ obufihọ nọ o re ro ru ẹnyaharo abọ-ẹzi. Ọ ta nọ: “Mẹ riẹ nọ uzuazọ ahwo nọ a re kporo epiano evaọ arozaha-ẹgbede o gwọlọ nọ a re no oria ruọ oria ẹsikpobi yọ a re zizie ai kpohọ erozaha nọ i re bu te 400 eva ẹgbukpe, fikiere mẹ tẹ ruọ iruo iticha re mẹ sai wo ugho nọ mẹ rẹ rọ rẹrote oma mẹ je ru iruo usiuwoma ota oke-kpobi.” Eva oke yena yọ a zizie Kristina no kẹ ikporakporo ọsosuọ riẹ evaọ ọgwa arozaha nọ ọ viodẹ evaọ orẹwho riẹ. Ọ ta nọ: “Ikporakporo yena ọ nwane jọ ọrọ ọsosuọ gbe ọrọ urere mẹ.” Kristina ọ tẹ te rọo ọzae Oleleikristi jọ nọ ọ rrọ ọkpako ukoko. Enẹna avọ ọzae riẹ a bi ru iruo evaọ uwou ogha Isẹri Jihova jọ. Eva e be were iẹe inọ Jihova ọ kẹ riẹ ẹgba nọ ọ rọ jiroro nọ i woma jẹ be sae rehọ oke gbe ẹgba riẹ ru iruo Riẹ enẹna.
Ukuoriọ Oghaghae
15. Eme Devidi ọ gwọlọ seba kẹ emọ riẹ, kọ ẹvẹ o ro ru ere?
15 Devidi o kere nọ: “Wha nyaze, O whai emezae na, gaviẹezọ kẹ omẹ, me re ti wuhrẹ owhai ozọedhẹ ỌNOWO.” (Olezi 34:11) Wọhọ ọsọmọ, o jọ oware osegboja kẹ Devidi re ọ siọ ukuoriọ oghaghae ba kẹ emọ riẹ—uvi ozodhẹ Jihova. Devidi ọ rehọ ẹkwoma uruemu gbe ẹme-unu dhesẹ Jihova wọhọ Ọsẹ ẹruọsa, oyoyou, nọ ọ rẹ rọ vrẹ emọ otọakpọ Riẹ, orọnikọ Ọghẹnẹ imuozọ nọ ọ rẹ gwọlọ oware nọ u vi ohwo mi ei hi, ọnọ ọ rẹ rọ vrẹ hẹ nọ a tẹ nwane thọ uzi Riẹ jọ. Devidi ọ nọ inọ: “Ono ọ rẹ sae riẹ otọ iruthọ riẹ?” Kẹsena, bi dhesẹ evaifihọ riẹ inọ Jihova ọ be kiẹ gwọlọ ethobọ mai hi, o te fibae nọ: “Ru omẹ fo uno obọ iruthọ ididi mẹ.” Eva abọdekọ riẹ, u mu Devidi ẹro inọ ọ tẹ dao ẹgba riẹ kpobi, iroro gbe ẹme-unu riẹ e te were Jihova.—Olezi 19:12, 14.
16, 17. Ẹvẹ esẹgbini a sai ro wuhrẹ emọ rai ozodhẹ Jihova?
16 Devidi ọ rrọ emamọ oriruo kẹ eyewọ nẹnẹ. Ralph nọ avọ oniọvo riẹ a bi ru iruo evaọ uwou ogha Isẹri Jihova jọ ọ ta nọ: “Ọsẹgboni mai a yọrọ omai evaọ edhere nọ o rọ rrọ omawere kẹ omai re ma jọ ukoko na.” O fibae nọ: “Okenọ ma jọ emaha, a kẹ omai uvẹ nọ ma rẹ rọ tẹme kugbe kpahe iruẹru ukoko na, ma te wo ọwhọ kẹ uzẹme na wọhọ epanọ ae omarai. A yọrọ omai rro ze avọ otoriẹ inọ ma rẹ sai ru eware ezi evaọ egagọ Jihova. Evaọ uzẹme, ikpe buobu uviuwou mai o rria orẹwho nọ ẹgwọlọ kẹ iwhowho-uvie o jọ, je fi obọ họ rehọ ikoko ekpokpọ mu.
17 “Orọnikọ izi buobu nọ e rrọ kekeke a jẹ hai fihọ kẹ omai nọ e kpọ omai họ edhere he, rekọ fikinọ Jihova o mu rai ẹro, a tẹ jẹ ruẹ nọ o ri wowoma jẹ rrọ wowou. O jọ isiuru rai re a riẹ Jihova ziezi je ru ei eva were, yọ ma wuhrẹ no uvi ozodhẹ gbe uyoyou nọ a wo kẹ Ọghẹnẹ ze. Nọ ma te ru oware thọ dede, ọsẹgboni mai a re ru omai roro ho inọ Jihova o gbe you omai hi; yọ a rẹ rehọ evedha fi awhaha họ kẹ omai hi fiki ethobọ na. Ẹsebuobu, a rẹ rehọ omai keria a ve lele omai ta ẹme, ẹsejọ oni mai ọ rẹ ta ẹme kẹ omai avọ irui oviẹ re ẹme na ọ ruẹsi te omai udu. Yọ ona yena u gine ru iruo. Ma wuhrẹ no ẹme gbe uruemu ọsẹgboni mai ze inọ ozodhẹ Jihova u re wowoma, gbe inọ re a jọ omọvo Isẹri Jihova o rẹ kẹ oghọghọ gbe evawere, orọnikọ owha ogbẹgbẹdẹ hẹ.”—1 Jọn 5:3.
18. Erere vẹ ma re wo nọ ma tẹ be dhozọ Ọghẹnẹ uzẹme na?
18 Evaọ usu “eme urere Devidi” ma se nọ: “Nọ ohwo o te su ahwo kiẹrẹe, o te bi suẹ eva ozodhẹ Ọghẹnẹ, o re vẹ mu ai wọhọ elo ohiohiẹ.” (2 Samuẹle 23:1, 3, 4) U muẹro inọ Solomọn, ọmọ Devidi gbe ọnọ ọ rehọ ẹta riẹ o vuhu ẹme nana mu keme ọ yare nọ Jihova ọ kẹe “iroro otọ-oriẹ” gbe ẹgba nọ ọ sae rọ “hẹriẹ oware uwoma ro no uyoma.” (1 Ivie 3:9) Solomọn o vuhumu nọ re a dhozọ Jihova họ edhere areghẹ avọ evawere. Uwhremuna Solomọn ọ rehọ ẹme nana gba obe Ọtausiuwoma Na ekru inọ: “Ukuhọ eme na ona; a yo rai kpobi no. Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo. Keme Ọghẹnẹ ọ rẹte rehọ iruo enana kpobi ze ẹdhoguo, gbe eware nọ a sino kpobi, te iwoma te iyoma.” (Ọtausiwoma Na 12:13, 14) Ma tẹ jẹ uthubro yena rehọ, ma te ginẹ ruẹ nọ areghẹ gbe evawere ọvo họ “osohwa omaurokpotọ avọ ozodhẹ ỌNOWO na” ha, rekọ te “efe, adhẹẹ gbe uzuazọ.”—Itẹ 22:4.
19. Eme o ti fi obọ họ kẹ omai wo otoriẹ “ozodhẹ ỌNOWO na”?
19 Ẹkwoma iriruo Ebaibol gbe erọ ahwo oke mai na, ma ruẹ nọ emamọ ozodhẹ Ọghẹnẹ u re fi obọ họ gaga evaọ uzuazọ idibo uzẹme Jihova. Orọnikọ ozodhẹ utioye na o rẹ sae thọ omai no eruo oware nọ o rẹ dha Ọsẹ obọ odhiwu mai na eva ọvo họ, o rẹ jẹ kẹ omai uduowha nọ ma rẹ rọ rẹriẹ ovao dhe ewegrẹ mai gbe ẹgba nọ ma re ro thihakọ edawọ gbe ọbẹwẹ nọ ma rẹriẹ ovao dhe. Fikiere, jomai emaha gbe ekpako ma roma totọ wuhrẹ Ẹme Ọghẹnẹ, roro-didi kpahe eware nọ ma wuhrẹ, je si kẹle Jihova ziezi ẹkwoma olẹ nọ u re no udu ze kẹse kẹse. Ẹkwoma ere oruo, ma te “ruẹ eriariẹ Ọghẹnẹ” je wo otoriẹ “ozodhẹ ỌNOWO na.”—Itẹ 2:1-5.
[Oruvẹ-obotọ]
^ edhe-ẹme 4 A nwene edẹ na.
^ edhe-ẹme 5 O sae jọnọ onana yọ oware jọ nọ o wọ Devidi kere Olezi avọ 57 gbe 142 na.
Kọ Whọ Sae k’Iyo Nana Vevẹ?
Ẹvẹ ozodhẹ Ọghẹnẹ o sae
• rọ jọ obufihọ kẹ ohwo re ọ wariẹ wo edikihẹ riẹ nọ ọ tẹ thọ uzi ulogbo jọ?
• rọ lẹliẹ ohwo wereva ghelọ edawọ gbe ukpokpoma?
• rọ bọ omai ga ru oreva Ọghẹnẹ?
• rọ jọ ukuoriọ oghaghae kẹ emọ mai?
[Enọ Uwuhrẹ]
[Uwoho nọ o rrọ ẹwẹ-obe avọ 22]
Ozodhẹ Jihova u fi obọ họ kẹ Devidi nọ o gbe ro kpe Sọl ovie na ha
[Iwoho nọ e rrọ ẹwẹ-obe avọ 25]
Ozodhẹ Ọghẹnẹ yọ ukuoriọ oghaghae nọ esẹgbini a rẹ sae kẹ emọ rai