‘Nyaze Whọ Jọ Olele Mẹ’
‘Nyaze Whọ Jọ Olele Mẹ’
“Otẹrọnọ ohwo jọ ọ rẹ te rọ kpahe omẹ, jọ ọ vro oma riẹ re ọ tọlọ [ure oja, “NW”], riẹ ọ rọ kpahe omẹ kẹdẹ kẹdẹ.”—LUK 9:23.
1, 2. (a) Emamọ uzizie vẹ Jesu o zizie omai? (b) Ẹvẹ who ro dede uzizie Jesu na rehọ no?
EVAỌ ubrobọ ekuhọ odibọgba riẹ, Jesu ọ jẹ ta usiuwoma evaọ Pẹria, ẹkwotọ Jọdan nọ o kẹle Judia. Ọmoha jọ ọ nyaze ọ tẹ nọ Jesu oware nọ o re ru re ọ ruẹsi wo uzuazọ ebẹdẹ bẹdẹ. Nọ Jesu ọ ruẹ inọ ọmoha na o je koko Uzi Mosis na, Jesu o te zizie ei kẹ iruo obọdẹ jọ. Ọ ta nọ: “Kpo, zẹ eware kpobi nọ who woi, whọ rọ kẹ iyogbere, who re ti wo efe eva obọ odhiwu. Whọ nyaze, lele omẹ.” (Mak 10:21) Dai roro uzizie yena—uzizie re o lele Jesu, Ọmọvo Ọghẹnẹ Erumeru na!
2 Ọmoha yena ọ siọ uzizie na, rekọ amọfa a jẹ uzizie na rehọ. Evaọ emuhọ odibọgba riẹ, Jesu ọ ta kẹ Filip nọ: “Lele omẹ.” (Jọn 1:43) Filip ọ jẹ uzizie na rehọ, uwhremu na o te zihe ruọ ukọ Jesu. Jesu o zizie Matiu re, yọ Matiu ọ jẹ uzizie na rehọ. (Mat. 9:9; 10:2-4) Evaọ uzẹme, Jesu o zizie ahwo kpobi nọ a you ẹrẹreokie nọ ọ ta inọ: “Otẹrọnọ ohwo jọ ọ rẹ te rọ kpahe omẹ, jọ ọ vro oma riẹ re ọ tọlọ [ure oja, NW] riẹ ọ rọ kpahe omẹ kẹdẹ kẹdẹ.” (Luk 9:23) Fikiere, oghẹrẹ ohwo kpobi ọ sae jọ olele Jesu otẹrọnọ u no rie eva ze. Kọ whọ gwọlọ jọ olele Jesu? Mai ibuobu ma ginẹ rehọ oghọghọ dede uzizie Jesu na rehọ no, yọ oke kpobi nọ ma tẹ rrọ usiuwoma ma bi uzizie amọfa inọ a nyaze te jọ ilele Jesu.
3. Eme u re fi obọ họ k’omai nọ ma gbe reghe siọ Jesu ba ha?
3 Uyoma gaga inọ otujọ nọ i je lele Jesu vẹre a gbe bi lele Jesu enẹna ha. Ukpoye, a te zihe kpemu, uwhremu na a te “reghe” siọ Jesu ba. (Hib. 2:1) Eme u re fi obọ họ k’omai nọ ma gbe reghe he? U re fi obọ họ re ma nọ oma mai nọ: ‘Fikieme mẹ rọ salọ inọ Jesu me re lele? Eme o gwọlọ re ma lele iei? Iyo enọ ivẹ nana i ti fi obọ họ k’omai ruabọhọ nya evaọ emamọ edhere nọ ma salọ na. U ti je fi obọ họ k’omai tuduhọ amọfa awọ re a lele Jesu.
Fikieme Ma Je Lele Jesu?
4, 5. Fikieme Jesu o ro te ọnọ o re su?
4 Jerimaya ọruẹaro na ọ ta nọ: “O ỌNOWO mẹ riẹ nọ ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.” (Jeri. 10:23) Ikuigbe ohwo-akpọ e kẹ imuẹro inọ avro ọ rrọ ẹme Ebaibol nana ha. Kẹse kẹse u bi dhesẹ oma via inọ ahwo-akpọ nọ e gba ha a sae riẹ oma rai su hu. Ma jẹ uzizie Jesu na rehọ fikinọ ma riẹ inọ ọye họ Osu nọ ọ rẹ sae riẹ omai su. Joma ta kpahe epanọ Jesu o ro te ọnọ ọ rẹ sai su omai.
5 Orọ ọsosuọ, Jihova ọvo họ ọnọ ọ salọ Jesu re ọ jọ Mesaya Osu na. U te no Ọnọ ọ ma omai na no, ono ọfa ọ riẹ oghẹrẹ osu nọ ọ rẹ sai su omai ziezi? Orọ avivẹ, Jesu o wo iruemu-ezi nọ i re siuru nọ ma rẹ sae raro kele. (Se Aizaya 11:2, 3.) Oriruo obọdẹ ọ rrọ k’omai. (1 Pita 2:21) Orọ avesa, Jesu o wo ọdawẹ gaga kẹ enọ i bi lele iei, wọhọ epanọ o dhesẹ via okenọ o whu fiki mai. (Se Jọn 10:14, 15.) O te je dhesẹ omariẹ wọhọ othuru-igodẹ owoma nọ o bi su omai evaọ edhere nọ o rẹ wha evawere se omai evaọ enẹna gbe ebẹdẹ bẹdẹ. (Jọn 10:10, 11; Evia. 7:16, 17) Fiki ẹjiroro enana gbe efa, ma jẹ emamọ owọ nọ ma rọ rọwo inọ ma re lele Jesu. Kọ eme owojẹ nana o gwọlọ mi omai?
6. Eme o gwọlọ re a lele Jesu?
6 U te he re ma r’unu ta ọvo nnọ mai yọ Ileleikristi. Ahwo nọ a se oma rai Ileleikristi nẹnẹ a bu te ima-idu ivẹ, rekọ uruemu rai u bi dhesẹ ai fihọ “irumuomu.” (Se Matiu 7:21-23.) Okenọ ahwo a tẹ jẹ uzizie na rehọ re a lele Jesu, ma re ru ei vẹ kẹ ai inọ Ileleikristi uzẹme a re yere uzuazọ nọ o rọwo kugbe iwuhrẹ gbe oriruo Jesu kẹdẹ kẹdẹ evaọ uzuazọ rai. Re ma dhesẹ oware nọ onana o rrọ, joma ta kpahe eware jọ nọ ma riẹ kpahe Jesu.
Raro Kele Oriruo orọ Areghẹ Jesu
7, 8. (a) Eme họ areghẹ, kọ fikieme Jesu o ro woi doma fia? (b) Ẹvẹ Jesu o ro dhesẹ areghẹ, kọ ẹvẹ ma sae rọ raro kele iei?
7 Jesu o ru eware buobu nọ i dhesẹ oghẹrẹ ohwo nọ ọ rrọ via, rekọ ma te ta kpahe ene rai: areghẹ riẹ, omaurokpotọ riẹ, ọwhọ riẹ, gbe uyoyou riẹ. Orọ ọsosuọ, roro kpahe areghẹ riẹ—ona nọ o ro fi eriariẹ gbe otoriẹ họ iruo ziezi. Pọl ukọ na o kere nọ: “Efe areghẹ eriariẹ kpobi i dhere eva [Jesu].” (Kọl. 2:3) Diẹse Jesu ọ jọ wo areghẹ otiọye na? Ọye ọvo ọ ta nọ: “Epanọ Ọsẹ o wuhrẹ omẹ, mẹ rọ ta eme eware enana.” (Jọn 8:28) Jihova họ ọnọ ọ kẹ riẹ areghẹ, yọ agbẹta nọ Jesu ọ jẹ hae rọ jiroro nọ e gba gaga na.
8 Wọhọ oriruo, Jesu ọ rọ areghẹ salọ oghẹrẹ uzuazọ nọ o yeri. Ọ roma kẹ ilale eware buobu hu evaọ uzuazọ riẹ, ọ tẹrovi ugogo oware ovo: eruo oreva Ọghẹnẹ. Ọ rọ areghẹ yeri uzuazọ nọ ọ rọ rehọ oke gbe ẹgba riẹ kpobi ru iruo Uvie na. Ma te bi lele oriruo Jesu ma re ru ẹro mai lọhọ, rọ ere whaha uye nọ ma rẹ rọ bẹ oma mai fiki eware nọ e roja ha nọ e rẹ sai mi omai ẹgba gbe oke buobu. (Mat. 6:22) Ileleikristi buobu a ru uzuazọ rai lọhọ no re a sae raha oke ziezi fihọ iruo odibọgba na. Ahwo jọ a mu ọkobaro oke-kpobi họ no. Otẹrọnọ whẹ yọ omọvo rai jọ, ma yere owhẹ ziezi. Re a “kake guọlọ uvie” na o rẹ wha evawere gbe edẹro ze.—Mat. 6:33.
Wo Omaurokpotọ Wọhọ Jesu
9, 10. Ẹvẹ Jesu o ro dhesẹ omaurokpotọ riẹ?
9 Abọ avivẹ ọrọ oghẹrẹ ohwo nọ Jesu ọ rrọ nọ ma be te t’ẹme kpahe na họ omaurokpotọ riẹ. Okenọ ogaga-esuo u te te ahwo-akpọ nọ a gba ha obọ, a re ru oma oruoro wọhọ ẹsenọ a woma vi amọfa. Jesu o wo ohẹriẹ gaga evaọ abọ nana. Dede nọ ọkwa nọ Jesu ọ rrọ evaọ erugba ẹjiroro Jihova o re ruaro, o fu uke vievie he. Yọ a tuduhọ omai awọ re ma raro kele oriruo omaurokpotọ riẹ. Pọl ukọ na o kere nọ: “Wha jọ ẹjiroro nana ọjọ eva rai, ọnọ wha wo eva Kristi Jesu, ọnọ avọ Ọghẹnẹ a gbẹjọ ẹruọvo, dede na o kele i rie gbe odẹ-oro nọ avọ Ọghẹnẹ a rẹ jọ ẹrẹe he, rekọ o se omariẹ gbe oware ovo ho, ọ tẹ rehọ oghẹrẹ oma odibo, a te je yẹi wọhọ ohwo.” (Fil. 2:5-7) Eme oyena o gwọlọ?
10 Jesu ọ jọ kugbe Ọsẹ riẹ evaọ obọ odhiwu, rekọ u no rie eva ze inọ o re “se omariẹ gbe oware ovo ho.” A kpeze uzuazọ riẹ fihọ edhede ọmọtẹ ohwo Ju nọ ọ riẹ ọzae he, etẹe ọ jọ rro emerae izii bẹsenọ a ti ro yẹi wọhọ ọmọboba nọ a yọrọ evaọ uviuwou ọwena nọ ọ jọ oyogbere. Evaọ uwou Josẹf, Jesu ọ jọ rro te epanọ o ro wuhrẹ onya, rro te ọmọzae ọsese, jẹ rro te ọmoha. Ọ kare uzioraha. Rekọ, eva etoke uzoge riẹ kpobi ọ romakpotọ kẹ ọsẹgboni riẹ nọ i wo oma uzioraha. (Luk 2:51, 52) Ọ romakpotọ kẹhẹ!
11. Idhere vẹ ma sae rọ raro kele oriruo omaurokpotọ Jesu?
11 U te no omai eva ze nnọ ma re ru iruo nọ amọfa a rẹ sai rri vo yọ ma be raro kele oriruo omaurokpotọ Jesu. Wọhọ oriruo, roro kpahe iruo usiuwoma ota na. A rẹ sai rri iruo nana kuẹku, maero nọ ahwo a tẹ be se ovuẹ na, se omai ẹkoko, hayo gbẹroma. Rekọ ma te bi thihakọ evaọ iruo usiuwoma ota na, yọ ma bi fi obọ họ kẹ amọfa re a jẹ uzizie Jesu na rehọ re a jọ ilele riẹ. Enẹ ma re ro fi obọ họ kẹ ai re a zọ. (Se 2 Timoti 4:1-5.) Oriruo ọfa họ ẹruorote gbe erufuọ Ọgwa Uvie. Onana u kugbe erara nọ a rẹ whẹ kufiẹ, otọ Ọgwa Uvie na nọ a re hwere jẹ wozẹ, gbe erufuọ eria nọ a re jo ne—enana kpobi yọ iruo nọ a rẹ sai riwi kuẹku! Ghele na, ma rẹ riẹ vuhumu inọ ẹruorote Ọgwa Uvie mai, oria nọ ma rẹ jọ gọ Ọghẹnẹ uzẹme na evaọ okogho na, yọ abọjọ egagọ mai. Ma tẹ be romatotọ ru iruo itienana nọ a rẹ sai rri kuẹku na yọ ma bi dhesẹ omaurokpotọ, be rọ ere lele ithihi Kristi.
Wo Ọwhọ Wọhọ Jesu
12, 13. (a) Ẹvẹ Jesu o ro dhesẹ ọwhọ, kọ eme o wọ riẹ ru onana? (b) Eme o rẹ w’omai rọ ọwhọ ta usiuwoma na?
12 Joma t’ẹme kpahe ọwhọ Jesu evaọ odibọgba na. Jesu o ru eware buobu okenọ ọ jọ otọakpọ. Evaọ emuhọ uzuazọ riẹ o wọhọ nọ o lele Josẹf ọzae oni riẹ ru iruo ọwena. Evaọ etoke odibọgba riẹ, Jesu o ru iruo igbunu, o siwi enọ e jẹ mọ jẹ kpare enọ i whu. Rekọ iruo nọ ọ mae roma kẹ họ ewhowho emamọ usi na gbe ewuhrẹ enọ e gwọlọ gaviezọ. (Mat. 4:23) Ma bi ru iruo evona nẹnẹ fikinọ ilele riẹ ma rrọ. Kọ ẹvẹ ma sai ro lele oriruo riẹ? Ma rẹ sai wo oghẹrẹ eriwo nọ Jesu o wo.
13 Uyoyou nọ Jesu o wo kẹ Ọghẹnẹ họ oware nọ o jẹ mae wọe ta usiuwoma je wuhrẹ ahwo. Rekọ Jesu o te je you ẹme Ọghẹnẹ nọ o je wuhrẹ ahwo na. Jesu o rri eme nọ o je wuhrẹ ahwo na ghaghae, yọ o je muọwhọ riẹ re o wuhrẹ amọfa eware nana. Mai enọ i bi wuhrẹ ahwo, ma re wo ọkpọ eriwo otiọye na re. Dai roro kpahe eme uzẹme jọ nọ ma jọ Ebaibol na wuhrẹ no! Ma riẹ kpahe avro esuo ehrugbakpọ na gbe epanọ a ti ro ku ei họ. Ma riẹ oware nọ Ikereakere na e ta kpahe oghẹrẹ nọ enọ i whu no a rrọ, gbe eghale nọ ma ti wo evaọ akpọ ọkpokpọ na. O tẹ make rọnọ kẹlena ma wuhrẹ eme uzẹme nana hayo ma riẹ rai kri no, e gbẹ rrọ ghaghae. (Se Matiu 13:52.) Ma tẹ be rọ ọwhọ ta usiuwoma na no eva ze, yọ ma bi dhesẹ kẹ amọfa inọ ma you eware nọ Jihova o wuhrẹ omai na.
14. Ẹvẹ ma sae rọ raro kele oghẹrẹ nọ Jesu o ro wuhrẹ ahwo?
14 Je muẹrohọ oghẹrẹ nọ Jesu o je ro wuhrẹ. No oke ruọ oke ọ jẹ hae si iroro enọ e jẹ gaviezọ kẹe kpohọ Ikereakere na. Ẹsibuobu, re o te ti mu ẹme nọ o wuzou họ, ọ rẹ ta nọ: “A kere nọ.” (Mat. 4:4; 21:13) Evaọ abọ Hibru ọrọ Ikereakere na, ebe nọ Jesu ọ t’ẹme fodẹ hayo rehọ ẹme no ze ovavo i bu vi abọvo ebe nọ e riẹ kpobi. Wọhọ Jesu, ma rẹ rehọ Ebaibol na wuhrẹ ahwo ẹsikpobi nọ ma tẹ rrọ usiuwoma jẹ daoma rehọ ẹme noi ze evaọ oke kpobi nọ uvẹ u rovie. Enẹ ma re ro fi obọ họ kẹ ahwo nọ a wo evezi re ae ọvo a ruẹ inọ ẹme Ọghẹnẹ ma bi wuhrẹ ahwo orọnikọ orọ obọ mai hi. O rẹ were omai eva gaga nọ ma tẹ ruẹ ohwo nọ ọ rọwo inọ o re se Ebaibol na je lele omai roro kpahe otofa gbe aghare Ẹme Ọghẹnẹ. Yọ ma rẹ ghọghọ gaga nọ ahwo otiọye na a tẹ jẹ uzizie na rehọ, re a zihe ruọ ilele Jesu.
Re Ma Lele Jesu O Gwọlọ nọ Ma re You Amọfa
15. Eme họ okwakwa Jesu nọ o mae viodẹ, kọ ẹvẹ o rẹ sai kpomahọ omai nọ ma te bi roro tei?
15 Abọ urere ọrọ oghẹrẹ ohwo nọ Jesu ọ rrọ nọ ma be te t’ẹme te na o rẹ kẹ omosasọ gaga, oyehọ uyoyou nọ o wo kẹ ahwo-akpọ. Pọl ukọ na o kere nọ: “Uyoyou Kristi oye o rọ omai esuo.” (2 Kọr. 5:14) Nọ ma te roro te uyoyou nọ Jesu o wo kẹ ahwo-akpọ kpobi t’omai omomọvo, u re duobọte udu mai, nọ ma jẹ raro kele oriruo riẹ.
16, 17. Idhere vẹ Jesu o ro dhesẹ uyoyou riẹ kẹ ahwo?
16 Ẹvẹ Jesu o ro dhesẹ uyoyou kẹ ahwo? Unevaze nọ o ro whu kẹ ahwo-akpọ họ edhere nọ o mae rro nọ o ro dhesẹ uyoyou riẹ k’omai. (Jọn 15:13) Rekọ evaọ etoke odibọgba riẹ, Jesu o dhesẹ uyoyou evaọ idhere efa re. Wọhọ oriruo, o jẹ hae dae gaga nọ ọ tẹ ruẹ ahwo nọ e be ruẹ-uye. Nọ ọ ruẹ Meri avọ enọ e jọ kugbe ei nọ a bi weri Lazarọs nọ o whu, o kẹ Jesu uye gaga. Dede nọ ọ riẹ nọ ọ be te kpare Lazarọs tha, Jesu ‘ọ viẹ’ fiki epanọ uwhu na o da riẹ te.—Jọn 11:32-35.
17 Evaọ emuhọ odibọgba Jesu, ọmoti jọ ọ nyabru ei ze inọ: “O tẹ ruọ owhẹ, whọ rẹ sai ru ọmẹ fua.” Kọ eme Jesu o ru? Ikuigbe na e ta nọ: “Ohrọ riẹ o [tẹ] riẹe.” O te ru okpoware jọ. Nọ ọ riẹ obọ riẹ tei, “ọ tẹ ta kẹe nọ, ‘o ruọ omẹ, a ru owhẹ fo.’ Oti na ọ tẹ nwane kpo noi, oma riẹ o tẹ fo.” Evaọ oke Mosis, emoti yọ ahwo nọ a fo ho, yọ Jesu ọ hẹ sai siwi ọzae nana ababọ obọ nọ o re ro tei. Ghele na, nọ Jesu o siwi ọmoti na, ọ r’obọ tei keme o wọhọ nnọ u kri gaga no nọ omọfa ọ r’oma tei. Ohrọ nọ Jesu o dhesẹ na o rro kẹhẹ!—Mak 1:40-42.
18. Ẹvẹ ma sai ro dhesẹ ọdawẹ?
18 O gwọlọ nnọ mai ilele Jesu ma re wo ọdawẹ kẹ amọfa. (1 Pita 3:8) O rẹ sae jọ bẹbẹ re ma riẹ epanọ o rrọ ibe Oleleikristi jọ oma, ọnọ ọ be mọ okpẹyao hayo nọ ọ rrọ ọkora maero otẹrọnọ ma re ruẹ edada itieye na ẹdọvo ho. Ghele na, Jesu ọ re ohrọ enọ e jẹ mọ dede nọ ọyomariẹ ọ mọ ẹdọvo ho. Ẹvẹ ma sai ro wo ọdawẹ otiọye na? Ẹkwoma ezọ nọ ma rẹ gaviẹ okenọ ọnọ o wo ẹbẹbẹ o te bi gbiku uye riẹ k’omai. Ma sae nọ oma mai nọ, ‘O hae jọ nọ mẹ ẹbẹbẹ nana ọ roma, ẹvẹ mẹ hae jọ?’ Ma te wo ọdawẹ kẹ amọfa, kẹsiẹe ma te sae rọ “ta udu họ enọ udu u re bro awọ.” (1 Tẹs. 5:14) Onana u ve ti dhesẹ nọ ma bi lele Jesu.
19. Idhere vẹ oriruo Jesu u ro kpomahọ omai?
19 Eware nọ ma wuhrẹ no ẹmeunu gbe iruẹru Jesu Kristi ze i siuru kẹhẹ! Epanọ ma wuhrẹ kpahe iẹe te, ere ma te gwọlọ raro kele iei te, yọ ere ma ti fi obọ họ kẹ amọfa te re a raro kele iei. Fikiere, joma rọ oghọghọ lele Mesaya Ovie na no enẹna rite ebẹdẹ bẹdẹ!
Kọ Whọ Sae k’Iyo Enọ Nana Vevẹ?
• Ẹvẹ ma rẹ sai ro wareghẹ t’oma wọhọ Jesu?
• Idhere vẹ ma sai ro dhesẹ omaurokpotọ?
• Ẹvẹ ma sai ro wo ọwhọ evaọ odibọgba na?
• Idhere vẹ ma sae rọ raro kele Jesu evaọ uyoyou nọ ma re dhesẹ kẹ amọfa?
[Enọ Uwuhrẹ]
[Ẹkpẹti/Uwoho nọ e rrọ ẹwẹ-obe avọ 5]
OBE NỌ O RE FI OBỌ HỌ K’OMAI RARO KELE KRISTI
Evaọ okokohọ ubrotọ nọ a ru evaọ ukpe 2007, a siobọno obe nọ u wo ewẹ-ebe 192, onọ uzoẹme riẹ o ta nọ “Come Be My Follower.” A kere obe nana re u fi obọ họ kẹ Ileleikristi raro kele Jesu, maero kọ iruẹru riẹ gbe iruemu-aghae riẹ. Nọ a rehọ izoẹme ivẹ ọsosuọ na dhesẹ eware nọ e rrọ obe na no, abọ ọsosuọ obe na o ta kpẹkpẹe kpahe iruemu-aghae Jesu—omaurokpotọ riẹ, aruọwha, areghẹ, ẹmeoyo, gbe ithihakọ riẹ.
U te ti te abọ nọ e ta kpahe iruẹru Jesu wọhọ owuhrẹ gbe ọnọ ọ jẹ vuẹ ovuẹ usiuwoma Uvie na gbe idhere jọ nọ o ro dhesẹ uyoyou ulogbo riẹ. A jọ oma obe na soso ta kpahe eware nọ i re fi obọ họ kẹ Ileleikristi raro kele Jesu.
U mu omai ẹro inọ obe nana o te w’omai kpobi kiẹ oma mai riwi jẹ nọ oma mai inọ: ‘Kọ me bi gine lele Jesu? Ẹvẹ mẹ sae rọ raro kele iei vi epaọ anwẹdẹ?’ U ti je fi obọ họ kẹ ‘enọ i wo eva ezi kẹ uzuazọ ebẹdẹ bẹdẹ kpobi’ re a zihe ruọ ilele Jesu.—Iruẹru 13:48.
[Uwoho nọ o rrọ ẹwẹ-obe avọ 4]
Jesu ọ rọwo ziọ otọakpọ a te yẹi wọhọ ọmọboba. Eme oyena o gwọlọ mi ei?
[Uwoho nọ o rrọ ẹwẹ-obe avọ 6]
Eme o te w’omai rọ ọwhọ ta usiuwoma na?