Ẹdẹ Nọ Emọ Eklase Avọ 125 Ọrọ Isukulu Giliad A Ro Nwrotọ

A Tuduhọ Imishọnare Awọ Re A Jọ Wọhọ Jerimaya

“EKLASE nana ọrọ isukulu Giliad na o rẹ thẹro ho,” ere Geoffrey Jackson, nọ ọ rrọ omọvo Ugboma Esuo na, ọ ta. Ọ jẹ ta ẹme kẹ ahwo idu ezeza, ẹgba ọvo, ikpe isoi gbe ezeza (6,156) nọ i kokohọ evaọ okenọ eklase avọ 125 ọrọ Isukulu Ebaibol ọ Giliad ọrọ Watchtower a je nwrotọ evaọ September 13, 2008. A te ku ahwo 56 nọ i nwrotọ no eklase nana ba enọ i nwrotọ kpobi no, koyehọ enọ i nwrotọ no Isukulu Giliad nọ a vi wọhọ imishọnare kpohọ “ọnyaba akpọ na” no i bu vi idu eree (8,000).—Iruẹru 1:8.

Brọda Jackson, ohwo-agbara ọ ọruẹrẹfihotọ na, ọ tẹ nọ inọ, “Kọ oruọzewọ o te whẹ erru họ odibọgba ra?” Ọ tẹ fodẹ eware ene nọ i re ru ohwo họ oruọzewọ: ewo emamọ eriwo, ẹjọ emamọ oriruo, iwuhrẹ ohwo nọ ọ rẹ rehọ no Ebaibol ze, gbe oma nọ ọ rẹ dawo re ahwo a riẹ odẹ Jihova.

David Schafer, ọnọ o bi ru iruo kugbe Ogbẹgwae Ewuhrẹ, ọ tẹ ta kpahe uzoẹme na “Kọ Who ti Wo Otoriẹ Eware Kpobi?” Ọ tẹ tuduhọ enọ i bi nwrotọ na awọ inọ a rẹ sai “wo otoriẹ eware kpobi” nọ u re fi obọ họ kẹ ae jọ imishọnare otẹrọnọ a ruabọhọ be gwọlọ Jihova jẹ be rọ oma kpotọ kẹ ‘ọrigbo nọ o wo ẹrọwọ avọ areghẹ na.’—Itẹ 28:5; Mat. 24:45.

Kẹsena John E. Barr, omọvo Ugboma Esuo na, ọ tẹ ta ẹme kpahe uzoẹme na “Wha Jọ Oware Ovo O Hẹriẹ Owhai no Uyoyou Ọghẹnẹ Hẹ.” Uvi ohrẹ nọ Brọda Barr ọ kẹ o si ozọ no imishọnare na avọ esẹgbini rai ẹro kpahe eware nọ a te nya ku. Ọ ta nọ: “Uyoyou Ọghẹnẹ nọ ma rẹ jọ họ oria nọ ọ mai fo omai oma evaọ uzuazọ.” Uvumọ oware o rẹ sae si imishọnare na no uyoyou Ọghẹnẹ hẹ ajokpanọ a kiuke ku Ọghẹnẹ.

Sam Roberson ọnọ o bi ru iruo evaọ Ẹko-Iruo Isukulu Iruẹru Uvie Na ọ tẹ tuduhọ ogbotu na awọ inọ a “wha ẹgọ ọkpokpọ na họ oma.” Nọ a te wuhrẹ kpahe oware nọ Jesu o ru no je fi ai họ iruo, inievo nana a te sae “fi Ọnowo na Jesu Kristi họ oma.” (Rom 13:14) Kẹsena, William Samuelson, ọnọ ọ rrọ ọsẹro Ẹko-Iruo Isukulu Iruẹru Uvie Na, o te dhesẹ oware nọ u re ru ohwo wo ọghọ. Oware nọ u re ru ohwo wo ọghọ họ epanọ Ọghẹnẹ o bi rri ohwo orọnikọ epaọ eriwo ohwo-akpọ họ.

Michael Burnett, omọvo iwuhrẹ isukulu na, ọ tẹ kiẹ emọ-uwuhrẹ na riwi kpahe eware nọ a nyaku evaọ usiuwoma ota evaọ etoke isukulu na. Dede nọ a dhe ibuobu rai fihọ ẹkwotọ nọ a rẹ jọ ta usiuwoma ziezi no vẹre evaọ okenọ a jọ isukulu na eva Patterson, New York, a nyaku ahwo nọ i wo isiuru. Gerald Grizzle, ọnọ o bi ru iruo evaọ Ẹko-Iruo Okokohọ, ọ tẹ kiẹ inievo esa riwi enọ e rrọ Isukulu ọ Ahwo Ogbẹgwae Uwou-Ogha. Eme nọ a ta i fi obọ họ ruẹrẹ inievo nana họ kẹ eware nọ a te nyaku evaọ ẹkwotọ nọ a bi ti vi ai kpohọ.

 David Splane, ọnọ ọ rrọ omọvo Ugboma Esuo na, ọnọ o nwrotọ no eklase avọ 42, ọye ọ kẹ ovuẹ nọ uzoẹme riẹ o rrọ “Jọ Wọhọ Jerimaya.” Dede nọ ozọ u je mu Jerimaya kpahe uwou nọ a vi rie, Jihova ọ kẹ riẹ ẹgba. (Jeri. 1:7, 8) Ọghẹnẹ ọ te kẹ imishọnare ekpokpọ nana ẹgba re. Brọda Splane ọ ta nọ: “Who te bi wo ẹbẹbẹ kugbe ohwo jọ, keria re who kere eware ikpe nọ e jọ oma ohwo na were owhẹ. Yọ otẹrọnọ whọ gbẹ sai kere eware ikpe gba ha, koyehọ whọ riẹ ohwo na ziezi hi.”

Jerimaya o wo ẹzi omolahiẹ. Okenọ o je roro nọ ọ rẹ siọ iruo na ba, ọ tẹ lẹ, yọ Jihova ọ jọ kugbei. (Jeri. 20:11) Brọda Splane ọ ta nọ: “Iruo na e tẹ be b’owhẹ no, lẹ se Jihova. Oghẹrẹ nọ Jihova o ti ro fi obọ họ kẹ owhẹ o ti gb’owhẹ unu.”

Eva ekuhọ ọruẹrẹfihotọ na, ohwo-agbara na ọ tẹ kareghẹhọ ogbotu na inọ inievo nana a wuhrẹ eware buobu no nọ i re fi obọ họ kẹ ae jọ ahwo oruọzewọ. Nọ ahwo a tẹ ruẹ nnọ imishọnare na yọ ahwo oruọzewọ, ẹsiẹ a te gaviezọ kẹ ae.—Aiz. 43:8-12.

[Ẹkpẹti nọ ọ rrọ ẹwẹ-obe avọ 22]

AHWO NỌ A JỌ EKLASE NA

Unu erẹwho nọ a no ze: 6

Unu erẹwho nọ a vi rai kpohọ: 21

Unu ahwo nọ e jọ eklase na: 56

A tẹ ghale ikpe rai ẹrẹrẹe: 32.9

A tẹ ghale ikpe nọ a rọ rrọ ukoko na ẹrẹrẹe: 17.4

A tẹ ghale ikpe nọ a rọ rrọ ekobaro ẹrẹrẹe: 13

[Uwoho nọ o rrọ ẹwẹ-obe avọ 23]

Eklase avọ 125 ọrọ Isukulu Ebaibol ọ Giliad ọrọ Watchtower

A kele uhie ahwo na no obaro kpobọ emu, yọ a kere edẹ na no ẹkpẹlobọ kpohọ obọze evaọ uhie kpobi.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.