Daniel Avọ Ebaje Okokohọ Riẹ

JESU ọ whọku isu egagọ nọ e jọ ẹro obọrai kiẹrẹe enọ e jẹ dheva nọ a ruẹ emaha nọ e jẹ jọ ẹgbede jiri Ọghẹnẹ. Nwani fo, Jesu ọ nọ rai nọ: “Wha ri se he, ‘Wha rẹ rehọ ejiro nọ o no unu emaha gbe emọ unuevie’?”—Matiu 21:15, 16.

Daniel, ọmọ ikpe ezeza nọ ọ rrọ ukoko ẹvẹrẹ ahwo Russia evaọ Germany, ọ kẹ imuẹro inọ emaha a gbe bi jiri Jihova. Tei te oni gbe oniọvo riẹ a kpohọ okokohọ Isẹri Jihova evaọ Duisburg. Onana họ orọ ọsosuọ nọ a ro kpohọ okokohọ ologbo otiọnana. Eware kpobi i je gbe ai unu: ehọtẹle nọ a wohọ, ogbotu ahwo buobu na, ahwo na kpobi nọ a keria dhedhẹ evaọ edẹ esa, ame-ọhọ na, a gbẹ du fodẹ edrama na ha. Uruemu vẹ Daniel o dhesẹ? Ọ roma kpotọ edẹ na kpobi.

Nọ a no okokohọ na kpozi no, okiokiọ riẹ nọ o rrọ Ẹdọvo-Oka, Daniel ọ tẹ kpama evaọ ohiohiẹ re o kpohọ isukulu. Rekọ eme ọ gbẹ samu ewu riẹ? Ebaje okokohọ na! Oni riẹ ọ tẹ ta kẹe nọ: “Okokohọ na ọ fa no. Whọ rẹ sai si ebaje na no.” Rekọ Daniel ọ tẹ ta nọ: “Mẹ gwọlọ re ahwo kpobi a riẹ obonọ mẹ nya jẹ riẹ eware nọ me wuhrẹ.” Fikiere, okikpo evaọ obọ isukulu, ọ wha ebaje riẹ avọ oma nọ u je mu ei. Nọ iticha riẹ ọ nọe kpahe ebaje na, o tẹ ta epanọ okokohọ na ọ jọ kẹe.

Daniel ọ rehọ ere be raro kele oriruo emaha idu buobu enọ e be rehọ orro kẹ Jihova evaọ ikpe na kpobi ze na.