Ẹgbakiete Ra O Rẹ Wha Evawere Se Jihova
Ẹgbakiete Ra O Rẹ Wha Evawere Se Jihova
“Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.”—ITẸ 27:11.
1, 2. (a) Eme obe Job o dhesẹ inọ Setan ọ vravro kpahe? (b) Eme u dhesẹ inọ Setan ọ gbẹ be poviẹ Jihova nẹnẹ?
JIHOVA ọ kẹ Setan uvẹ re ọ dawo ẹgbakiete Job, odibo omaurokpotọ riẹ. Fiki odawọ na, erao Job i whu, emọ riẹ i whu, ẹyao o te je kiei. Rekọ okenọ Setan ọ jẹ vravro kpahe ẹgbakiete Job, orọnikọ Job ọvo o wo họ iroro ho. Setan ọ ta nọ: “Ohọroma [avọ] ohọroma! Eware kpobi nọ ohwo o wo o re ro nwene uzuazọ riẹ.” Orọnikọ Job ọvo ẹme avro nana o kpomahọ họ rekọ te omai kpobi.—Job 2:4.
2 Nọ edawọ Job e ruọ emu no, oware wọhọ ikpe egba ezeza (600) nọ i lele i rie, Solomọn o te kere nọ: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” (Itẹ 27:11) O rrọ vevẹ inọ evaọ oke yena yọ Setan ọ gbẹ jẹ wọso Jihova. Ofariẹ, Jọn ukọ na ọ jọ eruẹaruẹ nọ a kẹ riẹ ruẹ Setan nọ o bi gu idibo Ọghẹnẹ anwẹnọ a ro lei no obọ odhiwu no, okenọ a rehọ Uvie Ọghẹnẹ mu no evaọ 1914. Ẹhẹ, makọ evaọ inẹnẹ, nọ ma kẹle ekuhọ uyerakpọ muomu nana no na, Setan ọ gbẹ be vro ẹgbakiete idibo Ọghẹnẹ!—Evia. 12:10.
3. Eware vẹ nọ i wuzou ma rẹ sai wuhrẹ no obe Job ze?
3 Roro kpahe eware esa nọ i wuzou nọ ma rẹ sai wuhrẹ no obe Job ze. Orọ ọsosuọ, edawọ Job i ru nọ ma rọ riẹ ohwo nọ ọ ginẹ rrọ ọwegrẹ ahwo-akpọ gbe oria nọ uye nọ u bi te idibo Ọghẹnẹ oma nẹnẹ u bi no ze. Ọwegrẹ yena họ Setan Ẹdhọ. Orọ avivẹ, makọ oghẹrẹ edawọ nọ i re te omai kẹhẹ, usu okpekpe nọ ma re wo kugbe Ọghẹnẹ u re fi obọ họ kẹ omai kru ẹgbakiete mai. Orọ avesa, nọ edawọ i te t’omai, Ọghẹnẹ o re fi obọ họ kẹ omai wọhọ epanọ o ru kẹ Job na. Nẹnẹ, Jihova be rọ ẹkwoma Ebaibol na, ukoko riẹ, gbe ẹzi ọfuafo riẹ fi obọ họ kẹ omai.
Hae Kareghẹhọ Uzedhe Ọwegrẹ Na
4. Ono ọ be wha ebẹbẹ akpọ na ze?
4 Ahwo buobu a rọwo ho inọ Setan ọ rrọ. Fikiere, dede nọ eware nọ e rrọ akpọ via e be kẹ ae uye, a riẹ hẹ inọ Setan Ẹdhọ ọ be whae ze. O ginẹ rrọ uzẹme inọ ahwo-akpọ ọvo a be wha ebẹbẹ buobu ze. Ọsẹgboni ọsosuọ mai, Adamu avọ Ivi, a keke aro fihọ wọso Ọnọ ọ ma rai. No anwọ oke yena ze, uruemu uyoma ọvo ahwo-akpọ a bi dhesẹ. O make rrọ ere na, Ẹdhọ họ ọnọ ọ viẹ Ivi họ re ọ ghẹmeeyo kẹ Ọghẹnẹ. Ọye họ ọnọ o bi su akpọ na galuzou vi na. Fikinọ Setan họ “ọghẹnẹ akpọ nana,” ahwo-akpọ a bi dhesẹ ọkpọ uruemu riẹ—omovia, oma-uhrowo, ihri-eriọ, uvo-uthei, eviẹhọ, gbe ọkparesuọ. (2 Kọr. 4:4; 1 Tim. 2:14; 3:6; se Jemis 3:14, 15.) Iruemu itieye na e wha ozighi isuẹsu gbe erọ egagọ ze no, omukpahọ, ofruriọ, gbe ozighi, eware nọ e be lẹliẹ akpọ bẹ ahwo nẹnẹ.
5. Eme u fo nnọ ma rẹ rehọ eriariẹ eghaghae nọ ma wo na ru?
5 Eriariẹ nọ mai idibo Jihova ma wo a rẹ ruẹ obọ rai hi! Ẹhẹ, ma riẹ ohwo nọ ọ be wha ebẹbẹ akpọ na ze. Kọ oma o gbẹ be wọ omai re ma vuẹ amọfa kpahe ohwo ugbarugba nana? Kọ eva e gbẹ were omai re ma se isẹi kẹ Ọghẹnẹ uzẹme na, Jihova, jẹ ta kẹ amọfa epanọ o ti ro kpe Setan no je si ebẹbẹ ahwo-akpọ no?
6, 7. (a) Ono ọ rrọ emu ukpokpoma nọ u bi te eg’Ọghẹnẹ uzẹme? (b) Ẹvẹ ma sae rọ raro kele Elaihu?
6 Setan họ ọnọ ọ be wha ebẹbẹ buobu nọ e rrọ akpọ na ze gbe ukpokpoma nọ u bi te idibo Ọghẹnẹ. Ọ gba riẹ mu nnọ ọ rẹ dawo omai. Jesu Kristi ọ ta kẹ Pita ukọ na nọ: “Saimọn, Saimọn, ri, Setan ọ yare re ọ rehọ [owhai], re o voro [owhai] wọhọ eka.” (Luk 22:31) Epọvo na re, mai enọ i bi lele ithihi Jesu ma te nyaku edawọ jọ. Pita ọ rehọ Ẹdhọ dhesẹ ‘okpohrokpo nọ o bi do enu, be gwọlọ ọjọ nọ ọ rẹ ria.’ Yọ Pọl ọ ta nnọ: “Ahwo kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.”—1 Pita 5:8; 2 Tim. 3:12.
7 Ẹvẹ ma sai ro dhesẹ nọ ma be kareghẹhọ uzedhe ọwegrẹ na nọ oware uyoma o tẹ via kẹ ibe ọg’Ọghẹnẹ? Ukpenọ ma re si oma no oniọvo na, ma re ru wọhọ Elaihu, ọnọ ọ ta ẹme kẹ Job wọhọ uvi ogbẹnyusu. Ma re kuomagbe oniọvo mai họre Setan ọwegrẹ mai na. (Itẹ 3:27; 1 Tẹs. 5:25) Utee mai họ, ma re fi obọ họ kẹ ibe ọg’Ọghẹnẹ mai kru ẹgbakiete riẹ ghelọ odawọ kpobi nọ u re tei kẹhẹ, ma vẹ rrọ ere ru Jihova eva were.
8. Fikieme Setan ọ gbẹ sai ro ru re Job ọ siọ Jihova ba ẹgọ họ?
8 Oware ọsosuọ nọ Setan ọ raha ku Job họ erao riẹ. Ẹsejọhọ erao na o je ro yeri akpọ. U te no ere no, Job ọ jẹ hae rehọ ae dheidhe kẹ Ọghẹnẹ. Nọ Job o te voro emọ riẹ oma no, “irioke frifri ọ vẹ kparoma dhidhe-emahọ rọ kẹ [emọ riẹ] epanọ a bu te; keme Job ọ ta nọ, ‘Otiẹsejọ emọ mẹ e thọ uzi, jẹ la Ọghẹnẹ eka evaọ eva rai.’ Kọ enẹ Job o je he ruẹ ẹsikpobi.” (Job 1:4, 5) Nọ edawọ riẹ i muhọ no, o gbe wo erao nọ o re ro dheidhe he. Job o wo “eyero” nọ ọ rẹ rọ kẹ Jihova adhẹẹ hẹ. (Itẹ 3:9) Rekọ ọ sae rọ unu riẹ kẹ Jihova adhẹẹ, yọ ere o gine ru.
Wo Usu Okpekpe Kugbe Jihova
9. Eme o mae ghare omai obọ?
9 Ma tẹ make rrọ edafe hayo iyogbere, emaha hayo ekpako, enọ i wo omakpokpọ hayo be mọ, ma rẹ sai wo usu okpekpe kugbe Jihova. Makọ edawọ nọ i re t’omai kẹhẹ, usu okpekpe nọ ma re wo kugbe Ọghẹnẹ u re fi obọ họ kẹ omai kru ẹgbakiete mai je ru Jihova eva were. Makọ otujọ nọ i wo eriariẹ uzẹme na tere he a dikihẹ whawha je kru ẹgbakiete rai no.
10, 11. (a) Eme oniọvo-ọmọtẹ mai jọ o ru evaọ otọ edawọ? (b) Eme oniọvo-ọmọtẹ nana o dhesẹ Setan fihọ?
10 Rehọ oriruo oniọvo-ọmọtẹ jọ nọ odẹ riẹ o rrọ Valentina Garnovskaya, omọvo inievo mai nọ i kru ẹgbakiete rai ghelọ edawọ gaga wọhọ Job evaọ obọ Russia. Evaọ 1945, nọ ọ jọ oware wọhọ ikpe 20, oniọvo-ọmọzae jọ ọ ta usiuwoma kẹe. Oniọvo-ọmọzae na o zihe bru ei isiava re ọ ta kpahe Ebaibol na, rekọ ọ gbẹ ruẹ oniọvo na viere he. O make rrọ ere na, Valentina o te mu usiuwoma họ ẹta kẹ erivẹ riẹ. Fiki onana, a te mu ei a te fi ei họ uwou-odi ikpe eree. Evaọ 1953, a te siobọnoi, ọ tẹ wariẹ mu usiuwoma họ ẹta. A tẹ wariẹ mu ei je fi ei họ uwou-odi ikpe ikpe. Nọ ọ rria uwou-odi na te ikpe buobu no, a tẹ wọe kpohọ uwou-odi ọfa. Evaọ uwou-odi yena, ọ ruẹ inievo-emetẹ jọ nọ i wo Ebaibol. Ẹdẹjọ oniọvo-ọmọtẹ jọ o te dhesẹ Ebaibol na kẹ Valentina. Eva e were riẹ gaga! U te no Ebaibol nana no, Ebaibol ọfa nọ Valentina ọ ruẹ no họ onọ oniọvo-ọmọzae na ọ rọ ta usiuwoma kẹe evaọ 1945!
11 Evaọ 1967, nọ a siobọno Valentina no, ọ tẹ te họ-ame. Avọ ọwhọ, ọ tẹ rehọ uvẹ nana ta usiuwoma ri bọwo 1969. Rekọ evaọ ukpe yena, a tẹ wariẹ mu ei, je fi ei họ uwou-odi ikpe esa. Ghele na, Valentina ọ ruabọhọ usiuwoma ota. Taure o te ti whu evaọ 2001, o fi obọ họ kẹ ahwo 44 kurẹriẹ no. Ikpe 21 ọ raha evaọ iwou-odi. U no rie eva ze inọ o re siobọno eware kpobi, makọ ufuoma riẹ dede, re ọ ruẹsi kru ẹgbakiete riẹ. Evaọ ekuhọ uzuazọ riẹ, Valentina ọ ta nọ: “Me wo uwou nọ mẹ rria ẹdọvo ho. Ẹkpa ọvo eware mẹ kpobi e jọ, rekọ mẹ jẹ rọ evawere gbe edẹro gọ Jihova.” Valentina o dhesẹ Setan fihọ ọtọrue, o dhesẹ nnọ ahwo-akpọ a rẹ sae gọ Ọghẹnẹ evaọ otọ edawọ! (Job 1:9-11) O rẹ sai mu omai ẹro inọ o ru Jihova eva were gbe nnọ Ọghẹnẹ ọ be hẹrẹ oke nọ ọ te kpare Valentina avọ amọfa nọ i kru ẹrọwọ rai rite uwhu ziọ uzuazọ.—Job 14:15.
12. Abọ vẹ uyoyou u wo evaọ usu mai kugbe Jihova?
12 Ma mu usu kugbe Jihova fikinọ ma you rie. Oghẹrẹ ohwo nọ Ọghẹnẹ ọ rrọ o were omai, fikiere ma rẹ dawo utho ẹgba mai kpobi re ma ruẹse rria lele ẹjiroro riẹ. Wo ohẹriẹ no eme nọ Ẹdhọ ọ ta, ma be rọ unevaze you Jihova makọ oware nọ o rẹ via kpobi. Uvi uyoyou nana o rẹ kẹ omai ẹgba kru ẹgbakiete mai evaọ oke ẹdawọ. Rọkẹ Jihova, ọ be “yọrọ edhere erezi riẹ.”—Itẹ 2:8; Ol. 97:10.
13. Ẹvẹ Jihova o bi rri omodawọ mai evaọ egagọ riẹ?
13 Uyoyou o rẹ wọ omai rọ ọghọ kẹ odẹ Jihova nọ ma tẹ maki roro nnọ ma be daoma te he. Ọ be ruẹ iroro iwoma mai, yọ o re brukpe omai hi otẹrọnọ ma sai ru te epanọ o rrọ omai udu hu. Oware nọ o roja họ orọnikọ oware nọ ma ru ọvo ho rekọ te ẹjiroro nọ ma bi ro ru ei. Dede nọ Job ọ jọ ọkora gbe nnọ o thihakọ gaga no, ọ ta ẹme kẹ egbẹnyusu esa riẹ kpahe epanọ o you idhere Jihova te. (Se Job 10:12; 28:28.) Evaọ uzou urere ọrọ obe Job, Ọghẹnẹ ọ dheva kẹ Elifaz, Bildad, gbe Zofa fikinọ a ta uzẹme he. Evaọ oke ọvona, Jihova o dhesẹ inọ Job ọ were riẹ nọ o sei “odibo mẹ” isiane, ọ tẹ jẹ ta kẹe inọ ọ lẹ kẹ egbẹnyusu esa riẹ na. (Job 42:8) Wọhọ Job, joma lẹ kẹ ahwo nọ a ru omai thọ re Jihova ọ sai rri omai aro.
Jihova Ọ rẹ Tha Idibo Ẹrọwọ Riẹ Uke
14. Ẹvẹ Jihova o ro fi obọ họ kẹ Job kpọ iroro riẹ vi?
14 Dede nọ Job ọ gba ha, o kru ẹgbakiete riẹ. Okejọ, nọ uye o bẹe gaga no, o wo eriwo ọthọthọ. Wọhọ oriruo, ọ ta kẹ Jihova nọ: “Me bo se owhẹ, whọ kẹ omẹ uyo ovo ho . . . Ẹgba obọ ra who bi ro kpokpo omẹ.” Ofariẹ, Job o rri oma riẹ inọ o woma hrọ nọ ọ ta nọ: “Me ruthọ họ,” gbe nnọ “oruthọ ọvo o no obọ mẹ ze he, yọ olẹ mẹ olẹ uzẹme.” (Job 10:7; 16:17; 30:20, 21) Ghele na, Jihova o fi obọ họ kẹ Job nọ ọ nọe enọ buobu enọ e kpọ iroro Job kpohọ epanọ Ọghẹnẹ o woma te. Enọ na i te je fi obọ họ kẹ Job ruẹ epanọ Ọghẹnẹ o kpehru te gbe epanọ ohwo-akpọ ọ kawo te. Job ọ jẹ ọkpọvio na rehọ ọ tẹ kpọ iroro riẹ vi.—Se Job 40:8; 42:2, 6.
15, 16. Idhere vẹ Jihova o bi ro fi obọ họ kẹ idibo riẹ nẹnẹ?
15 Jihova ọ be jẹ kẹ idibo riẹ uvi ọkpọvio nẹnẹ. Ofariẹ, ma bi wo irere buobu. Wọhọ oriruo, idhe ẹtanigbo Jesu Kristi u ru rie lọhọ re ma wo erọvrẹ izieraha mai. Fiki idhe yena, ma rẹ sai wo usu okpekpe kugbe Ọghẹnẹ dede nọ ma gba ha. (Jem. 4:8; 1 Jọn 2:1) Nọ ma tẹ rẹriẹ ovao ku edawọ, ma rẹ sae jẹ lẹ kẹ uketha gbe obufihọ ẹzi ọfuafo Ọghẹnẹ. Ofariẹ, ma wo Ebaibol na, yọ ma te sei je roro kpahe eme riẹ, ma rẹ sae ruẹrẹ oma kpahe kẹ edawọ. Ese Ebaibol na o re fi obọ họ kẹ omai wo otoriẹ ẹme-avro kpahe esuo Ọghẹnẹ gbe ẹgbakiete ahwo-akpọ.
16 Ofariẹ, ma bi wo irere buobu fikinọ ma rrọ abọ okugbe-inievo akpọ-soso na onọ Jihova ọ be rọ ẹkwoma ‘ọrigbo nọ o wo ẹrọwọ avọ areghẹ na’ kẹ emuore abọ-ẹzi. (Mat. 24:45-47) A be jọ ikoko Isẹri Jihova nọ e dina bu vi idu udhusoi (100,000) ru iwuhrẹ nọ i bi fi obọ họ k’omai jẹ be bọ omai ga kẹ edawọ nọ e rẹ sai te omai. Ma rẹ sae rehọ oriruo Sheila ro dhesẹ onana, uzoge omọvo Isẹri Jihova nọ e rrọ Germany.
17. Kẹ oriruo epanọ o rrọ oware areghẹ te re ma fi ehrẹ nọ ma be jọ ukoko Jihova wo họ iruo.
17 Ẹdẹjọ evaọ obọ isukulu, uvumọ iticha ọ jọ eklase Sheila ha. Emọ-eklase riẹ a tẹ jẹ rehọ oware jọ nọ a rẹ rọ gbẹva zaro. Sheila ọ tẹ nwane ruọ otafe, yọ usi nọ o yo uwhremu na o lẹliẹ eva were iẹe inọ ọ jọ eklase na ha. Nọ a jẹ rehọ oware ẹvagba na zaro, oghẹrẹ nọ oma u je ru ai a tẹ riẹ nnọ idhivẹri na i bru rai ze no, fikiere a tẹ dhẹ. Rekọ eme o fi obọ họ kẹ Sheila ruọ otafe vẹrẹ vẹrẹ? Ọ ta nọ: “Taure oware nana o tẹ te via, u ri kri hi nọ ma jọ obọ Ọgwa Uvie wuhrẹ inọ enwoma e rrọ ekwakwa itieye na. Fikiere mẹ riẹ oware nọ me re ru. Mẹ gwọlọ ru Jihova eva were wọhọ epanọ Ebaibol e ta evaọ Itẹ 27:11.” U woma gaga inọ Sheila ọ jọ evaọ ewuhrẹ na gbe nnọ ọ gaviezọ ziezi!
18. Eme whọ gba riẹ mu nọ who re ru?
18 Jọ mai omomọvo ma gbae mu inọ ma re fi eware nọ a be jọ ukoko Ọghẹnẹ wuhrẹ omai họ iruo. Ma re wo uketha gbe obufihọ nọ ma gwọlọ ẹkwoma iwuhrẹ nọ ma re kpohọ ẹsikpobi, isase Ebaibol, ese ebe ukoko na, olẹ, gbe usu kugbe Ileleikristi nọ e kpako evaọ iroro. Jihova ọ gwọlọ nnọ ma kparobọ, yọ u mu rie ẹro inọ ma ti kru ẹrọwọ mai ẹsikpobi. Ọghọ riẹ o rro kẹhẹ re ma kpare odẹ Jihova kpehru, ru eva were iẹe, je kru ẹgbakiete!
Kọ Whọ Kareghẹhọ?
• Iyero gbe edawọ vẹ Setan ọ be wha ze?
• Oware vẹ o mae ghare omai obọ nọ ma wo?
• Eme o rẹ sae lẹliẹ omai mu usu kugbe Jihova?
• Idhere jọ vẹ Jihova ọ be rọ tha omai uke nẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 8]
Kọ oma o be wọ owhẹ re who wuhrẹ amọfa eware nọ whọ riẹ no?
[Uwoho nọ o rrọ ẹwẹ-obe avọ 9]
Ma rẹ sai fi obọ họ kẹ ibe eg’Ọghẹnẹ kru ẹgbakiete rai
[Uwoho nọ o rrọ ẹwẹ-obe avọ 10]
U no Valentina eva ze inọ o re si obọ no eware kpobi re ọ ruẹsi kru ẹgbakiete riẹ