Enọ Ahwo Nọ A s’Ebe

Ẹvẹ ma rọ riẹ nọ udhesẹ odẹme nọ a ro dhesẹ areghẹ eva Itẹ 8:22-31 na u kie kpahe Jesu Kristi evaọ uzuazọ obọ odhiwu riẹ taure ọ tẹ te ziọ otọakpọ?

A rehọ ẹgba ẹzi dhesẹ areghẹ evaọ obe Itẹ inọ: “Ọto muhọ iruo ỌNOWO na ọrọ ma omẹ, eva uruemu anwae ọsosuọ riẹ. . . . Nọ igbehruitho gbe igbehru e te jọ họ, yọ a ma omẹ no; . . . Okenọ ọ ma idhuwu yọ mẹ rọ etẹe, . . . Whaọ yọ mẹ rọ abotọ riẹ, wọhọ osu iruo, mẹ jọ eva-ewerọ kẹ e kẹdẹ kẹdẹ jẹ hae ghọghọ eva aro riẹ kẹse kẹse. . . . jẹ were eva kẹ emọ ahwo.”

O sae jọnọ areghẹ Ọghẹnẹ hayo areghẹ gheghe ikereakere nana ọ be ta ẹme kpahe na ha. Fikieme? Fikinọ a jọ etenẹ dhesẹ nọ a “ma” riẹ wọhọ emuhọ ọrọ emama Jihova. Jihova Ọghẹnẹ o wo emuhọ họ, yọ epọvo na areghẹ riẹ ọ rrọ re. (Olezi 90:1, 2) Areghẹ riẹ o wo emuhọ họ; ‘a ma riẹe he.’ Ofariẹ, a dhesẹ areghẹ nana inọ ọ rẹ ta ẹme je ru oware, onọ u dhesẹ nọ areghẹ na yọ ohwo.—Itẹ 8:1.

Obe Itẹ na o ta inọ notọ avọ otọ ze areghẹ ọ jọ abotọ Jihova, Ọmemama na, wọhọ “osu iruo.” Oyena u gine kie kpahe Jesu. Oke lelehie taure ọ tẹ te ziọ otọakpọ, Jesu o ru iruo kugbe Jihova kpekpekpe te epanọ Ebaibol e rọ ta nọ: “Ọ rọ no re eware na kpobi e tẹ rọ, eva riẹ a je ku eware na gbe.”—Ahwo Kọlọsi 1:17; Eviavia 3:14.

U gine fo nọ a ro dhesẹ Ọmọ Ọghẹnẹ wọhọ areghẹ, keme ọye họ Ohwo nọ o dhesẹ ẹjiroro gbe ijaje Jihova via. Jesu ọ jọ Ọtota hayo Ẹme Ọghẹnẹ taure ọ tẹ te ziọ otọakpọ. (Jọn 1:1) A dhesẹ i rie wọhọ “ogaga gbe areghẹ Ọghẹnẹ.” (1 Ahwo Kọrint 1:24, 30) A riẹ Ọmọ Ọghẹnẹ dhesẹ woma kẹhẹ, ọnọ ọ rehọ fiki uyoyou nọ o wo kẹ ahwo-akpọ si obọ no uzuazọ riẹ wọhọ ẹtanigbo!—Jọn 3:16.

[Uwoho nọ o rrọ ẹwẹ-obe avọ 27]

“Nọ . . . igbehru e te jọ họ, yọ a ma omẹ no”