“Nọ Iyei Epanọ Whọ Guọlọ Kẹ Ọghẹnẹ”
“Nọ Iyei Epanọ Whọ Guọlọ Kẹ Ọghẹnẹ”
“Eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ.”—AHWO FILIPAI 4:6.
1. Ono ma wo uvẹ ẹmeọta kugbe, kọ fikieme uvẹ yena u ro gbunu gaga?
WHỌ tẹ yare nọ whọ gwọlọ ta ẹme kugbe osu orẹwho ra, ẹvẹ who roro nọ a te kpahe fihọ ayare ra? Ahwo nọ a rrọ otọ riẹ a sae rehọ edhere owowolẹ kpahe fihọ ayare na, rekọ o nwane lọhọ họ re a kẹ owhẹ uvẹ lele osu na ta ẹme. Rekọ, uyero na u wo ohẹriẹ nọ whọ tẹ gwọlọ ta ẹme kugbe Jihova Ọghẹnẹ, Osu ehrugbakpọ na. Ma rẹ sae ta ẹme kugbe Jihova eva oria kpobi nọ ma rrọ gbe oke kpobi nọ ma gwọlọ. Ẹsikpobi elẹ nọ ọ rẹ jẹrehọ i re tei oma. (Itẹ 15:29) Oyena u gbunu kẹhẹ! Kọ ovuhumuo nọ ma wo kẹ uvẹ nana nọ ma wo na o gbẹ wọ omai lẹ se “Ọnọ o re yo elẹ” na ẹsikpobi?—Olezi 65:2.
2. Re Ọghẹnẹ ọ ruẹse jẹ elẹ mai rehọ, eme o wuzou?
2 Dede na, ohwo ọ sae nọ inọ, ‘Elẹ vẹ Ọghẹnẹ ọ rẹ jẹrehọ?’ Ebaibol na o dhesẹ vevẹ oware jọ nọ u wuzou nọ Ọghẹnẹ ọ jẹ sae jẹ elẹ rehọ nọ o ta nọ: “O rẹ bẹbẹ re ohwo ọ were Ọghẹnẹ ababọ ẹrọwọ. Keme ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe ọ rẹ te hwosa kẹ e nọ e guọlọ e riẹ.” (Ahwo Hibru 11:6) Ẹhẹ, wọhọ epanọ ma ta ẹme te evaọ uzoẹme nọ u kpemu na, ugogo oware nọ u wuzou evaọ elẹ mai se Ọghẹnẹ họ ẹrọwọ. U no Ọghẹnẹ eva ze re o yo elẹ ahwo nọ a bru rie ze, thakpinọ a lẹ avọ ẹrọwọ je bi ru iruo iwoma, jẹ rrọ oruọzewọ avọ eva efuafo.
3. (a) Wọhọ epanọ elẹ idibo Ọghẹnẹ oke anwae nọ i wo ẹrọwọ i dhesẹ na, oghẹrẹ eme vẹ ma rẹ sai fiba elẹ mai? (b) Didi elẹ ma rẹ sae lẹ?
3 Pọl ukọ na ọ hrẹ Ileleikristi erọ oke riẹ nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ.” (Ahwo Filipai 4:6, 7) Iriruo ahwo buobu nọ a lẹ kẹ Ọghẹnẹ kpahe ọdawẹ rai e rrọ Ebaibol na. Ejọ rai họ Hana, Elaeja, Hẹzikaya, gbe Daniẹl. (1 Samuẹle 2:1-10; 1 Ivie 18:36, 37; 2 Ivie 19:15-19; Daniẹl 9:3-21) U fo re ma raro kele oriruo rai. Muẹrohọ re inọ ẹme Pọl na o dhesẹ nọ elẹ mai e rẹ sae jọ oghoghẹrẹ. Ọ fodẹ uyere-okẹ, koyehọ, olẹ nọ ma re ro yere Ọghẹnẹ kẹ eware nọ o bi ru kẹ omai. Ujiro o rẹ sai lele onana. Olẹ-ayare u dhesẹ omurokpotọ gbe osegboja nọ ma rẹ rọ lẹ se Ọghẹnẹ kẹ oware nọ ma gwọlọ. Ma rẹ sae jẹ nọ iyei, hayo yare Ọghẹnẹ rọ kẹ ugogo oware jọ nọ ma gwọlọ. (Luk 11:2, 3) O rẹ were Ọsẹ obọ odhiwu mai re ma rehọ edhere jọ evaọ usu enọ ma fodẹ na lẹ sei.
4. Dede nọ Jihova ọ riẹ ẹgwọlọ mai, fikieme ma jẹ yare iẹe ghele?
4 Ahwo jọ a rẹ sae nọ inọ, ‘Kọ Jihova ọ gbẹ riẹ eware kpobi nọ ma gwọlọ?’ Ee, ọ riẹ. (Matiu 6:8, 32) Otẹrọ ere, kọ fikieme ọ jẹ gbẹ gwọlọ nọ ma lẹ sei kpahe oware nọ ma gwọlọ? Muẹrohọ oriruo nana: O sae jọnọ ọthueki jọ ọ ta kẹ ehreki riẹ nọ o wo okẹ nọ ọ gwọlọ rọ kẹ ai. Dede na, re okẹ na o ruẹsi te ehreki na obọ, o gwọlọ nọ a rẹ nyaze te rehọ ọvuọvuọ oriẹ. Nọ ehreki jọ a gbẹ nyaze te rehọ orai hi kiyọ u dhesẹ nọ okẹ na o were rai he. Epọvo na re, nọ ma gbẹ lẹ se Ọghẹnẹ kpahe eware nọ ma gwọlọ họ kiyọ u dhesẹ nọ eware nọ Jihova ọ ruẹrẹfihọ kẹ omai e were omai hi. Jesu ọ ta nọ: “Yare, wha re ti wo.” (Jọn 16:24) Enẹ ma re ro dhesẹ nọ ma rẹroso Ọghẹnẹ.
Ẹvẹ U fo nọ Ma rẹ rọ Lẹ?
5. Fikieme o jẹ gwọlọ nọ odẹ Jesu ma rẹ rọ lẹ?
5 Jihova o fi izi egaga họ kẹ omai kpahe oghẹrẹ nọ ma rẹ rọ lẹ hẹ. O make rrọ ere na, u fo nọ ma rẹ riẹ emamọ edhere nọ ma re ro bru Ọghẹnẹ, nọ a dhesẹ fihọ Ebaibol na. Wọhọ oriruo, Jesu o wuhrẹ ilele riẹ nọ: ‘Oware nọ wha jọ obọ Ọsẹ na yare, ọ rẹ te rehọ fiki odẹ mẹ kẹ owhai.’ (Jọn 16:23) Fikiere, o gwọlọ nọ odẹ Jesu ma rẹ rọ lẹ, vuhu Jesu mu wọhọ ugogo edhere nọ eghale Ọghẹnẹ i re ro te ahwo-akpọ kpobi obọ.
6. Ẹvẹ ma re fi oma họ nọ ma tẹ be lẹ?
6 Ẹvẹ ma re fi oma họ nọ ma tẹ be lẹ? A jọ Ebaibol na dhesẹ oghẹrẹ jọ nọ ma re fi oma họ re a te yo elẹ mai hi. (1 Ivie 8:22; Nehemaya 8:6; Mak 11:25; Luk 22:41) Oware nọ u wuzou họ thakpinọ ma lẹ avọ oma oruọzewọ gbe eva efuafo.—Joẹl 2:12, 13.
7. (a) Eme họ otofa ọ “ami”? (b) Ẹvẹ u fo nọ a rẹ rọ rehọ iẹe ru iruo evaọ etoke olẹ?
7 Kọ ẹvẹ kpahe “ami” nọ a re bo evaọ olẹ na? Ikereakere na i dhesẹ nọ ere u fo nọ ma re ro ku elẹ mai họ, maero nọ ma tẹ be lẹ evaọ ẹgbede. (Olezi 72:19; 89:52) Ugogo otofa ẹme Hibru na ʼa·menʹ họ, “ere o rẹ jọ.” Obe Cyclopedia nọ McClintock avọ Strong a kere u dhesẹ nọ re a bo nọ “Ami” evaọ ekuhọ olẹ yọ ohwo ọ be “kẹ imuẹro ẹme nọ ọ ta na, jegbe nọ jọ o jọ ere.” Fikiere, nọ o te bo “Ami” no eva ze evaọ ekuhọ olẹ, yọ ohwo nọ ọ be lẹ na o bi dhesẹ epanọ o gine roro nọ ẹme nọ ọ ta evaọ olẹ na o rẹ jọ. Nọ ohwo nọ ọ be lẹ evaọ ukoko Ileleikristi ọ tẹ rehọ “Ami” ku olẹ họ no, ahwo nọ a be gaviezọ a re yo họ eva hayo do via epọvona, ro dhesẹ nọ a rọwo kugbe ẹme nọ a ta evaọ olẹ na vọvọ.—1 Ahwo Kọrint 14:16.
8. Ẹvẹ elẹ mae jọ e sai ro tho erọ Jekọp hayo Abraham, kọ eme onana u re dhesẹ kpahe omai?
8 Oke jọ o rẹ ja riẹ nọ Ọghẹnẹ ọ sae rọ gwọlọ nọ ma dhesẹ epanọ ọdawẹ mai ọ ga te kpahe oware nọ ma be lẹ kẹ na. Ma rẹ sae jọ wọhọ Jekọp oke anwae, ọnọ o muabọ kugbe ẹnjẹle bẹsenọ oke o rọ ke re oghale o ruẹsi tei obọ. (Emuhọ 32:24-26) Oghẹrẹ uyero jọ o jẹ sae lẹliẹ omai jọ wọhọ Abraham, ọnọ ọ lẹ se Jihova unuẹse buobu rọkẹ Lọt gbe ahwo ikiẹrẹe efa nọ o rẹ sae wọhọ nọ i kiọkọ Sodọm. (Emuhọ 18:22-33) Ma rẹ sae lẹ se Jihova epọvo na re kpahe eware nọ ma rri ghaghae, yare iẹe re ọ rehọ fiki uvi-ẹdhoguo, uyoyou-ẹwo, gbe ohrọ riẹ ru ẹgwọlọ mai kẹ omai.
Eme Ma rẹ Sae Lẹ Kpahe?
9. Eme u fo nọ o rẹ mae jọ omai oja nọ ma tẹ be lẹ?
9 Kareghẹhọ nọ Pọl ọ ta inọ: ‘Eva koware koware . . . nọ iyei epanọ whọ guọlọ kẹ Ọghẹnẹ.’ (Ahwo Filipai 4:6) Fikiere, a rẹ sai dhunu te eware nọ i kpomahọ kabọ kabọ uzuazọ kpobi evaọ elẹ omobọ ohwo. Dede na, u fo nọ isiuru nọ ma re wo kpahe Jihova o rẹ jọ oware ọsosuọ evaọ elẹ mai. Daniẹl o fi obọdẹ oriruo hotọ evaọ onana. Okenọ uye u je te ahwo Izrẹl fiki izieraha rai, Daniẹl ọ lẹ nọ Jihova ọ re ai ohrọ inọ: “Whọ raha oke he, fiki odẹ ra O Ọghẹnẹ mẹ.” (Daniẹl 9:15-19) Kọ elẹ mai i bi dhesẹ epọvo na inọ erufuọ odẹ Jihova gbe erugba oreva riẹ họ eware nọ e mae rrọ omai oja?
10. Ẹvẹ ma rọ riẹ nọ u fo re a lẹ kpahe ẹgwọlọ omobọ ohwo?
10 U fo re inọ ma rẹ yare eware nọ i kie kpahe ẹgwọlọ omobọ mai. Wọhọ oriruo, wọhọ ọso-ilezi na, ma rẹ sae lẹ kẹ otoriẹ udidi orọ ẹme Ọghẹnẹ. Ọ lẹ nọ: “Kẹ omẹ orimuo, re me koko izi ra, mẹ vẹ jẹ rehọ eva mẹ kpobi koko ie.” (Olezi 119:33, 34; Ahwo Kọlọsi 1:9, 10) Jesu ọ “kpare uru whahwa avọ oviẹ jẹlẹ elẹ gbe ayare, kẹ ọ nọ ọ rẹ sai si ei no uwhu.” (Ahwo Hibru 5:7) Ọ rehọ ere oruo dhesẹ nọ u fo re a lẹ kẹ uduowha nọ ohwo ọ tẹ rẹriẹ ovao dhe ọza hayo odawọ. Okenọ o je wuhrẹ ilele riẹ olẹ olori na, Jesu o dhunu te ọdawẹ omobọ ohwo, wọhọ erọvrẹ izieraha gbe ewo emu okpẹdẹ.
11. Ẹvẹ olẹ o sai ro fi obọ họ kẹ omai nọ ma gbe ro kie kẹ edawọ họ?
11 Evaọ olẹ olori na, Jesu ọ yare re inọ: “Who su omai ruọ ẹdawọ họ, rekọ si omai no eyoma.” (Matiu 6:9-13) Kẹsena ọ tẹ hrẹ ilele na inọ: “Wha roro hẹ lẹ, re wha siọ ẹdawọ ba ẹruọ.” (Matiu 26:41) Olẹ o roja eva okenọ ma tẹ rẹriẹ ovao dhe ẹdawọ. A rẹ sae gwọlọ ru omai gbabọkẹ ehri izi Ebaibol evaọ oria iruo hayo obọ isukulu. Ahwo nọ a rrọ Isẹri hi, a rẹ sai zizie omai re ma lele ai wobọ evaọ iruẹru nọ i fo kẹ Ileleikristi hi. A sae gwọlọ nọ ma ru oware jọ nọ o wọso itee uruemu ezi. Eva oke utioye na, wọhọ epanọ Jesu ọ ta u re fo re ma lẹ—taure ma tẹ te rẹriẹ ovao dhe odawọ utioye na gbe okenọ odawọ na o tẹ roma via no—yare Ọghẹnẹ inọ o fi obọ họ kẹ omai re ma seba ekie.
12. Didi eware e rẹ wha awa-ọruọ ze nọ e rẹ sae lẹliẹ omai lẹ, kọ eme ma rẹ sai rẹro riẹ mi Jihova?
12 Itunyẹ gbe awa-ọruọ sa-sa e rẹ roma via evaọ uzuazọ idibo Ọghẹnẹ nẹnẹ. Ẹyao gbe idhọvẹ iroro yọ ugogo eware nọ e rẹ lẹliẹ ahwo buobu ruawa. Ozighi nọ ọ wariẹ omai họ o rẹ kẹ omai idhọvẹ evaọ uzuazọ. Ẹgaga uyere-akpọ o re ru nọ o jẹ jọ bẹbẹ re ma sae ruẹ emu okpẹdẹ. Ẹvẹ o rrọ oware omosasọ te nọ ma rọ riẹ nọ Jihova ọ be gaviezọ kẹ idibo riẹ nọ e be lẹ sei kpahe ebẹbẹ nana! Olezi 102:17 ọ ta kpahe Jihova nọ: “O re ti yo olẹ oyogbere, ọ rẹ te jẹ ayare rai fiẹ hẹ.”
13. (a) Ọdawẹ omobọ ohwo vẹ u fo nọ a rẹ lẹ kpahe? (b) Gbiku oriruo ọrọ oghẹrẹ olẹ utioye na jọ.
13 Ginọ uzẹme, oware kpobi nọ u kpomahọ odibọgba mai kẹ Jihova hayo usu nọ ma wo kugbei u fo oware nọ ma rẹ sae lẹ kpahe. (1 Jọn 5:14) Who te wo iroro jọ nọ whọ gwọlọ jẹ kpahe orọo hayo okọ-ugho hayo kpahe epanọ who ro ru odibọgba ra kẹre, whọ raha oke he re whọ tẹ lẹ se Ọghẹnẹ kẹ ọkpọvio. Wọhọ oriruo, uvovo aye jọ evaọ obọ Philippines ọ gwọlọ ru iruo odibọgba oke-kpobi. Rekọ o wo iruo nọ ọ rẹ rọ rẹrote oma riẹ hẹ. Ọ ta nọ: “Ẹdẹ-Ọmaha jọ, mẹ lẹ se Jihova inọ mẹ gwọlọ jọ ọkobaro oke-kpobi. Eva ẹdẹ ọvo yena nọ me kpohọ usiuwoma ota, me te fi obe họ ada kẹ uzoge-ọmọtẹ jọ. Ọmọtẹ na ọ tẹ ta ẹme nọ me rẹro riẹ hẹ, inọ: ‘Nya ze obọ isukulu mẹ ohiohiẹ Ẹdẹvo-Oka.’ Mẹ tẹ nọe nọ, ‘Fikieme?’ Ọ tẹ ta kẹ omẹ nọ uvẹ iruo jọ o riẹ nọ a gwọlọ nọ ohwo jọ o re fi obe họ kẹ vẹrẹ vẹre. Mẹ nya, a tẹ rehọ omẹ iruo ẹsiẹsiẹ. O raha oke he.” Ọkpọ eware itienana e via kẹ Isẹri Jihova buobu no wariẹ akpọ na họ. Fikiere, whọ raha oke he re whọ tẹ lẹ se Ọghẹnẹ kpahe ọdawẹ ra!
Ẹvẹ Ma re Rri Olẹ nọ Ma tẹ Raha Uzi?
14, 15. (a) Fikieme ohwo ọ gbẹ rrọ se olẹ ba ha nọ ọ tẹ make thọ uzi? (b) U te no olẹ omobọ ohwo no, eme ọfa o re fi obọ họ kẹ ohwo ruẹrẹ usu riẹ họ kugbe Ọghẹnẹ nọ ọ tẹ thọ uzi?
14 Ẹvẹ olẹ o sai ro fi obọ họ nọ ohwo ọ tẹ thọ uzi? Fiki omovuọ, ahwo jọ nọ a raha uzi a rẹ gbẹ gwọlọ lẹ hẹ. Dede na, o rrọ emamọ owojẹ hẹ re a se olẹ ba. Re a dhesẹ iẹe: Ahwo nọ a rẹ dhẹ Arupre a riẹ inọ a te vru, a rẹ sae ta ẹme kugbe ahwo nọ a rẹ jọ ogege-arupre kpọ edhadhẹ rai kẹ obufihọ. Kọ otẹrọnọ fiki omovuọ, ohwo nọ ọ be dhẹ Arupre nọ o vru ọ gbẹ gwọlọ ta ẹme kugbe ahwo nọ a rọ otọ kpọ edhadhẹ na ha? O rẹ sae wha okpẹtu ze! Epọvo na re, o rẹ sai su kpohọ enwoma ọfa nọ ohwo ọ tẹ thuzi, jẹ be siọ olẹ ba fiki omovuọ nọ ọ rẹ rọ lẹ se Ọghẹnẹ. U fo re omovuọ uzioraha o whaha omai ẹlẹ se Ọghẹnẹ hẹ. Evaọ uzẹme, Ọghẹnẹ o zizie ahwo nọ a thuzi ulogbo re a lẹ sei. Aizaya ọruẹaro na ọ ta udu họ erahizi erọ oke riẹ awọ nọ a lẹ se Jihova, “keme ọ rẹ te rehọ vrẹ” evaọ edhere ologbo. (Aizaya 55:6, 7) Uzẹme, taure ohwo ọ tẹ te yare nọ ‘Jihova o rri rie aro,’ o sae gwọlọ nọ ọ rẹ kaki dhesẹ udu omurokpotọ tao, whaha edhere uzioraha na, je kurẹriẹ no eva ze.—Olezi 119:58; Daniẹl 9:13.
15 Nọ u te kpomahọ uzioraha, olẹ u wuzou eva edhere ọfa re. Jemis olele na ọ ta kpahe ohwo nọ ọ gwọlọ obufihọ abọ-ẹzi nnọ: “Jọ o se ekpako [ukoko] na, re a lẹ kẹe, . . . Ọnowo na ọ vẹte kpariẹ tovrẹ.” (Jemis 5:14, 15) Ẹhẹ, ohwo na ọ rẹ fa izieraha riẹ kẹ Jihova evaọ olẹ, rekọ ọ rẹ sae jẹ ta kẹ ekpako na re a lẹ kẹe. Oyena u re fi obọ họ kẹe ruẹrẹ usu riẹ họ kugbe Ọghẹnẹ.
Uyo Elẹ
16, 17. (a) Ẹvẹ Jihova ọ rẹ rọ kuyo elẹ? (b) Iriruo vẹ i dhesẹ nọ olẹ avọ iruo usiuwoma ota na e jẹhọ ohwohwo?
16 Ẹvẹ Ọghẹnẹ ọ rẹ rọ kuyo elẹ? Ọ rẹ sae kuyo ejọ vevẹ, ababọ oke oraha. (2 Ivie 20:1-6) Efa e rẹ sae raha oke, yọ o rẹ sae dina jọ bẹbẹ re ohwo o wo otoriẹ epanọ a rọ kuyo rai. Wọhọ epanọ ma ruẹ evaọ ọtadhesẹ Jesu ọrọ aye-uku nọ o je dhe obruoziẹ jọ ẹnyẹnya bru na, o sae gwọlọ nọ ma rẹ lẹ se Ọghẹnẹ unuẹse buobu. (Luk 18:1-8) Dede na, o rẹ sai mu omai ẹro nọ elẹ mai e tẹ rọwokugbe oreva Ọghẹnẹ, Jihova ọ te ta kẹ omai vievie he inọ: ‘Who kpokpo omẹ hẹ.’—Luk 11:5-9.
17 Idibo Jihova a rẹro ruẹ unuẹse buobu nọ a kuyo elẹ rai no. Ẹsibuobu ma ruẹ onana vevẹ no evaọ iruo usiuwoma ota mai. Wọhọ oriruo, inievo Ileleikristi emetẹ ivẹ jọ evaọ obọ Philippines a je fi ebe nọ a kere no Ebaibol ze họ ada kẹ ahwo ugbothabọ orẹwho na jọ. Nọ a kẹ aye jọ omobe-ovẹvẹ, irui-ovuẹ i te su no aye na aro ze. Ọ ta nọ: “Aso nọ ọ vrẹ na mẹ lẹ nọ Ọghẹnẹ o vi ohwo jọ ze ti wuhrẹ omẹ Ebaibol na, yọ me roro nọ olẹ mẹ a kuyo riẹ no na.” Nọ omoke jọ o vrẹ no, aye na o te mu ewuhrẹ họ ekpohọ evaọ obọ Ọgwa Uvie. Eva ofẹ jọ Asia, ozọ u je mu Oleleikristi ọmọzae jọ kpahe epanọ ọ sae rọ ta usiuwoma evaọ ighẹ ilogbo jọ nọ a rẹ sai mu rueva ha. Rekọ ọ tẹ lẹ se Jihova, jẹ gbaudu rueva ighẹ na. Nọ o kporo ẹthẹ uwou jọ, uvovo aye jọ ọ tẹ nya lahwe. Nọ oniọvo na ọ ta oware nọ ọ rọ fiki riẹ nyaze, aye na o te muhọ ẹviẹ. Aye na ọ ta nọ ọ gwọlọ Isẹri Jihova bẹ no, yọ ọ be lẹ inọ jọ Ọghẹnẹ o fi obọ họ kẹe duku ai. Avọ evawere, oniọvo ọmọzae na o te fi obọ họ kẹe gwọlọ ku ukoko Isẹri Jihova nọ o rrọ okegbe na.
18. (a) Eme u fo nọ ma re ru nọ a tẹ kuyo elẹ mai? (b) Eme ọ rẹ sai mu omai ẹro nọ ma tẹ be hai lẹ oke kpobi nọ uvẹ u rovie fihọ?
18 Olẹ yọ ọruẹrẹfihotọ nọ o gine gbunu gaga. Jihova ọ ruẹrẹ oma kpahe re ọ gaviezọ kẹ jẹ kuyo elẹ. (Aizaya 30:18, 19) Ghele na, u fo nọ ma re muẹrohọ epanọ ọ be rọ kuyo elẹ mai. O rẹ sae nwane jọ epanọ ma rẹro riẹ ẹsikpobi hi. Ghele na, nọ ma te vuhu ọkpọvio riẹ mu, ajọ uyere gbe ujiro nọ ma rẹ kẹe o thọrọ omai ẹro ho. (1 Ahwo Tẹsalonika 5:18) Ofariẹ, hae kareghẹhọ ohrẹ Pọl ukọ na ẹsikpobi: “Eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ.” Ẹhẹ, rehọ uvẹ kpobi lẹ se Ọghẹnẹ. Nọ who te bi ru ere, ẹsikpobi whọ te hae reawere oware nọ Pọl ọ ta kpahe ahwo nọ a be kuyo elẹ rai na inọ: “Udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai.”—Ahwo Filipai 4:6, 7.
Kọ Whọ Sae k’Uyo?
• Oghẹrẹ elẹ vẹ ma rẹ sae lẹ?
• Ẹvẹ u fo nọ ma rẹ rọ lẹ?
• Eme ma rẹ sae yare evaọ elẹ mai?
• Obufihọ vẹ olẹ u wo nọ ohwo ọ tẹ thọ uzi?
[Enọ Uwuhrẹ]
[Iwoho nọ e rrọ ẹwẹ-obe avọ 25]
Olẹ nọ u no udu ze u re fi obọ họ nọ ma gbe ro kie kẹ odawọ họ
[Iwoho nọ e rrọ ẹwẹ-obe avọ 27]
Ma rẹ rehọ ẹkwoma olẹ nọ iyei kẹ Ọghẹnẹ, ta ọdawẹ mai kẹe, jẹ kẹe uyere