Kristi Erue na A Fere Rai Via No

EME who re ru rọ thọ oma ra whọ tẹ riẹ nnọ ẹyao oyoma jọ nọ o re vo o bi kp’ahwo gaga evaọ oria ra? Whọ rẹ re oghẹrẹ emu jẹ rehọ imu nọ i re kru ohwo oma ga họre ẹyao whọ vẹ jẹ kẹnoma no ahwo nọ a wo ẹyao na. O gwọlọ owojẹ ovo yena mi omai evaọ abọ-ẹzi. Ikereakere na e ta kẹ omai inọ Kristi erue e “rọ eva akpọ na no.” (1 Jọn 4:3) Ma tẹ gwọlọ nọ “ẹyao” rai na o vo ruọ omai hi, ma re vuhu enọ ẹyao nana ọ rrọ oma, ma vẹ kẹnoma no ai. U woma kẹhẹ inọ Ebaibol na ọ kẹ omai evuẹ buobu kpahe ẹme nana.

Kristi erue u dhesẹ enọ e wọso Kristi hayo ilele riẹ, u te je dhesẹ enọ i re dhesẹ oma rai wọhọ Kristi hayo ilele riẹ kpakiyọ a rrọ ere he. Jesu omariẹ ọ ta nọ: “Ọnọ o kuomagbe omẹ hẹ, ọrọ suomẹ; ọnọ o koko kugbe omẹ hẹ, ọ [be] vaha.”—Luk 11:23.

Jọn o kere kpahe Kristi erue nọ Jesu o whu jẹ kparoma kpohọ odhiwu vrẹ ikpe 60 no. Fikiere, oware nọ a re ro vuhu Kristi erue họ oghẹrẹ nọ iruẹru rai i bi kpomahọ iruo uvi ilele Jesu evaọ otọakpọ.—Matiu 25:40, 45.

Kristi Erue A Mukpahe Ilele Jesu

Jesu ọ vẹvẹ ilele riẹ unu inọ akpọ na o ti mukpahe ae. Ọ ta nọ: “A re ti fi owhai họ uye obẹbẹ, a re ti kpe owhai; erẹwho na kpobi i re ti mukpahe owhai fiki odẹ mẹ. Eruẹaro erue buobu e rẹ te jọ, a ve ti su ahwo buobu thọ.”—Matiu 24:9, 11.

Nọ orọnọ a ti kpokpo ilele Jesu “fiki odẹ” Jesu na, enọ i ti kpokpo ai na a ginẹ wọso Kristi. “Otu eviẹhọ” na, nọ ejọ rai e jọ Ileleikristi vẹre na, a rrọ Kristi erue re. (2 Jọn 7) Jọn ukọ na o kere nọ: ‘Oma mai enọ  e rọ suọ Kristi na a no nyawa, rekọ a jọ ọvo kugbe omai hi; keme orọnọ ae avọ omai a gbẹ jọ ọvo, a gbehe lele omai jọ.’—1 Jọn 2:18, 19.

Eme ọ Jesu gbe erọ Jọn na i dhesẹ vevẹ inọ Kristi erue na orọnikọ omọvo jọ họ rekọ ahwo buobu. Ofariẹ, fikinọ a rrọ eruẹaro erue, ẹjiroro rai jọ họ eviẹhọ egagọ. Eghẹ vẹ jọ a bi ro ruiruo?

Ẹvaha Erue Egagọ

Pọl ukọ na ọ vẹvẹ Timoti ibe oruiruo riẹ unu inọ ọ yọroma kpahe iwuhrẹ ikọ-erue, ahwo wọhọ Himẹnayọs avọ Filẹtus, enọ ‘ẹmeunu rai ọ te vaha ruaro wọhọ ola-ikpo.’ Pọl o fibae inọ ahwo nana yọ “enọ i kiukeku uzẹme na, enọ eta nọ ẹkparomatha ọrọ kẹ okenọ ukpemu ovo. A tẹ be rehọ oyena raha ẹrọwọ otu jọ.” (2 Timoti 2:16-18) U re vevẹ, Himẹnayọs avọ Filẹtus a je wuhrẹ inọ ẹkparomatha na yọ oware ẹwoho, inọ Ileleikristi a kparoma no evaọ edhere abọ-ẹzi. Ginọ uzẹme inọ ohwo o te zihe ruọ uvi olele Jesu no yọ ọ ziọ uzuazọ no evaọ eriwo Ọghẹnẹ, onọ Pọl omariẹ ọ ta vevẹ. (Ahwo Ẹfẹsọs 2:1-5) Rekọ, iwuhrẹ ọ Himẹnayọs avọ Filẹtus e wọso eyaa Jesu erọ ẹkparomatha iwhuowhu na evaọ otọ Uvie Ọghẹnẹ.—Jọn 5:28, 29.

Otu ahwo egagọ ididi jọ a tẹ te wha uwuhrẹ na haro inọ ẹkparomatha ẹwoho ọvo ọ riẹ. Fikinọ a rọwo inọ a rẹ sae rehọ edhere odidi wo eriariẹ t’obọ, otu ahwo nana a tẹ jẹ gua Egagọ-Ileleikristi erue avọ eriariẹ-ikpehru erọ ahwo Griki avọ ereghẹ ididi erọ ahwo ofẹ obọ Esia kugbe. Wọhọ oriruo, a wuhrẹ nọ oware nọ a rẹ ruẹ kpobi o wọso ọrẹri, fikiere a te wuhrẹ nọ Jesu ọ nyaze evaọ oma uwo ho rekọ o fake wọhọ nọ o wo oma uwo. Wọhọ epanọ ma ruẹ no na, uzedhe oware nọ Jọn ukọ na ọ vẹvẹ unu kpahe na oye.—1 Jọn 4:2, 3; 2 Jọn 7.

Ọrue ọfa jọ nọ a wọ lahwe ikpe buobu nọ i lele i rie họ uwuhrẹ ọ Esanerọvo, onọ a jọ ta nnọ Jesu ọvo yọ Ọghẹnẹ Erumeru ọ tẹ jẹ rrọ Ọmọ Ọghẹnẹ. Evaọ obe riẹ The Church of the First Three Centuries [Ichọche Ikpe-Udhusoi Esa Ọsosuọ Na], Dr. Alvan Lamson ọ ta inọ uwuhrẹ Esanerọvo na “orọnikọ Ikereakere ahwo Ju gbe erọ Ileleikristi u no ze he; inọ Ilorida Ichọche jọ e rehọ e riẹ lahwe a te fi ei ba Egagọ-Ileleikristi.” Amono họ “Ilorida Ichọche” nana? Ahwo nana yọ isu-egagọ nọ e rrọ ikọ-erue enọ e dhẹ gbalọ iwuhrẹ Plato, ọgbaeriariẹ Griki nọ ọ jọ ọgẹdhọ.

Ẹrọvia uwuhrẹ Esanerọvo na yọ uwuhrẹ eviẹhọ nọ o mae rro orọ Kristi erue na, keme uwuhrẹ nana u ru Ọghẹnẹ fihọ ohwo nọ a rẹ sae riẹ hẹ, o tẹ jẹ wha avro fihọ oghẹrẹ nọ Ọghẹnẹ avọ Ọmọ riẹ a ginẹ rrọ. (Jọn 14:28; 15:10; Ahwo Kọlọsi 1:15) Dai roro iei, ẹvẹ ohwo ọ sai ro ‘si kẹle Ọghẹnẹ,’ wọhọ epanọ Ikereakere na e ta nọ ma ru na, otẹrọnọ Ọghẹnẹ yọ ohwo nọ a rẹ sae riẹ hẹ?—Jemis 4:8.

Fiba ozighi nana, ahwo buobu nọ a fa Ebaibol a si odẹ Ọghẹnẹ, Jihova, no efafa rai, dede nọ o roma via vrẹ asia 7,000 evaọ ikere ọsosuọ na! U re vevẹ, orọnikọ a bi dhesẹ Erumeru na wọhọ ohwo nọ a rẹ sae riẹ hẹ ọvo ho, rekọ jẹ wọhọ awodẹhẹ, orivo ologbo kẹ Ọnọ ọ ma omai jẹ rọkẹ Ebaibol na nọ a rọ ogaga ẹzi riẹ kere. (Eviavia 22:18, 19) Ofariẹ, edẹ-ọkwa wọhọ Olori gbe Ọghẹnẹ nọ a ro nwene odẹ oma Ọghẹnẹ o rrọ orivo ologbo kẹ olẹ oriruo Jesu na, onọ abọ riẹ jọ o ta nọ: “Odẹ ra ojọ ọrẹri.”—Matiu 6:9.

Kristi Erue A Siọ Uvie Ọghẹnẹ

Kristi erue a kru obọ ga viere no maero evaọ “edẹ urere” nọ ma be rria na. (2 Timoti 3:1) Ugogo ẹjiroro ọrọ otu eviẹhọ erọ ọgbọna họ re a su ahwo thọ kpahe ọkwa Jesu wọhọ Ovie ọrọ Uvie Ọghẹnẹ, egọmeti obọ odhiwu nọ o te rehọ esuo otọakpọ na kpobi kẹle na.—Daniẹl 7:13, 14; Eviavia 11:15.

 Wọhọ oriruo, isu egagọ jọ a re wuhrẹ inọ udu ahwo Uvie Ọghẹnẹ o rrọ, eriwo nọ ọ wọso Ikereakere na. (Daniẹl 2:44) Amọfa a rẹ ta nnọ egọmeti ahwo-akpọ gbe ikoko rai Jesu o bi ro ruiruo. Rekọ, Jesu ọ ta nọ: ‘Uvie mẹ o rrọ orọ akpọ na ha.’ (Jọn 18:36) Evaọ uzẹme, Setan họ ‘osu akpọ ọnana’ gbe “ọghẹnẹ akpọ nana,” orọnikọ Jesu hu. (Jọn 14:30; 2 Ahwo Kọrint 4:4) Oye jabọ nọ Jesu o ti ro si egọmeti ahwo-akpọ kpobi no kẹle na, ọye ọvo ọ vẹ te jọ Osu otọakpọ na. (Olezi 2:2, 6-9; Eviavia 19:11-21) Oware nọ ahwo a be lẹ kẹ na oye, nọ a tẹ be lẹ Olẹ Olori na inọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”—Matiu 6:10.

Fikinọ a be thọ otu isuẹsu akpọ na uke, isu egagọ buobu a wọso, tube kpokpo enọ i bi whowho uzẹme kpahe Uvie Ọghẹnẹ no. Nwani fo na, obe Eviavia o ta kpahe ogberẹ ẹwoho—“Babilọn ologbo na”—ọnọ “ọ da azẹ erezi na gbe azẹ ọhaha enọ a kpe fiki Jesu.” (Eviavia 17:4-6) O te je bi bru igberẹ evaọ abọ-ẹzi ẹkwoma uke nọ ọ be tha “ivie” akpọ na, avọ ọghọ nọ ivie na i bi ru ei. Aye ẹwoho nana họ egagọ erue akpọ na. Ọ rrọ abọ ologbo ọrọ Kristi erue na.—Eviavia 18:2, 3; Jemis 4:4.

Kristi Erue na I bi ‘Wuhrẹ Ahwo Onọ A Gwọlọ’

U te no ẹsiọ uzẹme Ebaibol no, ibuobu nọ i se oma rai Ileleikristi a siọ itee ẹfuọ Ebaibol no a te bi kie lele uruemu nọ o viodẹ. A jọ Ebaibol ruẹaro kpahe onana, inọ: “Oke o be tha nọ ahwo [enọ i se oma rai eg’Ọghẹnẹ] a rẹ te rehọ uwuhrẹ nọ o gbunu hu, [rekọ] ezọ e rẹ te sae okpọ a ve ti koko iwuhrẹ nọ i re ti wuhrẹ ai onọ a guọlọ.” (2 Timoti 4:3) A te je dhesẹ ahwo nana nọ e rrọ iwuhrẹ erue na wọhọ ‘ikọ erue, iruiruo ọviẹwẹ, enọ e be rẹriẹ oma rai ruọ ikọ Kristi.’ Ebaibol e ta haro nọ: “Urere rai o te jọ epanọ iruo rai erọ.”—2 Ahwo Kọrint 11:13-15.

Usu iruo rai họ “ogbeyero” hayo uruemu uwhrewhrehe, onọ o rrọ orivo kẹ ehri-izi ẹfuọ. (2 Pita 2:1-3, 12-14) Kọ ma gbẹ be ruẹ isu egagọ buobu gbe ilele rai nọ a bi kie lele—hayo be kuvẹ kẹ—iruemu ethọthọ, wọhọ ezae-duezae hayo owezẹ evaọ udevie enọ e rọo ohwohwo ho? Iviena rehọ omoke jọ rọ iruemu nana rọ wawo oware nọ Ebaibol e ta eva Iruo-Izerẹ 18:22; Ahwo Rom 1:26, 27; 1 Ahwo Kọrint 6:9, 10; Ahwo Hibru 13:4; Jud 7.

“Dawo Izi Na”

Ma te roro kpahe eware nọ ma jọ obehru ta no na, u fo nọ ma gaviezọ kẹ eme ọ Jọn ukọ na ọnọ ọ tuduhọ omai awọ inọ ma kiẹ iwuhrẹ egagọ mai riwi. Ọ vẹvẹ unu nọ: “Wha fievahọ ẹzi kpobi hi, rekọ dawo izi na sọ a rọ erọ Ọghẹnẹ; keme eruẹaro erue buobu e vaha ruọ eva akpọ na no.”—1 Jọn 4:1.

Roro kpahe emamọ oriruo “uvi-ahwo” nọ e jẹ rria okpẹwho Bẹria evaọ ikpe-udhusoi ọsosuọ na. “Evaọ oghọghọ a rọ rehọ ẹme na, yọ a riwẹ ikerakere na kẹse kẹse, sọ epanọ [Pọl avọ Saelas] a ta kẹ ae na ere eghinẹ rọ.” (Iruẹru 17:10, 11) Ẹhẹ, dede nọ oma o jẹ kpakpa ae re a wuhrẹ, ahwo Bẹria a roma totọ kiẹ riwi re a ruẹ inọ eme nọ a yo je dede rehọ na i no Ikereakere ze.

Nẹnẹ re, uvi Ileleikristi a re kie lele eriwo ọkpokpọ kpobi nọ o kie ze he, rekọ a rẹ talamu uzẹme Ebaibol na. Pọl ukọ na o kere nọ: ‘Mẹ lẹ kẹ owhai re uyoyou rai u hedhe ẹruẹruọ, eva ẹriẹ gbe areghẹ kpobi.’—Ahwo Filipai 1:9.

Otẹrọnọ who ri ru ere no ho, daoma re who wo ‘eriariẹ gbe areghẹ kpobi’ ẹkwoma ewuhrẹ kpahe oware nọ Ebaibol na i gine wuhrẹ. “Eme erue” erọ Kristi erue e rẹ viẹ enọ e raro kele ahwo Bẹria na họ họ. (2 Pita 2:3) Ukpoye, uzẹme Ebaibol na nọ u no obọ Kristi gbe uvi ilele riẹ ze u re ru ai họ emuyẹ.—Jọn 8:32, 36.

[Ẹkpẹti/Uwoho nọ o rrọ ẹwẹ-obe avọ 12]

OWARE NỌ EBAIBOL NA E TA KPAHE KRISTI ERUE

“Emaha na, oke urere orọ na, wọhọ epanọ wha yo vẹre, nnọ, e nọ e rọ suọ Kristi e be tha, whaọ enẹna e nọ e rọ suọ Kristi e zino.”—1 Jọn 2:18.

“Ono họ ọtọrue na, ogbẹrọ ọye nọ ọ rẹ vro nọ Jesu họ Kristi na ha? Ọnana họ ọ nọ ọ rọ so Kristi, ọye nọ ọ rẹ vro Ọsẹ na jegbe Ọmọ na.”—1 Jọn 2:22.

“Ẹzi kpobi nọ ọ rọwo Jesu hu ọ rọ ọrọ Ọghẹnẹ hẹ. Onana họ ẹzi nọ ọ rọ suọ Kristi, ọnọ wha yo vẹre nọ ọ be tha, whaọ enẹna ọ rọ eva akpọ na no.” —1 Jọn 4:3.

“Otu eviẹhọ buobu a vaha ruọ eva akpọ na no, enọ e rẹ rọwa nọ Jesu ọ rehọ oma uwo ze he, ohwo otiọye na họ ọvieviaviẹ gbe ọ nọ ọ rọ suọ Kristi.”—2 Jọn 7.