Oghẹrẹ Egagọ Nọ I Woma Kẹ Owhẹ

“UWOMA kẹ omẹ re me sikẹle Ọghẹnẹ,” ere Asaf ọso-ilezi na ọ ta. Ọ dina roro epanọ ọ rẹ rọ raro kele ahwo nọ a be daezọ Ọghẹnẹ hẹ, re ọ ruẹsi yeri uzuazọ riẹ odode. Rekọ Asaf ọ kareghẹhọ irere nọ e rrọ esikẹle Ọghẹnẹ, kẹsena ọ tẹ ta nọ u woma kẹe re o sikẹle Ọghẹnẹ. (Olezi 73:2, 3, 12, 28) Kọ egagọ uzẹme i woma kẹ owhẹ nẹnẹ? Ẹvẹ e sae rọ kẹ owhẹ erere?

Ẹgọ Ọghẹnẹ uzẹme na u re fi obọ họ nọ eriwo ra o je kpehru vi ọrọ edhere uzuazọ ẹgwọlọ isiuru omobọ ohwo ọvo. Fiki oghẹrẹ nọ “Ọghẹnẹ uyoyou” na ọ ma omai, ahwo nọ a re le isiuru omobọ rai ọvo a sai wo evawere vievie he. (2 Ahwo Kọrint 13:11) Jesu o wuhrẹ ugogo uzẹme jọ kpahe ẹkoma ohwo-akpọ okenọ ọ ta nọ: “Ẹkẹ oghale o mae rọ vi emio.” (Iruẹru 20:35) Oyejabọ nọ eva e jẹ were omai nọ ma te bi ru eware kẹ egbẹnyusu gbe ahwo uviuwou mai. Rekọ o rẹ mae kẹ evawere nọ ma te bi wobọ evaọ iruo Ọghẹnẹ. O te ọnọ ma re you vi omọfa jọ kpobi. Ima ahwo buobu no oghẹrẹ uyerakpọ sasa ze a vuhumu no inọ o rẹ kẹ evevọwẹ ilogbo nọ a tẹ be gọ Ọghẹnẹ ẹkwoma eruo oware nọ ọ gwọlọ mi omai.—1 Jọn 5:3.

Ewo Ẹjiroro Evaọ Uzuazọ

Edhere ọfa nọ egagọ uzẹme i ro woma kẹ owhẹ họ, u re ru nọ uzuazọ ra u je wo ẹjiroro. Kọ who gbe muẹrohọ unuẹse buobu no inọ evawere ra i wobọ kugbe ele tobọ oware jọ nọ u wuzou? Ahwo buobu a wo ute jọ nọ a bi le evaọ uzuazọ, ẹsejọhọ onọ u kpomahọ uviuwou, egbẹnyusu, akọ-iruo, hayo omawere rai. Fikinọ uzuazọ o dọmu hu, ẹsibuobu eware enana e rẹ kẹ ai evawere he. (Ọtausiwoma Na 9:11) Rekọ, egagọ uzẹme i re fi obọ họ kẹ owhẹ duku ẹjiroro ologbo, ẹjiroro nọ o rẹ hae kẹ owhẹ evevọwẹ nọ eware efa e gbẹ be maki kiehọ kẹ owhẹ hẹ evaọ uzuazọ.

Egagọ uzẹme e kẹre te Jihova nọ a rẹ riẹ jẹ gọ avọ ẹrọwọ. Ahwo nọ a rrọ egagọ uzẹme a re si kele Ọghẹnẹ kpekpekpe. (Ọtausiwoma Na 12:13; Jọn 4:23; Jemis 4:8) O sae jọ oware igbunu kẹ owhẹ re who roro nọ whọ sae riẹ Ọghẹnẹ te epanọ ọ rẹ rọ jọ ogbẹnyusu ra. Rekọ nọ who te roro kpahe eware nọ ọ ma gbe ikuigbe ọrọ oghẹrẹ nọ o ro yerikugbe ahwo no, whọ te sae riẹ abọjọ ọrọ oghẹrẹ ohwo nọ ọ rrọ. (Ahwo Rom 1:20) Ofariẹ, nọ who te bi se Ebaibol na, whọ sae riẹ oware nọ o soriẹ nọ ma rọ rrọ uzuazọ, oware nọ Ọghẹnẹ ọ jẹ kuvẹ kẹ uye-oruẹ, epanọ o ti ro ku uye-oruẹ họ, gbe ẹsejọhọ whọ te sai je wo otoriẹ orọ oware nọ o wọhọ nọ o be mai gb’owhẹ unu kparobọ na, epanọ whọ sai ro wo emamọ abọ evaọ ẹjiroro Ọghẹnẹ. (Aizaya 43:10; 1 Ahwo Kọrint 3:9) Otoriẹ utioye na o sae lẹliẹ owhẹ wo ẹjiroro ọkpokpọ nọ whọ rẹ rọ rria uzuazọ!

Epanọ Whọ rẹ rọ Jọ Emamọ Ohwo

Egagọ uzẹme i woma kẹ owhẹ keme i re fi obọ họ kẹ owhẹ jọ emamọ ohwo. Whọ tẹ rrọ egagọ uzẹme, who re wo uruemu nọ o rẹ lẹliẹ owhẹ wo emamọ usu kugbe amọfa. Whọ sai wuhrẹ mi Ọghẹnẹ gbe Ọmọ riẹ kpahe epanọ whọ rẹ rọ jọ oruọzewọ, ta ẹme wowolẹ, je yeri uzuazọ nọ a jẹ rẹroso owhẹ. (Ahwo Ẹfẹsọs 4:20-5:5) Nọ whọ tẹ riẹ Ọghẹnẹ ziezi te epanọ who ro wo uyoyou kẹe, oma o te wọ owhẹ raro kele iE. Ebaibol na e ta nọ: “Wha jọ ahwo nọ a bi lele Ọghẹnẹ, wọhọ emọ iyoyou.”—Ahwo Ẹfẹsọs 5:1, 2.

Kọ o gbẹ rrọ oware evawere re ma jọ udevie ahwo nọ a be raro kele uyoyou Ọghẹnẹ? U  woma kẹhẹ, egagọ Ọghẹnẹ uzẹme na e rrọ iruẹru omọvo goli hi. O rẹ lẹliẹ owhẹ jọ usu kugbe amọfa nọ a you ewoma gbe oware nọ u kiete. Ginọ uzẹme, o sae jọnọ u kiehọ owhẹ oma ha re who kuomagbe ẹko egagọ. Dede na, wọhọ epanọ ma ruẹ evaọ uzoẹme nọ u kpemu na, orọnikọ ẹko nọ a rrọ oye o lẹliẹ egagọ buobu thọ họ, rekọ fiki epanọ a koko oma họ evaọ emamọ edhere gbe uvi ẹjiroro ho. Ẹko egagọ buobu a bi le itee nọ e rọwo kugbe Ileleikristi hi. Jihova Ọghẹnẹ ọvo o koko ahwo riẹ họ ẹko rọkẹ obọdẹ ẹjiroro. Ebaibol na e ta nọ: “Ọghẹnẹ ọ rọ Ọghẹnẹ ukpokpoma ha rekọ ọrọ udhedhẹ.” (1 Ahwo Kọrint 14:33) Wọhọ ima buobu efa, whọ sae ruẹ nọ omakugbe ẹko Ileleikristi nọ a rrọ kpatiẹ u ti nwene eriwo ra wowoma.

Ẹruore Kpahe Obaro

Ikereakere Efuafo na i dhesẹ nọ Ọghẹnẹ o bi koko Ileleikristi uzẹme họ re a ruẹse zọ okenọ ọ te raha eyero omuomu na, re a jẹ te reuku akpọ ọkpokpọ nọ “ẹrẹreokie ọ be ria.” (2 Pita 3:13; Eviavia 7:9-17) Fikiere, egagọ nọ i woma e rẹ kẹ owhẹ ẹruore, nọ u re su kpohọ evawere. Ahwo jọ a rẹroso nọ obaro akpọ rai o ti woma nọ egọmeti e tẹ dọmu, nọ eki-ọthuọ rai o te woma, hayo nọ a te wo omokpokpọ gbe emamọ oma-usehọ no iruo. Rekọ umutho gheghe otẹrọnọ ejọ e rẹ sae jọ usu eware enana lẹliẹ ohwo wo obọdẹ irẹro obaro akpọ nọ o rẹ kẹ evawere. Evaọ abọdekọ riẹ, Pọl ukọ na o kere nọ: “Ma rehọ ẹruore mai kpahe Ọghẹnẹ uzuazọ na.”—1 Timoti 4:10.

Who te rri otọ mu ziezi, whọ sai duku eg’Ọghẹnẹ uzẹme. Evaọ akpọ nana nọ okugbe ọ rrọ họ na, uyoyou gbe okugbe-ọvo o lẹliẹ Isẹri Jihova wo ohẹriẹ gaga. A no unwenọ erẹwho gbe eghẹrẹ uyereakpọ kpobi ze; ghele na, a wo okugbe fikiọ uyoyou nọ a wo kẹ Jihova gbe ohwohwo. (Jọn 13:35) A zizie owhẹ re whọ kiẹ vuhumu kẹ oma ra oware nọ a rẹro ruẹ no. Asaf o kere nọ: “Uwoma kẹ omẹ re me sikẹle Ọghẹnẹ.”—Olezi 73:28.

[Uwoho nọ o rrọ ẹwẹ-obe avọ 7]

Whọ sae jọ ogbẹnyusu Ọghẹnẹ