Enọ Ahwo nọ A s’Ebe

Ọmọ ọ tẹ jọ eva oni whu hayo a te yẹi thọwa, kọ ẹruore ọ riẹ inọ a te kpare iẹe ze?

Rọ kẹ ahwo nọ oware utiona o re via kẹ hẹ, a riẹ epanọ o rẹ da te he. Esẹgbini jọ a re weri uwhu otiọnana gaga. Oni jọ o dieva họ isiasoi soso, rekọ o yẹ ọvuọvo fihọ akpọ họ. Ukuhọ riẹ, o te yẹ emọ ivẹ nọ e rrọ uzuazọ. Rekọ ọ gbẹ be kareghẹhọ emọ isoi nọ e rrọ uzuazọ họ na. Ri te inẹnẹ o gbe bi roro epanọ emọ riẹ na e hae kpako te no o hae jọnọ a rrọ uzuazọ. Kọ ẹruore ọ rrọ kẹ Ileleikristi itieye na inọ a te kpare emọ na ze?

Uyo onọ yena họ, ma riẹ hẹ. Ebaibol e ta ha kpahe ẹkparomatha emọ nọ i whu fihọ eva hayo enọ a yẹ thọwa. Ghele na, ehri-izi jọ e rrọ Ebaibol na nọ e dina dhunu te ẹme nana nọ o rẹ sae kẹ omosasọ.

Joma roro kpahe enọ ivẹ nọ i w’obọ kugbe ẹme nana. Orọ ọsosuọ, evaọ eriwo Jihova, oke vẹ uzuazọ ohwo-akpọ u ro muhọ—okenọ a ro dieva na họ manikọ eva oke eyẹ? Orọ avivẹ, ẹvẹ Jihova o rri ọmọ nọ ọ rrọ eva oni riẹ—wọhọ ohwo-akpọ dẹẹ manikọ wọhọ egẹgẹ-uzuazọ gheghe nọ e rrọ eva oni riẹ? Ehri-izi Ebaibol e kẹ iyo enọ ivẹ nana vevẹ.

Uzi Mosis u dhesẹ inọ orọnikọ okenọ a ro yẹ ọmọ fihọ otọ no ẹsiẹ uzuazọ riẹ u ro muhọ họ, rekọ u dina muhọ kri no. Evaọ oghẹrẹ vẹ? Uzi na u dhesẹ inọ ohwo o te kpe ọmọ nọ ọ rrọ eva oni riẹ, a re kpe ohwo na lele iei. Uzi na o ta nọ: “Wha rẹ rehọ uzuazọ nwene uzuazọ.” * (Ọny. 21:22, 23) Fikiere, a rẹ sae rehọ ọmọ nọ ọ gbẹ rrọ eva oni riẹ wọhọ ọmọ nọ ọ rrọ uzuazọ. Oyejabọ nọ ima Ileleikristi buobu a be rọ whaha eva-ekparọ na, keme a rri rie wọhọ ẹraha uzi Ọghẹnẹ.

Fikiere, o rrọ vevẹ inọ ọmọ nọ a ri yẹ hẹ o mu uzuazọ họ ẹria no, rekọ ẹvẹ Jihova o rri rie ghare te? Uzi nọ ma jọ obehru fodẹ na o ta inọ a re kpe ohwo nọ ọ wha uwhu se ọmọ nọ ọ gbẹ rrọ eva oni riẹ. Fiki onana, ma rẹ sae ta nnọ Ọghẹnẹ o rri uzuazọ ọmọ nọ a ri yẹ fihọ akpọ họ ghaghae. Ofariẹ, eria sa-sa evaọ Ikereakere na i dhesẹ inọ Jihova o rri ọmọ nọ ọ gbẹ rrọ eva oni riẹ wọhọ ohwo-akpọ dẹẹ. Wọhọ oriruo, Devidi Ovie na ọ ta kpahe Jihova nọ: “[Who] koko omẹ họ eva edhede oni mẹ. . . . Ibiaro ra e ruẹ ekuakua mẹ nọ a te ma omẹ hẹ; eva obe ra a kere i rai kpobi ọvuọvo họ, eva okenọ a je ru ai kẹ omẹ.”—Ol. 139:13-16; Job 31:14, 15.

Jihova ọ sae jẹ riẹ oghẹrẹ uruemu nọ ọmọ nọ ọ gbẹ rrọ eva oni riẹ o ti wo, ọ vẹ jẹ riẹ epanọ ọ te jọ evaọ obaro. Okenọ Rebeka, aye Aiziki, o dieva ejime họ, Jihova ọ ruẹaro kpahe emezae ivẹ nọ i bi hrowo oma evaọ eva riẹ, onọ u dhesẹ inọ nọ a gbẹ rrọ obeva na, ọ riẹ uruemu nọ a bi ti wo okenọ a te yẹ ai no.—Emu. 25:22, 23; Rom 9:10-13.

Oriruo Jọn Ọhọahwo-Ame na o siuru gaga re. Ikere na e ta nọ: “Nọ Ẹlizabẹt o yo uyere Meri, ọmọ o te duola eva edhede riẹ; Ẹzi Ẹri ọ tẹ vọ Ẹlizabẹt.” (Luk 1:41) Nọ o je dhesẹ oware nana nọ o via na, ẹme Griki nọ Luk ọbo na ọ rọ t’ẹme o rẹ sai dhesẹ ọmọ nọ ọ gbẹ rrọ obeva hayo ọmọ nọ a yẹ obọ. Ẹme ọvo na ọ rọ t’ẹme kpahe Jesu evaọ okenọ a wọe kiẹzẹ ehru oria nọ a re fi emu erao họ.—Luk 2:12, 16; 18:15.

 Kọ Ebaibol na i dhesẹ ohẹriẹ ulogbo nọ o rrọ udevie ọmọ nọ ọ rrọ eva gbe ọnọ a yẹ obọ? Ijo. Yọ oyena o rọwo kugbe eware nọ egbaeriariẹ a kiẹ via no. Wọhọ oriruo, ekiotọ a wuhrẹ no inọ eware nọ oni na gbe amọfa nọ e wariẹ e riẹ họ a bi ru e rẹ sai kpomahọ ọmọ nọ ọ rrọ eva. Agbẹta nọ aye nọ o dihọ o re ro you ọmọ riẹ gaga na.

Oware ọfa nọ ma re roro kpahe họ oghẹrẹ nọ a ro yẹ ọmọ na. Rehọ oriruo nana: Oni jọ o yẹ ọmọ jọ nọ emerae riẹ e gba ha, ọmọ na o te whu nọ emedẹ jọ e vrẹ no. Oni ọfa ọ yọrọ eva riẹ emerae izii, rekọ taure ọ tẹ te nwani yẹ ọmọ na, ọmọ na ọ tẹ jọ eva riẹ whu. Kọ oni ọsosuọ na o re wo ẹruore inọ a te kpare ọmọ riẹ ze fikinọ o yẹ riẹ fihọ akpọ, rekọ oni avivẹ na họ ọnọ o re wo ẹruore he?

Re ma gba ẹme na ekru, Ebaibol i wuhrẹ vevẹ inọ a te dieva họ no yọ uzuazọ u muhọ no gbe nnọ Jihova ọ rehọ ọmọ nọ ọ gbẹ rrọ eva oni riẹ wọhọ ohwo. Fikinọ enẹ Ebaibol i wuhrẹ, ahwo jọ a re roro inọ re a ta nọ a te kpare ọmọ nọ o whu fihọ eva oni riẹ ze he o thọ. Evaọ eriwo ahwo otiọye na, o tẹ ginẹ rọnọ a te kpare emọ itieye na ze he, kiyọ Ọghẹnẹ o se rai gb’ohwo ho, fikiere eva-ekparọ e thọ gbe he.

Evaọ oke nọ u kpemu emagazini nana o nọ enọ jọ nọ e dina dhesẹ inọ emọ nọ i whu fihọ eva oni rai a te kpare ae ze he. Wọhọ oriruo, evaọ Aparadase na, kọ Ọghẹnẹ o ti ru re aye nọ eva nọ o dihọ obọ i no ọ wariẹ dieva ọvo yena họ? Rekọ nọ ma roro kpahe ẹme nana didi no, Ugboma Esuo na o ku rie họ inọ onana u wobọ kpahe ẹruore ẹkparomatha na ha. Jesu ọ ta nọ: “Ọghẹnẹ ọ rẹ sai ru eware kpobi.” (Mak 10:27) Oware nọ o via kẹ Jesu u dhesẹ inọ ẹme nana uzẹme; Ọghẹnẹ o kpeze uzuazọ riẹ no obọ odhiwu fihọ edhede ọmọtẹ nọ ọ riẹ ọzae he—oware nọ o rẹ sae via ha evaọ eriwo ohwo-akpọ.

Kọ onana kpobi u dhesẹ inọ Ebaibol i wuhrẹ nnọ emọ nọ e jọ eva oni whu a te kpare ae ze? Ma rẹ riẹ nnọ Ebaibol e kuyo nana gbiae he, fikiere ma rẹ sae r’obọ s’udu kuyo na ha. Enọ buobu e riẹ nọ ahwo a rẹ nọ kpahe ẹme nana. Fikiere, o rẹ mai woma re ma whaha eme nọ i muẹro ho. Oware nọ ma riẹ ona: Ẹme na ọ rrọ obọ Jihova Ọghẹnẹ, ọnọ ọ vọ avọ uyoyou-ẹwo gbe ohrọ. (Ol. 86:15) Ababọ avro, o rrọ isiuru riẹ re ọ kpare enọ i whu no ze. (Job 14:14, 15) O rẹ sai mu omai ẹro inọ o re ru oware nọ u woma ẹsikpobi. O ti si edada nọ uyerakpọ muomu nana o wha se omai no ọ vẹ te rọ uyoyou kpọ Ọmọ riẹ re ọ “raha iruo ukumuomu na.”—1 Jọn 3:8.

[Oruvẹ-obotọ]

[Uwoho nọ o rrọ ẹwẹ-obe avọ 13]

Jihova o ti si edada nọ ma wo kpobi no