Daji Uyoyou Ọghẹnẹ!
Daji Uyoyou Ọghẹnẹ!
“Iyoyou, wha . . . yọre oma rai eva uyoyou Ọghẹnẹ; . . . [avọ ẹruore] uzuazọ ebẹdẹ bẹdẹ.”—JUD 20, 21.
1, 2. Ẹvẹ whọ sae rọ yọre oma ra eva uyoyou Ọghẹnẹ?
JIHOVA o you ahwo-akpọ ga te epanọ ọ jẹ rehọ Ọmọvo riẹ kẹ re ahwo nọ a fi ẹrọwọ họ iẹe a ruẹsi wo uzuazọ ebẹdẹ bẹdẹ. (Jọn 3:16) Re a you ohwo oghẹrẹ utioye yọ uvẹ ọghọ ulogbo! Avro ọ riẹ hẹ, whọ tẹ rrọ odibo Jihova whọ te gwọlọ reawere uyoyou yena bẹdẹ bẹdẹ.
2 Jud olele na o dhesẹ epanọ whọ sae rọ daji uyoyou Ọghẹnẹ. Jud o kere nọ: “Wha rọ orọwọ ọrẹri rai yọrọ oma rai whẹro, wha lẹ evaọ Ẹzi Ẹri na; jẹ yọre oma rai eva uyoyou Ọghẹnẹ na; wha hẹrẹ ohrọ-oriọ Ọnowo mai Jesu Kristi rite uzuazọ ebẹdẹ bẹdẹ.” (Jud 20, 21) Nọ whọ tẹ be hai wuhrẹ Ẹme Ọghẹnẹ jẹ ta usiuwoma na, u ti fi obọ họ nọ “orọwọ ọrẹri” na—iwuhrẹ Ileleikristi na—e te rọ jọ otọhotọ kẹ uzuazọ ra. Re whọ ruẹse daji hayo yọre oma ra eva uyoyou Ọghẹnẹ, o gwọlọ nọ whọ rẹ hae “lẹ evaọ Ẹzi Ẹri na,” hayo evaọ otọ ekpakpọ riẹ. Re whọ ruẹsi wo uzuazọ ebẹdẹ bẹdẹ, o gwọlọ re inọ who re fi ẹrọwọ họ idhe ẹtanigbo Jesu Kristi na.—1 Jọn 4:10.
3. Fikieme ahwo jọ nọ a wo ẹrọwọ vẹre a gbẹ rọ omọvo Isẹri Jihova ha?
3 Ahwo jọ nọ a wo ẹrọwọ vẹre, a daji uyoyou Ọghẹnẹ hẹ. Fiki uzuazọ umuemu nọ a bi yeri, a gbẹ rrọ omọvo Isẹri Jihova ha. Ẹvẹ whọ sae rọ whaha oware utioye? Eroro kpahe eme nọ e rrọ obotọ na sai fi obọ họ kẹ owhẹ whaha uzioraha jẹ yọre oma ra evaọ uyoyou Ọghẹnẹ.
Dhesẹ Uyoyou nọ Who Wo kẹ Ọghẹnẹ Via
4. Ẹvẹ ẹmeoyo kẹ Ọghẹnẹ o wuzou te?
4 Dhesẹ uyoyou nọ who wo kẹ Ọghẹnẹ via, ẹkwoma ẹme riẹ nọ who re yo. (Matiu 22:37) Jọn ukọ na o kere nọ: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.” (1 Jọn 5:3) Nọ whọ tẹ be hai yeri uzuazọ ẹmeoyo kẹ Ọghẹnẹ u re fi obọ họ kẹ owhẹ whaha uzioraha je wo evawere. Ọso-ilezi na ọ ta nọ: “O ghale ohwo nọ ọ rẹ nya evaọ edhere ahwo omuomu hu, . . . rekọ awere riẹ ọ rẹ jọ evaọ uzi ỌNOWO.”—Olezi 1:1, 2.
5. Eme uyoyou nọ who wo kẹ Jihova o rẹ wọ owhẹ ru ẹsikpobi?
5 Uyoyou nọ who wo kẹ Jihova o te wọ owhẹ whaha uzioraha nọ o rẹ wha ekela se odẹ riẹ. Agọ ọ lẹ nọ: “Who ru omẹ yogbe he, who ru omẹ fe gbehe; rehọ utho emu nọ o fo kuọ omẹ, Ogbẹrọ erehe, eva e jẹ te vọ omẹ hrọ, mẹ vẹ te vro owhẹ, mẹ vẹ te tanọ, ‘Ono họ ỌNOWO na?’ Hayo ogbẹrọ erehe me ti yogbe, je tho uji, mẹ vẹ te raha odẹ Ọghẹnẹ mẹ.” (Itẹ 30:1, 8, 9) Gbaemu inọ whọ rẹ “raha odẹ Ọghẹnẹ” hẹ ẹkwoma eruo eware nọ e rẹ wha ekela sei. Ukpoye, hae daoma ru oware nọ u kiehọ ẹsikpobi nọ o rẹ wha orro se odẹ riẹ.—Olezi 86:12.
6. Eme ọ rẹ sae via nọ whọ tẹ barosa raha uzi?
6 Hae lẹ se Ọsẹ oyoyou ra nọ ọ rrọ obọ odhiwu ẹsikpobi re o fi obọ họ kẹ owhẹ whaha odawọ nọ who re ro kie ruọ uzioraha. (Matiu 6:13; Ahwo Rom 12:12) Hai ru lele uthubro Ọghẹnẹ re elẹ ra e seba ebrudhe. (1 Pita 3:7) Nọ whọ tẹ barosa raha uzi, u re su kpohọ okpẹtu ologbo keme Jihova ọ rẹ tehe ezọ di kẹ ayare ahwo uzou-uveghe wọhọ ẹsenọ ọ rehọ ẹgho ruru oma re elẹ rai e siẹe ba ẹnya lafi. (Enuobro 3:42-44) Fikiere, wo ẹzi omurokpotọ, jẹ lẹ re whọ siọ oware nọ Ọghẹnẹ o gbe ro yo elẹ ra ha ba eru.—2 Ahwo Kọrint 13:7.
You Ọmọ Ọghẹnẹ
7, 8. Ẹvẹ uthubro Jesu nọ ohwo ọ rẹ gaviezọ kẹ o sai ro fi obọ họ kẹe whaha uzioraha?
7 You Jesu Kristi ẹkwoma ijaje riẹ nọ who re koko keme u ti fi obọ họ kẹ owhẹ whaha edhere uzioraha. Jesu ọ ta nọ: “Wha te koko ijaje mẹ wha rẹ te jọ eva uyoyou mẹ, wọhọ epanọ me koko ijaje Ọsẹ mẹ, mẹ jẹ rọ eva uyoyou riẹ.” (Jọn 15:10) Ẹvẹ eme Jesu nọ who re fihọ iruo o sai ro fi obọ họ kẹ owhẹ daji uyoyou Ọghẹnẹ?
8 Nọ who te bi ru lele ẹme Jesu o sai fi obọ họ kẹ owhẹ yọrọ uruemu ezi. Uzi nọ Ọghẹnẹ o jie kẹ Izrẹl o ta nọ: “Who bruẹnwae he.” (Ọnyano 20:14) Jesu o dhesẹ ehri-uzi nọ o rrọ emu ujaje nana nọ ọ ta nnọ: “Kohwo kohwo nọ o re ri aye rite ẹguọlọ riẹ, ọ jọ eva lele ie bruẹnwae no.” (Matiu 5:27, 28) Pita ukọ na ọ ta nọ ahwo jọ evaọ ukoko ikpe-udhusoi ọsosuọ na a wo “ibiaro nọ e vọ avọ ẹhwae-obro” jẹ “viẹ izi nọ i dikihẹga-tehe họ.” (2 Pita 2:14) Dede na, wo ohẹriẹ no ahwo yena, whọ rẹ sae whaha ẹnwae-obro nọ who te you Ọghẹnẹ avọ Kristi je bi yo ẹme kẹ ae avọ ọtamuo inọ whọ rẹ yọrọ usu nọ who wo kugbe ai.
Jọ Ẹzi Jihova Ọ Kpọ Owhẹ
9. Eme ọ rẹ sae via kpahe ẹzi ọfuafo na nọ ohwo ọ tẹ ruabọhọ uzioraha?
9 Lẹ kẹ ẹzi ọfuafo Ọghẹnẹ, jẹ kẹe uvẹ re ọ kpọ owhẹ. (Luk 11:13; Ahwo Galesha 5:19-25) Whọ tẹ be ruabọhọ uzioraha, Ọghẹnẹ ọ sai mi owhẹ ẹzi riẹ. Okenọ Devidi ọ thuzi ẹnwae-obro kugbe Batshẹba no, ọ yare Ọghẹnẹ nọ: “Who le omẹ no aro ra ha, who mi omẹ ẹzi ẹri ra gbe he.” (Olezi 51:11) Fikinọ Sọl Ovie na o kurẹriẹ no uzioraha riẹ hẹ, ẹzi Ọghẹnẹ o te noi oma. Sọl ọ thuzi ẹkwoma udu obọriẹ nọ o ro dheidhe, o te je vu ovie ahwo Amalẹk gbe uthuru erao rai wa. Ukuhọ riẹ Jihova o te mi Sọl ẹzi ọfuafo riẹ.—1 Samuẹle 13:1-14; 15:1-35; 16:14-23.
10. Eme u je fo re whọ whaha iroro uzioraha?
10 Whaha iroro uzioraha. Pọl ukọ na o kere nọ: “Otẹrọnọ ma riẹ uzẹme na no, ma tẹ jẹ barosa keke be raha izi, iwẹ egọ fiki izieraha igbe fiokaha.” (Ahwo Hibru 10:26-31) Okpẹtu riẹ ọ rro kẹhẹ nọ whọ tẹ be barosa raha uzi!
You Amọfa no Eva Ze
11, 12. Idhere vẹ uyoyou gbe adhẹẹ e rẹ rọ whaha ohwo uruemu-ugbegbe orọ ẹnwae-obro?
11 Uyoyou nọ who re wo kẹ amọfa o rẹ whaha owhẹ nọ whọ gbẹ rọ thuzi ọfariẹ-ogbe he. (Matiu 22:39) Uyoyou utioye na o te wọ owhẹ yọrọ udu ra nọ who gbe ro wo isiuru kpahe ọzae hayo aye omọfa ha. O gbẹ rrọ ere he whọ vẹ te thuzi ẹnwae-obro. (Itẹ 4:23; Jerimaya 4:14; 17:9, 10) Raro kele Job ọzae okiẹrẹe na, ọnọ ọ kuvẹ kẹ urusio aye ọfa ha nọ u te no aye obọriẹ no.—Job 31:1.
12 Adhẹẹ rọkẹ ẹfuọ ọruẹrẹfihotọ orọo o rẹ sai fi obọ họ kẹ owhẹ whaha uzioraha ulogbo. Ẹjiroro Ọghẹnẹ họ re orọo adhẹẹ gbe owezẹ imava nọ a rọ orọo o jọ edhere nọ a re ro yẹ ọmọ. (Emuhọ 1:26-28) Kareghẹhọ inọ oware nọ Ọghẹnẹ ọ rọ kẹ ahwo-akpọ okẹ owezẹ ọzae-avọ-aye họ re a rehọ iẹe yẹ ahwo ziọ uzuazọ, yọ uzuazọ o rẹ fuafo. Igberedha gbe ibruẹnwae a wọso uzi Ọghẹnẹ, a bi gbe ọruẹrẹfihotọ owezẹ ọzae-avọ-aye ku, kare adhẹẹ kẹ ẹfuọ orọo, jẹ be raha uzi kpahe oma obọ rai. (1 Ahwo Kọrint 6:18) Uyoyou kẹ Ọghẹnẹ gbe erivẹ avọ ẹmeoyo kẹ Ọghẹnẹ e rẹ whaha ohwo nọ o gbe ro wobọ evaọ iruemu nọ a re ro si iei no ukoko Ileleikristi na ha.
13. Edhere vẹ ohwo nọ o re gbe-ọfariẹ ‘ọ rẹ rọ raha eyero buobu’?
13 U fo nọ ma rẹ nyẹ isiuru uzioraha re ma ruẹse whaha oware nọ o rẹ wha idhọvẹ se ahwo nọ ma you. Itẹ 29:3 o ta nọ: “Ọnọ ọ nya usu ogberẹ, ọ rẹ raha eyero” buobu. Obruẹnwae nọ ọ kare ekurẹriẹ ọ rẹ raha usu riẹ kugbe Ọghẹnẹ jẹ raha ọgbakugbe uviuwou. Aye riẹ o wo uvẹ nọ ọ sae rọ fa orọo rai. (Matiu 19:9) O tẹ make rọnọ ọzae hayo aye na họ ọnọ o bruẹnwae na, orọo nọ o fa o rẹ sae wha edada ilogbo se ọrivẹ orọo nọ o ruthọ họ na, emọ, gbe amọfa. Nọ ma riẹ kpahe ọraha nọ o re no ọfariẹ-ogbe ze na, u fo nọ o rẹ whaha omai nọ ma gbe ro kie kẹ odawọ yena ha.
14. Eme ma rẹ sai wuhrẹ no obe Itẹ 6:30-35 ze kpahe eyoma-oruo?
14 Nọ o rọnọ u wo uvumọ oware nọ ohwo nọ o bruẹnwae ọ rẹ hwa ro ruru uzi nọ ọ thọ họ na, u fo nọ onana o rẹ wọ ohwo whaha uruemu oriobọ nana. A jọ Itẹ 6:30-35 dhesẹ inọ a rẹ sai weri kẹ ohwo nọ o thuji fiki ohọo, rekọ a rẹ thothọ obruẹnwae he keme o wo iroro iyoma. Ọ be “raha uzuazọ riẹ.” Eva otọ Uzi Mosis na, a re kpei. (Iruo-Izerẹ 20:10) Obruẹnwae ọ rẹ wha edada se amọfa nọ o bi le urusio uyoma riẹ na, yọ o gbe kurẹriẹ hẹ, ọ rẹ sae daji uyoyou Ọghẹnẹ hẹ keme a re si iei no ukoko ofuafo Ileleikristi na no.
Yọrọ Obroziẹ-Iroro Ọfuafo
15. Ẹvẹ obroziẹ-iroro nọ ọ “yamu” no ọ rẹ jọ?
15 Re ma ruẹse daji uyoyou Ọghẹnẹ, ma rẹ kuvẹ re obroziẹ-iroro mai o whu-ikpi kẹ uzioraha ha. O rrọ vevẹ, ma rẹ kuvẹ kẹ ute uruemu-ezi akpọ na nọ o rrọ whrewhrehe he, yọ u fo nọ ma rẹ yọrọ oma eva eware wọhọ ẹsalọ egbẹnyusu, ebe nọ ma re se, gbe arozaha omawere. Pọl ọ kẹ unuovẹvẹ nọ: “Oke uwhremu ejọ e rẹ te hẹriẹ no orọwọ na no, a vẹ te kezọ kẹ izi ọviẹhọ avọ uwuhrẹ [ikọ-imuomu]; fiki omorọvia otu-erue e nọ iroro rai e yamu.” (1 Timoti 4:1, 2) Obroziẹ-iroro nọ ọ “yamu” o rẹ wọhọ ẹgbẹ omola nọ u kpo no, nọ ohwo nọ o rrọ oma ọ rẹ riẹ hẹ nọ a tẹ make kaobọ tei. Obroziẹ-iroro otiọye na ọ rẹ gbẹ vẹvẹ omai unu hu, nọ ma rẹ rọ kẹnoma kẹ otu nọ e siọ ẹrọwọ na no, gbe iyero nọ e rẹ sae lẹliẹ omai kie no ẹrọwọ na.
16. Fikieme u je wuzou re ma wo obroziẹ-iroro ọfuafo?
16 Esiwo mai ọ rọma hwa obroziẹ-iroro ọfuafo nọ ma rẹ yọrọ. (1 Pita 3:21) Obroziẹ-iroro mai ọ fo rono iruo iwhuowhu fiki ẹrọwọ nọ ma fi họ azẹ Jesu nọ o hwẹ, re ma ruẹse “gọ Ọghẹnẹ uzuazọ” na. (Ahwo Hibru 9:13, 14) Nọ ma tẹ barosa raha uzi, obroziẹ-iroro mai ọ sai gbeku no, ma gbẹ jọ ahwo nọ a kare afuẹwẹ hẹ nọ i te enọ e rẹ gbodibo kẹ Ọghẹnẹ. (Taitọs 1:15) Rekọ avọ obufihọ Jihova, ma rẹ sai wo obroziẹ-iroro ọfuafo.
Idhere Efa nọ Ma rẹ rọ Whaha Iruemu nọ I Fo Ho
17. Erere vẹ ohwo o re wo nọ ọ tẹ be ‘rehọ eva kpobi lele ỌNOWO na’?
17 ‘Rehọ eva ra kpobi lele ỌNOWO na’ wọhọ Kelẹb, ohwo Izrẹl oke anwae na. (Iziewariẹ 1:34-36) Ru oware nọ Ọghẹnẹ ọ gwọlọ mi owhẹ, who roro kpahe emuọriọ evaọ “emẹjẹ izi igbegbe” vievie he. (1 Ahwo Kọrint 10:21) Whaha uruemu kpobi nọ u dhesẹ ẹsiọ-ẹrọwọ. Re emu abọ-ẹzi nọ o bi no emẹjẹ Jihova ọvo ze avọ edẹro, yọ iwuhrẹ erue hayo egaga izi imuomu i ti su owhẹ thọ vievie he. (Ahwo Ẹfẹsọs 6:12; Jud 3, 4) Tẹrovi eware abọ-ẹzi, wọhọ uwuhrẹ Ebaibol omobọ ohwo, iwuhrẹ enya, gbe usiuwoma ota. Whọ te siọ evawere ba ewo ho nọ whọ tẹ be rehọ eva ra kpobi lele Jihova, jẹ be jọ owhreze iruo Olori na.—1 Ahwo Kọrint 15:58.
18. Ẹvẹ ozodhẹ Jihova u re ro kpomahọ uruemu ra?
18 Ru iei fihọ ọtamuo ra re whọ “gọ uvi egagọ nọ i re je Ọghẹnẹ miẹ, avọ enuho gbe ọwhewhe.” (Ahwo Hibru 12:28) Uvi ozodhẹ kẹ Jihova o te lẹliẹ owhẹ siọ edhere oyoma kpobi. O te wọ owhẹ ru lele uthubro nọ Pita ọ kẹ ibe Ileleikristi riẹ nọ a wholo inọ: “Otẹrọnọ wha se [rie] Ọsẹ, ọye họ ọnọ o re bruoziẹ ababọ-ọriẹwẹ epanọ iruo [rai] e rọ, wha rehọ ozodhẹ su oma rai vrẹ oke nana nọ owha rọ erara na.”—1 Pita 1:17.
19. Eme u je fo nọ whọ hai fi eware nọ who bi wuhrẹ no Ẹme Ọghẹnẹ ze hiruo ẹsikpobi?
19 Hai fi eware nọ who bi wuhrẹ no Ẹme Ọghẹnẹ ze họ iruo ẹsikpobi. Onana u ti fi obọ họ kẹ owhẹ whaha uzioraha ulogbo keme whọ te jọ kugbe ahwo nọ “i wo areghẹ te epanọ a sae [rọ] hẹriẹ uwoma no uyoma.” (Ahwo Hibru 5:14) Ukpenọ whọ rẹ kare oma-oyọrọ evaọ ẹme-unu gbe uruemu, rri otọ mu re whọ nya wọhọ owareghẹ, re whọ hae dẹ uvẹ oke kẹ omara evaọ edẹ imuomu nana. Hae “riẹ otọ epanọ oreva Ọnowo na o rọ,” re who je ru lele iei.—Ahwo Ẹfẹsọs 5:15-17; 2 Pita 3:17.
20. Fikieme u je fo re ma whaha eware amọfa e gwọlọ?
20 Who thou-uvo hayo gwọlọ eware amọfa ha. Ọvo jọ evaọ usu Ijaje Ikpe na o ta nọ: “Who wo isiuru [“thou-uvo,” New International Version] kpahe uwou ọrivẹ ra ha, hayo aye ọrivẹ ra, te odibo ọmọzae riẹ, hayo odibo ọmọtẹ riẹ, te eruẹ riẹ, te eketekete riẹ, gbe eware kpobi nọ o woi.” (Ọnyano 20:17) Uzi onana o jọ ọthọwẹ kẹ uwou, aye, idibo, gbe erao nọ ohwo o wo jekugbe eware itieye na efa. Rekọ oware nọ o mai wuzou họ ẹme Jesu na inọ eware amọfa e gwọlọ u re zue ohwo oma.—Mak 7:20-23.
21, 22. Eme Oleleikristi ọ rẹ sai ru re ọ ruẹse siọ uzioraha ba ekie ro?
21 Yọrọ oma re isiuru ra e siọ uzioraha ba esu kpohọ. Jemis olele na o kere nọ: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu, nọ umuomu o jẹ ro thẹtawa no o vẹ wha uwhu ze.” (Jemis 1:14, 15) Wọhọ oriruo, otẹrọnọ ohwo ọ jẹ hae da idi thomawa eva oke nọ u kpemu, ọ sae gbaemu re ọ siọ udi nọ u re mu ba efihọ uwou riẹ. Re Oleleikristi ọ sae whaha ekie kẹ odawọ ẹnwae-obro, ọ rẹ sai nwene iruo hayo oria nọ o je bi ru iruo.—Itẹ 6:23-28.
22 Whọ tubẹ jowọ nọ u re su kpohọ uzioraha dede he. Omarọlẹliẹ gbe erorokpahe isiuru ọfariẹ e rẹ sai su kpohọ ẹnwae-obro. Nọ ohwo ọ tẹ be hai gu umutho ọrue, o sae wọe nọ o je ti gu okpọ-ọrue, kẹsena ọrue gu o ve ti zihe ruọ uruemu riẹ. Nọ ohwo ọ tẹ be hai tho umu-uji u re kpe obruoziẹ-iroro riẹ te epanọ o ti ro mu ikpeware họ etho. Nọ ohwo ọ tẹ be hae jọ udu riẹ wo imiroro nọ u dhesẹ ẹsiọ-ẹrọwọ, iroro itieye na e rẹ sae vẹgbẹ te epanọ ohwo ọ rẹ rọ siọ ẹrọwọ na.—Itẹ 11:9; Eviavia 21:8.
Kinọ Whọ tẹ Raha Uzi?
23, 24. Omosasọ vẹ ma rẹ sai wo no obe 2 Iruẹru-Ivie 6:29, 30 gbe Itẹ 28:13 ze?
23 Ahwo-akpọ kpobi a gba ha. (Ọtausiwoma Na 7:20) Dede na, whọ tẹ thọ uzi ulogbo, olẹ Solomọn Ovie na eva etoke eromudhe etẹmpol Jihova o rẹ sae kẹ owhẹ omosasọ. Solomọn ọ lẹ se Ọghẹnẹ nọ: “Eghẹrẹ elẹ kpobi te oghẹrẹ ayare kpobi nọ ohwo jọ o ru, hayo ahwo Izrẹl kpobi, omomọvo nọ ọ riẹ uye riẹ jegbe uweri riẹ, ọ jẹ ze evaọ uwou onana te lẹ; who yo no obọ odhiwu ze evaọ oria ẹria ra, whọ rọ vrẹ ae, who je fiobọhọ kẹ omomọvo nọ whọ riẹ iroro riẹ, wọhọ epanọ idhere riẹ e rọ (keme whẹ, whẹ ọvo, ọ riẹ iroro emọ ahwo ra).”—2 Iruẹru-Ivie 6:29, 30.
24 Ẹhẹ, Ọghẹnẹ ọ riẹ iroro eva ohwo yọ o wo erọvrẹ. Itẹ 28:13 o ta nọ: “Ọnọ ọ kuọ oruthọ riẹ dhere ọ rẹ nyahọ aro ho, rekọ ọnọ ọ ta iruthọ riẹ via, nọ o je sioma no ai o re wo ohrọ-oriọ.” Nọ ohwo ọ tẹ fa izieraha riẹ je kurẹriẹ, ọ rẹ sai wo ohrọriọ Ọghẹnẹ. Dede na, kọ otẹrọnọ who re whrehewhrehe eva abọ-ẹzi, eme ọfa ọ rẹ sai fi obọ họ kẹ owhẹ daji uyoyou Ọghẹnẹ?
Ẹvẹ Whọ te k’Uyo?
• Ẹvẹ ma sae rọ yọre oma mai evaọ uyoyou Ọghẹnẹ?
• Ẹvẹ uyoyou nọ ma wo kẹ Ọghẹnẹ gbe Kristi u re ro fi obọ họ kẹ omai whaha uzioraha?
• Fikieme uvi uyoyou nọ ma re wo kẹ amọfa o rẹ rọ whaha omai uruemu-ugbegbe orọ ẹnwae-obro?
• Idhere jọ vẹ ma rẹ rọ whaha ekpehru uruemu?
[Enọ Uwuhrẹ]
[Uwoho nọ o rrọ ẹwẹ-obe avọ 3]
Jud ọ vuẹ omai epanọ ma sae rọ yọre oma mai eva uyoyou Ọghẹnẹ
[Uwoho nọ o rrọ ẹwẹ-obe avọ 5]
Orọo o tẹ fa o rẹ sae wha edada ilogbo se emọ gbe ọrivẹ orọo nọ o ruthọ họ na
[Uwoho nọ o rrọ ẹwẹ-obe avọ 6]
Kọ whọ gba riẹ mu inọ whọ rẹ rehọ ‘eva ra kpobi lele ỌNOWO na’ wọhọ Kelẹb?
[Uwoho nọ o rrọ ẹwẹ-obe avọ 7]
Hae lẹ ẹsikpobi kẹ obufihọ nọ who re ro fi ẹdawọ kparobọ