“Fiki Ọmọzae Ikpe-Izii”

OKE kpobi nọ Isẹri Jihova a te kporo ẹthẹ Wiesława nọ ọ be rria ofẹ obọze ovatha-ọre Poland, ọ vẹ rehọ oma kpotọ yere ai jẹ ta nọ ọ gwọlọ yo ho. Nọ u te ẹdẹjọ, Samuel nọ ọ rrọ ikpe-izii avọ oni riẹ a tẹ nyate unuẹthẹ aye na. Orọ ọgbọna, Wiesława ọ tẹ gaviezọ kẹ ovuẹ rai jẹ rehọ emagazini nọ uzoẹme riẹ u kie kpahe aparadase otọakpọ.

Fikinọ oke Ekareghẹhọ uwhu Jesu Kristi o be kẹlino, Samuel ọ tẹ gwọlọ nọ o re zizie Wiesława kpohọ ekareghẹhọ obọdẹ nana. Fikiere, Samuel avọ oni riẹ a tẹ wariẹ zihe bru aye na avọ omobe uzizie nọ ọ wha lele oma. Nọ ọ ruẹ nọ osẹ ọmọ na o rrọ kpatiẹ, Wiesława o te mi ai uvẹ omoke kpẹkpẹ, o te zihe ruọ evaọ uwou re o ku emamọ ewu họ. Nọ o zihe no evaọ uwou ze, ọ tẹ gaviezọ kẹ Samuel, jẹ uzizie na rehọ, jẹ nọ inọ: “Mẹ ọvo mẹ nyaze manikọ mẹ avọ ọzae mẹ?” O te je fibae nọ: “Ọzae mẹ ọ gbẹ make nyaze dede he, mẹ te nyaze. Mẹ te nyaze fiki ra, Samuel.” Eva e were Samuel, keme aye na ọ ginẹ nyaze.

Samuel ọ keria kẹle Wiesława je dhesẹ eria ikereakere nọ a fodẹ kẹe eva etoke ẹme Ekareghẹhọ na. Onana u si aye na urru. Ọ reawere Ekareghẹhọ na jẹ kẹ uyere fiki epanọ a rehọ edhere ọlọlọhọ rọ fotọ eware ididi eva ovuẹ na. Oware ofa nọ o were riẹ gaga re họ, odederehọ ọsasa gbe ẹwo nọ ahwo ukoko na a dhesẹ kẹe. Anwọ oke yena ze, isiuru Wiesława kẹ eware nọ i kpomahọ egagọ Ọghẹnẹ i bi dhe ẹruẹruọ yọ enẹna, o mu oma họ ekugbe Isẹri Jihova no ẹsikpobi. Ọ ta kẹlena inọ: “Oma o be vuọ omẹ inọ oke ọsosuọ mẹ jẹ hae gaviezọ kẹ owhai hi nọ wha tẹ ziọ uwou mẹ. Yọ evaọ uzẹme, fiki ọmọzae ikpe-izii mẹ rọ gaviezọ kẹ ovuẹ rai, fiki Samuel.”

Wọhọ Samuel obọ Poland na, emaha Isẹri Jihova buobu a be rehọ unu gbe uruemu ezi rai jiri Ọghẹnẹ. Otẹrọnọ whẹ yọ ọmaha, whọ sai fi obọ họ kẹ ahwo oruọzewọ wo isiuru kẹ obọdẹ iwuhrẹ Ọghẹnẹ re.