Jọ Eme ọ Jesu I Kpomahọ Uruemu ra
Jọ Eme ọ Jesu I Kpomahọ Uruemu ra
“Keme ọnọ Ọghẹnẹ o vi ọ [rẹ] ta ẹme Ọghẹnẹ, keme ọ rẹ wawọ ẹzi kẹ e he.”—JỌN 3:34.
1, 2. Fikieme ma jẹ sae ta nnọ Jesu ọ rehọ eme nọ ọ ta evaọ Ovuẹ obọ Ugbehru na no “ẹme Ọghẹnẹ” ze?
JESU o wuhrẹ eware buobu nọ e rẹ kẹ erere evaọ Ovuẹ obọ Ugbehru na. Onana u re gb’omai unu hu keme obọ Jihova eme nọ Kristi o wuhrẹ na i no ze! Ebaibol na e ta kpahe Jesu nọ: “Keme ọnọ Ọghẹnẹ o vi ọ rẹ ta ẹme Ọghẹnẹ.”—Jọn 3:34-36.
2 Dede nọ oke nọ Jesu ọ rọ ta eme nọ ọ ta evaọ Ovuẹ obọ Ugbehru na u te ubro auwa ha, ọ wariẹ eme no ebe eree erọ Ikereakere Hibru na ze asia 21. Fikiere “ẹme Ọghẹnẹ” ọ ginẹ rehọ eme riẹ no ze. Joma ruẹ epanọ ma rẹ sai ro fi obọdẹ iwuhrẹ erọ ovuẹ Ọmọ oyoyou Ọghẹnẹ na họ iruo.
‘Kake Ruẹrẹhọ Kugbe Omoni Ra’
3. Okenọ Jesu ọ vẹvẹ ilele riẹ unu no kpahe enwoma nọ i re no ẹgo tha, didi ohrẹ ọ kẹ?
3 Mai Ileleikristi ma be wereva jẹ rrọ dhedhẹ keme ma wo ẹzi ọfuafo Ọghẹnẹ, yọ ubi riẹ u kugbe oghọghọ gbe udhedhẹ. (Gal. 5:22, 23) Jesu ọ gwọlọ inọ ilele riẹ a re wo udhedhẹ gbe evawere ẹsikpobi, fikiere ọ tẹ vẹvẹ ai unu kpahe enwoma nọ ẹgo nọ a re fihọ eva o rẹ wha ze. (Se Matiu 5:21, 22.) Kẹsena ọ tẹ ta nọ: “Fikiere whọ tẹ be kẹ okẹ ra evaọ aruẹri, etẹe who je roro nọ whẹ avọ omoni ra wha wo ẹme, siọ okẹ ra ba obọ aruẹri na tao, nyavrẹ, kake ruẹrẹ omoni ra họ, kẹsena whọ tẹ nyatha te kẹ okẹ ra.”—Mat. 5:23, 24.
4, 5. (a) Eme họ “okẹ” nọ Jesu ọ ta ẹme te eva Matiu 5:23, 24 na? (b) Ẹvẹ o roja te re ma ruẹrẹhọ kugbe oniọvo nọ ma ruthọ?
4 “Okẹ” nọ Jesu ọ fodẹ na họ oware kpobi nọ a je ro dheidhe eva etẹmpol nọ o jọ Jerusalẹm. Wọhọ oriruo, idhe erao e jọ oja keme yọ edhere jọ nọ ahwo Jihova a jẹ rọ gọe evaọ oke yena. Rekọ Jesu ọ fodẹ oware jọ nọ o mai tube wuzou—ẹruẹrẹhọ kugbe oniọvo nọ who ruthọ re whọ tẹ te kẹ Ọghẹnẹ okẹ ra.
5 ‘Ruẹrẹhọ kugbe omoni ra’ u dhesẹ ‘oware nọ who re ru re wha ku ẹwhọ rai họ.’ Fikiere, eme ma re wuhrẹ no ẹme Jesu nana ze? O rrọ uzẹme inọ oghẹrẹ nọ ma bi yeri kugbe amọfa u re kpomahọ usu mai kugbe Jihova. (1 Jọn 4:20) Idhe nọ ohwo o dhe kẹ Ọghẹnẹ evaọ oke emọ Izrẹl i re fioka ha otẹrọnọ ohwo nọ o bi dheidhe na ọ be riẹ yeri kugbe amọfa ha.—Se Maeka 6:6-8.
Omaurokpotọ O Roja
6, 7. Fikieme o jẹ gwọlọ omaurokpotọ nọ ma tẹ gwọlọ ruẹrẹhọ kugbe oniọvo nọ ma ruthọ?
6 Re ma ruẹrẹhọ kugbe oniọvo nọ ma ruthọ o te dawo omaurokpotọ mai. Ahwo nọ a wo omaurokpotọ a re lele ibe eg’Ọghẹnẹ si ikẹ hẹ re a ruẹsi dhesẹ inọ ohwo ọdekọ na ọye o ruthọ. Oyena o rẹ wha ebẹbẹ ze, utiọ ebẹbẹ nọ e jọ udevie Ileleikristi evaọ Kọrint anwae. Fiki ebẹbẹ nọ e jọ ukoko yena, Pọl ukọ na o te kere nọ: “Re whai ohwo o te siobe kẹ ohwo, yọ orọ ekie rọ kẹ owhai. Keme wha gbẹ rọwo ruẹ uye oware nọ ukiẹrẹe he? Re wha gbẹsọ gbuye họ ae oma ha?”—1 Kọr. 6:7.
7 Orọnikọ re ma dhesẹ kẹ omoni mai inọ ọye o ruthọ gbe nnọ mai ma riẹ ru họ ẹjiroro nọ Jesu ọ rọ ta nnọ ma nya bru omoni mai hi. Ẹjiroro mai họ re ma ku ẹbẹbẹ na họ. Re ma ruẹsi kugbe, ma rẹ ta eva mai. U te je fo re ma ta kẹ ohwo ọdekọ na inọ ma riẹ nnọ eva e dha riẹ. Yọ otẹrọnọ mai ma ruthọ, u fo re ma rọ oma kpotọ wounu.
‘Ẹro Ọze Ra O te bi Ru Owhẹ Zoruẹ’
8. Rehọ umutho eme jọ ta kpahe eme ọ Jesu nọ a kere fihọ Matiu 5:29, 30 na.
8 Evaọ ovuẹ obọ ugbehru na, Jesu ọ kẹ uvi ohrẹ kpahe emamọ uruemu. Ọ riẹ inọ ugboma sebaẹgba mai o rẹ sai fi omai họ uye. Fikiere Jesu ọ tẹ ta nọ: “Ẹro ọze ra o [te] bi ru owhẹ zoruẹ, vre i no who ku ei fiẹ; keme u woma kẹ owhẹ kpere abọvo ra jọ o vru re a siọ oma ra ososo ba efihọ ẹri-erae. Obọ ọze ra u [te] bi ru owhẹ zoruẹ, bru ei no, who ku ei fiẹ: keme u woma kẹ owhẹ kpere abọvo ra jọ o vru, re oma ra ososo o siọ ẹri-erae ba ẹnya.”—Mat. 5:29, 30.
9. Ẹvẹ “ẹro” hayo “obọ” mai o sai ro ru omai “zoruẹ”?
9 “Ẹro” nọ Jesu ọ ta kpahe na o dikihẹ kẹ ẹgba ude-oruẹ nọ ma sai ro muẹrohọ hayo tẹrovi oware, yọ “obọ” u dikihẹ kẹ oware nọ ma be rọ abọ mai ru. Ma gbe rri otọ mu hu, abọ oma enana e rẹ sai ru omai “zoruẹ“ je ru omai siọ ‘Ọghẹnẹ ba elele nya.’ (Emu. 5:22; 6:9) Nọ ma tẹ rrọ otọ odawọ re ma ghẹmeeyo kẹ Jihova, ma rẹ jowọ ogaga, onọ o rẹ wọhọ ẹsenọ ma bi vre ẹro na hayo bru obọ na no.
10, 11. Eme ọ rẹ sai fi obọ họ kẹ omai whaha ọfariẹ-ogbe?
10 Ẹvẹ ma rẹ sai ro si ẹro no eware etọtọ? Job ọnọ o wo ozodhẹ Ọghẹnẹ na, ọ ta nọ: “Me duwu aro mẹ iyeri no, kẹvẹ ọmọtẹ o gbe ro si omẹ uru?” (Job 31:1) Job yọ ohwo nọ o wo aye, yọ ọ gba riẹ mu inọ ọ rẹ thọ uzi ẹnwae-obro ho. Ere u fo nnọ ma rẹ jọ makọ ma rọo no hayo ma re rọo ho. Re ma whaha ọfariẹ-ogbe, u fo inọ ẹzi ọfuafo Ọghẹnẹ ọ rẹ kpọ omai, onọ u re fi obọ họ kẹ enọ i you Ọghẹnẹ wo oma-oriẹsuo.—Gal. 5:22-25.
11 Re ma whaha ọfariẹ-ogbe, u re woma re ma nọ oma mai nọ, ‘Kọ me bi si ibiaro mẹ no eware nọ e rẹ sae lẹliẹ omẹ wo isiuru ọfariẹ-ogbe, enọ a re duku evaọ ebe hayo etehe-ughe gbe Itanẹte?’ Joma jẹ kareghẹhọ eme ọ Jemis olele na: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu, nọ umuomu o jẹ ro thẹtawa no o vẹ wha uwhu ze.” (Jem. 1:14, 15) Evaọ uzẹme, otẹrọnọ ohwo nọ ọ rehọ oma riẹ mudhe kẹ Ọghẹnẹ no ọ be hae rehọ iroro ọfariẹ-ogbe rri ọzae hayo aye “rite ẹguọlọ,” u fo re o nwene uruemu riẹ ababọ okioraha, wọhọ ẹsenọ o bi vre ẹro na no je gbolo iei kufiẹ.—Se Matiu 5:27, 28.
12. Ohrẹ Pọl vẹ u re fi obọ họ kẹ omai họre mukpahe isiuru ọfariẹ-ogbe?
12 Nọ o rọnọ ma tẹ rọ abọ mai ru iruo thọthọ o rẹ sae lẹliẹ omai raha izi nọ Jihova o jie kpahe ẹfuọ uruemu na, jọ o jọ ọtamuo mai inọ ma rẹ jọ fuafo evaọ uruemu. Fikiere, u fo re ma fi ohrẹ Pọl na họ iruo: “Wha kpe abọ akpọ nọ e ro oma rai no: igberedia, egbegbe, urusio nọ o rẹ vrẹ ẹta, eware iyoma eguọlọ, gbe eware amọfa eguọlọ, onọ orọ edhọ egọ.” (Kọl. 3:5) Ẹme na “kpe” u fiẹgba họ epanọ ma rẹ daoma te re ma họre wọso isiuru ọfariẹ-ogbe.
13, 14. Fikieme u je wuzou re ma whaha iroro gbe uruemu ọfariẹ-ogbe?
13 Ohwo ọ rẹ sae rọwo inọ a bru obọ hayo owọ riẹ no re uzuazọ riẹ o ruẹsi te odẹ. ‘Ekufiẹ’ ẹwoho orọ ibiaro gbe abọ na o roja re ma sae whaha iroro gbe uruemu ọfariẹ-ogbe onọ o rẹ sai ru omai nọ ma gbe wo aruoriwo Jihova ha. Ma tẹ be yọrọ ẹfuọ uruemu, ọrọ iroro, gbe ẹfuọ abọ-ẹzi ọvo ma sae rọ vabọ no ọraha ebẹdẹ bẹdẹ nọ a rehọ Gehena dhesẹ na.
14 Fikinọ ma reuku uzioraha gbe sebaẹgba, o gwọlọ omodawọ re ma sae yọrọ ẹfuọ uruemu. Pọl ọ ta nọ: “Mẹ rẹ nyẹ-oma mẹ, mẹ vẹ ta hiẹ obọ, ogbẹrọ ere he, mẹ nọ mẹ vuẹ amọfa no na mẹ vẹ te jọ ọnọ a rẹ sia.” (1 Kọr. 9:27) Fikiere joma gbaemu inọ ma re fi ohrẹ nọ Jesu ọ kẹ kpahe ẹfuọ uruemu na họ iruo, ma re ru oware ovo ho nọ u re dhesẹ inọ idhe ẹtanigbo riẹ na o d’omai ẹro ho.—Mat. 20:28; Hib. 6:4-6.
Hae kẹ Okẹ
15, 16. (a) Ẹvẹ Jesu o ro fi oriruo ọghoruo h’otọ k’omai? (b) Eme họ otofa eme ọ Jesu nọ e rrọ Luk 6:38 na?
15 Eme nọ Jesu ọ ta gbe uvi oriruo riẹ o rẹ lẹliẹ ahwo wo ẹzi ọghọruo. O ru ọghọ gaga nọ ọ rọ ziọ otọakpọ na ti whu kẹ omai ahwo-akpọ sebaẹgba. (Se 2 Ahwo Kọrint 8:9.) U no Jesu eva ze re o siobọno oruaro nọ o wo evaọ obọ odhiwu, zihe ruọ ohwo-akpọ je whu kẹ omai ahwo-akpọ uzioraha, enọ ejọ rai a ti wo efe evaọ obọ odhiwu wọhọ ibe ereuku riẹ evaọ Uvie na. (Rom 8:16, 17) Yọ Jesu ọ tuduhọ omai awọ re ma wo ẹzi ọghoruo nọ ọ ta nọ:
16 “Kẹ a rẹ te kẹ owhai; uwoma, nọ a nẹ a nuhu kugbe, u ve hwẹ, a re ti fihọ awọ rai. Keme o wawọ wha wawe a jẹ rẹ wawe kẹ owhai i re.” (Luk 6:38) Re a ku eware “fihọ awọ” yọ uruemu nọ ahwo jọ nọ a rẹ zẹ eware a rẹ rọ wawo eware fihọ ewu hayo ohọ ohwo nọ ọ be dẹ oware mi ai. Ma tẹ be rọ unevaze ru amọfa ọghọ o rẹ sae whae ze nọ a re ro ru epọvo na k’omai re, maero okenọ ma tẹ rrọ uye.—Ọtausi. 11:2.
17. Ẹvẹ Jihova ọ rọ rrọ obọdẹ oriruo ọrọ ọghoruo, kọ oghẹrẹ ẹzi vẹ ma rẹ rọ kẹ okẹ nọ o jẹ wha evawere se omai?
17 Jihova o re you ahwo nọ a rẹ kokẹ nevaze, ọ vẹ jẹ hwosa kẹ ai. O fi obọdẹ oriruo h’otọ k’omai nọ ọ rọ rehọ Ọmọ ọvo riẹ rọ kẹ re “kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Pọl o kere nọ: “[Ọnọ] ọ kọ buobu [ọye] ọ rẹ kọrọ buobu. Ohwo o re ru wọhọ epanọ o roro evaọ eva riẹ, o jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” (2 Kọr. 9:6, 7) Ma tẹ be rehọ oke mai, ẹgba mai, gbe eware nọ ma wo rọ wha egagọ uzẹme haro, ma ti wo oghọghọ gbe eghale buobu.—Se Itẹ 19:17; Luk 16:9.
“Who Kporo Ọgba Aro Ra Ha”
18. Ẹvẹ ma re ru nọ ma gbẹ rọ jọ obọ Ọsẹ obọ odhiwu mai “wo osaohwa” ha?
18 “Wha yọrọ oma eware ẹrẹreokie iruo aro ahwo re a ruẹ; o tẹ rọ ere wha re wo osaohwa rai obọ Ọsẹ rai nọ ọ rọ obọ odhiwu hu.” (Mat. 6:1) “Ẹrẹreokie” nọ Jesu ọ fodẹ na u dhesẹ uruemu nọ o rọwo kugbe oreva Ọghẹnẹ. Orọnikọ ọ be ta nnọ a rẹ jọ ẹgbede ru iruo Ọghẹnẹ ha ha, keme ọ ta kẹ ilele riẹ inọ a “ru re elo rai o lo iraro ahwo.” (Mat. 5:14-16) Rekọ ma te jọ obọ Ọsẹ obọ odhiwu mai “wo osaohwa” ha otẹrọnọ ma bi ru eware evaọ “aro ahwo” re a ruẹse jiri omai, wọhọ ahwo nọ a rẹ zaro evaọ ẹgbede re ahwo a rri rai. Ma te wo iroro itieye na, ma ti wo emamọ usu kugbe Ọghẹnẹ hẹ yọ ma ti wo eghale Uvie na gbe he.
19, 20. (a) Eme họ otofa eme ọ Jesu inọ ma “kporo ọgba” ha nọ ma te bi ru “ọghọ-ohrọ”? (b) Eme ma re ru nọ ẹkpẹlobọ mai ọ gbẹ riẹ oware nọ obọze o bi ru hu?
19 Ma te wo uruemu ezi, ma re lele ohrẹ Jesu: “Fikiere nọ who ti ru ọghọ-ohrọ ra, who kporo ọgba aro ra ha, wọhọ epanọ eviẹwẹ na i re ruẹ eva iwou-egagọ gbe eva izore re ahwo a jiri ai. Uzẹme mẹ ta kẹ owhai, a wo osaohwa rai no.” (Mat. 6:2) “Ọghọ-ohrọ” yọ okẹ nọ a jẹ hai ro fi obọ họ kẹ enọ ọbẹwẹ o jọ oma. (Se Aizaya 58:6, 7.) Jesu avọ ikọ na a wo ẹkpa-ugho nọ a jẹ hai ro fi obọ họ kẹ iyogbere. (Jọn 12:5-8; 13:29) Nọ orọnọ a jẹ hai gine kporo ọgba ha okenọ a te bi ru ọghọ na, Jesu o bru okpa họ ẹme na nọ ọ ta inọ ma re “kporo ọgba” ha nọ ma te bi ru “ọghọ-ohrọ.” Ma rẹ jọ ẹgbede whowho okẹ nọ ma be kẹ hẹ, wọhọ epanọ ahwo Farisi na a jẹ hai ru. Jesu o se rai eviẹwẹ keme a jẹ hai whowho ọghọ nọ a ru “eva iwou-egagọ gbe eva izore.” Otu eviẹwẹ na “a wo osaohwa rai no.” Osohwa nọ a ti wo kpobi họ ujiro ahwo gbe eria ikpehru nọ a je lele iwuhrẹ na keria evaọ obaro iwou-egagọ na, keme Jihova ọ te kẹ ai oware ovo ho. (Mat. 23:6) Rekọ didi uruemu ilele Jesu a re dhesẹ? Jesu ọ ta kẹ ai jegbe omai kpobi inọ:
20 “Rekọ nọ who ti ru ọghọ-ohrọ ra, who ru re ẹkpẹlobọ ra ọ riẹ onọ obọze ra u re ruo ho; re ọghọ-ohrọ ra ọ jọ didi; Ọsẹ ra nọ ọ rẹ ruẹ edidi ọ rẹte hwaosa kẹ owhẹ.” (Mat. 6:3, 4) Ẹsibuobu abava ma re ro ru eware. Fikiere, re ẹkpẹlobọ mai ọ siọ oware nọ obọze mai o bi ru ba ẹriẹ, u dhesẹ inọ ma re woro eware ezi nọ ma bi ru hu, makọ rọ kẹ enọ e kẹle omai wọhọ epanọ ẹkpẹlobọ mai o kẹle obọze mai na.
21. Didi osohwa ma te jọ obọ ọnọ “ọ rẹ ruẹ edidi” na wo?
21 Ma gbẹ rehọ ewoma nọ ma bi ru ro seha ha, “ọghọ-ohrọ” mai o rẹ te jọ evaọ edidi. Ọsẹ mai nọ ọ be “ruẹ edidi” ọ vẹ te hwosa k’omai. Fikinọ ma be rọ ẹro ruẹ Ọsẹ obọ odhiwu mai hi na, o rọ aro mai wọhọ ẹsenọ ọ be rria “edidi.” (Jọn 1:18) Osohwa nọ u re no obọ ọnọ “ọ rẹ ruẹ edidi” na ze u kugbe uvẹ nọ ma re ro wo emamọ usu kugbe Jihova, izieraha nọ ọ rẹ rọ vrẹ omai, gbe uzuazọ ebẹdẹ bẹdẹ nọ ọ te k’omai. (Itẹ 3:32; Jọn 17:3; Ẹf. 1:7) Enana kpobi i woma gaga vi ujiro ahwo nọ ma re wo!
Obọdẹ Iwuhrẹ nọ A re Rri Ghaghae
22, 23. Fikieme ma je rri iwuhrẹ Jesu ghaghae?
22 Jesu ọ jọ Ovuẹ obọ Ugbehru riẹ na wuhrẹ eware ezi buobu. Ọ ta eme ezi buobu nọ e rẹ k’omai evawere evaọ akpọ oyoma nana. Ẹhẹ, eva e te were omai otẹrọnọ ma rri iwuhrẹ Jesu na ghaghae je fi ai họ iruo evaọ uzuazọ mai.
23 Oghale u ti te ohwo kpobi nọ o “yo” je “ru” eware nọ Jesu o wuhrẹ. (Se Matiu 7:24, 25.) Fikiere joma gbaemu inọ ma re fi ehrẹ Jesu na họ iruo. Ma te t’ẹme kpahe eme efa nọ Jesu ọ ta evaọ Ovuẹ obọ Ugbehru na evaọ uzoẹme n’otha.
Didi Uyo Whọ Te Kẹ?
• Fikieme u je wuzou re whọ ruẹrẹhọ kugbe oniọvo nọ who ru thọ?
• Eme ma re ru re “ẹro ọze” mai o siọ omai ba eru zoruẹ?
• Oghẹrẹ vẹ ma re ro ru ọghọ?
[Enọ Uwuhrẹ]
[Uwoho nọ o rrọ ẹwẹ-obe avọ 11]
U woma gaga re whọ ‘ruẹrẹhọ kugbe’ ibe ọg’Ọghẹnẹ nọ who ru thọ!
[Uwoho nọ o rrọ ẹwẹ-obe avọ 13]
Jihova ọ rẹ ghale enọ i re ru ọghọ