Tẹrovi Ewoma Ọrọ Ukoko Jihova
Tẹrovi Ewoma Ọrọ Ukoko Jihova
“Eva ewoma uwou ra e rẹ te vọ omai!”—OLEZI 65:4.
1, 2. (a) Ẹvẹ iruo nọ a te jọ etẹmpol na ru u ti kpomahọ ahwo Ọghẹnẹ? (b) Eruẹrẹfihotọ vẹ Devidi o ru kẹ ẹbọ etẹmpol na?
DEVIDI ọrọ Izrẹl anwae yọ ohwo jọ nọ ọ viodẹ nọ a ta ẹme te evaọ Ikereakere Hibru na. Ovie nana nọ ọ jọ othuru-igodẹ, okporo-ile, gbe ọruẹaro na o fi eva kpobi họ Jihova Ọghẹnẹ. Usu okpekpe nọ Devidi o wo kugbe Jihova o wọ riẹ nọ ọ rọ gwọlọ bọ uwou kẹ Ọghẹnẹ. Uwou utioye na, hayo etẹmpol, o te jọ oria oviede egagọ uzẹme evaọ Izrẹl. Devidi ọ riẹ inọ etẹmpol na gbe iruẹru nọ a te jọ eva riẹ ru o te wha oghọghọ gbe eghale se ahwo Ọghẹnẹ. Fikiere Devidi ọ so nọ: “Oghale u te ọnọ whẹ ọ sanọ, no who bigba oma, re ọ te ria eva egua ra! Eva ewoma uwou ra e rẹ te vọ omai, tubọ uwou egagọ-ode ọrẹri ra!”—Olezi 65:4.
2 A kẹ Devidi uvẹ re ọ bọ uwou Jihova ha. Ukpoye, Solomọn ọmọzae riẹ a kẹ uvẹ-ọghọ yena. Devidi ọ go ho fikinọ a rehọ uvẹ-ọghọ oware nọ o jọ isiuru riẹ gaga rọ kẹ omọfa. Oware nọ o mae jariẹ oja họ thakpinọ a bọ etẹmpol na. Ọ rehọ udu kpobi tha ebabọ na ẹkwoma omaa uwou na nọ Jihova ọ kẹ riẹ nọ ọ rehọ kẹ Solomọn. Ofariẹ, Devidi o dhe idu ahwo Livai fihọ ẹkuẹko iruo ọ tẹ zọhọ orro gbe idọlọ-efuafo buobu kẹ ẹbọ etẹmpol na.—1 Iruẹru-Ivie 17:1, 4, 11, 12; 23:3-6; 28:11, 12; 29:1-5.
3. Didi uruemu idibo Ọghẹnẹ a wo kpahe eruẹrẹfihotọ kẹ egagọ uzẹme?
3 Emọ Izrẹl nọ i se egagọ Ọghẹnẹ gboja a tha eruẹrẹfihotọ nọ a ru kẹ egagọ uzẹme evaọ uwou Ọghẹnẹ uke. Wọhọ idibo Jihova erọ ọgbọna, ma be tha eruẹrẹfihotọ nọ a ru kẹ egagọ evaọ abọ otọakpọ ọrọ ukoko Jihova uke. Ma be rọ ere dhesẹ nnọ ma wo oghẹrẹ uruemu nọ Devidi o wo. Ma wo ẹzi eguago ho. Ukpoye, ma be tẹrovi ewoma ukoko Ọghẹnẹ. Kọ who roro kpahe eware buobu nọ u fo nọ ma rẹ rehọ fiki rai kẹ uyere no? Joma ta kpahe ejọ rai.
Ma Wo Ovuhumuo kẹ Enọ E Be Kobaro Na
4, 5. (a) Ẹvẹ ‘ọrigbo nọ o wo ẹrọwọ avọ areghẹ na’ o bi ro ru iruo riẹ gba? (b) Ẹvẹ Isẹri jọ a rri emuore abọ-ẹzi nọ o bi te ai obọ?
4 Ma wo uvi ẹjiroro buobu nọ ma rẹ rọ kẹ uyere fiki ‘ọrigbo nọ o wo ẹrọwọ avọ areghẹ na’ ọnọ Jesu Kristi o ro mu uzou ekwakwa riẹ evaọ otọakpọ. Utu ọrigbo ọrọ Ileleikristi nọ a rọ ẹzi wholo na a be kobaro evaọ iruo ewhowho emamọ usi na, be ruẹrẹ iwuhrẹ họ, je bi kere ebe nọ a re ro wuhrẹ Ebaibol na nọ a be fa fihọ evẹrẹ nọ i bu vi 400. Ima ahwo buobu evaọ otọakpọ na a be rehọ evawere re emuore abọ-ẹzi eva ẹruoke. (Matiu 24:45-47) Ma wo uvumọ ẹjiroro nọ ma rẹ rọ go kpahe ọrigbo na ha.
5 Evaọ ikpe buobu, Elfi, omọvo Isẹri Jihova nọ ọ kpako no, ọ ruẹ omosasọ gbe uketha ẹkwoma efihiruo ohrẹ Ikereakere nọ e rrọ ebe ọ utu ọrigbo na. Uvi ovuhumuo o wọ Elfi kere nọ: “Eme mẹ rẹ sai ru ababọ ukoko Jihova?” Ọzae avọ aye jọ, Pita avọ Irmgard, a gọ Ọghẹnẹ ikpe buobu no. Irmgard ọ kẹ uyere fiki eruẹrẹfihotọ nọ “ukoko Jihova nọ ọ vọ avọ uyoyou gbe ẹruọsa” u bi ru ẹsikpobi. Ebe nana i kugbe enọ a ru kẹ ahwo nọ a wo ẹgwọlọ obọdẹ, wọhọ ahwo nọ a rẹ ruẹ ude tere he hayo enọ i re yo ẹme te he.
6, 7. (a) Ẹvẹ a be rọ rẹrote iruẹru ikoko nọ e rrọ akpọ na soso? (b) Eme ahwo jọ a ta kpahe abọ otọakpọ ọrọ ukoko Jihova?
6 Enọ e rrọ ahwo ẹro ‘ọrigbo ẹrọwọ’ na họ Ugboma Esuo orọ Isẹri Jihova, ẹmẹko ezae jọ nọ a rọ ẹzi wholo nọ i bi ruiruo evaọ oria-uzou Isẹri Jihova evaọ Brooklyn, New York. Ugboma Esuo na o rẹ rehọ ezae nọ i wo eriariẹ ziezi mu re a ruiruo eva iwou ogha nọ e be rẹrote iruẹru ikoko nọ i bu vi 98,000 evaọ otọakpọ na soso. A rẹ rehọ ezae nọ e nyate itee Ebaibol na mu wọhọ ekpako gbe idibo iruiruo evaọ ikoko na. (1 Timoti 3:1-9, 12, 13) Ekpako na a rẹ kobaro a vẹ jẹ rọ uyoyou rẹrote uthuru Ọghẹnẹ nọ a muhọ ae obọ. Ẹvẹ o rrọ oghale ulogbo te re a jọ omọvo uthuru yena jẹ ruẹ uyoyou gbe okugbe nọ ọ rrọ udevie “imoni na”!—1 Pita 2:17; 5:2, 3.
7 Ukpenọ a rẹ go, enọ e rrọ ukoko na a bi dhesẹ uyere rai via rọkẹ uvi ọkpọvio abọ-ẹzi nọ ekpako na a be rọ kẹ ae. Wọhọ oriruo, roro kpahe Birgit, aye uwou-orọo jọ nọ ọ rrọ Oleleikristi nọ ọ rrọ ikpe 30 gbọ. Nọ ọ jọ ikpe ikpegbọ, o te mu ekpehre usu, kiọkọ omojọ re o kie ruọ emuemu. Rekọ ohrẹ uvevẹ nọ ekpako na a kẹ riẹ no Ebaibol ze gbe obufihọ ibe eg’Ọghẹnẹ u fi obọ họ kẹe kẹnoma no uyero nọ o hae wha uye sei. Enẹna, ẹvẹ Birgit o rri oware nọ o via evaọ oke yena? Ọ ta nọ: “Eva e be were omẹ gaga inọ mẹ gbẹ rrọ ukoko Jihova nọ a rẹ ruẹ obọ riẹ hẹ.” Andreas, ọmọzae ikpe 17 jọ, ọ ta nọ: “Ginọ ukoko Jihova ona, ukoko nọ o mai woma kpaobọ evaọ akpọ na.” Kọ ma gbe yere Jihova fiki ewoma ọrọ abọ otọakpọ ukoko riẹ?
Enọ E Be Kobaro na A Gba Ha
8, 9. Uruemu vẹ ahwo jọ evaọ oke Devidi a dhesẹ, kọ ẹvẹ Devidi o ru evaọ uyero yena nọ o wariẹ e riẹ họ na?
8 Uzẹme, enọ a ro mu re a kobaro evaọ egagọ uzẹme a gba ha. Oware o rẹ thọ aikpobi obọ, yọ ejọ a wo eria nọ a jọ yẹlẹ nọ a be daoma kpọvi. Kọ u fo re onana o k’omai uye? Ijo. Makọ ahwo nọ i wo ekwa ilogbo evaọ Izrẹl anwae a ru eware iyoma ilogbo. Wọhọ oriruo, okenọ Devidi ọ gbẹ jọ ọmoha, a se rie re o kporo ile ro ru oma dhẹ Sọl Ovie na nọ ẹzi oyoma o je kpokpo. Uwhremu na, Sọl ọ tẹ jẹ gwọlọ edhere nọ o re ro kpe Devidi, ọnọ ọ te dhẹ no uwou re a siẹe ba ekpe.—1 Samuẹle 16:14-23; 18:10-12; 19:18; 20:32, 33; 22:1-5.
9 Ahwo Izrẹl efa e jariẹ nọ a dhesẹ uruemu ẹghẹ. Wọhọ oriruo, Joab, oletu ogbaẹmo Devidi o kpe Abna, omoni Sọl. Absalọm ọ gba ẹgwae emu nọ ọ gwọlọ ro mi Devidi, ọsẹ riẹ, uvie na. Yọ Ahitofẹl, ọkohrẹ Devidi nọ o fi eva họ, o vivie i rie. (2 Samuẹle 3:22-30; 15:1-17, 31; 16:15, 21) Ghele na, Devidi o zihe ruọ ohwo nọ ọ jẹ fiunu nya ha; yọ ọ dhẹ no egagọ Ọghẹnẹ hẹ. Evaọ uzẹme, eware nọ e via kẹ Devidi i ru rie tubẹ kẹle Ọghẹnẹ viere. Ọ talamu Jihova o te je kru uruemu ezi nọ o wo okenọ ọ dhẹ no uwou fiki Sọl nọ o je lei. Eva oke yena, Devidi ọ so nọ: “Ọghẹnẹ, ohrọ mẹ o re owhẹ, ohrọ mẹ o re owhẹ, keme whẹ họ oria adhẹzọ mẹ; eva otọ uwoho ibekpe ra me re si oma mẹ no họ, bẹsenọ okpofou ọraha na ọ te vrẹ no.”—Olezi 57:1.
10, 11. Eme ọ via kẹ Oleleikristi jọ nọ a re se Gertrud evaọ okenọ ọ jọ ọmoha, kọ eme ọ ta kpahe ethobọ ibe Ileleikristi?
10 Ma jọ ukoko Ọghẹnẹ nẹnẹ wo eviẹhọ họ nọ ma rẹ go kpahe. Jihova hayo ijẹle riẹ hayo esẹro nọ o ro mu a re vu otu irumuomu eviẹhọ wa ukoko Ileleikristi na ha. Ghele na, sebaẹgba o rrọ ẹbẹbẹ kẹ omai kpobi—erọ obọ mai gbe erọ idibo Ọghẹnẹ efa.
11 Okenọ Gertrud, aye jọ nọ ọ gọ Jihova kri no, ọ gbẹ jọ ọmoha, a bọwo riẹ ota inọ ohwo iwhayo ọ rrọ, orọnikọ ọgbodibo oke-kpobi hi. Eme o ru? Kọ Gertrud ọ jẹ go fiki oghẹrẹ nọ a ru rie? Ijo. Taure o te ti whu evaọ 2003 nọ ọ kpako te ikpe 91 no, o roro uzuazọ nọ o yeri no ọ tẹ ta nọ: “Oware yena gbe efa nọ e via i wuhrẹ omẹ inọ ghelọ ethobọ ahwo, Jihova ọ be kpọ iruo riẹ, enọ ọ be rehọ mai ahwo-akpọ nọ e gba ha ru.” Nọ Gertrud ọ ruẹ sebaẹgba ọrọ idibo Ọghẹnẹ efa, ọ rehọ udu riẹ kpobi lẹ se Jihova.
12. (a) Ekpehre oriruo vẹ Ileleikristi jọ evaọ ikpe-udhusoi ọsosuọ a dhesẹ? (b) Eme u fo nọ ma rẹ tọ iroro mai vi?
12 Nọ o rọnọ makọ Oleleikristi nọ ọ mae ga dede ọ gba ha na, okenọ ọkpako hayo odibo oruiruo o te ruthọ, joma ruabọhọ “ru eware kpobi ababọ ẹguọ.” (Ahwo Filipai 2:14) Ẹvẹ u re yoma te otẹrọnọ ma re lele ekpehre oriruo ahwo jọ evaọ ukoko Ileleikristi ikpe-udhusoi ọsosuọ na! Wọhọ epanọ Jud olele na ọ ta, otu-iwuhrẹ erue evaọ oke yena a jẹ “jẹ otu nọ uwuzou fiẹ, jẹ be rehọ otu ehru jijehwẹ.” Ofariẹ, otu oyoma yena a jọ “enọ e rẹ gua-imimẹ, iguiguẹgu.” (Jud 8, 16) Joma whaha uruemu enọ e rẹ go re ma tẹrovi eware ezi nọ i bi no ‘ọrigbo ẹrọwọ’ na obọ ze te omai. Joma yere Jihova kẹ ewoma ukoko riẹ re ma ruabọhọ “ru eware kpobi ababọ ẹguọ.”
“Onana Ẹme Ọgaga”
13. Owọ vẹ ahwo jọ a jẹ kpahe iwuhrẹ Jesu Kristi jọ?
13 Otujọ evaọ ikpe-udhusoi ọsosuọ na a jẹ go kpahe enọ a ro mu na, yọ ejọ e jariẹ re nọ e jẹ go kpahe iwuhrẹ Jesu. Wọhọ epanọ a kere fihọ Jọn 6:48-69 na, Jesu ọ ta nọ: “Ọnọ ọ re oma mẹ ọ tẹ jẹ da azẹ mẹ, o wo uzuazọ ebẹdẹ bẹdẹ.” Nọ a yo onana, “ibuobu ilele riẹ . . . a tẹ ta nọ, ‘Onana ẹme ọgaga; ono o re yoi?’ ” Jesu ọ “riẹ nọ ilele riẹ a be go kẹ onana.” Fiki onana, “ibuobu ilele riẹ jọ a te si oma họ emu, a gbe je lele ie nya ofa ha.” Rekọ orọnikọ ilele na kpobi a go ho. Muẹrohọ oware nọ o via okenọ Jesu ọ nọ ikọ 12 na nọ: “Wha rẹ te nya vrẹ re?” Pita ukọ na ọ tẹ kuyo nọ: “Olori, ono ma rẹ nya brẹ? Who wo ẹme uzuazọ ebẹdẹ bẹdẹ; ma rọwo, ma tẹ riẹ nọ, whẹ họ Omamọ na ọrọ Ọghẹnẹ.”
14, 15. (a) Fikieme eva e rẹ rọ dha otujọ kpahe iwuhrẹ Ileleikristi jọ? (b) Eme ma rẹ sai wuhrẹ no oriruo ọzae nọ a re se Emanuel ze?
14 Evaọ oke mai na, eva e dha umutho ahwo jọ evaọ udevie ahwo Ọghẹnẹ kpahe abọjọ ọrọ iwuhrẹ Ileleikristi no nọ u ru rai go kpahe abọ otọakpọ ọrọ ukoko Jihova. Fikieme onana o be rọ via? Eguago itieye na e rẹ romavia fiki ababọ otoriẹ kpahe edhere nọ Ọghẹnẹ o re ro ru eware. Ọnọma na o re dhesẹ uzẹme na kẹ ahwo riẹ ẹmẹrera. Fikiere, noke ruọ oke, a re ru otoriẹ mai orọ Ikereakere na vẹ. Enwenọ ahwo Jihova kpobi a rẹ ghọghọ kpahe oruvẹ otiọye na. Umutho ahwo jọ a re dhesẹ nọ a “kiẹrẹe hrọ,” a ve veghe uzou kẹ enwene hayo oruvẹ ọkpokpọ na. (Ọtausiwoma Na 7:16) O sae jọnọ omoya o be whae ze, yọ ejọ i re kie ruọ agbefẹ ọrọ elele iroro obọrai. Oware nọ o rẹ whai ze kpobi kẹhẹ, eguago itieye na i re su kpohọ enwoma, keme o rẹ sai si omai zihe kpobọ akpọ na gbe idhere riẹ.
15 Wọhọ oriruo, Emanuel yọ Osẹri ọnọ o wo avro kpahe eware jọ nọ o se ku evaọ ebe ọ ‘ọrigbo nọ o wo ẹrọwọ avọ areghẹ na.’ (Matiu 24:45) Ọ tẹ te siọ ebe ukoko na ba ese, uwhremu na ọ tẹ ta kẹ ekpako na inọ ọ gbẹ gwọlọ jọ omọvo Isẹri Jihova ha. Rekọ u ri kri hi na Emanuel ọ tẹ te ruẹ inọ kpakọ iwuhrẹ ukoko Jihova e gba. Ọ tẹ dhẹ bru Isẹri na, ta inọ o roro thọ, a tẹ rehọ iẹe zihe ze wọhọ omọvo Isẹri Jihova. Fiki onana, evawere riẹ i te zihe ze.
16. Eme ọ rẹ sai fi obọ họ kẹ omai fi avro kpahe iwuhrẹ Ileleikristi jọ kparobọ?
16 Kọ ẹvẹ otẹrọnọ oma o be gwọlọ wọ omai wo avro kpahe iwuhrẹ ukoko Jihova jọ? O tẹ via ere, ma kpakpa oma ha. Ma tẹ rọ udu kpotọ, ‘ọrigbo ẹrọwọ’ na o ti kere oware jọ nọ o te kuyo onọ mai na jẹ lẹliẹ ẹme na vẹ omai ẹro. O rẹ jọ oware areghẹ re ma gwọlọ obufihọ ekpako Ileleikristi. (Jud 22, 23) Olẹ, uwuhrẹ omobọ-ohwo, gbe usu kugbe Ileleikristi nọ i se egagọ Ọghẹnẹ gboja o sai fi obọ họ kẹ omai si avro no eva mai jẹ sai ru nọ ovuhumuo mai kẹ uzẹme Ebaibol nọ o rẹ bọ ẹrọwọ ga nọ ukoko Jihova u bi wuhrẹ omai na u re ro diwi viere.
Rọ Ubiẹro Ezi Rri Eware
17, 18. Ukpenọ ma rẹ go, didi uruemu u fo nọ ma re wo, kọ fikieme?
17 Uzẹme, ahwo-akpọ nọ a gba ha a rẹ sae thọ uzi, yọ ejọ i wo oma nọ a re ro thihakọ họ, a wo uruemu ọ ẹgo. (Emuhọ 8:21; Ahwo Rom 5:12) Rekọ otẹrọnọ oke kpobi ma rẹ go kpahe eware nọ e via, yọ ma bi fi usu mai kugbe Jihova Ọghẹnẹ họ ọza. Fikiere, u re woma otẹrọnọ ma rẹ gba oma mai re ma siọ eguago ba.
18 Ukpenọ ma rẹ go kpahe eware nọ e rrọ ukoko na via, u re woma re ma rọ ubiẹro ezi rri eware jẹ roma kẹ iruo ziezi evaọ ukoko na onọ u re ru omai wo evawere, jọ owowa, jẹ jọ kothi evaọ ẹrọwọ na. (1 Ahwo Kọrint 15:58; Taitọs 2:1-5) Jihova ọ be kpọ eware kpobi nọ e rrọ evaọ ukoko riẹ, yọ Jesu ọ riẹ oware nọ o rrọ ukoko kpobi via, wọhọ epanọ ọ riẹ kpahe ikoko ikpe-udhusoi ọsosuọ na. (Eviavia 1:10, 11) Rehọ ithihakọ hẹrẹ Ọghẹnẹ gbe Kristi, Ọnowuzou ukoko na. A sae rehọ esẹro nọ a ro mu rọ kpọ eware nọ e gwọlọ ẹkpọhọ vi.—Olezi 43:5; Ahwo Kọlọsi 1:18; Taitọs 1:5.
19. Bọwo okenọ Uvie na u ti ro muọ akpọ na họ esu, eme u fo nọ ma rẹ tẹrovi?
19 Kẹle na, akpọ omuomu nana o bi ti kuhọ, Uvie Mesaya na u ve ti muọ iruẹru ahwo-akpọ kpobi họ ẹkpọ. Bọwo oke yena, o roja gaga inọ mai kpobi ma re wo eriwo owoma. Onana u ti fi obọ họ kẹ omai ruẹ uruemu ezi orọ ibe eg’Ọghẹnẹ mai, ukpenọ ma rẹ tẹrovi ethobọ rai. Eva e te were omai otẹrọnọ ma be tẹrovi ewoma rai. Ukpenọ ma rẹ jọ dokpo dokpo eva iroro fiki eguago, ma ve ti wo uduotahawọ gbe ọbọga abọ-ẹzi.
20. Didi eghale eriwo owoma o re fi obọ họ kẹ omai reawere rai?
20 Eriwo owoma o re je fi obọ họ kẹ omai kareghẹhọ eghale buobu nọ ma wo fikinọ ma rrọ usu kugbe abọ otọakpọ ọrọ ukoko Jihova. Ukoko nana ọvo họ ukoko nọ ọ rrọ akpọ na nọ ọ be roma kpotọ kẹ Osu ehrugbakpọ na. Ẹvẹ uzẹme yena o rọ owhẹ oma gbe uvẹ-ọghọ nọ who wo nọ whọ be rọ gọ Ọghẹnẹ uzẹme ọvo na, Jihova? Ajọ uruemu ra o jọ wọhọ orọ Devidi, ọnọ ọ so nọ: “O whẹ họ ọnọ o re yo elẹ! Whẹ họ ọnọ ahwo kpobi a re bru tha. Oghale u te ọnọ whẹ ọ sanọ, no who bigba oma, re ọ te ria eva egua ra! Eva ewoma uwou ra e rẹ te vọ omai!”—Olezi 65:2, 4.
Kọ Whọ Kareghẹhọ?
• Fikieme ma jẹ kẹ uyere fiki iruo enọ e be kobaro evaọ ukoko na?
• Ẹvẹ ma re rri rie otẹrọnọ eware e thọ inievo nọ i wo ọkwa-iruo obọ?
• Ẹvẹ ma re rri oruvẹ kpahe otoriẹ Ikereakere na?
• Eme ọ rẹ sai fi obọ họ kẹ Ileleikristi fi avro kparobọ?
[Enọ Uwuhrẹ]
[Uwoho nọ o rrọ ẹwẹ-obe avọ 8]
Devidi ọ rehọ omaa etẹmpol na kẹ Solomọn ọ tẹ jẹ rehọ udu kpobi tha egagọ uzẹme
[Uwoho nọ o rrọ ẹwẹ-obe avọ 11]
Ekpako Ileleikristi a rẹ rọ evawere kẹ obufihọ abọ-ẹzi