Kọ Whọ Be Gbodibo Wọhọ Ọnọ O Wo “Aruoriwo Ọghẹnẹ”?
Kọ Whọ Be Gbodibo Wọhọ Ọnọ O Wo “Aruoriwo Ọghẹnẹ”?
“Whai ohwo ọ rehọ uyoyou oniọvo you ohwo, whai ohwo ọ kẹ ohwo adhẹẹ.”—ROM 12:10.
1. Imuẹro vẹ Ẹme Ọghẹnẹ ọ k’omai?
ẸME ỌGHẸNẸ o be k’omai imuẹro ẹsikpobi inọ Jihova o ti fi obọ họ k’omai okenọ ma tẹ rrọ uye. Wọhọ oriruo, muẹrohọ eme omosasọ nana: “ỌNOWO na ọ be yọrọ enọ i re kie, ọ vẹ jẹ kpare enọ e rọ oma kpotọ.” ‘O bi siwi enọ eva rai e raha, jẹ be gba emela rai.’ (Ol. 145:14; 147:3) Ofariẹ, Ọsẹ obọ odhiwu mai ọ ta nọ: “Mẹ, ỌNOWO na Ọghẹnẹ ra, o kru obọze ra na; mẹ họ ọnọ ọ ta kẹ owhẹ, ‘Ozọ umu owhẹ hẹ, me ti fiobọhọ kẹ owhẹ.’”—Aiz. 41:13.
2. Ẹvẹ Jihova o bi ro fi obọ họ kẹ idibo riẹ?
2 Ẹvẹ Jihova nọ a rẹ ruẹ hẹ nọ ọ rrọ obọ odhiwu o bi ro ‘kru obọze mai’? Ẹvẹ ọ be rọ ‘kpare omai okenọ ma tẹ rọ oma kpotọ’ koyehọ, okenọ ma tẹ rrọ uye? Jihova o bi fi obọ họ k’omai evaọ idhere sa-sa. Wọhọ oriruo, ọ be rọ ẹkwoma ẹzi ọfuafo riẹ kẹ ahwo riẹ “ogaga ulogbo nọ othesiwa.” (2 Kọr. 4:7; Jọn 14:16, 17) Idibo Ọghẹnẹ a bi je wo omosasọ no eme nọ e rrọ Ebaibol na ze evaọ okenọ a tẹ rrọ ẹbẹbẹ. (Hib. 4:12) Kọ edhere ọfa ọ riẹ nọ Jihova ọ be rọ b’omai ga? Ma rẹ ruẹ uyo na evaọ obe Pita Ọsosuọ.
“Aruoriwo Ọghẹnẹ” O Dhesẹ Oma Via Evaọ Idhere Sa-Sa
3. (a) Eme Pita ukọ na ọ ta kpahe edawọ? (b) Eme a jọ ubrobọ ekuhọ ileta ọsosuọ Pita ta kpahe?
3 Nọ Pita ukọ na o je kere se Ileleikristi nọ a rọ ẹzi wholo, o kere inọ a rẹ ghọghọ keme a ti wo osohwa ulogbo evaọ obaro. O te fibae nọ: “Dede enẹna u reti krẹ hẹ nọ wha rẹ te ruẹ ọyawa egheghẹrẹ edawọ.” (1 Pita 1:1-6) Muẹrohọ ẹme na “egheghẹrẹ.” U dhesẹ inọ edawọ e te jọ oghoghẹrẹ. Rekọ, Pita ọ jọ etẹe kuhọ họ, o vu inievo riẹ wa ha re a roro sọ a te sai thihakọ edawọ itieye na. Ukpoye, Pita o dhesẹ inọ epanọ o rẹ ga te kpobi kẹhẹ, o rẹ sai mu Ileleikristi ẹro inọ Jihova o ti fi obọ họ kẹ ai thihakọ edawọ nọ i ti te ai. A rẹ jọ ubrobọ urere obe-ovuẹ Pita na ruẹ imuẹro yena, onọ ukọ na ọ jọ ta kpahe “urere eware kpobi.”—1 Pita 4:7.
4. Fikieme eme nọ e rrọ 1 Pita 4:10 e jẹ rrọ eme omosasọ k’omai?
4 Pita ọ ta nọ: “Wọhọ epanọ omomọvo o wo okẹ no, rehọ iẹ ru iruo kẹ ohwo ohwo, wọhọ irieyero oghoghẹrẹ aruoriwo Ọghẹnẹ.” (1 Pita 4:10) Pita ọ jọ etenẹ wariẹ ẹme na “oghoghẹrẹ.” Koyehọ, ọ be ta nọ, ‘Edawọ e rẹ rọ idhere sa-sa te omai, rekọ ere ọvona ma re wo aruoriwo Ọghẹnẹ evaọ idhere sa-sa.’ Fikieme ẹme yena o jẹ rọ omosasọ? U dhesẹ inọ oghẹrẹ odawọ nọ u re te omai kpobi kẹhẹ, aruoriwo Ọghẹnẹ u ti fi obọ họ k’omai ẹsikpobi thihakọ riẹ. Kọ, whọ jọ ẹme Pita na muẹrohọ oghẹrẹ nọ ma re ro wo aruoriwo Ọghẹnẹ? Ma re woi ẹkwoma ibe eg’Ọghẹnẹ mai.
“Ru Iruo kẹ Ohwo Ohwo”
5. (a) Eme u fo nọ Oleleikristi kpobi o re ru? (b) Enọ vẹ e roma via?
5 Nọ Pita o je kere se ahwo kpobi nọ e rrọ ukoko Ileleikristi na, o kere nọ: “Onọ omae rọ aro whai ohwo ọ rọ uyoyou nọ o rẹ hiẹ hẹ you ohwo.” O te fibae nọ: “Wọhọ epanọ omomọvo o wo okẹ no, rehọ iẹ ru iruo kẹ ohwo ohwo.” (1 Pita 4:8, 10) Fikiere, omomọvo evaọ ukoko na ọ rẹ bọ ibe Ileleikristi riẹ ga. A mu oware jọ nọ Jihova o wo onọ u wuzou gaga họ omai obọ, yọ o gwọlọ nnọ ma rẹ rehọ iẹe fi obọ họ kẹ amọfa. Kọ eme a mu họ omai obọ na? Pita ọ ta nọ “okẹ.” Didi okẹ? Ẹvẹ ma rẹ rọ “rehọ iẹ ru iruo kẹ ohwo ohwo”?
6. Didi ekẹ jọ a kẹ Ileleikristi?
6 Ebaibol e ta nọ: “Kokẹ uwoma kokẹ uwoma avọ okẹ nọ o gba kiete kpobi obọ ehru u re notha.” (Jem. 1:17) Evaọ uzẹme, okẹ kpobi nọ Jihova ọ kẹ ahwo riẹ yọ odhesẹvia aruoriwo riẹ. Okẹ jọ nọ u wuzou nọ Jihova ọ k’omai họ ẹzi ọfuafo na. Okẹ yena u re fi obọ họ k’omai wo iruemu-aghae wọhọ uyoyou, ewoma, gbe omaurokpotọ. Iruemu yena i ve je ru omai dhesẹ uyoyou kẹ ibe eg’Ọghẹnẹ je fi obọ họ kẹ ai no eva ze. Uvi areghẹ gbe eriariẹ e tẹ jẹ rọ usu ekẹ iwoma nọ Ọghẹnẹ ọ rọ ẹkwoma ẹzi ọfuafo na k’omai. (1 Kọr. 2:10-16; Gal. 5:22, 23) Evaọ uzẹme, ma rẹ rehọ ẹgba gbe ona nọ ma wo kpobi wọhọ ekẹ nọ ma rẹ rọ wha ajiri gbe orro se Ọsẹ obọ odhiwu mai. Ọghẹnẹ ọ k’omai owha-iruo nọ ma rẹ rọ rehọ ẹgba gbe iruemu-aghae yena ro dhesẹ aruoriwo riẹ kẹ ibe eg’Ọghẹnẹ mai.
“Rehọ iẹ Ru Iruo”—Oghẹrẹ Vẹ?
7. (a) Eme họ otofa ẹme na “wọhọ epanọ”? (b) Enọ vẹ ma rẹ nọ oma mai, kọ fikieme?
7 Pita ọ tẹ jẹ ta kpahe ekẹ nọ ma wo inọ: ‘Wọhọ epanọ omomọvo o wo okẹ no, rehọ iẹ ru iruo.’ Ẹme na “wọhọ epanọ” u dhesẹ inọ ona gbe iruemu-aghae nọ omomọvo o wo gbe epanọ ma rẹ sae rehọ ai ru iruo te i re wo ohẹriẹ. O make rọ ere na, a tuduhọ omai omomọvo awọ re ma “rehọ ie [koyehọ, okẹ kpobi nọ a k’omai] ru iruo kẹ ohwo ohwo.” Ofariẹ, ẹme na inọ “rehọ iẹ ru iruo . . . wọhọ irieyero” yọ ujaje. Fikiere, u fo re ma nọ oma mai inọ: ‘Kọ mẹ be ginẹ rọ ekẹ nọ a kẹ omẹ na bọ ibe eg’Ọghẹnẹ mẹ ga?’ (Wawo 1 Timoti 5:9, 10.) ‘Hayo kọ mẹ be rọ ona nọ Jihova ọ k’omẹ na ru eware nọ e rẹ wha erere se omobọ mẹ ọvo—ẹsejọhọ ro le efe hayo odẹ?’ (1 Kọr. 4:7) Ma tẹ be rehọ ekẹ nọ ma wo ro “ru iruo kẹ ohwo ohwo,” yọ ma bi ru eva were Jihova.—Itẹ 19:17; se Ahwo Hibru 13:16.
8, 9. (a) Idhere jọ vẹ Ileleikristi evaọ akpọ-soso a bi ro fi obọ họ kẹ ibe eg’Ọghẹnẹ? (b) Ẹvẹ inievo nọ e rọ ukoko ra a bi ro fi obọ họ kẹ ohwohwo?
8 Ebaibol e fodẹ oghoghẹrẹ idhere nọ Ileleikristi ikpe-udhusoi ọsosuọ a rọ gbodibo kẹ ohwohwo. (Se Ahwo Rom 15:25, 26; 2 Timoti 1:16-18.) Epọvo na re nẹnẹ, uvi Ileleikristi a be rehọ unevaze ru lele ujaje na inọ a rehọ okẹ nọ ohwohwo o wo rọ gbodibo kẹ ibe eg’Ọghẹnẹ. Joma ta kpahe idhere jọ nọ a bi ro ru ere.
9 Kamara kamara, inievo-emezae buobu a rẹ raha oke rọ ruẹrẹ oma kpahe kẹ iwuhrẹ. Fikiere nọ a tẹ rrọ obọ ewuhrẹ ta kpahe eware jọ nọ a se kpahe no evaọ obọ uwou, eme areghẹ rai i re fi obọ họ kẹ ukoko na soso thihakọ. (1 Tim. 5:17) A riẹ inievo buobu kẹ omasasa gbe ẹwo nọ a bi dhesẹ kẹ ibe eg’Ọghẹnẹ. (Rom 12:15) Ejọ i re weze bru ahwo nọ a rọ uweri a vẹ jẹ lẹ kugbe ai. (1 Tẹs. 5:14) Amọfa a rẹ raha oke ro kere eme uduotahawọ se ibe Ileleikristi nọ i bi thihakọ edawọ. Yọ amọfa a rẹ rehọ ẹwo fi obọ họ kẹ enọ e be mọ ẹyao nọ a sae rọ ziọ ewuhrẹ hẹ gbe enọ e kpako gaga no re a sai kpohọ iwuhrẹ. Isẹri Jihova buobu a bi w’obọ evaọ iruo ogbodhẹ, bi fi obọ họ kẹ ibe eg’Ọghẹnẹ wariẹ bọ iwou rai nọ e raha idudhe. Uyoyou ẹwo nọ inievo na a bi dhesẹ gbe obọ nọ a bi fihọ na yọ “aruoriwo Ọghẹnẹ” nọ u bi dhesẹ oma via evaọ idhere sa-sa.—Se 1 Pita 4:11.
Ovẹ Họ Onọ O Mai Wuzou?
10. (a) Eware ivẹ vẹ e jọ Pọl oja evaọ egagọ Ọghẹnẹ? (b) Ẹvẹ ma rẹ rọ raro kele Pọl nẹnẹ?
10 Orọnikọ ibe eg’Ọghẹnẹ ọvo idibo Ọghẹnẹ a rẹ rehọ okẹ nọ a kẹ rai ro fi obọ họ kẹ hẹ rekọ te erivẹ rai ẹkwoma ovuẹ Uvie na nọ a rẹ vuẹ ae. Pọl ukọ na o vuhumu inọ ẹgọ Jihova o gwọlọ abọ ivẹ nana. O kere se ukoko nọ o jọ obọ Ẹfẹsọs kpahe “iruo odibo-ọgba aruoriwo Ọghẹnẹ” nọ a kẹ riẹ fiki rai. (Ẹf. 3:2) Ghele na, ọ ta re nọ: “O were Ọghẹnẹ nọ ọ jẹ rehọ usiuwoma na họ obọ mai.” (1 Tẹs. 2:4) Wọhọ Pọl, ma riẹ re inọ iruo nọ a k’omai họ re ma ta usiuwoma Uvie Ọghẹnẹ. Ma tẹ be ta usiuwoma na avọ ọwhọ, yọ ma be daoma raro kele oriruo Pọl ọnọ ọ rehọ ọwhọ ta usiuwoma na. (Iruẹru 20:20, 21; 1 Kọr. 11:1) Ma riẹ inọ usiuwoma na nọ ma rẹ ta u re siwi ahwo. Rekọ, evaọ oke ovona, ma rẹ jẹ daoma raro kele Pọl gwọlọ uvẹ nọ ma rẹ rọ kẹ ibe eg’Ọghẹnẹ mai “okẹ Ẹzi Ẹri” na jọ.—Se Ahwo Rom 1:11, 12; 10:13-15.
11. Ẹvẹ ma re rri iruo usiuwoma ota gbe ẹbọga inievo Ileleikristi mai?
11 Te obọ nọ ma re fihọ kẹ inievo mai te usiuwoma ota, ovẹ o mai wuzou? Onọ yena o wọhọ ẹsenọ ma be nọ onọ kpahe ọvra inọ, Ovẹ o mai wuzou evaọ ibekpe ivẹ riẹ? Uyo onọ na u re vevẹ. Ọvra ọ gwọlọ ibekpe ivẹ riẹ na re ọ sae ra ziezi. Epọvo na re, re ma sai ru oware nọ Ọghẹnẹ ọ gwọlọ mi omai Ileleikristi, ma re ru eware ivẹ na. Fikiere, ukpenọ ma re rri iruo usiuwoma ota na gbe ẹbọga ibe eg’Ọghẹnẹ mai wọhọ ọvuọ iruo riẹ, joma rri rai wọhọ epanọ ikọ na Pọl avọ Pita a rri rai—wọhọ iruo nọ i w’obọ kugbe ohwohwo. Evaọ edhere vẹ?
12. Ẹvẹ Jihova ọ be rọ rehọ omai ru iruo?
12 Mai etausiuwoma, ma rẹ rọ ona uwuhrẹ nọ ma wo kpobi ru re ovuẹ omosasọ orọ Uvie Ọghẹnẹ nọ ma be vuẹ u te erivẹ mai udu. Evaọ ere oruo, ma ti ro fi obọ họ kẹ ai zihe ruọ ilele Jesu. Rekọ, ma rẹ jẹ rọ ona gbe ekẹ efa nọ ma wo avọ eme ọbọga ro fi obọ họ kẹ ibe eg’Ọghẹnẹ mai; enana kpobi yọ odhesẹvia aruoriwo Ọghẹnẹ. (Itẹ 3:27; 12:25) Ere oruo, ma ti ro fi obọ họ kẹ ae jọ ilele Jesu. Evaọ idhere ivẹ na—usiuwoma nọ ma be ta kẹ ahwo gbe ‘iruo nọ ma re ru kẹ ohwohwo’—ma wo uvẹ-ọghọ nọ Jihova ọ be rọ rehọ omai ru iruo.—Gal. 6:10.
‘Wha You Ohwohwo’
13. Eme o rẹ via nọ ma gbe bi “ru iruo kẹ ohwo ohwo” ho?
13 Pọl ọ tuduhọ ibe eg’Ọghẹnẹ riẹ awọ nọ: “Whai ohwo ọ rehọ uyoyou oniọvo you ohwo, whai ohwo ọ kẹ ohwo adhẹẹ.” (Rom 12:10) Evaọ uzẹme, uyoyou nọ ma re wo kẹ inievo mai o rẹ lẹliẹ omai rehọ eva kpobi ru iruo wọhọ irieyero aruoriwo Ọghẹnẹ. Ma riẹ inọ Setan ọ tẹ sae whaha omai ‘iruo nọ ma re ru kẹ ohwohwo,’ yọ ọ raha okugbe nọ ọ rrọ udevie mai no. (Kọl. 3:14) Yọ ma gbe wo okugbe he ma sae rọ ọwhọ ta usiuwoma na ha. Setan ọ riẹ vevẹ inọ ọ tẹ sai wiri ubekpe ọvo mai, wọhọ odẹme, yọ o bru omai abọ họ no.
14. Ono o re wo erere no aruoriwo Ọghẹnẹ ze? Kẹ oriruo jọ.
14 Orọnikọ enọ ma bi fi obọ họ kẹ ọvo a re wo erere no aruoriwo Ọghẹnẹ ze he rekọ t’omai te. (Itẹ 11:25) Rehọ oriruo Ryan avọ Roni, ọzae avọ aye nọ e be rria Illinois, evaọ obọ America. Nọ a yo inọ Ofou-Ọwhibo nọ a mu odẹ kẹ nọ Katrina ọ raha iwou Isẹri buobu, uyoyou nọ a wo kẹ inievo rai o tẹ wọ ai nya siọ iruo rai ba, kwa no uwou rai, a tẹ dẹ umuwou iyibo nọ a rẹ wọ no oria ruọ oria, a tẹ ruẹrẹ uwou na, jẹe họ omoto dhẹ emaele egba izii (900) kpohọ ẹwho nọ a re se Louisiana. A rria etẹe vrẹ ukpe nọ a jẹ rehọ oke rai, ẹgba, gbe igho rai je ro fi obọ họ kẹ inievo Ileleikristi rai. Ryan, nọ ọ rrọ ikpe 29 ọ ta nọ: “Iruo ogbodhẹ na nọ me jo w’obọ u si omẹ kẹle Ọghẹnẹ ziezi. Mẹ ruẹ epanọ Jihova ọ be rọ sẹro ahwo riẹ.” Ryan o fibae inọ: “Inievo nọ e kpako no nọ me lele ru iruo u wuhrẹ omẹ ziezi kpahe oghẹrẹ nọ a re ro fi obọ họ kẹ inievo. Me te je wuhrẹ inọ iruo buobu e riẹ nọ mai enọ e gbẹ maha a re ru evaọ ukoko Jihova.” Roni, nọ ọ rrọ ikpe 25 ọ ta nọ: “Eva e were omẹ gaga nọ me ro w’obọ evaọ obufihọ kẹ amọfa. Eva e re were omẹ tenẹ ẹdọvo ho evaọ uzuazọ mẹ. Mẹ riẹ inọ evaọ ikpe nọ e be tha, me ti gbe wo erere no iruo ezi nana nọ me ru na ze.”
15. Emamọ ẹjiroro vẹ ma wo nọ ma re ro fi obọ họ kẹ amọfa wọhọ irieyero aruoriwo Ọghẹnẹ?
15 Evaọ uzẹme, ẹme nọ ma re yo kẹ Ọghẹnẹ re ma vuẹ emamọ usi na jẹ bọ ibe eg’Ọghẹnẹ ga o rẹ wha eghale s’omai kpobi. Ahwo nọ ma fi obọ họ kẹ a re wo ọbọga abọ-ẹzi, ma ve wo evawere nọ ẹkẹ o rẹ wha ze. (Iruẹru 20:35) Ukoko na soso o rẹ jọ sasasa nọ ahwo nọ a riẹ kpobi a te bi dhesẹ uvi uyoyou kẹ ohwohwo. Ofariẹ, uyoyou nọ ma re dhesẹ kẹ ohwohwo o rẹ lẹliẹ amọfa riẹ inọ mai yọ Ileleikristi uzẹme. Jesu ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Maero, ujiro u re te Ọsẹ oyoyou obọ odhiwu mai, Jihova, nọ ọ be ruẹ nnọ idibo riẹ nọ e rrọ otọakpọ a bi ru ẹgwọlọ riẹ, bi fi obọ họ kẹ enọ uye o rrọ oma. Enana kpobi yọ emamọ ẹjiroro nọ ma rẹ rọ rehọ okẹ mai ‘ru iruo kẹ ohwohwo, wọhọ irieyero aruoriwo Ọghẹnẹ.’ Kọ whọ te ruabọhọ ere oruo?—Se Ahwo Hibru 6:10.
Kọ Whọ Kareghẹhọ?
• Idhere vẹ Jihova ọ be rọ bọ idibo riẹ ga?
• Iruo vẹ a k’omai?
• Idhere jọ vẹ ma sai ro fi obọ họ kẹ ibe eg’Ọghẹnẹ mai?
• Eme o te w’omai ruabọhọ rehọ okẹ mai “ru iruo kẹ ohwo ohwo”?
[Enọ Uwuhrẹ]
[Uwoho nọ o rrọ ẹwẹ-obe avọ 13]
Kọ whọ be rehọ “okẹ” ra ru iruo kẹ amọfa manikọ omobọ ra?
[Uwoho nọ o rrọ ẹwẹ-obe avọ 15]
Ma rẹ ta usiuwoma na kẹ amọfa je fi obọ họ kẹ ibe Ileleikristi
[Uwoho nọ o rrọ ẹwẹ-obe avọ 16]
A re yere ahwo nọ a bi ru iruo ogbodhẹ fiki ẹzi omolahiẹ rai