Ẹvẹ Whọ Sai ro Thihakọ Evaọ Iruo Usiuwoma Ota Na?

KỌ OMA o lọhọ owhẹ no ẹdẹjọ te epanọ whọ rrọ ta nnọ whọ rẹ gbẹ ta usiuwoma ofa ha? Ọwọsuọ ọgaga, awaọruọ, ẹyao, otunyẹ ọhwa, hayo ahwo nọ a bi kurẹriẹ hẹ e rẹ sae wha elọhoma se omai. Rekọ roro kpahe oriruo Jesu. O thihakọ edawọ nọ e mae ga kpobi “fiki oghọghọ nọ a kẹ riẹ.” (Hib. 12:2) Ọ riẹ inọ o te dhesẹ nnọ ọrue koikoi oye Ẹdhọ o gu fihọ Ọghẹnẹ uzou, yọ o bi ru Jihova eva were.—Itẹ 27:11.

Wọhọ Jesu, whọ rẹ sai ru Jihova eva were otẹrọnọ whọ ruabọhọ odibọgba na avọ ithihakọ. Rekọ ẹvẹ otẹrọnọ who wo ebẹbẹ jọ nọ e be lẹliẹ iruo usiuwoma na bẹ owhẹ no? Enẹ Krystyna, oniọvo jọ nọ ọ kpako no nọ ẹyao ọ be lahiẹ ọ ta: “Ẹsibuobu oma o rẹ lọhọ omẹ, mẹ vẹ jẹ jọ ọkora. Ebẹbẹ owho jegbe awaọruọ epanọ eva e rẹ rọ vọ, e rẹ lẹliẹ ọwhọ mẹ kiekpo ẹsejọ.” Ẹvẹ whọ sae rọ ruabọhọ iruo odibọgba na ghelọ ebẹbẹ itieye na?

Raro Kele Eruẹaro Na

Re ma sai thihakọ evaọ iruo usiuwoma ota na, mai iwhowho Uvie kpobi ma rẹ daoma wo ọkpọ eriwo eruẹaro anwae na. Rehọ Jerimaya wọhọ oriruo. Okenọ Ọghẹnẹ ọ salọ iẹe re ọ jọ ọruẹaro, ọ jẹ kaki g’enu. Ghele na, Jerimaya o thihakọ evaọ iruo egaga yena vrẹ ikpe 40 keme o fi eva riẹ kpobi họ Ọghẹnẹ.—Jeri. 1:6; 20:7-11.

Oriruo Jerimaya o jọ uduotahawọ kẹ oniọvo nọ a re se Henryk. Ọ ta nọ: “O vrẹ ikpe 70 no nọ mẹ be rọ ta usiuwoma na, yọ ẹsejọ uruemu ahwo hayo ababọ isiuru rai o rẹ wha oyẹlẹ họ omẹ oma. Oke otiọye na mẹ rẹ kareghẹhọ oriruo Jerimaya. Uyoyou riẹ kẹ Jihova gbe epanọ o kru egagọ Ọghẹnẹ ga te i fi obọ họ kẹe ruabọhọ iruo aruọruẹ riẹ.” (Jeri. 1:17) Omọfa nọ oriruo Jerimaya o fi obọ họ kẹ họ Rafał. Ọ ta nọ: “Jerimaya ọ rẹroso Ọghẹnẹ ukpenọ o re roro kpahe omobọ riẹ. Dede nọ ahwo buobu a mukpahe iẹe, ọ r’udu dhe iruo na. Mẹ rẹ gwọlọ kareghẹhọ oyena ẹsikpobi.”

Aizaya yọ ọruẹaro ọfa ọnọ oriruo riẹ u fi obọ họ kẹ ahwo buobu thihakọ no evaọ odibọgba na. Ọghẹnẹ ọ ta kẹe inọ ahwo orẹwho riẹ a te kezọ kẹe he. Jihova ọ ta nọ: “Ru eva ahwo nana gaga, re ezọ rai i wo otu.” Kọ onana u dhesẹ inọ Aizaya ọ te sai ru iruo na ha? Ọghẹnẹ o roro ere he! Okenọ Ọghẹnẹ ọ rehọ iẹe mu ọruẹaro, Aizaya ọ ta nọ: “Mẹ na! Vi omẹ.” (Aiz. 6:8-10) Aizaya ọ dadamu iruo na. Kọ ere whọ rehọ iruo usiuwoma ota nọ a kẹ omai na?

Re ma sae thihakọ ru iruo odibọgba na evaọ udevie enọ e rẹ gaviezọ họ, wọhọ epanọ Aizaya o ru na, ma rẹ kpairoro vrẹ ababọ isiuru nọ ahwo a bi dhesẹ. Enẹ Rafał ọ ta kpahe epanọ o bi ro fi elọhoma kparobọ: “Mẹ rẹ daoma kpairoro vrẹ ikpehre eme nọ ahwo a rẹ ta. U te je ahwo nọ a rrọ ẹkwotọ mẹ a rẹ sae salọ sọ a rẹ gaviezọ hayo a rẹ gaviezọ họ.” Anna ọ ta nọ: “Mẹ rẹ daoma gaga re mẹ siọ eware nọ i re whrehe udu mẹ ba eroro kpahe. Oware nọ u bi fi obọ họ kẹ omẹ ru onana họ olẹ gbe isase ekere okpẹdẹ taure me te ti kpohọ usiuwoma ota. Mẹ tẹ nwani ru enẹ no, iroro ethọthọ kpobi e vẹ rayẹ no.”

Izikiẹl ọ ruẹaro evaọ udevie ahwo Ju nọ e  jẹ daezọ ẹme Ọghẹnẹ hẹ enọ e jọ igbo evaọ Babilọn. (Izik. 2:6) Ọruẹaro na ọ gbẹ hae ta ẹme Ọghẹnẹ kẹ ahwo na ha, ohwo omuomu jọ o je whu ababọ unuovẹvẹ nọ o yo, azẹ riẹ ọ hae te jọ Izikiẹl uzou. Jihova ọ ta kẹ Izikiẹl nọ: “Eva obọ ra mẹ jẹ te nekpẹ azẹ riẹ.” (Izik. 3:17, 18)

Henryk ọ daoma re o wo ọkpọ eriwo nọ Izikiẹl o wo: “Mẹ gwọlọ nọ azẹ ahwo kpobi o no omẹ uzou. Uzuazọ ahwo-akpọ o rrọ ọza.” (Iruẹru 20:26, 27) Zbigniew o wo iroro ọvona, ọ ta nọ: “Izikiẹl ọ ruabọhọ aruọruẹ riẹ ghele oghẹrẹ kpobi nọ ahwo a rri rie. Onana u fi obọ họ kẹ omẹ rehọ iruo usiuwoma ota na wọhọ epanọ Ọmemama na ọ rehọ e riẹ.”

Whẹ Ọvo Whọ Rrọ Usu Hu

Okenọ whọ tẹ rrọ usiuwoma, whẹ ọvo whọ rrọ usu hu. Wọhọ Pọl ukọ na ma rẹ sae ta nọ: “Mai otu nọ i bi ru iruo kẹ Ọghẹnẹ.” (1 Kọr. 3:9) Krystyna, ọnọ ọ ta nọ ẹsejọ ọ rẹ jọ ọkora, ọ ta nọ: “Oyejabọ mẹ jẹ be hae lẹ se Jihova re ọ kẹ omẹ ẹgba. Yọ ọ be hai yo olẹ mẹ ẹsikpobi.” Ẹhẹ, ma gwọlọ ẹzi Ọghẹnẹ re o fi obọ họ k’omai evaọ odibọgba mai!—Zek. 4:6.

Okenọ ma tẹ be ta usiuwoma, ẹzi ọfuafo na o re je fi obọ họ k’omai dhesẹ iruemu-aghae erọ “ubi Ẹzi” na. (Gal. 5:22, 23) Onana o re fi obọ họ k’omai thihakọ evaọ iruo usiuwoma ota na makọ oghẹrẹ nọ o rẹ ga te kẹhẹ. Henryk o muẹrohọ nọ: “Usiuwoma ota na o be whae ze nọ uruemu mẹ u bi ro dhe ewewoma. Me wuhrẹ epanọ a re thihakọ, je dhesẹ ororokẹ.” Who te bi thihakọ evaọ odibọgba na ghelọ oghoghẹrẹ ebẹbẹ o rẹ sai fi obọ họ kẹ owhẹ wo ubi ẹzi na doma fia.

Jihova ọ be rehọ ikọ-odhiwu kpọ uvi iruo nana. (Evia. 14:6) Ebaibol na e ta kpahe iko-odhiwu yena inọ “unu rai ubu thọ-esiwa nọ a sai kele he.” (Evia. 5:11) Evaọ otọ ọkpọvio Jesu, ikọ-odhiwu na i bi fi obọ họ kẹ idibo Ọghẹnẹ evaọ otọakpọ. Kọ whọ be kareghẹhọ onana nọ whọ tẹ rrọ usiuwoma ota?

Anna ọ ta nọ: “Mẹ tẹ be kareghẹhọ inọ ikọ-odhiwu a rrọ kugbe omai evaọ iruo usiuwoma na o rẹ kẹ omẹ uduotahawọ. Me rri obufihọ nọ a be k’omai evaọ otọ ẹruọsa Jihova avọ Jesu ghaghae.” Uvẹ-ọghọ riẹ o rro kẹhẹ nọ ma bi ru iruo kugbe ikọ-odhiwu na!

Kọ ẹvẹ kpahe ibe iwhowho-uvie mai? Ma wo ogbotu buobu erọ Isẹri nọ e wariẹ omai họ. Ababọ avro whọ ruẹ orugba ẹme Ebaibol nana no inọ: “Utehru a rọ thọ utehru da, ohwo o ve ru ohwo woma.”—Itẹ 27:17.

Nọ ma tẹ rọ kugbe amọfa evaọ odibọgba na o rẹ lẹliẹ omai muẹrohọ obọdẹ ona sa-sa nọ a be rọ ta usiuwoma. Elżbieta ọ ta nọ: “Iwhowho-uvie sa-sa nọ me bi lele jọ usu evaọ usiuwoma na u bi rovie uvẹ kẹ omẹ nọ me bi ro dhesẹ uyoyou kẹ inievo na gbe ahwo nọ ma nyaku.” Daoma hai kuomagbe inievo sa-sa kpohọ usiuwoma ota. O te lẹliẹ owhẹ wo evawere evaọ usiuwoma ota ra.

Rẹrote Oma Ra Ziezi

Re oma o ruẹse jọ omai sasasa ẹsikpobi evaọ odibọgba na, ma rẹ ruẹrẹ oma kpahe ziezi, ru uwuhrẹ omobọ-ohwo, jẹ hai serihọ ziezi. Koyehọ ma rẹ rẹrote oma mai ziezi evaọ abọ-ẹzi gbe abọ-iwo.

Ebaibol e ta nọ: “Oma omamọ ohwo o rẹ rehọ ọruẹriọ tha.” (Itẹ 21:5) Zygmunt, ọnọ ọ kpako te ikpe 88 no ọ ta nọ: “Emamọ omaa nọ me wo kẹ usiuwoma ota na u bi fi obọ họ kẹ omẹ nyate itee jọ nọ me fihọ. Mẹ ruẹrẹ oke mẹ họ ziezi re mẹ sai wo oke nọ me re ro kpohọ usiuwoma.”

Otoriẹ Ikereakere na nọ ma re wo ziezi o rẹ bọ omai ga je fi obọ họ k’omai evaọ odibọgba na. Wọhọ epanọ o gwọlọ nọ ma rẹ re emu ziezi re ma sai kru oma ga na, ere o gwọlọ nọ ma rẹ re emu abọ-ẹzi ẹsikpobi re ma sae ruabọhọ usiuwoma ota. Ẹme Ọghẹnẹ nọ ma rẹ rọ ko oma mai kẹdẹ kẹdẹ nọ “oke u te” o rẹ k’omai ẹgba nọ ma rẹ rọ ta usiuwoma na.—Mat. 24:45-47.

Elżbieta o ru inwene ilogbo evaọ uzuazọ riẹ re o gbe wo ẹnyaharo evaọ odibọgba na.  Ọ ta nọ: “Me bru oke nọ mẹ jẹ hae raha ro rri etehe-ughe kpẹre re mẹ ruẹsi wo oke ziezi nọ mẹ rẹ rọ ruẹrẹ oma kpahe kẹ iruo odibọgba na. Me te bi se Ebaibol na k’owọwọ k’owọwọ, me re roro kpahe ahwo nọ mẹ nyaku evaọ ẹkwotọ mai. Mẹ rẹ gwọlọ eria Ebaibol gbe izoeme nọ e rẹ sai fi obọ họ kẹ ae.”

Who te bi serihọ ziezi, who ti wo ẹgba nọ whọ rẹ rọ ruabọhọ iruo odibọgba na. Evaọ abọdekọ riẹ, whọ tẹ be raha oke ga hrọ kẹ aruọzaha o rẹ sai kpomahọ iruo odibọgba ra yoyoma. Andrzej, owhowho-uvie ajọwha jọ o muẹrohọ nọ: “Oma o rẹ rọ ohwo otẹrọnọ o gbe bi serihọ họ, yọ onana o rẹ whae ze nọ ohwo ọ jẹ rọ ẹmẹrera whrehe. Mẹ rẹ daoma gaga re mẹ whaha onana.”—Ọtausi. 4:6.

Epanọ ma daoma te ghele na umutho ahwo jọ ọvo a be jẹ usiuwoma na rehọ. Rekọ iruo mai e rẹ thọrọ Jihova ẹro ho. (Hib. 6:10) O tẹ make rọnọ ahwo buobu a rẹ gwọlọ gaviezọ kẹ omai hi, a rẹ ta ẹme mai nọ ma tẹ nyase ae ba no. O sae jọ wọhọ epanọ ma se kpahe Izikiẹl inọ: Ahwo “a rẹ te riẹ nọ ọruaro jọ ọ [jọ] udevie rai.” (Izik. 2:5) Evaọ uzẹme, iruo odibọgba na o lọhọ họ, rekọ t’omai te ahwo nọ a gaviezọ k’omai a re wo irere buobu noi ze.

Zygmunt o muẹrohọ nọ: “Odibọgba na nọ ma re jo w’obọ u re fi obọ họ k’omai wo uruemu okpokpọ na jẹ lẹliẹ omai you Ọghẹnẹ gbe erivẹ mai.” Andrzej, o fibae nọ “ọghọ ologbo o rrọ re ma w’obọ evaọ iruo usiwo nana. A te gbẹ wariẹ iruo na oghẹrẹ utiona hayo evaọ uyero utiona ha.” Who te bi thihakọ evaọ odibọgba na nẹnẹ who ti wo eghale buobu re.—2 Kọr. 4:1, 2.

[Uwoho nọ o rrọ ẹwẹ-obe avọ 31]

Ma tẹ be re eva vọ evaọ abọ-ẹzi jẹ be rẹrote oma mai ziezi u re fi obọ họ k’omai thihakọ evaọ odibọgba na