Oruvẹ no Obe Avisoi ọrọ Ilezi Ze
Ẹme Jihova Ọ Rrọ Uzuazọ
Oruvẹ no Obe Avisoi ọrọ Ilezi Ze
EDAFE e rẹ sae ta nọ: “Emọ mai e riẹ ro no otọ ze wọhọ ekakọ nọ e riẹ dhẹ emetẹ mai e wọhọ ethẹ ubienẹ nọ a rọ bọ ọgua uvie . . . iru mai e vọ, . . . igodẹ mai i . . . yẹ buobu.” Ofariẹ, enọ i fe a rẹ sae jẹ ta nọ: “Ahwo nọ eghale nana i te a rẹ ghọghọ!” Rekọ, okere-ilezi na ọ ta ẹme nọ o wo ohẹriẹ inọ: “Oghọghọ u te ahwo nọ ỌNOWO ọ rọ Ọghẹnẹ rai!” (Olezi 144:12-15) Ukpọ otu nọ i fe, ẹvẹ ahwo nọ ỌNOWO ọ rrọ Ọghẹnẹ rai a re ro wo oghọghọ? Jihova họ Ọghẹnẹ evawere, yọ ahwo nọ a be gọe a re wo evawere. (1 Timoti 1:11) Uzẹme nana u dhesẹ oma via evaọ abọ urere ọrọ ile nana nọ a rehọ ẹgba ẹzi kere na, nọ i ru Ilezi avọ 107 rite 150.
Obe avisoi orọ Ilezi na u fi elo họ ekwakwa-aghae Jihova nọ i wo ibe he, enọ e kẹre te uyoyou ulogbo riẹ, uzẹme, gbe ewoma. Epanọ ma wuhrẹ kpahe ekwakwa-aghae Ọghẹnẹ te, ere oma o rẹ wọ omai you rie jẹ dhozọ riẹ te. Onana u ve ti fiba evawere mai. Evuẹ nọ e rrọ Obe Avisoi orọ Ilezi na i woma kẹhẹ!—Ahwo Hibru 4:12.
EVAWERE NỌ UYOYOU ULOGBO JIHOVA O RẸ WHA ZE
Ahwo Ju nọ a je zihe no igbo Babilọn ze a so nọ: “Jọ a yere ỌNOWO fiki uyoyou ulogbo riẹ, epa iruo urirẹ riẹ rọ kẹ emọ ahwo!” (Olezi 107:8, 15, 21, 31) Devidi ọ so ole ujiro kẹ Ọghẹnẹ inọ: “Ọtẹruo ra o te obọ idedeghe na.” (Olezi 108:4) Eva ole nọ o lele i rie, ọ so nọ: “Fiobọhọ kẹ omẹ, O ỌNOWO Ọghẹnẹ mẹ! Jọ eva ohrọ ra nọ o rẹ hiẹ hẹ siwi omẹ!” (Olezi 109:18, 19, 26) Olezi avọ 110 yọ eruẹaruẹ nọ i kiekpahe esuo Mesaya na. Olezi avọ 111:10 o ta nọ: “Ozọodhẹ kẹ ỌNOWO họ emuhọ areghẹ.” Wọhọ epanọ olezi nọ o lele i rie o ta, “Oghale u [re] te ọnọ ọ be dhẹozọ ỌNOWO.”—Olezi 112:1.
Ẹsibuobu a jọ Ilezi avọ 113 rite 118 na ta kpahe ujiro nọ a rẹ rọ kẹ Jihova. Wọhọ epanọ o rrọ Mishnah—obe ikpe-udhusoi avesa nọ a kere iwuhrẹ ọsosuọ ahwo Ju fihọ—a jẹ hae so ile ajiri nana evaọ ẹdẹ ehaa Ọnyavrẹ gbe ehaa esa nọ ahwo Ju a jẹ hai ru kukpe kukpe na. Olezi avọ 119 nọ ọ mai theri, ọ tẹ jẹ rrọ uzou Ebaibol nọ awọ riẹ e mai bu kpaobọ na o bru ọghọ họ ẹme Jihova.
Enọ Ikereakere nọ A Kẹ Iyo Rai:
109:23—Eme họ otofa ẹme Devidi na nọ ọ ta inọ: “Me re no, wọhọ uwoho oke owọwọ”? Devidi ọ jẹ rehọ oze ta inọ o wọhọ nọ uwhu riẹ o kẹlino.—Olezi 102:11.
110:1, 2—Eme ‘Olori Devidi,’ Jesu Kristi, o ru okenọ ọ keria obọze Ọghẹnẹ? Nọ ọ kparoma no, Jesu o te kpohọ odhiwu jẹ hẹrẹ eva obọze Ọghẹnẹ rite ukpe 1914 re o te muhọ esuo wọhọ Ovie. Eva etoke yena, Jesu o je su ilele riẹ nọ ẹzi o wholo, jẹ kpọ ai evaọ iruo usiuwoma ota gbe ilele-iruo rai, ọ tẹ jẹ ruẹrẹ ai họ kpahe kẹ epanọ a ti ro lele iei su evaọ Uvie riẹ.—Matiu 24:14; 28:18-20; Luk 22:28-30.
110:4—Eme Jihova ‘Ọ bẹ-ehao kpahe ababọ ẹrẹriẹ’? Ehao nana yọ ọvọ nọ Jihova ọ re kugbe Jesu Kristi nọ ọ te rọ jọ Ovie gbe Ozerẹ Okpehru.—Luk 22:29.
113:3—Edhere vẹ a re ro jiri Jihova “no ovatha-ọre ri te ukiediwo riẹ”? Onana o kẹre vi ẹko ọrọ ahwo nọ a be gọ Ọghẹnẹ kẹdẹ kẹdẹ. No ovatha-ọre rite ukiediwo-ọre, elo ọre na u bi lo mu oria kpobi evaọ akpọ na. Epọvo na u fo nọ a re jiri Jihova no oka rite oka akpọ na. A rẹ sai ru onana ha ababọ oma nọ a rẹ riẹ kokohọ. Wọhọ Isẹri Jihova, ma wo uvẹ-ọghọ nọ ma bi ro jiri Ọghẹnẹ jẹ be ta usiuwoma Uvie na avọ ajọwha.
116:15—Ẹvẹ ‘uwhu erezi na o ghare te eva aro ỌNOWO’? Idibo Jihova a ghare riẹ obọ te epanọ ọ sae rọ kuvẹ re aikpobi a whu ẹsiẹvo ho. O hẹ jọnọ Jihova ọ rẹ kuvẹ kẹ oware utioye, o hae te jọ wọhọ ẹsenọ ewegrẹ riẹ a goma vi iEi. Ofariẹ, ohwo ọvuọvo o gbe ti kiọkọ akpọ na nọ ọ rẹ jọ otọhotọ kẹ akpọ ọkpokpọ na ha.
119:71—Ewoma vẹ o rẹ sai no uye-oruẹ ze? Ọbẹwẹ akpọ o rẹ sai wuhrẹ omai epanọ ma rẹ rọ rẹroso Jihova, rehọ osegboja lẹ sei, roma totọ wuhrẹ Ebaibol na je fi ẹme riẹ hiruo. Ofariẹ, eva otọ uye-oruẹ ma rẹ sai dhesẹ ekpehru uruemu jọ nọ ma roro nọ ma wo vẹre he, nọ ma rẹ sai si obọ no. Uye-oruẹ u re ru omai vioja ha nọ ma tẹ kuvẹ re u ru omai kpokpọ.
119:96—Eme “urere ewoma kpobi” u dhesẹ? Okere-ilezi na ọ be jọ etenẹ ta ẹme kpahe ewoma hayo ẹgbagba evaọ eriwo ohwo-akpọ. O wọhọ nọ ọ be ta inọ evaọ iroro ohwo-akpọ, ẹgbagba o wo ọnyaba. Wo ohẹriẹ, uzi Ọghẹnẹ u wo ọnyaba ha. Ọkpọvio riẹ o kpomahọ kabọ kabọ uzuazọ.
119:164—Eme họ otofa ẹme na inọ a jiri Ọghẹnẹ “asiahrẹ gbagba . . . evaọ okpẹdẹ”? Ẹsibuobu nọ a tẹ fodẹ ihrẹ yọ a be rehọ iẹe dhesẹ ẹgbagba. Fikiere, okere-ilezi na ọ be ta nọ Jihova o te ohwo nọ ma rẹ rehọ ujiro kpobi kẹ.
Eware nọ Ma Jariẹ Wuhrẹ:
107:27-31. Areghẹ ahwo-akpọ o ti “re ae eva” okenọ Amagẹdọn o ti fi. (Eviavia 16:14, 16) Areghẹ ahwo-akpọ ọ te sai siwi ohwo ọvuọvo no ọraha ha. Ahwo nọ a rẹroso Jihova kẹ esiwo ọvo a te zọ je “yere [iei] fiki uyoyou ulogbo riẹ.”
109:30, 31; 110:5. Ojese nọ alakpa-ẹmo ọ rẹ rehọ ẹkpẹlobọ kru na o rẹ sai ruru obọze nọ o re ro veghe ọgbọdọ họ. Wọhọ odẹme, Jihova “o dikihẹ obọze” idibo riẹ re ọ ruẹse họre kẹ ai. Ọ be rehọ ere kẹ ai obufihọ gbe uketha—emamọ ẹjiroro nọ ma rẹ rọ “rehọ uyere ulogbo bru [rie]!”
113:4-9. Jihova o kpehru ga te epanọ o re ro hrẹ oma kpotọ tube “riwi ihru” na. Ghele na, o wo ohrọ kẹ oruori, oyogbere, gbe ọga—aye nọ ọ sai yẹ ọmọ họ. Jihova, Olori Osu na o wo omurokpotọ, ọ tẹ jẹ gwọlọ nọ ahwo nọ a be gọe a jọ epọvo na.—Jemis 4:6.
114:3-7. U fo re eware igbunu nọ Jihova o ru fiki ahwo riẹ eva Abade Ọwawae na, eva Ethẹ Jọdan, gbe eva Ugbehru Saena nọ ma re wuhrẹ kpahe i kpomahọ omai wowoma. U fo nọ ozọ u re mu “akpọ,” koyehọ ahwo akpọ na—fiki Olori na.
119:97-101. Nọ ma te bi wo areghẹ, eriariẹ, gbe otoriẹ no Ẹme Ọghẹnẹ ze o rẹ thọ omai no enwoma abọ-ẹzi.
119:105. Ẹme Ọghẹnẹ họ ukpẹ kẹ awọ mai keme o rẹ sai fi obọ họ kẹ omai yerikugbe ebẹbẹ nọ ma rẹriẹ ovao dhe enẹna. O tẹ jẹ rrọ elo kẹ edhere mai evaọ edhere ẹwoho keme u bi ru omai riẹ ẹjiroro Ọghẹnẹ kpahe obaro.
EVAWERE GHELỌ OKPẸTU
Ẹvẹ ma sae rọ rẹriẹ ovao dhe edawọ jẹ zọ evaọ etoke okpẹtu? Ilezi avọ 120 rite 134 e kẹ uyo onọ yena vevẹ. Ma re thihakọ ọbẹwẹ, jẹ yọrọ oghọghọ mai ẹkwoma Jihova nọ ma rẹ rẹroso kẹ obufihọ. O wọhọ nọ okenọ emọ Izrẹl a je kpohọ Jerusalẹm kẹ ehaa ẹgbukpe rai a rọ so Ilezi nana nọ a se Ile Ẹgadiẹ-kpehru na.
Wo ohẹriẹ no emedhọ nọ e rẹ sai ru oware ovo ho, Olezi avọ 135 gbe 136 i dhesẹ Jihova wọhọ ọnọ O re ru oware kpobi nọ u je rie. A kere Olezi avọ 136 epanọ a rẹ rọ suo iẹe avọ ozaa, abọ urere ọrọ owọ kpobi nọ o rrọ olezi nana yọ ozaa rọkẹ abọ ọsosuọ owọ na. Olezi nọ o lele i rie o kiekpahe uzuazọ ọkora ọrọ ahwo Ju nọ a jọ Babilọn nọ a gwọlọ gọ Jihova evaọ obọ Zayọn. Devidi họ ọnọ ọ so Ilezi avọ 138 rite 145. Ọ gwọlọ ‘rehọ eva riẹ kpobi kẹ ỌNOWO na uyere.’ Fikieme? Ọ ta nọ, keme ‘whọ ma omẹ evaọ edhere nọ o muozọ je gbenu.’ (Olezi 138:1; 139:14) Evaọ Ilezi isoi nọ i lele i rie, Devidi ọ lẹ kẹ ọthọwẹ rono obọ ahwo oyoma, ọ tẹ jẹ lẹ kẹ ọwhọkuo okiẹrẹe, ọthọwẹ rono obọ otu ukpokpoma, gbe ọkpọvio rọkẹ uruemu ezi. O fi oruvẹ họ oghọghọ nọ o rrọ kẹ idibo Jihova. (Olezi 144:15) Nọ ọ kiẹ oruaro gbe ewoma Ọghẹnẹ riwi no, Devidi o te bo nọ: “Unu mẹ u re jiri ỌNOWO na, jọ iwo kpobi i jiri odẹ riẹ bẹdẹ bẹdẹ.”—Olezi 145:21.
Enọ Ikereakere nọ A Kẹ Iyo Rai:
122:3—Ẹvẹ Jerusalẹm ọ rọ jọ “okpẹwho nọ a bọ gaga”? Wọhọ epanọ o jọ evaọ ikpewho oke anwae, a bọ iwou kẹle ohwohwo gaga evaọ Jerusalẹm. Fikiere o jọ lọlọhọ re a thọ okpẹwho na. Ofariẹ, fikinọ iwou rai e kẹle ohwohwo u ru rie lọhọ nọ ahwo okpẹwho na a jẹ rọ rẹroso ohwohwo kẹ obufihọ gbe uketha. Onana u dhesẹ okugbe abọ-ẹzi ọrọ erua 12 Izrẹl eva okenọ a te kuomagbe kẹ egagọ.
123:2—Eme oriruo nọ o kie kpahe ibiaro idibo na u dikihẹ kẹ? Idibo a re rri ibiaro olori rai fiki ẹjiroro ivẹ: re a ruẹse riẹ oware nọ olori rai ọ gwọlọ gbe re idibo na omarai a ruẹsi wo uketha gbe ugogo eware nọ a gwọlọ evaọ uzuazọ. Epọvo na re, ma re rri bru Jihova re ma ruẹse riẹ oreva riẹ je wo aruoriwo riẹ.
131:1-3—Ẹvẹ Devidi o ro ‘ru udu riẹ wolẹ gbe ẹwẹ riẹ dhedhẹ wọhọ ọmọ nọ a bru-evie no nọ ọ rrọ adobọ oni riẹ’? Wọhọ epanọ ọmọ nọ a bru-evie no ọ rẹ daoma re o wo evawere gbe evevọwẹ evaọ obọ oni riẹ na, ere Devidi o wuhrẹ epanọ ọ rẹ rọ jọ wolẹ avọ eva-idhedhẹ “wọhọ ọmọ nọ ọ rọ adobọ oni riẹ vievie.” Eva oghẹrẹ vẹ? Ẹkwoma udu omurokpotọ gbe ẹro ọlọlọhọ nọ o wo o gbe je le ikpeware kẹ omariẹ hẹ. Ukpenọ ọ gwọlọ okpodẹ, Devidi ọ jẹ hai vuhu ọnyaba riẹ mu je dhesẹ omurokpotọ. O rrọ oware areghẹ re ma raro kele oriruo riẹ, maero nọ ma te bi wo uvẹ-iruo evaọ ukoko na.
Eware nọ Ma Jariẹ Wuhrẹ:
120:1, 2, 6, 7. Ọtaraha gbe eme nọ a re zuehọ e rẹ sae da amọfa thesiwa. Ẹme mai nọ ma rẹ ma te yọ edhere jọ nọ ma re ro dhesẹ nọ ma “rọ kẹ udhedhẹ!”
120:3, 4. Ma te bi thihakọ ‘ohwo ọviẹwẹ,’ ma rẹ sai wo omosasọ nọ ma tẹ riẹ nọ Jihova ọ te kpọ eware vi evaọ ẹruoke riẹ. Ahwo ọtaraha a te ruẹ uye okpẹtu eva obọ “ọgbaẹmo.” A te ruẹ uye ẹdhoguo erae Jihova nọ a rehọ ‘iwowerae inwenwe erọ ure ọ uhwere’ dhesẹ na.
127:1, 2. Evaọ iruẹru mai kpobi, u fo nọ ma re rri bru Jihova kẹ ọkpọvio.
133:1-3. Okugbe nọ ọ rrọ udevie ahwo Jihova o re ru udu kie ohwo vi, kẹ ohwo erri, gbe omosasọ. Ajọ ma rehọ iruthọ-gwọlọ, ẹwhọ, hayo inoma-iguo wha ohẹriẹ fihọ iẹe he.
137:1, 5, 6. Idibo Ọghẹnẹ nọ e jọ igbo a si iroro no Zayọn ho, onọ u dikihẹ kẹ ukoko Ọghẹnẹ. Kọ ẹvẹ omai re? Kọ ma bi tilẹmu ukoko nọ Jihova o bi ro ru iruo nẹnẹ?
138:2, NW. Jihova o ‘ru ẹme riẹ tube kpehru vi odẹ riẹ’ keme eware kpobi nọ ọ rehọ odẹ riẹ yaa i ti rugba thethabọ vrẹ epanọ ma rẹ sai roro. Avro ọ riẹ hẹ, ẹruore ologbo ọ rrọ omai aro.
139:1-6, 15, 16. Jihova ọ riẹ iruẹru, iroro-eva, gbe ẹme mai taure ma tẹ te tubẹ tae via. Ọ riẹ omai taure ma te ti mu oma họ ekokohọ evaọ edhede oni mai. Oghẹrẹ nọ Ọghẹnẹ ọ riẹ kpahe omai omomọvo te ‘u gbunu ga hrọ,’ ma sae riẹ otọ riẹ hẹ. Ẹvẹ o rẹ kẹ omosasọ te nọ ma riẹ inọ orọnikọ Jihova ọ be ruẹ odawọ nọ ma be riẹriẹ ovao dhe ọvo ho rekọ ọ riẹ uye nọ u bi noi ze te omai!
139:7-12. Oria ovo o riẹ hẹ nọ ma re kpohọ nọ ọbọga Ọghẹnẹ o gbe ro te omai hi.
139:17, 18. Kọ eriariẹ Jihova e be were omai? (Itẹ 2:10) O tẹ rrọ ere, kiyọ ma duku eyeri evawere nọ o wo oba ha no. Iroro Jihova “i bu vi ẹkpẹ.” Ẹsikpobi eware ekpokpọ e rẹ jariẹ nọ ma rẹ ruẹ wuhrẹ kpahe iẹe.
139:23, 24. U fo nọ ma kuvẹ re Jihova ọ kiẹ ohwo nọ ma rrọ evaọ obeva riwi sọ ma wo ‘eva imuomu’—iroro, isiuru, gbe iruemu nọ i fo ho—re o je fi obọ họ kẹ omai si ai no.
143:4-7. Ẹvẹ ma sai ro thihakọ, makọ eva otọ ọbẹwẹ ọgaga? Okere-ilezi na ọ vuẹ omai ugogo oware nọ ma re ru: Ma re roro kpahe iruẹru Jihova, roma kẹ iruo riẹ, jẹ lẹ sei kẹ obufihọ.
“Jọ Ahwo Kpobi A . . . Jiri ỌNOWO!”
Abọ ọvuọvo ọrọ Ilezi ene ọsosuọ na e rehọ ẹme oghale hayo ajiri nọ o re te Jihova kuhọ. (Olezi 41:13; 72:19, 20; 89:52; 106:48) Abọ urere na u wo ohẹriẹ hẹ. Olezi 150:6 o ta nọ: “Jọ koware koware nọ o be wẹ u jiri ỌNOWO na! Jiri ỌNOWO!” Onana u ti gine rugba evaọ akpọ ọkpokpọ Ọghẹnẹ.
Nọ ma bi rẹro oke evawere yena na, ma wo obọdẹ ẹjiroro nọ ma rẹ rọ rehọ oruaro kẹ Ọghẹnẹ uzẹme na je jiri odẹ riẹ. Nọ ma te roro kpahe evawere nọ ma be reawere riẹ fikinọ ma riẹ Jihova jẹ rrọ emamọ usu kugbe ei, kọ o gbẹ be wọ omai jiri ei avọ oma uyere?
[Uwoho nọ o rrọ ẹwẹ-obe avọ 30]
Iruo igbunu Jihova i re mu urirẹ
[Uwoho nọ o rrọ ẹwẹ-obe avọ 31]
Iroro Jihova “i bu vi ẹkpẹ”