‘Wha Yo Epanọ Job O Thihakọ Te’
‘Wha Yo Epanọ Job O Thihakọ Te’
“Wha yo epanọ Job o [thihakọ] te, wha tẹ jẹ ruẹ epanọ Ọnowo na o ru kẹe uwhremu na, epanọ Ọnowo o wo ohrọ avọ uwero te.”—JEMIS 5:11.
1, 2. Didi uye ọzae avọ aye jọ evaọ Poland a ruẹ?
HARALD ABT ọ re jọ omọvo Isẹri Jihova te ukpe ovo ho nọ egbaẹmo Hitler a fi ẹwho Danzig (nọ a bi se Gdańsk enẹna) kparobọ evaọ ofẹ ẹkpẹlobọ ovatha-ọre Poland. Eware e tẹ jọ gaga kẹ Isẹri Jihova nọ e jọ obei. Elakpa-ikpokpo a tẹ jẹ gwọlọ gba Harald họ whobọhọ obe nọ o ta nnọ ọ gbẹ rrọ omọvo Isẹri Jihova ha, rekọ ọ se. Nọ ọ jọ uwou-odi te eka jọ no, a tẹ rehọ Harald kpohọ ega uye nọ ọ jọ obọ Sachsenhausen, a tẹ jọ obei je d’aro ku ei unuẹse buobu yọ a bi kpei. Alakpa jọ ọ tẹ riobọhọ oria nọ a rẹ jọ mahe ahwo nọ a whu no, ọ tẹ ta kẹ Harald nọ, “Whọ tẹ ta nnọ egagọ ra na ha oja na, mẹ kẹ owhẹ edẹ 14 ọvo, iwiri ra e te jọ oria yena kunye bru Jihova ra na.”
2 Okenọ a mu Harald, yọ ọmọ emerae ikpe ọ rrọ aye riẹ obọ. Rekọ elakpa na a je fiẹro họ aye na re. U kri hi, a te mi ei ọmọ riẹ, a te mu ei jẹ rehọ iẹe kpohọ Auschwitz, ega uye nọ ahwo a re jo whu wọhọ irifẹ. Ghele na, t’ọzae t’aye na a whu fihọ ega na ha. Evaọ Uwou-Eroro Na ọrọ April 15, 1980 (ọrọ Oyibo), whọ sai gbe se kpahe epanọ a ro thihakọ. Harald o kere nọ: “Fiki ẹrọwọ nọ me fihọ Ọghẹnẹ, mẹ raha ikpe 14 no evaọ ega uye gbe uwou-odi. Ahwo jọ a nọ omẹ no inọ: ‘Kọ aye ra o fi obọ họ kẹ owhẹ evaọ eware nana kpobi nọ who thihakọ rai na?’ Ee! No emuhọ ukpokpoma na ze, mẹ riẹ inọ ọ te vro ẹrọwọ riẹ hẹ, yọ fikinọ mẹ riẹ onana u fi obọ họ kẹ omẹ thihakọ. Mẹ riẹ nọ o te mae were iẹe re o yo nnọ a kpe omẹ fiki ẹrọwọ mẹ viukpenọ a re si obọ no omẹ fikinọ mẹ vro ẹrọwọ mẹ. . . . Aye mẹ, Elsa, o thihakọ uye obẹbẹ ikpe buobu evaọ ega uye Germany.”
3, 4. (a) Iriruo amono e rẹ sae tudu họ Ileleikristi awọ thihakọ? (b) Fikieme Ebaibol na e rọ tudu họ omai awọ inọ ma kiẹ oware nọ o via kẹ Job riwi?
3 Re ohwo ọ ruẹ uye olahiẹ o lọhọ họ, wọhọ epanọ Isẹri Jihova buobu a rehọ ẹro ruẹ no. Fiki onana, Ebaibol na e hrẹ Ileleikristi kpobi nọ: “Imoni, wha ri oriruo uyeoruẹ avọ akothiho, eruẹaro na, enọ e jẹ rehọ odẹ Ọnowo na ta ẹme.” (Jemis 5:10) Evaọ ikpe na kpobi na, a kpokpo idibo Ọghẹnẹ buobu no gheghe gheghe. Oriruo nọ “isisẹri” nana nọ e wọhọ “ẹgho ologbo na” a fihọ otọ o rẹ tudu họ omai awọ rehọ ithihakọ dhẹ ohrẹ Ileleikristi na.—Ahwo Hibru 11:32-38; 12:1.
4 Evaọ Ebaibol na, Job yọ uvi oriruo ọrọ ithihakọ. Jemis o kere nọ: “Ri, ma rẹ tanọ enọ idikihẹ whawha na ae wo oghale. Wha yo epanọ Job o dikihẹwha [thihakọ] te, wha tẹ jẹ ruẹ epanọ Ọnowo na o ru kẹe uwhremu na, epanọ Ọnowo o wo ohrọ avọ uwero te.” (Jemis 5:11) Oghẹrẹ nọ eware e wariẹ woma kẹ Job uwhremu na yọ ẹmẹwoho ọrọ osohwa nọ u re te enọ i thihakọ te urere, enọ Jihova ọ ghale. Maero, u dhesẹ uzẹme jọ via nọ u re fi obọ họ kẹ omai evaọ oke okpẹtu. Obe Job u fi obọ họ kẹ omai kuyo enọ nana: Nọ odawọ u te t’omai, fikieme ma jẹ daoma kareghẹhọ eme-avro ilogbo nọ e rrọ otọ na? Didi ekwakwa-aghae gbe eriwo u re fi obọ họ kẹ omai thihakọ? Ẹvẹ ma sae rọ bọ ibe Ileleikristi nọ e be ruẹ uye ga?
Ewo Otoriẹ Eme-Avro Na
5. Ugogo oware vẹ ma rẹ kareghẹhọ okenọ ma tẹ rẹriẹ ovao ku ebẹbẹ gbe edawọ?
5 Re ma yọrọ edikihẹga mai evaọ egagọ Jihova ghelọ okpẹtu, o roja re ma wo otoriẹ eme-avro nọ Ẹdhọ ọ kpare ze na. Ogbẹrọ ere he, ebẹbẹ mai i ve ti ru nọ ma gbẹ te rọ kareghẹhọ edikihẹ mai wọhọ Ileleikristi hi. Ẹme ọ omarokpotọ kẹ Ọghẹnẹ ọ roja gaga. Ọsẹ obọ odhiwu mai ọ ta eme jọ nọ u fo nọ omomọvo mai o re si te udu: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” (Itẹ 27:11) A rẹ ruẹ ọghọ nọ ọ rro vi oyena ha. Ghelọ sebaẹgba mai, ma rẹ sai ru eva were Ọnọ ọ ma omai na. Ma re ru ere okenọ uyoyou mai kẹ Jihova o tẹ wọ omai mugba kẹ ebẹbẹ gbe edawọ. Uvi uyoyou Ileleikristi u re thihakọ eware kpobi. O rẹ hiẹ hẹ.—1 Ahwo Kọrint 13:7, 8.
6. Ẹvẹ Setan ọ be rọ poviẹ Jihova, kọ ẹvẹ o ru ere kri te no?
6 Obe ọ Job u dhesẹ Setan via vevẹ wọhọ ọnọ ọ be poviẹ Jihova na. U te je dhesẹ inọ ọwegrẹ nana nọ a rẹ ruẹ hẹ na o wo iroro iyoma gbe ẹgwọlọ nọ ọ rẹ rọ raha usu mai kugbe Ọghẹnẹ. Wọhọ epanọ oriruo Job o dhesẹ na, Setan ọ be ta nnọ idibo Jihova kpobi a be gọ Ọghẹnẹ fiki oware nọ u re noi te ai obọ, ọ tẹ be daoma dhesẹ inọ uyoyou rai kẹ Ọghẹnẹ o rẹ sae hiẹ. Ọ poviẹ Ọghẹnẹ ikpe idu buobu no. Nọ a gele Setan no obọ odhiwu ze, uru ulogbo jọ nọ u no odhiwu ze u dhesẹ i rie wọhọ “oguiguẹgu imoni mai” gbe nnọ o bi “gu ai kẹ Ọghẹnẹ mai tuvo taso.” (Eviavia 12:10) Ẹkwoma akothiho mai, ma sai dhesẹ via nnọ iguẹgu riẹ i wo otọ họ.
7. Ẹvẹ ma sai ro mugba kẹ ebẹbẹ ugboma?
7 Ma rẹ kareghẹhọ inọ Ẹdhọ ọ sae rehọ uye nọ ma rrọ kpobi rọ gwọlọ ru omai re ma si oma no Jihova. Oke vẹ ọ rọ dawo Jesu? Okenọ ohọo u je kpe Jesu nọ ọ siọ emuọriọ ba te edẹ buobu no. (Luk 4:1-3) Rekọ, ẹgba nọ Jesu o wo fiki usu riẹ kugbe Jihova u fi obọ họ kẹe siọ edawọ Ẹdhọ. O roja re ma rehọ ẹgba abọ-ẹzi rọ dadamu kẹ ẹbẹbẹ ugboma nọ ma wo kpobi, ẹsejọhọ enọ ẹyao hayo owho o wha ze. O tẹ make rọnọ ‘ugboma mai o be raha kufiẹ,’ ma re fi oma họ otọ họ keme “izi mai e be kpokpọ kẹdẹ kẹdẹ.”—2 Ahwo Kọrint 4:16.
8. (a) Ẹvẹ iroro ọkora e sae rọ lẹliẹ oma lọhọ omai? (b) Didi uruemu Jesu o wo?
8 Fibae, iroro ọkora e rẹ sae raha usu mai kugbe Ọghẹnẹ. Ohwo ọ rẹ sae fiẹ unu nọ: ‘Fikieme Jihova ọ rọ kuvẹ nnọ onana o via kẹ omẹ?’ Nọ a te ru ahwo jọ yoyoma, a sae nọ inọ: ‘Kinọ oware nọ oniọvo o re ru omẹ?’ Iroro itieye na e rẹ sae lẹliẹ omai rri ugogo ẹme-avro na vo jẹ tẹrovi ebẹbẹ mai ọvo. Idhọvẹ nọ ikpehre egbẹnyusu esa Job a wha sei e lẹliẹ iroro riẹ raha muotọ wọhọ epanọ ẹyao riẹ ọ raha ugboma riẹ na. (Job 16:20; 19:2) Epọvo na re, Pọl ukọ na o dhesẹ inọ evedha ikrẹkri e rẹ sai rovie edhere “kẹ ukumuomu” na. (Ahwo Ẹfẹsọs 4:26, 27) Ukpenọ ma rẹ rehọ fiki idhọvẹ hayo evedha kpahe ẹme ọgaga kẹ ahwo hayo roro ga hrọ kpahe uyero jọ fikinọ ma rri nọ a ru eware lele uvi oziẹ hẹ, u re woma re wọhọ Ileleikristi ma raro kele Jesu ọnọ “o fi oma riẹ họ-otọ kẹ ọnọ o re bruoziẹ kiete” na, Jihova Ọghẹnẹ. (1 Pita 2:21-23) Ma te wo ọkpọ “iroro” Jesu o rẹ sai fi obọ họ kẹ omai mugba kẹ ohọre Setan.—1 Pita 4:1.
9. Didi imuẹro Ọghẹnẹ ọ kẹ omai kpahe ebẹbẹ hayo edawọ nọ ma nyaku?
9 Maero, ma re rri ebẹbẹ mai wọhọ edhere nọ Ọghẹnẹ o bi ro muofu kẹ omai hi. Iroro ethọthọ itieye na e kẹ Job uye eva okenọ enọ e ta nọ a nyaze te sasa iẹe oma a jẹ rọ eme fae ovao. (Job 19:21, 22) Ebaibol e rehọ eme nana kẹ omai imuẹro: ‘A sae rehọ eyoma dawo Ọghẹnẹ hẹ, yọ ọyomariẹ ọ rẹ rehọ eyoma dawo ohwo ọvo ho.’ (Jemis 1:13) Ukpoye, Jihova ọ yeyaa inọ o ti fi obọ họ kẹ omai thihakọ ebẹbẹ nọ i te omai kpobi, ọ vẹ jẹ gbẹ edhere nọ ma rẹ rọ vabọ no edawọ na. (Olezi 55:22; 1 Ahwo Kọrint 10:13) Ma te si kẹle Ọghẹnẹ evaọ oke uye, ma te rehọ ubiẹro owowa ro riwi eware nọ e via kpobi, ma vẹ jẹ sae wọso Ẹdhọ ziezi.—Jemis 4:7, 8.
Eware nọ I re Fi Obọ họ kẹ Omai Thihakọ
10, 11. (a) Eme o fi obọ họ kẹ Job thihakọ? (b) Ẹvẹ iroro efuafo nọ Job o wo u ro fi obọ họ kẹe?
10 Ghelọ uye nọ Job ọ jọ—avọ eme iyoma ọ enọ e ta nnọ a nyaze te sasa iẹe oma gbe eware nọ e ja riẹ aro gede gede fikinọ ọ riẹ oware nọ o be wha uye riẹ ze he—Job o kru ẹgbakiete riẹ ghele. Eme ma rẹ sai wuhrẹ no akothiho riẹ ze? Ababọ avro, oware nọ o lẹle riẹ kparobọ họ ẹrọwọ riẹ. Ọ “dhozọ Ọghẹnẹ, o te je si oma no oware uyoma.” (Job 1:1) Ẹkoma uzuazọ riẹ oye. Job ọ se Jihova ha, dede nọ ọ riẹ oware nọ o lẹliẹ eware yoma kẹe idudhe he. T’uwhu t’azọ, Job ọ rọwo inọ ọ rẹ gọ Ọghẹnẹ.—Job 1:21; 2:10.
11 Eva efuafo nọ Job o wo e kẹ riẹ omosasọ jọ re. Eva okenọ o wọhọ nnọ uzuazọ riẹ u bi kuhọ no, eva nọ e jẹ were iẹe họ ọ riẹ inọ ọ daoma fi obọ họ kẹ amọfa, inọ o koko izi ikiẹrẹe Jihova, gbe nnọ ọ siọ oghẹrẹ egagọ erue kpobi.—Job 31:4-11, 26–28.
12. Didi owọ Job ọ jẹ kpahe obọ nọ Elaihu o fihọ kẹe?
12 Uzẹme inọ Job ọ gwọlọ obufihọ re ọ sae kpọ iroro riẹ vi evaọ eme jọ. Yọ ọ roma kpotọ jẹ obufihọ yena rehọ—onana yọ oware ofa jọ nọ u fi obọ họ kẹe thihakọ te urere. Job ọ roma totọ gaviezọ kẹ ohrẹ areghẹ Elaihu, o te dede ọkpọvio Jihova rehọ. Ọ feva nọ: ‘Fikiere mẹ ta onọ mẹ riẹ otọ riẹ hẹ. . . . Me kurẹriẹ evaọ ovu gbe enwo.’ (Job 42:3, 6) Dede nọ ọ gbẹ rrọ ẹyao, eva e were Job inọ enwene nana evaọ iroro riẹ u si rie kẹle Ọghẹnẹ viere no. Ọ ta nọ: “Mẹ riẹ nọ [whẹ, Jihova] whọ rẹ sai ru eware kpobi.” (Job 42:2) Fikinọ Jihova o dhesẹ oruaro riẹ via, Job ọ tẹ te riẹ vevẹ ziezi epanọ ọ kawo te evaọ aro Ọmemama na.
13. Ẹvẹ ohrọ udhesẹ u ro fi obọ họ kẹ Job?
13 Orọ urere, Job ọ rrọ uvi oriruo ọrọ ohwo nọ o dhesẹ ohrọ. Egbẹnyusu riẹ nọ a ta nnọ a nyaze te sasa iẹe oma a raha e riẹ udu gaga, rekọ nọ Jihova ọ ta kẹ Job inọ ọ lẹ kẹ ae, o ru ere. Kẹsena, Jihova o te ru nọ ẹyao Job o ro kpo. (Job 42:8, 10) U re vevẹ inọ evedha i re fi obọ họ kẹ omai thihakọ họ, rekọ uyoyou gbe ohrọ i ti fi obọ họ kẹ omai. Ofu nọ ma rẹ nya seba u re fi obọ họ kẹ omai wo omosasọ no obọ Jihova ze, yọ oye họ uzuazọ nọ Jihova ọ rẹ ghale.—Mak 11:25.
Ekohrẹ Iwareghẹ nọ I re Fi Obọ họ kẹ Omai Thihakọ
14, 15. (a) Ekwakwa-aghae vẹ e rẹ sai fi obọ họ kẹ ọkohrẹ sasa amọfa oma? (b) Dhesẹ oware nọ Elaihu o ru nọ ọ sae rọ t’ẹme te Job udu.
14 Oware ofa jọ nọ ma re wuhrẹ no ikuigbe Job ze họ epanọ ekohrẹ iwareghẹ e ghare te. Ahwo otiọye na a wọhọ ‘oniọvo evaọ oke uye.’ (Itẹ 17:17) Rekọ, wọhọ epanọ oriruo Job o dhesẹ na, ekohrẹ jọ a rẹ sae raha ohwo eva ukpenọ a tuduhọ ohwo awọ. Emamọ ọkohrẹ o re dhesẹ ọdawẹ, adhẹẹ, gbe ẹwo, wọhọ epanọ Elaihu o ru na. O sae gwọlọ nọ ekpako ukoko gbe Ileleikristi efa nọ e kpako evaọ abọ-ẹzi a kpọ iroro inievo nọ e rrọ ọkora fiki ẹbẹbẹ vi, yọ ekohrẹ itieye na a rẹ sai wuhrẹ eware buobu no obe Job ze.—Ahwo Galesha 6:1; Ahwo Hibru 12:12, 13.
15 Ma rẹ sae jọ uruemu nọ Elaihu o dhesẹ gbe eme nọ ọ ta wuhrẹ eware buobu. Ọ gaviezọ oke krẹkri taure ọ tẹ te kpahe ẹme fihọ eme ethọthọ erọ egbẹnyusu esa Job. (Job 32:11; Itẹ 18:13) Elaihu ọ ta ẹme te Job udu wọhọ ogbẹnyusu. (Job 33:1) Wo ohẹriẹ no egbẹnyusu erue esa Job na, Elaihu o rri oma riẹ kpehru vi Job hu. Ọ ta nnọ: “[Ọviẹ] a rọ ma omẹ re.” Ọ gwọlọ rehọ eme nọ e kare iroro fiba uye Job hu. (Job 33:6, 7; Itẹ 12:18) Ukpenọ ọ rẹ rọ eme fa Job ovao, Elaihu o jiri rie kẹ ẹrẹreokie riẹ. (Job 33:32) Maero, Elaihu o wo eriwo Ọghẹnẹ kpahe ẹme nọ ọ rrọ otọ na, yọ o fi obọ họ kẹ Job riẹ inọ Jihova o re kienyẹ ohwo ho. (Job 34:10-12) Ọ tuduhọ Job awọ inọ ọ hẹrẹ Jihova, ukpenọ o re dhesẹ oma riẹ inọ o kiẹrẹe. (Job 35:2; 37:14, 23) Ekpako ukoko gbe Ileleikristi efa a rẹ sae jọ onana wuhrẹ eware buobu.
16. Ẹvẹ a sae rọ ta nọ Setan ọ jẹ rehọ egbẹnyusu esa Job na ro ruiruo?
16 Eme ọ areghẹ Elaihu i wo ohẹriẹ gaga no emiẹsọ nọ Elifaz, Bildad, gbe Zofa a ta. Jihova ọ ta kẹ ae nọ: “Wha ta ewoma ọvo kpahe omẹ hẹ.” (Job 42:7) A tẹ make ta nnọ a wo oware uyoma fihọ udu hu, eme rai i dhesẹ i rai wọhọ uvi egbẹnyusu hu rekọ wọhọ enọ Setan o bi ro ruiruo. Aimasa na a rehọ etata ẹme rai dhesẹ no emuhọ ze inọ Job ọvo ọ wha uye se oma riẹ. (Job 4:7, 8; 8:6; 20:22, 29) Wọhọ epanọ Elifaz ọ ta, Ọghẹnẹ o re fi eva họ idibo riẹ hẹ, yọ ma tẹ maki kiẹrẹe hayo ma kiẹrẹe he u muẹme kẹ Ọghẹnẹ hẹ. (Job 15:15; 22:2, 3) Elifaz ọ tubẹ ta eware nọ Job o ru hu fihọ iẹe uzou. (Job 22:5, 9) Rekọ Elaihu o fi obọ họ kẹ Job ru usu riẹ kugbe Jihova ga, yọ oye họ ute emamọ ọkohrẹ kpobi.
17. Eme ma rẹ kareghẹhọ ma tẹ rrọ otọ odawọ?
17 Oware ofa o riẹ nọ ma rẹ jọ obe ọ Job wuhrẹ kpahe ithihakọ. Ọghẹnẹ oyoyou mai ọ be ruẹ uye nọ u bi te omai, yọ ọ rẹ sai fi obọ họ kẹ omai, o tẹ jẹ ruẹe nọ o re ru ere evaọ idhere sasa. Ma jọ obehru ta kpahe oware nọ o via kẹ Elsa Abt no vẹre. Roro kpahe epanọ o ro ku ẹme na họ: “Taure a te ti mu omẹ, me se ileta oniọvo-ọmọtẹ jọ nọ o ta nnọ, nọ ohwo ọ tẹ rrọ otọ ẹdawọ, ẹzi Jihova ọ rẹ lẹliẹ udu kie ohwo vi. Me je roro nnọ o fi uwhei họ ẹme na. Rekọ nọ uye u te omẹ oma, mẹ tẹ riẹ nnọ uzẹme ọ ta. Nwanọ ere o via kẹ omẹ. O rẹ sai v’owhẹ ẹro ho otẹrọnọ o gbẹ re via k’owhẹ hẹ. Rekọ ere o ginẹ via kẹ omẹ. Jihova o re fi obọ họ.” Orọnikọ Elsa ọ be ta kpahe oware nọ Jihova ọ te sai ru hayo oware nọ o ru evaọ oke nọ u kpemu evaọ edẹ Job hu. Oke mai nana ọ be ta kpahe na. Uzẹme o rrọ inọ Jihova o re fi obọ họ!”
Eva E Were Ohwo nọ O Thihakọ
18. Didi irere Job o wo fiki akothiho riẹ?
18 Enọ e te jọ udevie mai ruẹ uye te Job a ti bu hu. Rekọ ghelọ oghẹrẹ odawọ kpobi nọ o te jọ uyerakpọ nana te omai, ma wo ẹjiroro buobu nọ ma re ro kru ẹgbakiete mai, wọhọ epanọ Job o ru na. Evaọ uzẹme, ithihakọ e wha erere se Job. U ru rie kiete jẹ gbunu. (Jemis 1:2-4) O lẹliẹ usu riẹ kugbe Ọghẹnẹ ga vi epaọ ọsosuọ. Job ọ ta nnọ: “Mẹ rehọ ezọ mẹ yo kpahe owhẹ, rekọ enẹna ibiaro mẹ e ruẹ owhẹ no.” (Job 42:5) U dhesẹ Setan fihọ ọtọrue fikinọ ọ sae raha ẹgbakiete Job hu. Nọ ikpe udhusoi buobu e ruọ emu no, Jihova ọ gbẹ riobọhọ Job odibo riẹ wọhọ oriruo ọrọ ẹrẹreokie. (Izikiẹl 14:14) Iku ẹgbakiete gbe ithihakọ riẹ e gbẹ be kẹ ahwo Ọghẹnẹ ọwhọ nẹnẹ.
19. Fikieme whọ sae rọ ta nọ erere ọ rrọ akothiho?
19 Nọ Jemis o kere se Ileleikristi ikpe-udhusoi ọsosuọ kpahe akothiho, ọ fodẹ irere nọ akothiho ọ rẹ wha ze. Ọ rehọ oriruo Job rọ kareghẹhọ ae inọ Jihova o re ku eghale buobu ku idibo riẹ nọ e be gọe no eva ze. (Jemis 5:11) Ma jọ Job 42:12 se nọ: “ỌNOWO na ọ tẹ ghale Job evaọ edẹ uzuazọ riẹ nọ i kiọkọ, vi oke ọsosuọ nọ u kpemu.” Ọghẹnẹ o zihe eware nọ Job o wo vẹre kẹe akuava, yọ ọ rria tọ avọ evawere. (Job 42:16, 17) Epọvo na re, a ti si edada, uye-oruẹ, hayo ọbẹwẹ kpobi nọ ma bi thihakọ riẹ evaọ ekuhọ uyerakpọ nana no, e vẹ jẹ te thọrọ omai ẹro evaọ akpọ ọkpokpọ Ọghẹnẹ. (Aizaya 65:17; Eviavia 21:4) Ma yo kpahe ithihakọ Job no, yọ avọ obufihọ Jihova, ma gba riẹ mu no inọ ma te raro kele oriruo Job. Ebaibol na e ta nọ: “Ohwo nọ o re thihakọ kẹ odawọ o wo oghale, keme re o te mudhe kẹ odawọ na, o re ti mi etu-uvie uzuazọ nọ Ọnowo ọ kpokpa riẹ kẹ enọ i you rie.”—Jemis 1:12.
Ẹvẹ Whọ te k’Uyo?
• Ẹvẹ ma sai ro ru eva were Jihova?
• Fikieme ma gbe ro ku ei họ họ inọ ma tẹ rrọ ẹbẹbẹ kiyọ u dhesẹ nọ Ọghẹnẹ ọ be dheva kpahe omai?
• Eware vẹ i fi obọ họ kẹ Job thihakọ?
• Ẹvẹ ma sae rọ raro kele Elaihu evaọ oghẹrẹ nọ ma rẹ rọ ta udu họ ibe Ileleikristi awọ?
[Enọ Uwuhrẹ]
[Uwoho nọ o rrọ ẹwẹ-obe avọ 16]
Emamọ ọkohrẹ o re dhesẹ ọdawẹ, adhẹẹ, gbe ẹwo
[Iwoho nọ e rrọ ẹwẹ-obe avọ 17]
Elsa avọ Harald Abt