Epanọ A Re Ro Bru “Ọnọ O Re Yo Elẹ” na
Epanọ A Re Ro Bru “Ọnọ O Re Yo Elẹ” na
“O whẹ họ ọnọ o re yo elẹ! Whẹ họ ọnọ ahwo kpobi a re bru tha.”—OLEZI 65:2.
1. Eme o ru ahwo-akpọ wo ohẹriẹ no emama otọakpọ nọ i kiọkọ kpobi, kọ uvẹ vẹ onana u rovie fihọ?
EVAỌ usu idu emama buobu nọ e rrọ otọakpọ na, ahwo-akpọ ọvo họ enọ i wo ẹjiroro Ọghẹnẹ ọgọ. Ahwo-akpọ ọvo a wo ẹgwọlọ abọ-ẹzi je wo isiuru nọ a re ro ru ẹgwọlọ nana gba. Onana o kẹ omai obọdẹ uvẹ nọ ma rẹ rọ jọ usu kugbe Ọsẹ obọ odhiwu mai.
2. Ẹbẹbẹ vẹ uzioraha o wha fihọ usu nọ ohwo-akpọ o wo kugbe Ọnọ ọ ma riẹ?
2 Ọghẹnẹ ọ ma ohwo-akpọ evaọ edhere nọ ọ sae rọ ta ẹme kugbe Ọnọ ọ ma riẹ. A ma Adamu avọ Ivi gbagba. Fikiere, a wo ufuoma nọ a rẹ rọ ta ẹme kugbe Ọghẹnẹ wọhọ epanọ ọmọ ọ rẹ ta ẹme kugbe ọsẹ riẹ na. Rekọ uzioraha u mi rai uvẹ-ọghọ ulogbo yena. Adamu avọ Ivi a ghẹmeeyo kẹ Ọghẹnẹ je ku uvẹ usu okpekpe nọ a wo kugbei na fiẹ. (Emuhọ 3:8-13, 17-24) Kọ oyena u dhesẹ nọ emọ Adamu nọ a reuku sebaẹgba na a gbẹ sai lele Ọghẹnẹ ta ẹme he? Ijo, Jihova ọ gbẹ kuvẹ nọ a lele iei ta ẹme rekọ eva otọ iyero jọ ọvo. Iyero vẹ ye?
Eware nọ O Gwọlọ re Ma te Bru Ọghẹnẹ
3. Ẹvẹ ahwo-akpọ erahizi a sai ro bru Ọghẹnẹ, oriruo vẹ o dhesẹ onana?
3 Oware nọ o via kpahe emọ ivẹ Adamu u fi obọ họ kẹ omai riẹ oware nọ Ọghẹnẹ ọ gwọlọ mi ahwo-akpọ sebaẹgba nọ a gwọlọ bru Rie ze. Keni avọ Ebẹle a daoma bru Ọghẹnẹ ẹkwoma idhe akpẹwẹ nọ a dhe kẹe. A jẹ idhe Ebẹle rehọ rekọ a tẹ siọ erọ Keni. (Emuhọ 4:3-5) Fikieme a rọ rehọ idhe ọjọ siọ ọjọ ba? Ahwo Hibru 11:4 o ta nọ: “Fiki orọwọ jabọ nọ Ebẹle ọ jẹ rehọ ekẹ nọ iwoma nọ e rẹ jaimie vi e rọ Keni dhe idhe kẹ Ọghẹnẹ nọ o je se isẹi kẹe.” Ẹhẹ, o rrọ vevẹ inọ o gwọlọ ẹrọwọ re ma sai bru Ọghẹnẹ eva edhere nọ ọ rẹ jẹrehọ. Ma rẹ sae jọ ẹme nọ Jihova ọ ta kẹ Keni ruẹ oware ofa nọ o gwọlọ mi omai: “Orọnikọ whọ riẹ ru-oyo, a gbe he mi akpẹwẹ ra?” Uzẹme, Ọghẹnẹ ọ hae te jẹ akpẹwẹ Keni rehọ o hẹ jọnọ Keni o kurẹriẹ re o ru ewoma. Rekọ Keni ọ siọ uthubro Ọghẹnẹ, kpe oniọvo riẹ, kẹsena a te lei no udevie ahwo. (Emuhọ 4:7-12) Oyejabọ nọ a ro fi ẹgba họ epanọ u wuzou te no emuhọ ze inọ ohwo nọ o bi bru Ọghẹnẹ o re wo ẹrọwọ je ru iruo iwoma.
4. Eme u fo nọ ma re vuhumu nọ ma tẹ gwọlọ bru Ọghẹnẹ?
4 U wuzou re ma vuhumu inọ mai yọ ahwo-akpọ sebaẹgba nọ ma tẹ gwọlọ bru Ọghẹnẹ. Ahwo-akpọ kpobi a raha uzi, yọ uzioraha họ ọzadhe nọ ohwo ọ tẹ gwọlọ bru Ọghẹnẹ. Jerimaya ọruẹaro na o kere kpahe Izrẹl nọ: “Ma ruthọ . . . Whọ rehọ ẹgho ruru oma ra re olẹ ovuovo o siẹe ba ẹnya lafi.” (Enuobro 3:42, 44) O make rrọ ere na, no ikuigbe ohwo-akpọ ze Ọghẹnẹ ọ be rehọ unevaze yo elẹ ahwo nọ a lẹ sei avọ ẹrọwọ gbe eva ezi, bi koko ijaje riẹ. (Olezi 119:145) Amono a jọ usu ahwo nana, kọ eme ma rẹ sai wuhrẹ nọ elẹ rai ze?
5, 6. Eme ma rẹ sai wuhrẹ no oghẹrẹ nọ Abraham o ro bru Ọghẹnẹ ze?
5 Omọvo ahwo otiọye na jọ họ Abraham. Edhere nọ o ro bru Rie o were Ọghẹnẹ keme O se Abraham nọ “ogbẹnyusu mẹ.” (Aizaya 41:8) Eme ma rẹ sai wuhrẹ no oghẹrẹ nọ Abraham o ro bru Ọghẹnẹ ze? Ọsẹ-orua nana ọ yare Jihova kpahe ọreuku inọ: “Me wo ọmọ ha na, kọ eme whọ rẹ kẹ omẹ?” (Emuhọ 15:2, 3; 17:18) Eva oke ofa jọ, o dhesẹ ọdawẹ riẹ evaọ olẹ kpahe ahwo nọ a ti siwi okenọ Ọghẹnẹ ọ te raha irumuomu evaọ Sọdọm avọ Gomora. (Emuhọ 18:23-33) Abraham ọ tẹ jẹ lẹ kẹ ewoma amọfa. (Emuhọ 20:7, 17) Yọ, wọhọ epanọ Ebẹle o ru, eva ẹsejọ Abraham ọ jẹ hai bru Ọghẹnẹ ẹkwoma idhe nọ o je dhe kẹ Jihova.—Emuhọ 22:9-14.
6 Eva oke nana kpobi na, Abraham o wo ufuoma nọ ọ jẹ rọ ta ẹme kugbe Jihova. Dede na, ufuoma ẹmeọta riẹ o jẹhọ omurokpotọ nọ o wo kpahe edikihẹ riẹ kugbe Ọnọ ọ ma riẹ. Muẹrohọ edhere omurokpotọ nọ ọ rọ ta ẹme kẹ Jihova, nọ a kere fihọ Emuhọ 18:27: “Ri, mẹ rehọ e riẹ re mẹ ruẹse ta ẹme kẹ Ọnowo na, mẹ nọ ọrọ ovu gbe enwo.” Uruemu nana u fo aruorokele kẹhẹ!
7. Didi eware esẹ-orua na a lẹ kpahe se Jihova?
7 Esẹ-orua e lẹ kpahe oghẹrẹ eware sa-sa, yọ Jihova o yo elẹ rai. Jekọp ọ lẹ jẹ ya eyaa evaọ olẹ riẹ. Nọ ọ yare obufihọ Ọghẹnẹ no, ọ tẹ ya eyaa nọ: “Eware no whọ kẹ omẹ na kpobi mẹ rẹ ghale ai kpo abọ akpe, mẹ vẹ rehọ abọ ọvo kẹ owhẹ.” (Emuhọ 28:20-22) Uwhremuna, taure ọ tẹ te nyabru oniọvo riẹ, Jekọp ọ tẹ yare uketha Jihova ta nọ: “Siwi omẹ, mẹ lẹ owhẹ, no obọ oniọvo ọmọzae mẹ, ro no obọ Esọ, keme ozọ riẹ u bi mu omẹ.” (Emuhọ 32:9-12) Job, ọsẹ-orua na ọ lẹ se Jihova kpahe ahwo uviuwou riẹ, ọ jẹ hai dheidhe fiki rai. Okenọ egbẹnyusu esa Job a thuzi evaọ ẹmeọta rai, Job ọ rehọ fiki rai lẹ, “ỌNOWO na o te yo olẹ Job.” (Job 1:5; 42:7-9) Ikuigbe nana i fi obọ họ kẹ omai riẹ eware nọ ma rẹ sae lẹ kpahe se Jihova. Ma te je vuhumu no inọ Jihova ọ ruẹrẹ oma kpahe kẹ epanọ o re ro yo elẹ ahwo nọ a bi bru ei tha eva emamọ edhere.
Eva Otọ Ọvọ Uzi Na
8. Ẹvẹ elẹ ahwo Izrẹl i je ro te Jihova oma eva otọ ọvọ Uzi na?
8 Nọ Jihova o siwi orẹwho Izrẹl no Ijipti no, ọ tẹ kẹ ai ọvọ Uzi na. Uzi na u dhesẹ ọruẹrẹfihotọ epanọ a re ro bru Ọghẹnẹ ẹkwoma izerẹ nọ a ro mu. A rehọ ahwo Livai jọ mu ọkwa izerẹ kẹ ahwo na. Nọ ẹme jọ ọ tẹ roma via nọ o kpomahọ orẹwho soso, ohwo nọ o dikihẹ kẹ orẹwho na—nọ ọ rẹ sai jọ ovie hayo ọruẹaro na—ọ vẹ lẹ se Ọghẹnẹ kpahe ẹme na. (1 Samuẹle 8:21, 22; 14:36-41; Jerimaya 42:1-3) Wọhọ oriruo, eva etoke eromudhe etẹmpol na, Solomọn ovie na ọ rehọ eva riẹ kpobi lẹ se Jihova. Kẹsena, Jihova o te dhesẹ nọ ọ kuyo olẹ Solomọn ẹkwoma oruaro Riẹ nọ ọ rọ vọ uwou na jẹ ta nọ: “Ezọ mẹ i [ti] rovie kẹ olẹ rai eva oria nana.”—2 Iruẹru-Ivie 6:12-7:3, 15.
9. Re a te bru Jihova eva emamọ edhere, eme o gwọlọ nọ a re ru eva aruẹri na?
9 Jihova o fiba Uzi nọ ọ kẹ emọ Izrẹl kpahe oware nọ a re ru eva aruẹri na re ọ tẹ jẹ elẹ rai rehọ. Oware vẹ? U te no erao nọ a re ro dheidhe no, o gwọlọ nọ ozerẹ okpehru na ọ rẹ mahe insẹnse nọ u re gbore awere se Jihova kohiohiẹ kohiohiẹ gbe owọwọ kpobi. Kẹsena, ethabọ-izerẹ na a ve je ru epọvo na u te no Ẹdẹ Omavoro na no. Nọ izerẹ na a gbe ru iruẹru egagọ yena ha, odibọgba rai o rẹ were Jihova ha.—Ọnyano 30:7, 8; 2 Iruẹru-Ivie 13:11.
10, 11. Eme ọ kẹ omai imuẹro inọ Jihova o yo elẹ ahwo na omomọvo?
10 Evaọ Izrẹl anwae, kọ ẹkwoma ahwo ẹro Ọghẹnẹ nọ a ro mu ọvo a jẹ sai ro bru Ọghẹnẹ? Ijo, Ikereakere na i dhesẹ nọ o jọ evawere kẹ Jihova re o yo elẹ ahwo na omomọvo. Evaọ olẹ Solomọn orọ eromudhe etẹmpol na, ọ yare Jihova nọ: “Eghẹrẹ elẹ kpobi te oghẹrẹ ayare kpobi nọ ohwo jọ o ru, hayo ahwo Izrẹl kpobi, . . . ọ jẹ ze evaọ uwou onana te lẹ; who yo no obọ odhiwu ze.” (2 Iruẹru-Ivie 6:29, 30) Ikuigbe Luk e ta kẹ omai nọ okenọ Zekaraya, ọsẹ Jọn Ọhọahwo-Ame na ọ jẹ mahe insẹnse evaọ aruẹri na, yọ ogbotu ahwo nọ a be gọ Jihova nọ a rrọ ọkwa izerẹ na ha yọ a rọ “obọ otafe lẹ.” O rrọ vevẹ inọ ahwo a jẹ hae jọ otafe aruẹri na lẹ nọ ozerẹ ọ tẹ be jọ agbada-idhe nọ a rehọ igoru ru na mahe insẹnse.—Luk 1:8-10.
11 Oyejabọ okenọ a jẹ hae lẹ se Jihova eva emamọ edhere, o je ro yo elẹ ahwo nọ a dikihẹ kẹ orẹwho na soso gbe erọ omomọvo nọ a lẹ sei. Ma gbẹ rrọ otọ ọvọ Uzi na nẹnẹ hẹ. O make rrọ ere na, ma sai wuhrẹ obọdẹ oware kpahe olẹ eva idhere nọ ahwo Izrẹl oke anwae a je ro bru Ọghẹnẹ.
Eva Ọruẹrẹfihotọ Ileleikristi
12. Ọruẹrẹfihotọ vẹ ọ rrọ kẹ Ileleikristi nọ a rẹ sae rehọ ẹkwoma riẹ bru Jihova?
12 Enẹna ma be ria evaọ otọ ọruẹrẹfihotọ Ileleikristi. Etẹmpol nọ a rẹ rẹro ruẹ ọ gbẹ riẹ hẹ, nọ izerẹ a rẹ jọ dikihẹ kẹ ahwo Ọghẹnẹ kpobi hayo nọ ma rẹ jọ nyabru izerẹ nọ ma tẹ gwọlọ lẹ se Ọghẹnẹ. O make rrọ ere na, Jihova o gbe wo ọruẹrẹfihotọ kẹ omai nọ ma rẹ rọ lẹ sei. Ọruẹrẹfihotọ vẹ? Evaọ 29 C.E., nọ a ro wholo Kristi jẹ rehọ iẹe mu Ozerẹ Okpehru, etẹmpol abọ-ẹzi o te mu iruo họ. * Etẹmpol abọ-ẹzi nana họ ọruẹrẹfihotọ ọkpokpọ nọ Jihova o ru nọ a be rọ gọe ẹkwoma obufihọ idhe ofu-okie Jesu Kristi na.—Ahwo Hibru 9:11, 12.
13. Edhere jọ vẹ iruẹru etẹmpol obọ Jerusalẹm gbe etẹmpol abọ-ẹzi na i ro tho ohwohwo eva abọ olẹ?
13 Eware buobu nọ a je ru evaọ etẹmpol obọ Jerusalẹm na e nwani dhesẹ eruẹrẹfihotọ nọ e rrọ etẹmpol abọ-ẹzi na, te enọ i kpomahọ olẹ. (Ahwo Hibru 9:1-10) Wọhọ oriruo, eme insẹnse nọ a jẹ hae mahe te ohiohiẹ te owọwọ eva aruẹri insẹnse nọ ọ jọ ubrukpẹ Ọrẹri etẹmpol na o dikihẹ kẹ? Wọhọ epanọ obe Eviavia o ta, ‘ulẹri [insẹnse] emahọ nọ i re gbo ore-awere na, u dikihẹ kẹ elẹ erezi na.’ (Eviavia 5:8; 8:3, 4) Devidi ọ rrọ ẹgba ẹzi kere nọ: “Jọ a ruẹrẹ olẹ mẹ họ wọhọ insẹnse eva aro ra.” (Olezi 141:2, NW ) Oyejabọ o rrọ nwani fo nọ insẹnse nọ i re gbo ore-awere u dikihẹ kẹ elẹ gbe ujiro se Jihova evaọ ọruẹrẹfihotọ Ileleikristi na—1 Ahwo Tẹsalonika 3:10.
14, 15. Eme ma rẹ sae ta kpahe oghẹrẹ nọ: (a) Ileleikristi nọ a wholo na a bi ro bru Ọghẹnẹ? (b) “igodẹ efa” na a bi ro bru Ọghẹnẹ?
14 Ono ọ rẹ sai bru Ọghẹnẹ eva ọruẹrẹfihotọ etẹmpol abọ-ẹzi nana? Eva etẹmpol ahwo Izrẹl oke anwae, izerẹ gbe ahwo Livae na a wo uvẹ nọ a rẹ rọ ruọ ubruwou obeva na, rekọ izerẹ na ọvo a rẹ sae ruọ oria Ọrẹri na. Ileleikristi nọ a wholo nọ i wo ẹruore obọ odhiwu na a wo uvẹ oghẹrẹsa orọ uyero abọ-ẹzi nọ u dikihẹ kẹ ubruwou obeva gbe oria Ọrẹri na, onọ o kẹ rai uvẹ nọ a rẹ rọ lẹ se je jiri Ọghẹnẹ.
15 Kọ ẹvẹ kpahe ahwo nọ a wo ẹruore otọakpọ, nọ a se “igodẹ efa” na? (Jọn 10:16) Aizaya ọruẹaro na o dhesẹ nọ ahwo erẹwho buobu a te nyaze te gọ Jihova eva ‘edẹ urere na.’ (Aizaya 2:2, 3) O te je kere nọ “erara” a ti ku oma kugbe gọ Jihova. Ro dhesẹ nọ ọ te jẹ oghẹrẹ nọ a ro bru ei ze evaọ olẹ rehọ, Ọghẹnẹ ọ ta nọ: “Me re ti ru ai eva-were evaọ uwou olẹ mẹ.” (Aizaya 56:6, 7) Eviavia 7:9-15 o kẹ evuẹ efa kpahe onana, o ta kpahe “otu obuobu” nọ a no “erẹwho kpobi” ze nọ i kokohọ kẹ egagọ jẹ be lẹ se Ọghẹnẹ “taso tuvo” eva otafe uwou-egagọ ọrọ etẹmpol abọ-ẹzi na. O kẹ omosasọ kẹhẹ nọ ma rọ riẹ nọ idibo Ọghẹnẹ kpobi nẹnẹ a wo ufuoma ẹmeọta nọ a sai ro bru Ọghẹnẹ avọ udufihọ inọ o bi yo elẹ rai!
Elẹ vẹ Ọghẹnẹ Ọ rẹ Jẹrehọ?
16. Eme ma rẹ sai wuhrẹ kpahe olẹ rono elẹ Ileleikristi ọsosuọ na ze?
16 Ileleikristi ọsosuọ na a jẹ hae lẹ gaga. Eme a jẹ hae lẹ kpahe? Ekpako Ileleikristi a yare ọkpọvio nọ a rẹ rọ salọ ahwo kẹ ewha-iruo ukoko na. (Iruẹru 1:24, 25; 6:5, 6) Ẹpafras ọ kareghẹhọ ibe eg’Ọghẹnẹ riẹ evaọ olẹ. (Ahwo Kọlọsi 4:12) Ahwo ukoko nọ o jọ obọ Jerusalẹm a lẹ roro Pita evaọ okenọ ọ jọ uwou-odi. (Iruẹru 12:5) Ileleikristi ọsosuọ a yare nọ Ọghẹnẹ ọ kẹ ai aruọwha okenọ a jọ otọ ukpokpoma, inọ: “Ọnowo . . . ru kẹ idibo ra re a wo aruọwha nọ a rẹ rọ ta ẹme ra.” (Iruẹru 4:23-30) Jemis olele na ọ ta udu họ Ileleikristi awọ re a lẹ se Ọghẹnẹ kẹ areghẹ nọ a tẹ rrọ otọ odawọ. (Jemis 1:5) Kọ whọ be hai fi eme itieye na ba elẹ ra se Jihova?
17. Elẹ amono Jihova ọ rẹ jẹrehọ?
17 Elẹ kpobi Ọghẹnẹ ọ rẹ jẹ rehọ họ. Nọ o rrọ ere na, kọ ẹvẹ ma sae rọ lẹ avọ imuẹro inọ Ọghẹnẹ ọ te jẹ elẹ mai rehọ? Ahwo oke anwae nọ a wo ẹrọwọ nọ Ọghẹnẹ ọ gaviezọ kẹ elẹ rai a rehọ emamọ eva gbe oma oruọzewọ lẹ sei. A dhesẹ ẹrọwọ jẹ rehọ iruo ezi tua ẹrọwọ rai. O rẹ sai mu omai ẹro nọ Jihova ọ te gaviezọ kẹ ahwo nọ a rehọ edhere ọvona nya bru ei nẹnẹ.
18. Eme Ileleikristi a re ru re Ọghẹnẹ ọ sai yo elẹ rai?
18 O gbẹ gwọlọ oware ofa. Pọl ukọ na o ru onana vẹ, ọ ta nọ: “Fiki riẹ ma ro wo uvẹ eva Ẹzi ọvo na ro bru Ọsẹ na.” Ono Pọl o wo họ iroro nọ o kere inọ “fiki riẹ”? Jesu Kristi họ ọnọ o wo họ iroro. (Ahwo Ẹfẹsọs 2:13, 18) Ẹhẹ, ẹkwoma Jesu ọvo ma sai ro wo ufuoma ẹmeọta nọ ma re ro bru Ọsẹ na.—Jọn 14:6; 15:16; 16:23, 24.
19. (a) Oke vẹ insẹnse nọ a jẹ mahe evaọ Izrẹl i ro mu Jihova eva họ ẹdha? (b) Eme ma re ru re ma ruẹ nọ elẹ mai e wọhọ insẹnse nọ i re gbo ore awere se Jihova?
19 Wọhọ epanọ ma ta no vẹre na, insẹnse nọ izerẹ Izrẹl a jẹ hae mahe na i dikihẹ kẹ elẹ idibo Ọghẹnẹ nọ i wo ẹrọwọ nọ ọ rẹ jẹrehọ. Dede na, insẹnse nọ ahwo Izrẹl a jẹ mahe na e jẹ hae dha Jihova eva evaọ ẹsejọ. Ere o jọ eva okenọ ahwo Izrẹl a jẹ mahe insẹnse evaọ etẹmpol na rekiyọ a bi guzou kpotọ kẹ emedhọ eva oke ovona. (Izikiẹl 8:10, 11) Epọvo na o rrọ nẹnẹ, elẹ ahwo nọ a ta inọ a be gọ Jihova rekiyọ a bi ru iruemu nọ e rọwokugbe izi riẹ hẹ i re gbo ekpehre ore se ei. (Itẹ 15:8) Fikiere, jọ abọ mai ọ fo evaọ kabọ kabọ uzuazọ mai re elẹ mai e ruẹse jọ wọhọ insẹnse nọ i re gbo ore awere se Ọghẹnẹ. Elẹ ahwo nọ a rẹ nya evaọ edhere ẹrẹreokie e rẹ were Jihova. (Jọn 9:31) Dede na, enọ jọ e gbẹ riẹ nọ ma re kiyo rai hi. Ẹvẹ u fo nọ ma rẹ rọ lẹ? Eme ma rẹ sae lẹ kpahe? Gbe ẹvẹ Ọghẹnẹ ọ rẹ rọ kpahe fihọ elẹ mai? Uzoẹme nọ ma bi ti te na o te ta ẹme kpahe enọ nana gbe efa.
[Oruvẹ-obotọ]
^ edhe-ẹme 12 Rri Uwou-Eroro Na, June 1, 2001, ẹwẹ-obe avọ 31.
Kọ Whọ Sae k’Iyo Nana Vevẹ?
• Ẹvẹ ahwo-akpọ nọ a gba ha a sai ro bru Ọghẹnẹ eva edhere nọ ọ rẹ jẹrehọ?
• Ẹvẹ ma sae rọ raro kele esẹ-orua na evaọ elẹ mai?
• Eme ma wuhrẹ no elẹ Ileleikristi ọsosuọ na ze?
• Oke vẹ elẹ mai e rẹ rọ jọ wọhọ insẹnse nọ i re gbo ore awere se Ọghẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 19]
Eme ọ soriẹ nọ Ọghẹnẹ ọ rọ jẹ idhe Ebẹle rehọ nọ ọ gbẹ jẹ erọ Keni rehọ họ?
[Uwoho nọ o rrọ ẹwẹ-obe avọ 20]
‘Mẹ yọ ovu gbe enwo’
[Uwoho nọ o rrọ ẹwẹ-obe avọ 21]
“Mẹ rẹ ghale ai kpo abọ akpe, mẹ vẹ rehọ abọ ọvo kẹ owhẹ”
[Uwoho nọ o rrọ ẹwẹ-obe avọ 22]
Kọ elẹ ra e wọhọ insẹnse nọ i re gbo ore awere se Jihova?