Job Ọ Kpare Odẹ Jihova Kpehru

“Jọ ujiro u te odẹ Jihova.”—JOB 1:21, NW.

1. Ono whọ rẹ sae ta nnọ o kere obe Job, kọ oke vẹ?

 MOSIS ọ kpako te ikpe 40 okenọ ọ dhẹ no Ijipti kpohọ obọ Midian fiki evedha Fẹro. (Iruẹru 7:23) O sae jọnọ okenọ ọ jọ obọ Midian o ro yo kpahe edawọ Job, ọnọ ọ jẹ rria ẹwho ekẹloma nọ a re se Ọz. Ikpe buobu e vrẹ no, okenọ Mosis o su emọ Izrẹl kẹle Ọz evaọ ubrobọ urere onya rai evaọ udhude na, ẹsejọhọ ẹsiẹe o ro yo kpahe epanọ uzuazọ Job o jọ uwhremu na. Ahwo Ju a rọwo inọ Mosis o kere obe Job okenọ Job o whu no.

2. Idhere vẹ obe Job o rọ rrọ uduotahawọ kẹ idibo Jihova nẹnẹ?

² Obe Job o rẹ bọ ẹrọwọ idibo Ọghẹnẹ ga nẹnẹ. Evaọ idhere vẹ? Obe na u muhọ avọ ikuigbe eware nọ e via evaọ obọ odhiwu, enọ e roja k’omai nẹnẹ, o tẹ jẹ kareghẹhọ omai ẹme-avro ologbo ọrọ esuo ehrugbakpọ Ọghẹnẹ. Ikuigbe Job i te je ru omai wo otoriẹ oware nọ u dhesẹ re ma kru ẹgbakiete, je fi obọ họ kẹ omai riẹ oware nọ Jihova ọ rọ kuvẹ re uye o bẹ idibo riẹ ẹsejọ. Ofariẹ, obe Job u dhesẹ nọ Setan Ẹdhọ na họ Ọwegrẹ ologbo Jihova gbe ahwo-akpọ. Obe na o te je dhesẹ kẹ omai inọ ahwo-akpọ nọ e gba ha wọhọ Job a rẹ sai kru ẹgbakiete rai ghelọ edawọ egaga. Joma ta kpahe eware jọ nọ a dhesẹ evaọ obe Job.

Setan Ọ Dawo Job

3. Eme ma riẹ kpahe Job, kọ fikieme Setan o ro fiẹrohọ iẹe?

³ Job ọ jọ ọdafe ọnọ a riodẹ ziezi, ọzae nọ o dhabọ te eware etọtọ họ. Ọ jọ ọnọ ọ rẹ kẹ emamọ ohrẹ, ọnọ ọ jẹ hai si iyogbere gboma. Mai wuzou, Job ọ jẹ dhozọ Ọghẹnẹ. A dhesẹ Job wọhọ “ohwo nọ ọ kare [afuẹwẹ], ọ tẹ jẹ rọ uvi ohwo, ohwo nọ ọ jẹ dhozọ Ọghẹnẹ, o te je si oma no oware uyoma.” Oware nọ o lẹliẹ Setan Ẹdhọ fiẹrohọ Job họ oma nọ ọ rọ kẹ Ọghẹnẹ, orọnikọ fiki efe riẹ hẹ.—Job 1:1; 29:7-16; 31:1.

4. Eme họ ẹgbakiete?

⁴ Obọ emuhọ obe Job o ta kpahe ikọ-odhiwu nọ i kokohọ aro Jihova. Setan ọ jariẹ re, yọ ọ jọ etẹe raha Job kẹ Ọghẹnẹ. (Se Job 1:6-11.) Dede nọ Setan ọ fodẹ efe nọ Job o wo, ẹgbakiete Job họ oware nọ ọ vravro kpahe. Otofa “ẹgbakiete” họ kare afuẹwẹ, kiẹrẹe. Wọhọ epanọ a rehọ e riẹ ta ẹme evaọ Ebaibol na, re a dhesẹ nnọ ohwo-akpọ ọ gbakiete koyehọ ọ be rehọ eva riẹ kpobi gọ Jihova.

5. Eme Setan ọ ta kpahe Job?

⁵ Setan ọ ta nnọ oriobọ Job ọ be rọ gọ Ọghẹnẹ, orọnikọ ẹgbakiete he. Setan ọ ta nnọ Job o re kru ẹgbakiete riẹ thakpinọ Ọghẹnẹ ọ be thọe jẹ ghale iẹe. Re o dhesẹ Setan fihọ ọtọrue, Jihova ọ tẹ kẹe uvẹ re ọ dawo ọzae ẹrọwọ na. Fiki onana, evaọ okpẹdoke ọvuọvo, Job o te yo inọ a tho erao riẹ jọ, enọ i kiọkọ i whu, a kpe idibo riẹ no, gbe nnọ emọ ikpe riẹ i whu no. (Job 1:13-19) Kọ Job o kie kẹ edawọ Setan? Ebaibol i dhesẹ epanọ Job o rri okpẹtu nọ u te rie, nọ o ta nọ: “ỌNOWO na ọ kẹe, jẹ ruọ  ỌNOWO na ọ rehọ vrẹ; a rọ ujiro kẹ odẹ ỌNOWO na!”—Job 1:21.

6. (a) Eme o via nọ emọ Ọghẹnẹ a wariẹ kokohọ evaọ obọ odhiwu? (b) Amono Setan o wo họ iroro nọ ọ vro ẹgbakiete Job?

⁶ Uwhremu na, emọ Ọghẹnẹ a tẹ wariẹ kokohọ evaọ obọ odhiwu. Setan ọ tẹ wariẹ je gu Job, inọ: “Ohọroma [avọ] ohọroma! Eware kpobi nọ ohwo o wo o re ro nwene uzuazọ riẹ. Rekọ enẹna whọ rọ obọ ra ro te enwa riẹ gbe oma riẹ, ọ rẹ te la owhẹ eka eva iraro ra.” Muẹrohọ inọ Setan ọ rọ ẹme na whaliẹ ahwo kpobi no. Nọ ọ ta nnọ ‘Eware kpobi nọ ohwo o wo o re ro nwene uzuazọ riẹ,’ Ẹdhọ ọ tẹ rọ ere fi avro họ ẹgbakiete “ohwo” kpobi nọ ọ be gọ Jihova, orọnikọ Job ọvo ho. Kẹsena Ọghẹnẹ ọ tẹ kẹ Setan uvẹ re ọ rehọ ẹyao ọgaga jọ tehe Job. (Job 2:1-8) Rekọ edawọ Job e jọ etẹe kuhọ họ.

Oware nọ Ma rẹ Sai Wuhrẹ Mi Job

7. Idhere vẹ aye Job avọ erara riẹ a ro fiba uye riẹ?

⁷ Evaọ oke ọsosuọ, eware nọ i vru mi Job i vru mi aye riẹ re. Emọ riẹ nọ i whu gbe ekwakwa efe rai nọ i vru e lẹliẹ akpọ no aye na oma. O da riẹ gaga nọ ọ ruẹ ọzae riẹ nọ ẹyao ọ be lahiẹ. Ọ tẹ ta kẹ Job nọ: “Kọ who gbe kru orọwọ ra whawha enẹna? La Ọghẹnẹ eka re who whu.” Ezae esa e tẹ kpahe Job epaọ ẹsenọ a gwọlọ sasa iẹe oma, odẹ rai họ Elifaz, Bildad, avọ Zofa. Ukpenọ a sasa iẹe oma a tẹ jẹ rehọ eme ẹghẹ jẹ rọ fa Job ovao, kọ “uweri ero” a je lele iei weri. Wọhọ oriruo, Bildad ọ ta inọ eware iyoma nọ emọ Job a ru oye o wha uwhu se ai. Elifaz ọ rehọ eme riẹ dhesẹ inọ Ọghẹnẹ ọ be kẹ Job uye fiki eware iyoma nọ o ru vrẹ no. Ọ tubẹ jẹ vro dede sọ Ọghẹnẹ ọ be daezọ enọ i bi kru ẹgbakiete rai! (Job 2:9, 11; 4:8; 8:4; 16:2; 22:2, 3) Ghelọ idabolo nana kpobi, Job o kru ẹgbakiete riẹ. Uzẹme, o ruthọ nọ ọ rehọ etata ẹme riẹ “ru omariẹ kiẹrẹe vi Ọghẹnẹ.” (Job 32:2) Ghele na, o kru ẹrọwọ riẹ.

8. Didi emamọ oriruo Elaihu o fihọ otọ kẹ enọ e rẹ kẹ ohrẹ nẹnẹ?

⁸ Ma te je se kpahe Elaihu, ọnọ ọ nyaze te kpahe Job re. Elaihu ọ kake gaviezọ kẹ eme nọ Job avọ egbẹnyusu esa riẹ a jẹ kpahe kẹ ohwohwo. Dede nọ ọ maha vi ai, Elaihu o dhesẹ inọ o wo areghẹ vi ai. Ọ ta ẹme kẹ Job avọ adhẹẹ. Elaihu o jiri Job fiki ẹgbakiete riẹ. Rekọ ọ tẹ jẹ ta nnọ Job o jiri oma riẹ hrọ. Kẹsena Elaihu o te je dhesẹ kẹ Job nnọ u woma re a gọ Ọghẹnẹ. (Se Job 36:1, 11.) Onana yọ emamọ oriruo kẹ enọ e gwọlọ kẹ ohrẹ nẹnẹ! Elaihu o wo odiri,  gaviezọ ziezi, jiri Job evaọ oria nọ ọ jọ riẹ ru, ọ tẹ jẹ kẹe uvi ohrẹ.—Job 32:6; 33:32.

9. Ẹvẹ Jihova o ro fi obọ họ kẹ Job?

⁹ Ukuhọ riẹ, ọrara jọ nọ ọ rro thesiwa ọ tẹ kpahe Job! Ikere na e ta nọ: “ỌNOWO na o te yo kẹ Job no eva ofowhre na” ze. Jihova ọ rehọ enọ buobu fi obọ họ kẹ Job kpọ iroro riẹ vi. Job o dede ọwhọkuo na rehọ, ọ tẹ ta nọ: “Me fi oka ha . . . me [te] je kurẹriẹ evaọ ovu gbe enwo.” Nọ o lele Job ta ẹme no, Jihova o te muofu kẹ egbẹnyusu ẹghẹ esa Job na keme a “ta ewoma ọvo” ho. Ọ ta kẹ Job re ọ lẹ kẹ ae. “Koyehọ ỌNOWO na o zihe ekuakua Job rọ kẹe akuava, okenọ ọ lẹ rọ kẹ egbẹnyusu riẹ no.”—Job 38:1; 40:4; 42:6-10.

Ẹvẹ Ma You Jihova Te?

10. Fikieme Jihova ọ gbẹ rọ kpairoro vrẹ Setan hayo kpei no ho?

¹⁰ Jihova họ Ọnọ ọ ma ehrugbakpọ na, ọye họ Osu emama kpobi. Kọ eme ọ gbẹ rọ kpairoro vrẹ eme iyoma nọ Ẹdhọ ọ ta kpahe Job hu? Ọghẹnẹ ọ riẹ inọ ọ tẹ kpairoro vrẹ Setan hayo kpei no u ti ku avro nọ o fihọ otọ na họ họ. Ẹdhọ ọ ta nọ Job, ọnọ ọ rrọ uvi odibo Jihova, o ti kru ẹgbakiete riẹ hẹ a tẹ raha eyero uzuazọ riẹ. Job o kie he. Kẹsena Setan ọ tẹ ta nnọ ohwo kpobi nọ ẹyao ọ lahiẹ ọ rẹ vro Ọghẹnẹ. Ẹyao ọ lahiẹ Job rekọ ọ vro Ọghẹnẹ hẹ. Ọzae ẹrọwọ ọyena nọ ọ gba ha na o dhesẹ Setan fihọ ọtọrue. Kọ ẹvẹ kpahe idibo Ọghẹnẹ efa?

11. Ẹvẹ Jesu ọ rọ kẹ uyo nọ o mae gba inọ Setan yọ ọtọrue?

¹¹ Odibo Ọghẹnẹ kpobi nọ o kru ẹgbakiete riẹ ghelọ oghẹrẹ odawọ kpobi nọ Setan o ro tei yọ ọye omariẹ o bi dhesẹ eme ọwegrẹ ọgeva yena họ ọrue. Nọ Jesu ọ ziọ akpọ o te dhesẹ eme Setan na fihọ ọrue koikoi. Jesu ọ jọ gbagba wọhọ Adamu, ọsẹ ọsosuọ mai na. Ẹrọwọ riẹ nọ o kru rite uwhu oye họ uyo nọ o mae gba inọ Setan yọ ọtọrue gbe nnọ eme riẹ kpobi erue.—Evia. 12:10.

12. Didi uvẹ odibo Jihova kpobi o wo?

¹² Setan ọ gbẹ be dawo idibo Jihova. Mai omomọvo ma wo uvẹ nọ ma rẹ rọ rehọ ẹgbakiete mai dhesẹ inọ ma be gọ Jihova fikinọ ma you rie, orọnikọ fiki eware nọ ma bi wo mi ei hi. Ẹvẹ ma rri uvẹ yena? Ma rẹ rehọ iẹe wọhọ uvẹ-ọghọ re ma yoẹme kẹ Jihova. O tẹ jẹ rrọ oware evawere k’omai inọ Jihova ọ be kẹ omai ẹgba nọ ma re ro thihakọ gbe nnọ u wo umuo nọ Jihova ọ rẹ kuvẹ kẹ odawọ te wọhọ epanọ oriruo Job o dhesẹ na.—1 Kọr. 10:13.

Setan—Ọwegrẹ Ọwọsuọ

13. Didi eme obe Job o ta kpahe Setan?

¹³ Ikereakere Hibru na e ta ẹme gaga kpahe epanọ Setan ọ rọ wọso Jihova je su ahwo-akpọ thọ. Evaọ Ikereakere Griki Ileleikristi na, ma ruẹ evuẹ efa kpahe epanọ Setan ọ rọ wọso Jihova, yọ ma jọ obe Eviavia se kpahe epanọ Jihova ọ te rọ kpare esuo riẹ kpehru je kpe Setan no. Obe Job o lẹliẹ omai riẹ ziezi kpahe ọkparesuọ Setan. Okenọ Setan o kuomagbe emọ Ọghẹnẹ nọ i kokohọ evaọ obọ odhiwu, orọnikọ ọ nya  re o jiri Jihova ha. Oware uyoma jọ Ẹdhọ o wo họ iroro. Nọ ọ ta eme iyoma kpahe Job no, gbe okenọ a kẹe uvẹ no inọ ọ rẹ sae dawo Job, “Setan ọ tẹ nya no aro ỌNOWO na.”—Job 1:12; 2:7.

14. Ẹvẹ Setan o mukpahe Job te?

¹⁴ Fikiere obe Job o dhesẹ Setan wọhọ ọwegrẹ ọgeva ọrọ ahwo-akpọ. Evaọ etoke nọ emọ Ọghẹnẹ a ro kokohọ onọ a fodẹ evaọ Job 1:6 na gbe onọ a fodẹ evaọ Job 2:1 na, Ebaibol e fodẹ epanọ etoke na o theri te he, rekọ evaọ etoke nana Setan ọ dawo Job gaga. Ẹgbakiete Job o lẹliẹ Jihova ta kẹ Setan nọ: “Whọ tẹ make ru omẹ mukpahe [Job] re mẹ raha iẹe gheghe, o re gbe dikihẹ whawha ghele.” Rekọ Setan ọ rọwo ho inọ a dhesẹ ẹme riẹ fihọ ọrue no. Ukpoye, o sikẹ inọ ọ gwọlọ kẹ Job odawọ ogaga ofa. Koyehọ Ẹdhọ ọ dawo Job evaọ okenọ eware i ro woma kẹe gbe okenọ ọ jọ ababọ. O rrọ vevẹ, Setan o wo ohrọ kẹ enọ akpọ ọ be bẹ hẹ hayo enọ eware okpẹtu e via kẹ. O mukpahe enọ e be gọ Ọghẹnẹ. (Job 2:3-5) Ghele na, ẹgbakiete Job o dhesẹ inọ Setan yọ ọtọrue.

15. Ẹvẹ enọ i kieno egagọ Jihova no a rọ wọhọ Setan?

¹⁵ Setan họ omama ọsosuọ nọ ọ wọso Ọghẹnẹ. Enọ i kieno egagọ Jihova no nẹnẹ a bi dhesẹ ọkpọ uruemu Ẹdhọ. A re wo iroro iyoma kpahe ahwo jọ evaọ ukoko na, kpahe ekpako ukoko, hayo kpahe Ugboma Esuo na. O rẹ dha otu rai jọ eva re a se odẹ na Jihova. A gwọlọ wuhrẹ kpahe Jihova ha, yọ a gwọlọ gọe gbe he. Wọhọ Setan ọsẹ rai, ahwo tiọye na a gwọlọ gele enọ e be gọ Ọghẹnẹ kie. (Jọn 8:44) Oye jabọ u je fo re idibo Jihova a kẹnoma kẹ ae riẹriẹriẹ.—2 Jọn 10, 11.

Job Ọ Kpare Odẹ Jihova Kpehru

16. Iroro vẹ Job o wo kpahe Jihova?

¹⁶ Job ọ jẹ hai se je jiri odẹ Jihova. Makọ okenọ o je weri fiki uwhu emọ riẹ, Job ọ ta ekpehre ẹme ọvo kpahe Ọghẹnẹ hẹ. Dede nọ ọ rehọ eme riẹ dhesẹ inọ Ọghẹnẹ họ ọnọ ọ wha ebẹbẹ riẹ ze, ghele na ọ kpare odẹ Jihova kpehru. Evaọ eme jọ nọ ọ ta uwhremu na, Job ọ ta nọ: “Ri, ozodhẹ kẹ ỌNOWO na họ areghẹ; gbe umuomu u siomano họ eriariẹ.”—Job 28:28.

17. Eme u fi obọ họ kẹ Job kru ẹgbakiete riẹ?

¹⁷ Eme u fi obọ họ kẹ Job kru ẹgbakiete riẹ? O rrọ vevẹ inọ taure edawọ na e tẹ te ze, o wo usu okpekpe kugbe Jihova. Dede nọ u mu omai ẹro ho sọ Job ọ riẹ inọ Setan o lele Jihova vro avro, ọ gba riẹ mu inọ Jihova ọvo ọ rẹ gọ. Ọ ta nọ: “Bẹsenọ me re ti  whuẹ na mẹ sae ti siobọ no oruọzewọ mẹ hẹ.” (Job 27:5) Ẹvẹ Job o ro wo usu okpekpe otiọye na? Ababọ avro ọ jẹ hai roro kpahe oghẹrẹ nọ Ọghẹnẹ o ro yeri kugbe Abraham, Aiziki, gbe Jekọp, ahwo orua riẹ. Yọ Job ọ sae jọ eware nọ Ọghẹnẹ ọ ma vuhu oghẹrẹ ohwo nọ Ọghẹnẹ ọ rrọ.—Se Job 12:7-9, 13, 16.

18. (a) Ẹvẹ Job ọ jẹ rọ gọ Jihova? (b) Idhere vẹ ma rẹ rọ raro kele emamọ oriruo Job?

¹⁸ Eware nọ Job o wuhrẹ e kẹ riẹ ọwhọ nọ o ro ru eva were Jihova. Fiki iroro inọ ẹsejọhọ ọmọ riẹ jọ ọ raha uzi Ọghẹnẹ jọ hayo inọ ejọ rai a “la Ọghẹnẹ eka evaọ eva rai,” Job ọ jẹ hai dheidhe kẹse kẹse. (Job 1:5) Okenọ ọ jẹ make ruẹ uye, Job ọ ta eme ezi kpahe Jihova. (Job 10:12) Onana yọ emamọ oriruo. Wọhọ Job, ma rẹ daoma ẹsikpobi re ma hai wo eriariẹ egbagba kpahe Jihova gbe ẹjiroro riẹ. Ma rẹ rọ oma kẹ eware abọ-ẹzi ẹsikpobi, eware wọhọ isase Ebaibol, ewuhrẹ ọnya, olẹ, gbe usiuwoma ota. Ofariẹ, ma rẹ dawo utho ẹgba mai kpobi re ma whowho odẹ Jihova. Yọ wọhọ epanọ ẹgbakiete Job o were Jihova na, ere ẹgbakiete idibo Ọghẹnẹ nẹnẹ o be wha oghọghọ sei. Ma te t’ẹme kpahe onana evaọ uzoẹme nọ o rrọ aro na.

Kọ Whọ Kareghẹhọ?

• Eme o lẹliẹ Setan Ẹdhọ na fiẹrohọ Job?

• Edawọ vẹ Job o thihakọ rai, kọ eme o ru?

• Eme u re fi obọ họ k’omai kru ẹgbakiete mai wọhọ epanọ Job o ru na?

• Eme ma jọ obe Job wuhrẹ kpahe Setan?

[Enọ Uwuhrẹ]

[Uwoho nọ o rrọ ẹwẹ-obe avọ 4]

Ikuigbe nọ e rrọ obe Job e kareghẹhọ omai ẹme-avro ologbo ọrọ esuo ehrugbakpọ Ọghẹnẹ

[Uwoho nọ o rrọ ẹwẹ-obe avọ 6]

Evaọ otọ iyero vẹ a rẹ sae jọ dawo ẹgbakiete ra?