Uyoyou O Rẹ Kẹ Ohwo Udu
Uyoyou O Rẹ Kẹ Ohwo Udu
“Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga gbe uyoyou avọ oma-onyẹ.”—2 TIMOTI 1:7.
1, 2. (a) Eme uyoyou o rẹ sae wọ ohwo ru? (b) Fikieme udu hayo aruọwha Jesu o rọ jọ oghẹrẹsa?
ỌZAE avọ aye jọ nọ a rọo obọ a je diwi-ame eva unueri ethẹ nọ ọ kẹle ẹwho eva ofẹ ovatha-ọre Australia. Nọ a bi ti ru re a vaze, eshake ologbo jọ ọ tẹ họrọ mu aye na. Ọzae na ọ tẹ gbaudu gele aye riẹ fihọ akotọ, eshake na ọ tẹ lọ ọzae na omariẹ. Eva uwhori riẹ, aye-uku na ọ ta nọ: “O si obọ no uzuazọ riẹ fiki mẹ.”
2 Ẹhẹ, uyoyou o rẹ sae wọ ahwo-akpọ wo udu nọ o viodẹ. Jesu Kristi ọ ta nọ: “Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.” (Jọn 15:13) Nọ Jesu ọ ta eme nana no, oware wọhọ asohẹrioke o te si obọ no uzuazọ riẹ, orọnikọ fiki omọvo jọ họ rekọ fiki ahwo-akpọ kpobi. (Matiu 20:28) Ofariẹ, orọnikọ abọ-ọvahọ Jesu ọ rọ gbaudu si obọ no uzuazọ riẹ hẹ. Ọ riẹ kpahotọ inọ a ti sei ẹkoko, lahiẹe, bruoziẹ kpei ekueku, o ve ti je whu evaọ ure-oja. Ọ tubẹ ruẹrẹ ilele riẹ họ kpahe kẹ onana, ta nọ: “Ri, ma bi ti kpo obọ Jerusalem na; a re ti vivie Ọmọ ohwo kẹ ilori izerẹ gbe otu ikere-obe; a re ti bru kpe ei re o whu, a rẹ te rehọ iẹe kẹ otu Egedhọ. A re ti se i ẹkoko, a ve nhweya ku ei, a rẹ te fa e, a ve kpe i.”—Mak 10:33, 34.
3. Eme o ru nọ Jesu o ro wo udu hayo aruọwha ologbo?
3 Eme o ru nọ Jesu o ro wo udu ulogbo? Uyoyou gbe ozodhẹ Ọghẹnẹ nọ o wo o zọhọ fihọ onana ruaro. (Ahwo Hibru 5:7; 12:2) Dede na, oware nọ o mae lẹliẹ Jesu wo udu tere họ, uyoyou nọ o wo kẹ Ọghẹnẹ gbe ahwo-akpọ. (1 Jọn 3:16) Nọ ma te wo uyoyou utioye na avọ ẹrọwọ gbe ozodhẹ Ọghẹnẹ, ma te sai wo ọkpọ udu Kristi. (Ahwo Ẹfẹsọs 5:2) Ẹvẹ ma sai ro wo oghẹrẹ uyoyou utioye? O gwọlọ nọ ma re vuhu Ehri uyoyou utioye na mu.
“Uyoyou Họ o rọ Ọghẹnẹ”
4. Fikieme a sae rọ ta nọ Jihova họ Ehri uyoyou?
4 Jihova họ Ehri uyoyou. Jọn ukọ na o kere nọ: “Iyoyou, wha je omai ohwo o you ohwo, keme uyoyou họ o rọ Ọghẹnẹ, je te kohwo kohwo nọ o you, yọ Ọghẹnẹ o yẹ riẹ, ọ vẹ jẹ riẹ Ọghẹnẹ. Ohwo nọ o wo uyoyou hu, ọ riẹ Ọghẹnẹ hẹ; keme Ọghẹnẹ họ uyoyou.” (1 Jọn 4:7, 8) Fikiere, ohwo ọ rẹ sai wo otiọ uyoyou Ọghẹnẹ hẹ ajokpanọ o re sikẹle Jihova ẹkwoma eriariẹ egbagba riẹ nọ o re wuhrẹ gbe eva kpobi nọ o re ro fi eware nọ o wuhrẹ na họ iruo.—Ahwo Filipai 1:9; Jemis 4:8; 1 Jọn 5:3.
5, 6. Eme o fi obọ họ kẹ ilele Jesu erọ oke ọsosuọ wo ọkpọ uyoyou Kristi?
5 Eva olẹ urere riẹ kugbe ikọ 11 riẹ nọ i wo ẹrọwọ na, Jesu o dhesẹ okugbe nọ o rrọ Ọghẹnẹ nọ a rẹ riẹ gbe re a rro haro evaọ uyoyou, ọ ta nọ: “Me dhesẹ odẹ ra kẹ ae, me re [dhese iẹe], re uyoyou no who you omẹ o vẹ jọ eva rai, mẹ vẹ jọ eva rai.” (Jọn 17:26) Jesu o fi obọ họ kẹ ilele riẹ wo ọkpọ uyoyou nọ o rrọ udevie riẹ avọ Ọsẹ riẹ, ọ rehọ ẹme-unu gbe uruemu dhesẹ oware nọ odẹ Ọghẹnẹ u dikihẹ kẹ—obọdẹ iruemu-aghae Ọghẹnẹ. Oyejabọ nọ Jesu ọ sae rọ ta nọ: “Ọ nọ ọ ruẹ omẹ ọ ruẹ Ọsẹ na.”—Jọn 14:9, 10; 17:8.
6 Ọkpọ uyoyou Kristi yọ ubi ẹzi ọfuafo Ọghẹnẹ. (Ahwo Galesha 5:22) Okenọ ẹzi ọfuafo nọ a ya eyaa riẹ na o te Ileleikristi ọsosuọ na obọ eva Pẹntikọst 33 C.E., orọnikọ a kareghẹhọ eware buobu nọ Jesu o wuhrẹ i rai na ọvo ho rekọ u fi obọ họ kẹ ai wo otoriẹ Ikereakere vẹ vi epaọ ọsosuọ. Otoriẹ udidi nana u fi obọ họ kẹ ai rro haro evaọ uyoyou nọ a wo kẹ Ọghẹnẹ. (Jọn 14:26; 15:26) Eme o no rie ze? U ru nọ a rọ ta usiuwoma na ududu avọ ajọwha dede nọ uzuazọ rai o jọ ọza.—Iruẹru 5:28, 29.
Udu avọ Uyoyou nọ O Rrọ Iruo
7. Eme Pọl avọ Banabas a thihakọ riẹ eva okenọ a jọ usu evaọ erẹ usiuwoma ota?
7 Pọl ukọ na o kere nọ: “Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga gbe uyoyou avọ oma-onyẹ.” (2 Timoti 1:7) Eware nọ e via kẹ Pọl no eye o roro ku ta ẹme nana. Roro kpahe eware nọ e via kẹe avọ Banabas nọ a jọ usu evaọ erẹ usiuwoma ota. A ta usiuwoma eva ewho buobu, nọ o kẹre te Antiọk, Aikoniọm, gbe Listra. Evaọ ewho na, ahwo jọ a kurẹriẹ, rekọ amọfa a jọ ewegrẹ ilogbo. (Iruẹru 13:2, 14, 45, 50; 14:1, 5) Evaọ Listra, otu-ugbarugba a tubẹ rehọ itho fi Pọl, kẹsena a tẹ nya se iẹe ba bi roro nọ o whu no! “Rekọ epanọ ilele na i ro dikihẹ wariẹ e họ na, ọ tẹ kparoma ọ jẹ nya ruọ evaọ okpẹwho na; okeokiọ riẹ a vọ Banabas a tẹ gbẹ nya kpobọ Dẹbi.”—Iruẹru 14:6, 19, 20.
8. Ẹvẹ udu hayo aruọwha Pọl avọ Banabas u ro dhesẹ uyoyou nọ a wo kẹ amọfa?
8 Kọ obọ ojihẹ nọ a jẹ kẹ Pọl avọ Banabas na o lẹliẹ e rai siọ iruo usiuwoma ota na ba? Vievie! Ukpoye, nọ a “ru ilele buobu no” evaọ Dẹbi, aimava a te “zihe ze Listra jẹ ze Ikọniọm gbe Antiọk.” Fikieme? Re a ruẹse ta udu họ ahwo nọ a bi kurẹriẹ ze obọ na awọ epanọ a re ro dikihẹ ga evaọ ẹrọwọ na. Pọl avọ Banabas a ta nọ: “Udevie ikpokpoma buobu ma rẹ nya vrẹ ruọ uvie Ọghẹnẹ.” U re vevẹ, uyoyou udidi nọ a wo kẹ “imigodẹ” Kristi oye o kẹ rai udu yena. (Iruẹru 14:21-23; Jọn 21:15-17) Nọ a rehọ ekpako mu no evaọ ikoko ekpokpọ na, inievo Ileleikristi ivẹ na a tẹ lẹ je “mu ai họ obọ Ọnowo na ọnọ a rọwo.”
9. Eme uyoyou nọ Pọl o dhesẹ kẹ ekpako nọ i no obọ Ẹfẹsọs ze o wọ rai ru?
9 Pọl yọ ohwo nọ o wo udu gbe ẹruọsa, onọ u ru nọ Ileleikristi oke ọsosuọ buobu a ro wo uvi uyoyou kẹe. Kareghẹhọ oware nọ o via eva ẹgwa nọ Pọl ọ gba kugbe ekpako nọ i no obọ Ẹfẹsọs ze, oria nọ ọ jọ evaọ ikpe esa jẹ ruẹ uye ọwọsuọ buobu. (Iruẹru 20:17-31) Nọ ọ ta udu họ ai awọ no inọ a sẹro uthuru Ọghẹnẹ nọ o muhọ ai obọ, Pọl avọ ekpako na a te kiguẹ lẹ. Kẹsena, “ai kpobi a tẹ jẹ viẹ gaga, a jẹ gbalọ Pọl ohọe, a jẹ viọlọ iẹe unu, onọ amai weri kọ orọ ẹme nọ ọ ta na, nnọ, a gbẹ sai ruẹ ovao riẹ ofa ha.” Uyoyou nọ inievo nana a wo kẹ Pọl o rro kẹhẹ! Evaọ uzẹme, okenọ a rẹ rọ nya se ai ba u te, udugaga Pọl avọ ogbẹnya riẹ a rọ “hẹrioma,” yọ ekpako okogho na a jẹ rọwo si obọ no ai hi.—Iruẹru 20:36–21:1.
10. Ẹvẹ Isẹri Jihova ọgbọna a rọ rehọ aruọwha dhesẹ uyoyou kẹ ohwohwo no?
10 Ma wo uyoyou ulogbo kẹ esẹro ọnyawariẹ, ekpako ukoko, gbe inievo efa buobu fiki udu nọ a wo nọ a be rọ rẹro te igodẹ Jihova. Wọhọ oriruo, evaọ erẹwho nọ ẹmo ọ raha kuotọ hayo nọ a jẹ za iruo usiuwoma ota na dhe, esẹro ọnyawariẹ avọ eyae rai a fi uzuazọ rai họ ọza no re a ruẹsi weze kpohọ ikoko. Epọvo na re, Isẹri Jihova buobu a ruẹ uye evaọ obọ isu egeva gbe enọ e rrọ otọ rai no fikinọ a se inọ a re vivie ibe Isẹri rai hi hayo dhesẹ oria nọ emu-ẹzi o noze te ai obọ họ. A rehọ ukpokpoma te, lahiẹ, je tube kpe idu ahwo buobu efa no fikinọ a se inọ a rẹ siọ usiuwoma ota ba, hayo siọ oma ba ekugbe ibe Ileleikristi rai evaọ iwuhrẹ. (Iruẹru 5:28, 29; Ahwo Hibru 10:24, 25) Joma raro kele ẹrọwọ gbe uyoyou inievo itieye na nọ i dhesẹ udu na!—1 Ahwo Tẹsalonika 1:6.
Wha jọ Uyoyou Rai U Kiekpo Ho
11. Idhere vẹ Setan ọ be rọ họre idibo Jihova eva abọ-ẹzi, kọ eme o gwọlọ nọ a re ru?
11 Okenọ a le Setan ziọ otọakpọ, o jọ ọtamuo riẹ re ọ rehọ ofu wọso idibo Jihova fikinọ a bi “koko izi Ọghẹnẹ, [je] se isẹi kẹ Jesu.” (Eviavia 12:9, 17) Edhere jọ nọ Ẹdhọ ọ be rọ wọso họ ukpokpoma. Dede na, ẹsibuobu ukpenọ onana o lẹliẹ idibo Ọghẹnẹ kie no ẹrọwọ rai, kọ u bi fi obọ họ kẹ ai jọ okugbe ọvo viere evaọ uyoyou Ileleikristi, jẹ be wọ ibuobu rai wo ọwhọ ziezi. Edhere ọfa nọ Setan o bi ro ru iruo họ, ẹkwoma eware nọ ọ be rọ kpare isiuru ohwo-akpọ. Re a sae whaha ẹghẹ nana o gwọlọ oghẹrẹ aruọwha ọfa jọ keme ohọre nana obeva ohwo o rrọ, ohọre wọso urusio nọ u fo ho evaọ udu mai nọ “u wo ẹghẹ vi eware na kpobi, je wo uruemu ugbogbo” na.—Jerimaya 17:9; Jemis 1:14, 15.
12. Ẹvẹ Setan ọ be rọ daoma rehọ “ẹzi akpọ na” ru iruo re ọ ruẹsi whrehe uyoyou nọ ma wo kẹ Ọghẹnẹ?
12 Setan o wo okwakwa-ẹmo uyoma ọfa jọ evaọ usu enọ ọ be rọ họre na—“ẹzi akpọ na,” oye họ, isiuru nọ e rrọ akpọ na wowẹ nọ e wọso ẹzi ọfuafo Ọghẹnẹ. (1 Ahwo Kọrint 2:12) Ẹzi akpọ na ọ be wha uvo-uthe gbe efe-ole—“urusio ibiaro” na haro. (1 Jọn 2:16; 1 Timoti 6:9, 10) Dede nọ re a wo igho gbe ekwakwa efe o thọ họ, otẹrọnọ uyoyou nọ ma wo kẹ ai o tẹ ga vi onọ ma wo kẹ Ọghẹnẹ, kiyọ Setan ọ kparobọ no. Oware nọ u ru “ogaga” ẹzi akpọ na via họ, urusio riẹ kẹ ugboma sebaẹgba na, ẹghẹ riẹ, epanọ o bi kpomahọ ahwo te jẹ vaha vẹrẹ te wọhọ ofou. Whọ kuvẹ re ẹzi akpọ na o gbe udu ra ku hu!—Ahwo Ẹfẹsọs 2:2, 3; Itẹ 4:23.
13. Ẹvẹ udu nọ ma rẹ rọ yọrọ ẹfuọ uruemu o sae rọ ziọ otọ odawọ?
13 Dede na, re ma sae whaha ẹzi oyoma akpọ na o gwọlọ udu nọ ma re wo. Wọhọ oriruo, o gwọlọ udu re ohwo ọ sae kpama no afe-ughe hayo furie ekọmputa hayo etẹlivisiọne nọ a tẹ be jarai dhesẹ iwoho nọ i fo ho. O gwọlọ udu re a sae za otunyẹ ọhwa nọ o fo ho dhe jẹ whaha ekpehre usu. Epọvo na re, o gwọlọ udu re a sai koko izi Ọghẹnẹ nọ ohwo ọ tẹ rẹriẹ ovao dhe ẹkoko ọrọ ibe emọ isukulu, ibe iruiruo, erivẹ, hayo imoni.—1 Ahwo Kọrint 15:33; 1 Jọn 5:19.
14. Eme u fo nọ ma re ru otẹrọnọ ẹzi akpọ na o kpomahọ omai?
14 Nọ o rrọ ere na, u wuzou gaga re ma bọ uyoyou nọ ma wo kẹ Ọghẹnẹ gbe inievo abọ-ẹzi mai ga! Roma totọ kiẹ itee ra gbe edhere uzuazọ ra riwi sọ ẹzi akpọ na o kpomahọ owhẹ no evaọ edhere jọ. Otẹrọnọ o kpomahọ owhẹ no—makọ evaọ edhere ọsese—lẹ se Jihova re ọ kẹ owhẹ udu nọ whọ rẹ rọ whaha ẹzi ọyena jẹ kẹnoma kẹe. Jihova ọ te jẹ olẹ eva efuafo yena fiẹ hẹ. (Olezi 51:17) Ofariẹ, ẹzi Ọghẹnẹ ọ ga vi ẹzi akpọ na kpekufiẹ.—1 Jọn 4:4.
Ovao O Rẹriẹ Dhe Edawọ avọ Udu
15, 16. Ẹvẹ ọkpọ uyoyou Kristi o sai ro fi obọ họ kẹ omai thihakọ edawọ? Kẹ oriruo.
15 Ise-abọ efa nọ idibo Jihova a re lele muabọ họ ebẹbẹ ọ sebaẹgba jekugbe owho, nọ ẹsibuobu i re su kpohọ ẹyao, lẹliẹ ohwo ko fihotọ, wha ọkora, gbe ebẹbẹ efa buobu ze. (Ahwo Rom 8:22) Ọkpọ uyoyou Kristi o rẹ sai fi obọ họ kẹ omai thihakọ ebẹbẹ nana. Rri oriruo ọrọ Namangolwa nọ ọ jọ uviuwou Ileleikristi whẹro evaọ Zambia. Ẹyao ọ ko Namangolwa fihotọ nọ ọ jọ ikpe ivẹ. Ọ ta nọ: “Mẹ jẹ hai roro kpahe oma mẹ na gaga,” je fibae nọ, “me je roro nọ epanọ oma mẹ o rrọ o te hai gbe ahwo unu. Rekọ ibe inievo Ileleikristi a fi obọ họ kẹ omẹ kpọ eriwo mẹ vi. O tẹ whae ze nọ mẹ rọ siọ oma mẹ na ba eroro kpahe, o raha oke he mẹ tẹ họ-ame.”
16 Dede nọ Namangolwa o wo akaba-ọmo nọ a re ghelie, ẹsibuobu ọ rẹ rehọ abọ gbe ighilawọ nya evaọ edhere nọ uwẹkpẹ o vọ. Ghele na, o tẹ kawo, ọ rẹ rehọ ọkobaro ubroke emerae ivẹ evaọ ẹgbukpe. Irui-oviẹ i su no ohwo jọ nọ Namangolwa ọ ta usiuwoma kẹ aro ze. Fikieme? Fikinọ ẹrọwọ gbe udu nọ oniọvo-ọmọtẹ mai na o dhesẹ e dhẹ ruẹe oma. Jihova ọ ghale omodawọ Namangolwa, emọ-uwuhrẹ Ebaibol isoi riẹ e họ-ame no, yọ omọvo rai jọ ọ rrọ ọkpako ukoko enẹna. Ọ ta nọ: “Awọ na e rẹ da omẹ gaga ẹsibuobu,” o fibae nọ, “rekọ mẹ rẹ kuvẹ re oyena o whaha omẹ hẹ.” Ọnana yọ oriruo ọvo ọrọ Isẹri buobu wariẹ akpọ na họ nọ oma o ga tehe rekiyọ a rẹ gaga evaọ ẹzi fiki uyoyou nọ a wo kẹ Ọghẹnẹ gbe erivẹ. Ahwo otiọye na kpobi a rrọ ghaghae gaga evaọ aro Jihova!—Hagai 2:7.
17, 18. Eme o bi fi obọ họ kẹ ahwo buobu thihakọ ẹyao gbe edawọ efa? Kẹ iriruo ahwo obonẹ jọ.
17 Ẹyao nọ ọ rẹ kaki kpo ho ọ sai whrehe ohwo udu jẹ kẹ idhọvẹ. Ọkpako ukoko jọ ọ ta nọ: “Evaọ utu uwuhrẹ obe ukoko mẹ, u wo oniọvo-ọmọtẹ jọ nọ ọ be mọ ẹyao-evẹ, ọfa o wo ẹyao-ọta, inievo emetẹ ivẹ efa i wo ẹyao ọnyokpa-enwa, oniọvo ọmọtẹ ọfa jọ o wo ẹyao edada oma na kpobi gbe ẹyao oyoma jọ nọ ọ rẹ raha ekwakwa oma na. Ẹsejọ a rẹ jọ ọkora. Ghele na, ewuhrẹ o re vo ai hi ajokpanọ ẹyao na o kru rai fihotọ hayo a rrọ ẹsipito. Aikpobi a re kpohọ usiuwoma ota ẹsikpobi. A kareghẹhọ omẹ ẹme Pọl, ọnọ ọ ta nọ: ‘Nọ omẹ rẹ kuako, kpakiyọ ẹsiẹe mẹ gae.’ Uyoyou gbe aruọwha rai u si omẹ urru kẹhẹ. Ẹsejọhọ uyero rai o lẹliẹ rai riẹ epanọ uzuazọ o rrọ gbe oware nọ o ginẹ mai wuzou.”—2 Ahwo Kọrint 12:10.
18 Otẹrọnọ who bi lele ẹyao jọ hayo oghẹrẹ ẹbẹbẹ ọfa jọ muabọ, “he dhe ẹlẹlẹ” kẹ obufihọ re udu o se owhẹ ba ewhrehe. (1 Ahwo Tẹsalonika 5:14, 17) Ginọ uzẹme, ẹsejọhọ whọ te hai wo ọkora otiẹse, rekọ daoma tẹrovi abọ owoma, eware abọ-ẹzi, maero kọ ẹruore Uvie mai nọ ọ rẹ ghaghae na. Oniọvo ọmọtẹ na jọ ọ ta nọ: “Rọkẹ omẹ, iruo odibọgba na yọ umu.” Usiuwoma na nọ ọ be ta kẹ amọfa u bi fi obọ họ kẹe wo emamọ eriwo.
Uyoyou U re Fi Obọ họ kẹ Ahwo nọ A Thuzi nọ A je Zihe Bru Jihova Ze
19, 20. (a) Eme o rẹ sai fi obọ họ kẹ ahwo nọ a raha uzi nọ a je wo udu nọ a re ro zihe bru Jihova? (b) Eme ma te ta kpahe evaọ uzoẹme nọ ma bi ti te na?
19 O be jọ bẹbẹ kẹ ahwo jọ buobu nọ a be mọ oyẹlẹ evaọ abọ-ẹzi hayo nọ a thuzi re a zihe bru Jihova. Rekọ ahwo otiọye na a ti wo udu nọ o gwọlọ otẹrọnọ a gine kurẹriẹ je ru uyoyou nọ a wo kẹ Ọghẹnẹ kpokpọ. Rehọ oriruo Mario, * oniọvo nọ ọ be rria United States. Mario o no ukoko Ileleikristi na, o te zihe ruọ ọgbidi gbe ọnọ ọ rehọ imu-egaga reria no, kẹsena nọ ikpe 20 e ruọ emu no a te fi ei họ uwou-odi. Mario ọ ta nọ: “Me te mu epanọ obaro akpọ mẹ ọ te jọ họ eroro kpahe, je mu Ebaibol họ ẹwariẹ se.” O fibae nọ, “Nọ omoke jọ o vrẹ no, me te wo ovuhumuo kpahe iruemu-aghae Jihova, maero kọ ohrọ riẹ nọ mẹ jẹ hae lẹ kẹ ẹsikpobi. Nọ me no uwou-odi ze no, me te si oma no egbẹnyusu anwae mẹ, mu iwuhrẹ Ileleikristi họ ekpohọ, kẹsena a tẹ wariẹ rehọ omẹ ziọ ukoko na. Mẹ be jọ oma mẹ ruẹ uye eware nọ me ru, rekọ eva nọ e be were omẹ họ me wo obọdẹ ẹruore. Mẹ be ruẹ unu ro yere Jihova kẹ ohrọ gbe erọvrẹ riẹ hẹ.”—Olezi 103:9-13; 130:3, 4; Ahwo Galesha 6:7, 8.
20 Evaọ uzẹme, o rẹ gwọlọ omodawọ ogaga re ahwo nọ a kie ruọ oghẹrẹ ẹbẹbẹ Mario na a sai zihe bru Jihova. Rekọ uyoyou rai nọ a rẹ wariẹ ru kpokpọ—ẹkwoma uwuhrẹ Ebaibol, olẹ, gbe eroro-odidi—o te kẹ ai udu gbe ọtamuo nọ a gwọlọ. Ẹruore Uvie na o jọ ọbọga kẹ Mario re. Ẹhẹ, fiba uyoyou, ẹrọwọ gbe ozodhẹ Ọghẹnẹ, ẹruore o re kpomahọ uzuazọ mai wowoma. Evaọ uzoẹme nọ ma bi ti te na, ma te roma totọ ta kpahe okẹ oghaghae abọ-ẹzi nana.
[Oruvẹ-obotọ]
^ edhe-ẹme 19 A nwene odẹ na.
Kọ Whọ Sae k’Uyo?
• Ẹvẹ uyoyou u ro fi obọ họ kẹ Jesu yọrọ udu hayo aruọwha nọ o viodẹ?
• Ẹvẹ uyoyou nọ a wo kẹ inievo Ileleikristi na o rọ kẹ Pọl avọ Banabas udu oghẹrẹsa?
• Idhere vẹ Setan ọ be rọ daoma whrehe uyoyou Ileleikristi?
• Edawọ vẹ uyoyou nọ ma re wo kẹ Jihova o rẹ sae k’omai udu thihakọ rai?
[Enọ Uwuhrẹ]
[Uwoho nọ o rrọ ẹwẹ-obe avọ 23]
Uyoyou nọ Pọl o wo kẹ amọfa o kẹ riẹ udu nọ o ro thihakọ
[Uwoho nọ o rrọ ẹwẹ-obe avọ 24]
Re a sae rria lele itee Ọghẹnẹ o gwọlọ udu
[Uwoho nọ o rrọ ẹwẹ-obe avọ 24]
Namangolwa Sututu