“No Umuọ Inẹnẹ Vrẹ, Mẹ Rọwo Inọ Ọghẹnẹ Ọ Rrọ”

A LEXANDRA, aye obọ Ukraine jọ nọ ọ be rria Prague, Czech Republic, o je no iruo kpo ẹdẹjọ. Evaọ oria nọ imoto e rẹ jọ wọ ahwo, ọ ruẹ ẹmẹkpa ọsese jọ nọ ahwo a bi thihi vrẹ. Nọ ọ tọlọ ẹmẹkpa na je rovie iei, akpọ o te gbei unu. Igho e vọ riẹ eva! Ọ ruẹ uvumọ ohwo nọ ọ be gwọlọ ẹkpa riẹ nọ o vru hu. Wọhọ ọrara nọ ọ be rria Czech Republic, eware e rrọ Alexandra oma gaga. Kọ eme o re ru?

Nọ o t’uwou, Alexandra o te dhesẹ ẹkpa na kẹ Victoria, ọmọtẹ riẹ. A tẹ kiẹ eva ẹkpa na sọ a rẹ ruẹ odẹ gbe adrẹse ohwo nọ o wo rie, rekọ a ruẹ hẹ. Dede na, ẹwẹ-obe jọ ọ rrọ ẹkpa na nọ a kere inọmba sa-sa fihọ. A kere inọmba nọ a ro fi ugho họ ebanke fihọ ofẹ jọ ẹwẹ-obe na, inọmba efa e rrọ ofẹ odekọ riẹ. Ẹwẹ-obe ọfa ọ tẹ jẹ rrọ ẹkpa na nọ a kere adrẹse ebanke ẹwho na jọ gbe unuigho jọ fihọ, yọ a te nwene unuigho nọ a kere fihọ ẹwẹ-obe na kpohọ igho mai, i bu te enwenọ enaera ima ọvo gbe idu egba ivẹ. Uzedhe ugho nọ o rrọ ẹkpa na oye.

Alexandra ọ daoma re ọ rehọ inọmba jọ nọ ọ ruẹ evaọ ẹkpa na nọ o wọhọ inọmba ifonu ro se ebanke na, rekọ o nya ha. Fikiere tei te ọmọtẹ riẹ a te kpohọ ebanke na, a tẹ ta oware nọ o via. A tẹ nọ kpahe inọmba nọ a ro fi ugho họ ebanke nọ a jọ ẹkpa na ruẹ na. Rekọ, inọmba yena e rrọ ebanke na ha. Okiokiọ riẹ, Alexandra ọ tẹ rehọ inọmba avivẹ nọ ọ jọ ẹkpa na ruẹ na zihe ziọ ebanke na. Kpakiyọ aye jọ nọ ọ rọ ọhreki ebanke na, ọye o wo inọmba yena. Alexandra gbe Victoria a te se aye na, aye na ọ tẹ ta nnọ ẹkpa riẹ o gine vru. Nọ a te ruẹ ohwohwo, aye na o te yere ai ziezi jẹ nọ inọ, “Eme wha gwọlọ nọ mẹ k’owhai fiki ugho na nọ wha zihe ze na?”

Victoria ọ tẹ ta nọ: “Ma gwọlọ uvumọ oware he. Ma hae gwọlọ rehọ ugho na, ma hai zihe iei se owhẹ hẹ.” Dede nọ ọ rẹ sae jẹ ẹvẹrẹ Czech ziezi hi, ọ daoma ta nọ: “Ma bi zihe ugho na kẹ owhẹ keme mai yọ Isẹri Jihova. Obroziẹ-iroro nọ a rehọ Ebaibol wuhrẹ no o kẹ omai uvẹ rehọ oware nọ o rrọ omai ha ha.” (Ahwo Hibru 13:18) Avọ evawere, aye na ọ tẹ ta nọ: “No umuọ inẹnẹ vrẹ, mẹ rọwo inọ Ọghẹnẹ ọ rrọ.”