Hae Jẹ Ọwhọkuo Jihova Rehọ Ẹsikpobi
Hae Jẹ Ọwhọkuo Jihova Rehọ Ẹsikpobi
“Whọ jẹ ozọusio ỌNOWO na kufiẹ hẹ.”—ITẸ 3:11.
1. Fikieme u je fo re ma jẹ ọwhọkuo Ọghẹnẹ rehọ?
SOLOMỌN ovie Izrẹl oke anwae na ọ kẹ omai omomọvo obọdẹ ẹjiroro nọ ma rẹ rọ jẹ ọwhọkuo Ọghẹnẹ rehọ. Ọ ta nọ: “Ọmọ mẹ whọ jẹ ozọusio ỌNOWO na kufiẹ hẹ, hayo who ri ẹwhọkuo riẹ evevere he. Keme ỌNOWO na ọ rẹ [whọku] ọnọ o you, wọhọ epanọ ọsẹ-ọmọ o re ru ọmọ nọ ọ were riẹ.” (Itẹ 3:11, 12) Ẹhẹ, Ọsẹ obọ odhiwu ra ọ rẹ whọku owhẹ fiki uyoyou nọ o wo kẹ owhẹ.
2. Ẹvẹ a fotọ “ọwhọkuo,” kọ idhere vẹ a sae rọ whọku ohwo?
2 ‘Ọwhọkuo’ o dhesẹ ozọ-usio, ẹkpọhọ, uthubro gbe uwuhrẹ. Pọl ukọ na o kere nọ: “Awere ọ rọ uye orọkẹ [hayo ọwhọkuo] eva oke ọsosuọ họ; rekọ uwhremu riẹ o rẹ mọ ubi udhedhẹ o rọ ẹrẹreokie rọ kẹ e nọ a kẹ uye na.” (Ahwo Hibru 12:11) Whọ tẹ be hae jẹ ọwhọkuo Ọghẹnẹ rehọ je fi ei họ iruo o sai fi obọ họ kẹ owhẹ yeri uzuazọ ẹrẹreokie, rehọ ere si kẹle Jihova, Ọghẹnẹ ọrẹri na. (Olezi 99:5) Ma rẹ sai wo ọkpọvio no obọ ibe enọ ma gbẹ rrọ egagọ ze, eware nọ ma wuhrẹ evaọ iwuhrẹ Ileleikristi na, gbe Ẹme Ọghẹnẹ avọ ebe ọ “odibo oruọzewọ” na. (Luk 12:42-44) O rẹ jọ oware evawere kẹ owhẹ nọ a te dhesẹ oware jọ kẹ owhẹ nọ u fọ nọ whọ rẹ kpọvi! Kọ oghẹrẹ ọwhọkuo vẹ o rẹ sae gwọlọ, otẹrọnọ whọ thuzi ulogbo?
Oware nọ A re ro Si Otujọ no Ukoko
3. Eme a re ro si ohwo no ukoko?
3 Idibo Ọghẹnẹ a re wuhrẹ Ebaibol gbe ebe ukoko Ileleikristi na. A be hae ta kpahe itee Jihova eva iwuhrẹ gbe ikokohọ rai. Fikiere, Ileleikristi a riẹ kpahe oware nọ Jihova ọ gwọlọ mi ai. Oware nọ a re ro si ohwo no ukoko họ otẹrọnọ ọ thuzi ulogbo jọ ọ gbẹ rọwo kurẹriẹ hẹ.
4, 5. Oriruo Ikereakere vẹ a jọ etenẹ dhesẹ kpahe ohwo osino-ukoko, kọ fikieme a rọ ta udu họ ukoko na awọ inọ a wariẹ zihe ohwo na ze?
4 Muẹrohọ oriruo Ikereakere na jọ kpahe ohwo nọ a re si no ukoko. Ukoko nọ o jọ obọ Kọrint o kuvẹ kẹ “oghẹrẹ ẹnwae-obro nọ a sae ruẹ eva udevie egedhọ dede he; keme ọzae jọ avọ aye ọsẹ riẹ a [gbẹ jọ].” Pọl ọ ta udu họ ukoko obọ Kọrint na awọ nọ a “siobọnọ ohwo ọnana kẹ Setan re uwo riẹ ọ raha, re a ruẹse siwi ẹzi riẹ.” (1 Ahwo Kọrint 5:1-5) Nọ a si ei no ukoko jẹ rehọ ere si obọ noi kẹ Setan, orumuomu na ọ tẹ wariẹ zihe kpohọ akpọ nọ Ẹdhọ ọ rrọ osu riẹ. (1 Jọn 5:19) Esino riẹ o ru nọ ẹzi-ogbegbe ọrọ oma-iwo u ro no ukoko na, nọ “ẹzi” Ọghẹnẹ ọ rọ daji ei.—2 Timoti 4:22; 1 Ahwo Kọrint 5:11-13.
5 Nọ omoke jọ o ruemu no, Pọl ọ tẹ ta udu họ Ileleikristi obọ Kọrint na awọ inọ a wariẹ rehọ orumuomu na zihe ziọ ukoko na. Fikieme? Ukọ na ọ ta nọ re “Setan ọ siọ erere ba ewo” eva oma rai. U muẹro inọ orumuomu na o kurẹriẹ je mu uzuazọ nọ o kare egbegbe họ eyeri no. (2 Ahwo Kọrint 2:8-11) Nọ Ileleikristi na a gbẹ wariẹ rehọ ọzae na zihe ziọ ukoko na ha, Setan ọ rẹ sai wo erere eva oma rai keme a rẹ te jọ eva gaga jẹ kare erọvrẹ wọhọ epanọ Ẹdhọ ọ gwọlọ nọ a rẹ jọ. O wọhọ nọ Pọl o kere se ai no, o raha oke he a tẹ ‘rọ vrẹ jẹ sasa’ ọzae nọ o kurẹriẹ na oma.—2 Ahwo Kọrint 2:5-7.
6. Eme ohwo osino-ukoko o rẹ sai rugba?
6 Eme ohwo osino-ukoko u re rugba? U re si ekela no odẹ ofuafo Jihova jẹ thọ uruemu-ezi idibo riẹ. (1 Pita 1:14-16) Re a si orumuomu nọ ọ kare ekurẹriẹ no ukoko na o rẹ kpare itee Ọghẹnẹ kpehru je fi obọ họ yọrọ ẹfuọ abọ-ẹzi ukoko na. O sai je fi obọ họ kẹ ohwo nọ ọ kare ekurẹriẹ na riẹ epanọ uzioraha na o gbẹdẹ te.
Ekurẹriẹ O Wuzou
7. Eme ọ via kẹ Devidi okenọ ọ re fa izieraha riẹ hẹ?
7 Ahwo buobu nọ a thuzi ulogbo a gine kurẹriẹ, fikiere a si rai no ukoko na ha. Uzẹme, re ohwo o gine kurẹriẹ o nwane rọ oware olọlọhọ họ. Roro kpahe Devidi Ovie Izrẹl nọ o kere eme Olezi avọ 32 na. Ole yena o dhesẹ nọ omoke jọ o vrẹ taure Devidi ọ tẹ te fa izieraha riẹ, ẹsejọhọ orọ ẹnwae-obro riẹ kugbe Batshẹba. Onana o soriẹ ze nọ uweri kẹ izieraha riẹ u ro mi ei ogaga, wọhọ epanọ ivo egaga i re si ame no ure oma na. Uye o bẹ Devidi eva ugboma gbe iroro, rekọ nọ ọ ‘fa izieraha riẹ via, ỌNOWO na ọ tẹ rehọ iruthọ riẹ vrẹe.’ (Olezi 32:3-5) Kẹsena Devidi ọ tẹ so nọ: “O ghale ohwo nọ ỌNOWO o bi kele umuomu họ kẹ hẹ.” (Olezi 32:2) U woma kẹhẹ nọ o ro wo ohrọoriọ Ọghẹnẹ!
8, 9. Ẹvẹ ohwo nọ a si no ukoko o re ro dhesẹ nọ o kurẹriẹ no, kọ ẹvẹ onana u wuzou te rọkẹ ẹwariẹ rehọ ze riẹ?
8 Fikiere, o rrọ vevẹ inọ orumuomu o re kurẹriẹ hrọ otẹrọnọ a rẹ riẹe ohrọ. Dede na, orọnikọ ohwo ọ tẹ be dhomovuọ hayo dhozọ nọ amọfa a te riẹ kpahe oruthọ riẹ họ ekurẹriẹ hẹ. “Re a kurẹriẹ” u dhesẹ epanọ “ohwo o re nwene iroro” kpahe uruemu uyoma fikinọ oware nọ o ru na o da riẹ. Ohwo nọ o kurẹriẹ u dhesẹ nọ o wo “ẹzi uweri,” jẹ gwọlọ ‘kare afuẹwẹ’ nọ o tẹ lọhọ.—Olezi 51:17; 2 Ahwo Kọrint 7:11.
9 Ekurẹriẹ yọ oware nọ u wuzou gaga nọ a rẹ rọ riẹ sọ a rẹ wariẹ rehọ ohwo nọ a sino zihe ziọ ukoko Ileleikristi na. Orọnikọ okejọ o tẹ vrẹ no a vẹ nwane rehọ ohwo nọ a sino ukoko vẹre zihe ze he. Re a tẹ wariẹ rehọ ohwo zihe ziọ ukoko, udu riẹ u re nwene ziezi tao. O gwọlọ nọ ọ rẹ riẹ epanọ uzioraha riẹ gbe ekela nọ o wha se odẹ Jihova avọ ukoko riẹ o gbẹdẹ te. Orumuomu na o re kurẹriẹ, rehọ osegboja lẹ kẹ erọvrẹ, je yeri uzuazọ riẹ rọwokugbe itee Ọghẹnẹ. Nọ ọ tẹ be yare nọ a wariẹ iẹe rehọ ze ukoko na, u fo nọ ọ rẹ kẹ imuẹro nọ u re dhesẹ nọ o gine kurẹriẹ ẹkwoma eruo “iruo nọ i te epaọ ekurẹriẹ.”—Iruẹru 26:20.
Fikieme Ohwo Ọ jẹ Fa Iruthọ Riẹ?
10, 11. Fikieme u gbe ro fo ho re ma ko uzioraha dhere?
10 Ahwo jọ nọ a thuzi a sai roro nọ: ‘Mẹ tẹ vuẹ ohwo jọ kpahe iruthọ mẹ, ọ sae nọ omẹ enọ nọ i re ru oma vuọ omẹ yọ a sai je si omẹ no ukoko. Rekọ mẹ gbẹ ta ha, eyena kpobi e rẹ jariẹ hẹ yọ uvumọ ohwo ọ rẹ jọ ukoko na riẹ kpahe iruthọ mẹ vievie he.’ Ohwo nọ o wo eriwo yena ọ kareghẹhọ eware jọ nọ i wuzou ho. Eware vẹ?
11 Jihova yọ “Ọghẹnẹ nọ ọ vọ avọ ohrọ gbe aruoriwo, ọ rẹ kaki muofu hu, o wo uyoyou nọ o rẹ rẹriẹ hẹ gbe ọtẹruo, o wo uyoyou nọ o rẹ rẹriẹ hẹ rọkẹ idu ahwo, nọ ọ rẹ rehọ eyoma gbe iruthọ gbe uzioraha rọ vrẹ.” Ghele na ọ rẹ kpọ idibo riẹ họ, ‘ọ rẹ fa ai umutho.’ (Ọnyano 34:6, 7; Jerimaya 30:11) Otẹrọnọ whọ thuzi ulogbo jọ, kọ ẹvẹ whọ sai ro wo aruoriwo Ọghẹnẹ nọ whọ tẹ kuọ uzioraha ra dhere? Jihova ọ riẹ kpahe iẹe, yọ o re mu rri iruthọ vo ho.—Itẹ 15:3; Habakuk 1:13.
12, 13. Eme ọ rẹ sae via nọ ohwo ọ tẹ be gwọlọ ko izieraha riẹ dhere?
12 Otẹrọnọ whọ thuzi ulogbo jọ, uzioraha na nọ whọ rẹ fa o rẹ sai fi obọ họ kẹ owhẹ wariẹ wo emamọ obroziẹ-iroro. (1 Timoti 1:18-20) Rekọ whọ gbẹ ta ha, o rẹ sai gbe obroziẹ-iroro ra ku je su owhẹ kpohọ izieraha efa. Kareghẹhọ inọ orọnikọ omọfa jọ hayo ukoko na whọ thuzi mukpahe na ha. Ọghẹnẹ whọ thuzi mukpahe na. Ọso-ilezi na ọ so nọ: “Agbara uvie [ỌNOWO] ọ rọ o bọ odhiwu; aro riẹ o bi riwẹ, ikparo riẹ e be dawo emọ ahwo. ỌNOWO na ọ rẹ kiẹ ikiẹrẹe gbe iru-umuomu.”—Olezi 11:4, 5.
13 Jihova ọ rẹ ghale ohwo nọ ọ ko iruthọ ilogbo dhere he, nọ ọ be gwọlọ roma da ukoko ofuafo riẹ. (Jemis 4:6) Fikiere, otẹrọnọ whọ thuzi jọ yọ whọ gwọlọ ru oware nọ u kiehọ, feva ababọ okioraha. Ogbẹrọ ere he, udu ra o te hai brukpe owhẹ, maero nọ who te se hayo yo ẹme kpahe iruthọ itieye na. Kọ ẹvẹ o rẹ jọ nọ Jihova o te si ẹzi riẹ no owhẹ oma wọhọ epanọ o ru Sọl Ovie na? (1 Samuẹle 16:14) Nọ ẹzi Ọghẹnẹ o te no owhẹ oma, whọ sai kie ruọ izieraha ilogbo efa.
Fi Eva Họ Inievo Ra nọ I Wo Ẹrọwọ
14. Fikieme u je fo re orumuomu o ru lele ohrẹ nọ o rrọ Jemis 5:14, 15?
14 Nọ o rrọ ere na, eme u fo nọ orumuomu nọ o kurẹriẹ o re ru? “Jọ o se ekpako [ukoko] na, re a lẹ kẹe, avẹ rehọ udẹ wholo iei eva odẹ Ọnowo na; olẹ orọwọ u re siwẹ ohwo nọ ọ rẹ mọ; Ọnowo na ọ vẹte kpariẹ tovrẹ.” (Jemis 5:14, 15) Ekpako na nọ ohwo ọ rẹ nya bru yọ edhere jọ nọ ọ rẹ rọ “mọ ibi nọ i te ekurẹriẹ.” (Matiu 3:8) Ezae nana nọ i wo ẹrọwọ jẹ rrọ wowou na a te ‘lẹ kẹe, a vẹ rehọ udẹ wholo iei eva odẹ Ọnowo na.’ Wọhọ udẹ usiwo, ehrẹ Ebaibol na e te jọ omosasọ kẹ ohwo kpobi nọ o kurẹriẹ nevaze.—Jerimaya 8:22.
15, 16. Ẹvẹ ekpako Ileleikristi a rẹ rọ raro kele oriruo nọ Ọghẹnẹ o fihotọ, wọhọ epanọ o rrọ Izikiẹl 34:15, 16?
15 Oriruo uyoyou nọ Jihova o fihotọ ọ rro kẹhẹ, nọ o ro si obọ no ahwo Ju nọ a jọ igbo Babilọn kpo evaọ 537 B.C.E. jegbe nọ o ro siwi Izrẹl abọ-ẹzi no obọ “Babilọn ologbo na” evaọ 1919 C.E.! (Eviavia 17:3-5; Ahwo Galesha 6:16) Ọ rrọ ere ru eyaa riẹ gba, nọ ọ ta nọ: “Mẹ oma mẹ ọvo ọ rẹte [ko igodẹ] mẹ, me reti ru ae rọ oma totọ . . . Mẹ rẹte gwọlọ ọnọ o vru na, mẹ vẹte rehọ ọnọ ọ nyathọ na ziheze, enọ e ko na mẹ vẹte gba eria rai nọ i wiri na, enọ oma o rọẹrọ me veti ru ai oma ga.”—Izikiẹl 34:15, 16.
16 Jihova ọ ko igodẹ ẹwoho riẹ, o ru rai kiẹzẹ oria ufuoma, jẹ gwọlọ enọ i vru. Epọvo na re, esẹro Ileleikristi a rẹ ruẹ nọ uthuru Ọghẹnẹ o re eva vọ evaọ abọ-ẹzi je wo ufuoma. Ekpako na a rẹ gwọlọ igodẹ nọ i vru no ukoko na. Wọhọ epanọ Ọghẹnẹ ọ ‘gba oria enọ i wiri’ na, ere esẹro a rẹ “gba” igodẹ nọ oware nọ amọfa a ru rai hayo iruthọ obọrai e nwoma. Epanọ Ọghẹnẹ o re ru enọ ‘oma o be rrọ ga na,’ ere ekpako na a re fi obọ họ kẹ otu nọ ọ be mọ oyẹlẹ eva abọ-ẹzi, ẹsejọhọ fiki iruthọ rai.
Epanọ Esẹro A re ro Fi Obọ Họ
17. Fikieme ma gbẹ rọ raha oke he re ma tẹ yare obufihọ ekpako na eva abọ-ẹzi?
17 Ekpako na a rẹ rehọ evawere ru lele uthubro nana: “Wha rehọ omoyọrọ re ohrọ.” (Jud 23) Ileleikristi jọ a thuzi ulogbo no ẹkwoma igberẹ-ibro nọ a kiero. Rekọ nọ a te gine kurẹriẹ, a sai wo imuẹro inọ a ti wo ohrọ gbe ẹruọsa oyoyou eva obọ ekpako nọ isiuru rai o rrọ epanọ a re ro fi obọ họ kẹ ai evaọ abọ-ẹzi na. Pọl ọ ta kpahe ekpako itieye na, te omariẹ te inọ: “Orọnikọ ma wo [ogaga] orọwọ rai hi, rekọ obufihọ ma rọ kẹ oghọghọ nọ wha wo na.” (2 Ahwo Kọrint 1:24) Fikiere, whọ raha oke re whọ tẹ yare obufihọ rai eva abọ-ẹzi hi.
18. Ẹvẹ u fo nọ ekpako na a rẹ rọ whọku ibe Ileleikristi rai nọ i ruthọ?
18 Whọ tẹ thuzi ulogbo, fikieme whọ jẹ sai fi eva họ ekpako na? Fikinọ ae họ ugogo esẹro nọ Ọghẹnẹ o ro mu kẹ uthuru riẹ. (1 Pita 5:1-4) Othuru-igodẹ oyoyou ọvuọvo ọ riẹ hẹ nọ ọ rẹ jẹ fa ogodẹ owowolẹ nọ o bi bo fiki omonwa. Fikiere, nọ ekpako a tẹ be whọku ibe Oleleikristi rai, orọnikọ uye nọ a rẹ kẹe a rẹ tẹrovi hi, rekọ uzioraha na gbe epanọ a sae rọ wariẹ iẹe zihe ziọ edikihẹ abọ-ẹzi riẹ nọ o tẹ lọhọ. (Jemis 5:13-20) O gba ekpako họ nọ a re guẹdhọ okiẹrẹe jẹ ruẹ nọ ‘uthuru na o zeziẹ e rai ẹro.’ (Iruẹru 20:29, 30; Aizaya 32:1, 2) Wọhọ ibe Ileleikristi efa kpobi, ekpako na a re ‘ru onọ u kiẹrẹe, kielele uyoyou, jẹ rehọ oma kpotọ lele Ọghẹnẹ nya.’ (Maeka 6:8) Uruemu-aghae otiọye na u wuzou eva etoke nọ a tẹ be jiroro nọ i wobọ kpahe uzuazọ gbe egagọ efuafo “igodẹ nọ [Jihova] ọ rẹ kuọ.”—Olezi 100:3.
19. Oghẹrẹ uruemu vẹ ekpako Ileleikristi a rẹ rọ daoma kpọ ohwo họ?
19 Ẹzi ọfuafo na ọ rẹ rehọ esẹro Ileleikristi mu, yọ a rẹ daoma ru lele ekpakpọ ẹzi na. Otẹrọnọ “uzi o thọ ohwo obọ”—epaọ oware nọ ohwo o rẹro riẹ hẹ—esẹro nọ a ro mu na a rẹ daoma rehọ “ẹzi oma-urokpotọ se ohwo otiọye ziheze.” (Ahwo Galesha 6:1; Iruẹru 20:28) Avọ omurokpotọ gbe itee Ọghẹnẹ nọ a rẹ yọrọ, ekpako na a rẹ daoma kpọ iroro ohwo otiọye na họ, wọhọ epanọ ohwo nọ ọ riẹ kpahe uwholo ọ rẹ roma totọ gba oria nọ u wiri re ọ ruẹse whaha edada efa evaọ etoke usiwo riẹ na. (Ahwo Kọlọsi 3:12) Nọ o rrọ oware nọ a re se kpahe evaọ Ikereakere na jẹ lẹ kpahe nọ a tẹ be jiroro sọ ohwo nọ ọ thuzi o te kẹ ohrọriọ na, eriwo Ọghẹnẹ o ti dhesẹ oma via evaọ ẹjiroro ekpako na.—Matiu 18:18.
20. Oke vẹ o sai ro fo re a ru owhowhovia kẹ ukoko inọ a whọku ohwo jọ?
20 Nọ ahwo buobu a tẹ riẹ kpahe uzioraha jọ hayo otẹrọnọ a te riẹ kpahe iẹe, o sai fo re a ru owhowhovia kẹ ukoko na re o siọ ekpehre odẹ ba ẹwha se ukoko na. A re je ru owhowhovia otẹrọnọ u fo re a jọ ukoko na riẹ. Eva etoke nọ ohwo nọ a whọku ọ be rọ wariẹ kru oma ga evaọ abọ-ẹzi na, a rẹ sae rehọ iẹe dhesẹ ohwo nọ omonwa riẹ u bi kpo ẹmẹrera, onọ o lẹle riẹ dobọji evaọ eware jọ nọ ọ jẹ hai ru vẹre. Eva omoke jọ, o rẹ mai fi obọ họ re ohwo nọ o si obọ no iruthọ riẹ na ọ gaviezọ ukpenọ ọ rẹ kpahe ẹme eva iwuhrẹ. Ekpako na a sai ru ọruẹrẹfihotọ nọ ohwo jọ o re ro wuhrẹ Ebaibol na kugbe ei re a ruẹse bọe ga eva abọ nọ ọ jọ mọ oyẹlẹ re ọ wariẹ “kru ẹrọwọ ga.” (Taitọs 2:2) Edhere uyoyou a re ro ru onana kpobi, orọnikọ re a ruẹsi ru uye bẹ ohwo nọ o ruthọ na ha.
21. Eme a rẹ sai ru kpahe oghẹrẹ iruthọ jọ?
21 Ekpako a sae kẹ obufihọ abọ-ẹzi evaọ idhere sa-sa. Wọhọ oriruo, ma rehọ iẹe nọ oniọvo nọ o wo ẹbẹbẹ idieda vẹre, ọ da udi thomawa ẹsiẹvo hayo isiava eva okenọ ọye ọvo ọ jọ uwou. Hayo oniọvo nọ ọ siọ ivovavovo ba kri no, ọ lẹlẹ vovo ẹsiẹvo hayo isiava eva etoke jọ nọ ọ sae gba oma riẹ hẹ. Dede nọ ọ lẹ kpahe oware nọ o via na avọ imuẹro inọ Ọghẹnẹ ọ rọ vrẹe no, ọ rẹ yare obufihọ ọkpako jọ re uzioraha utiọye o siọ ẹkẹ uruemu riẹ ba ẹjọ. Ọkpako ọvo hayo ivẹ a sae rẹrote ẹme yena. Dede na, ọkpako hayo ekpako na a rẹ vuẹ ọsẹro ukoko na, keme o sae jọnọ eware efa e rrọ otọ riẹ.
Hae Jẹ Ọwhọkuo Ọghẹnẹ Rehọ Ẹsikpobi
22, 23. Fikieme u je fo re whọ jẹ ọwhọkuo Ọghẹnẹ rehọ ẹsikpobi?
22 Re Oleleikristi kpobi ọ ruẹsi wo ọjẹrehọ Jihova, ọ rẹ gaviezọ kẹ ọwhọkuo Riẹ. (1 Timoti 5:20) Fikiere, jẹ ọkpọvio kpobi nọ whọ jọ Ikereakere na gbe ebe ukoko Ileleikristi mai se rehọ gbe ithubro nọ who bi yo evaọ iwuhrẹ gbe ikokohọ erọ ahwo Jihova. Jaja aro vi kẹ oreva Jihova uruo. Ọwhọkuo Ọghẹnẹ o ti fi obọ kẹ owhẹ yọrọ ekpọfia abọ-ẹzi, nọ o te jọ wọhọ ugbẹhẹ ogaga nọ o rẹ te thọ owhẹ no uzioraha.
23 Nọ whọ tẹ be jẹ ọwhọkuo Ọghẹnẹ rehọ, u ti fi obọ họ kẹ owhẹ daji uyoyou Ọghẹnẹ. Uzẹme o rọ inọ a si otujọ no ukoko Ileleikristi na no, rekọ onana o te via kẹ owhẹ hẹ otẹrọnọ whọ ‘yọrọ udu ra’ jẹ ‘nya wọhọ owareghẹ.’ (Itẹ 4:23; Ahwo Ẹfẹsọs 5:15) Dede na, o tẹ make rọnọ enẹna a si owhẹ no ukoko, kọ eme whọ gbẹ jowọ nọ a rẹ rọ rehọ owhẹ zihe ze he? Ọghẹnẹ ọ gwọlọ nọ ahwo nọ a roma mudhe kẹe no kpobi a gọe avọ ẹrọwọ gbe “oghọghọ.” (Iziewariẹ 28:47) Whọ rẹ sai ru ere bẹdẹ bẹdẹ otẹrọnọ whọ be hae jẹ ọwhọkuo Jihova rehọ ẹsikpobi.—Olezi 100:2.
Ẹvẹ Whọ te k’Uyo?
• Fikieme a ro si otujọ no ukoko Ileleikristi na?
• Ẹvẹ a re ro dhesẹ uvi ekurẹriẹ?
• Fikieme u je fo re a fa izieraha ilogbo?
• Idhere vẹ ekpako Ileleikristi a re ro fi obọ họ kẹ orumuomu nọ o kurẹriẹ?
[Enọ Uwuhrẹ]