Enọ Ahwo nọ A s’Ebe

Oke vẹ a ro gele Setan no odhiwu ze?— Evia. 12:1-9.

Dede nọ obe Eviavia o fodẹ uzedhe oke nọ a ro gele Setan no odhiwu ze he, o fodẹ eware jọ nọ e via nọ e rẹ sai fi obọ họ kẹ omai riẹ etoke na. Oware ọsosuọ nọ o via họ Uvie Mesaya nọ a ro mu. Nọ a rọ Uvie na mu no, ‘ẹmo o te du lahwe evaọ obọ odhiwu,’ onọ a jo fi Setan kparobọ je gele ei no odhiwu ze.

Ikereakere na i dhesẹ vevẹ inọ 1914 họ ukpe nọ “oke ahwo Egedhọ” u ro kuhọ, a tẹ rọ Uvie na mu. * (Luk 21:24) Nọ oyena o vrẹ no, ẹvẹ u kri te taure ẹmo obọ odhiwu na o te ti muhọ nọ a ro gele Setan ziọ otọakpọ?

Eviavia 12:4 o ta nọ: “Odudu na [Setan] o te dikihẹ aro aye na nọ o je ti ru re o yẹ ọmọ na, re ọ ruẹse kpe ọmọ na re nọ a yẹ riẹ no.” Onana u dhesẹ nọ Setan ọ gwọlọ dawo utho ẹgba riẹ kpobi re ọ raha Uvie okpokpọ nọ a ro mu na. Dede nọ Jihova ọ kẹ Setan uvẹ re o ru oware uyoma nọ o jariẹ eva ha, Setan ọ gba riẹ mu inọ ọ rẹ dawo utho ẹgba riẹ re ọ raha Uvie nọ a ro mu obọ na. Fikiere o rrọ oware iroro re ma ta nnọ “Maekẹl avọ ikọ-odhiwu riẹ” a raha oke he re a gele “odudu na avọ ikọ riẹ” no odhiwu re a siọ ebẹbẹ ba ẹwha ze Uvie na. Onana u dhesẹ nnọ okenọ a rọ Uvie na mu no evaọ 1914, ẹsiẹe a ro fi Setan kparobọ je gele ei no odhiwu ze.

Oware ofa nọ ma re roro kpahe họ ẹkparomatha Ileleikristi nọ a rọ ẹzi wholo na, onọ u muhọ nọ a rọ Uvie na mu no, wọhọ epanọ imuẹro Ikereakere na i dhesẹ. * (Evia. 20:6) Nọ orọnọ uvumọ inievo Kristi nọ a rọ ẹzi wholo a jọ kugbei hi evaọ okenọ o lele odudu na avọ ikọ riẹ fiẹmo na, o rrọ vevẹ inọ ẹmo nọ a jọ obọ odhiwu fi na gbe Setan avọ idhivẹri riẹ nọ a gele no odhiwu ze o via no taure a te ti mu inievo Kristi họ ẹkpare kpobọ odhiwu.

Fikiere Ebaibol e fodẹ uzedhe etoke nọ a ro gele Setan avọ idhivẹri riẹ no odhiwu ze he. Ghele na, o rrọ vevẹ inọ onana o via nọ a rehọ Jesu Kristi keria agbara-uvie no evaọ obọ odhiwu eva 1914.

[Oruvẹ-obotọ]