Raro Kele Oriruo Itai

“ORUARO gbe igbunu eye họ iruo ra, O Ọnowo Ọghẹnẹ Erumeru! Ẹrẹreokie avọ uzẹme họ idhere ra, O Ovie ebẹdẹ bẹdẹ! Ono ozọ u re ti muẹ re o jiri odẹ ra ha, O Ọnowo? Keme whẹ ọvo họ ọrẹri.” Onana yọ ole nọ “enọ ekparobọ vi arao” na avọ ẹmema riẹ a jọ obọ odhiwu so, onọ u dhesẹ inọ Ọghẹnẹ ọ rrọ ọrẹri, koyehọ o te ọnọ a re fievahọ. (Evia. 15:2-4) Jihova ọ gwọlọ inọ enọ e be gọe a rẹ jọ ahwo nọ a re fievahọ re.—Ẹf. 4:24.

Evaọ abọdekọ riẹ, Setan Ẹdhọ na ọ be dawo utho ẹgba riẹ kpobi re ọ raha uyoyou nọ ma wo kẹ Ọghẹnẹ nọ ma be gọ na. Rekọ, ibuobu i kru ẹgbakiete rai no, makọ evaọ oke ẹbẹbẹ ologbo. Eva e were omai inọ Jihova o rri ẹgbakiete mai ghaghae gaga. Ebaibol e k’omai imuẹro nọ: “ỌNOWO o you oziẹokiẹrẹe; ọ rẹ se erezi riẹ hẹ.” (Ol. 37:28) Re o fi obọ họ kẹ omai yọrọ edikihẹga mai, o ru re a kere kpahe enọ e yọrọ edikihẹga rai fihọ Ebaibol na.  Ohwo jọ nọ a kere kpahe họ Itai, ohwo Git.

‘Ọrara gbe Ọnọ Ọ Dhẹ no Ẹwho Riẹ’

A riẹ Itai wọhọ ohwo nọ o no ẹwho Filistia nọ a re se Gat ze, ẹwho Goliat ọgwara na gbe onọ ewegrẹ Izrẹl efa i no ze. Oke ọsosuọ nọ ma ro yo kpahe ọgbaẹmo ologbo nana họ okenọ Absalọm ọ kpareso Devidi Ovie na. Evaọ oke yena yọ Itai avọ ahwo Filistia nọ a bu te egba ezeza (600) nọ e jọ kugbei a jẹ ria kẹle Jerusalẹm.

Ẹsejọhọ uyero Itai avọ ilele riẹ o lẹliẹ Devidi kareghẹhọ okenọ tei te egbaẹmo egba ezeza (600) erọ Izrẹl a rọ dhẹ kpohọ ẹwho Filistia jọ, a tẹ ruọ ẹwho nọ Akish, ovie Gat, o je su. (1 Sam. 27:2, 3) Eme Itai avọ ahwo riẹ a ti ru nọ Devidi ọ be dhẹ fiki ọkparesuọ Absalọm ọmọ riẹ na? Kọ a te whomahọ abọ Absalọm, kọ a te r’abọ muoma, manikọ a te whomahọ abọ Devidi avọ ahwo riẹ?

Dai roro epanọ o jọ okenọ Devidi ọ dhẹ no Jerusalẹm, kpohọ oria nọ a re se Bẹt-mahak, onọ otofa riẹ o rrọ “Uwou Ugbothabọ Na.” O wọhọ nnọ oye họ uwou urere nọ ọ rrọ oka Jerusalẹm evaọ ofẹ Ugbehru Olivi re a tẹ te fa Ukiekpotọ Kidrọn vrẹ. (2 Sam. 15:17) Etenẹ Devidi o jo kele egbaẹmo riẹ okenọ a jẹ fa ukiekpotọ na vrẹ. Rri! Orọnikọ emọ Izrẹl ọvo e jọ kugbei hi rekọ te ahwo Kẹret kpobi gbe ahwo Pẹlẹt kpobi. Ofariẹ, ahwo Git na kpobi a jariẹ re, koyehọ Itai avọ egbaẹmo egba ezeza (600) riẹ.—2 Sam. 15:18.

Avọ ororokẹ, Devidi ọ ta kẹ Itai nọ: “Eme who jẹ be nya lele omai re? Who zihe, re who lele ovie na [koyehọ Absalọm] ria, keme whẹ ọrara gbe ohwo nọ a ro no obọ ẹwho ra ze. Odẹ nọ ukpo ọvo whọ nyaze, kọ mẹ vẹ [nwani] ru owhẹ re ma gbe ghoro nẹnẹ, keme whọ riẹ nọ ma rẹ nya na, ma riẹ obonọ ma rẹ nya ha. Who zihe, re whọ rehọ imoni ra kpobi gboma; jọ ỌNOWO na o dhesẹ uvi uyoyou gbe orọwọ rọ kẹ owhai.”—2 Sam. 15:19, 20.

Uyo nọ Itai ọ kẹ u dhesẹ inọ Devidi ọvo o re lele. Ọ ta nọ: “Nọ ỌNOWO na ọ gbẹ rọ uzuazọ na, jegbe olori mẹ ovie na ọ gbẹ rọ na, oria kpobi nọ olori mẹ ovie na ọ nya, otẹrọ oria uwhu hayo oria uzuazọ, etẹe odibo ra ọ rẹ jọ re.” (2 Sam. 15:21) Ẹsejọhọ onana o lẹliẹ Devidi kareghẹhọ eme nọ Rut, oniode riẹ, ọ ta. (Rut 1:16, 17) Fikinọ eme nọ Itai ọ ta i duobọte udu riẹ, Devidi ọ tẹ ta kẹe nọ: “Whọ nya” fa Ukiekpotọ Kidrọn na vrẹ. Koyehọ “Itai, ohwo Git na, ọ tẹ nya haro vrẹ, ọye avọ ahwo riẹ kpobi gbe emọ esese nọ e jọ kugbe i.”—2 Sam. 15:22.

“Rọ kẹ Omai Ohrẹ”

Ahwo Rom 15:4 o ta nọ: “Eware kpobi nọ a kere oke anwae, a kere ai rọ kẹ omai ohrẹ.” Fikiere, u fo re ma nọ inọ, Eme ma rẹ sai wuhrẹ no oriruo Itai ze? Dai roro oware nọ o wọ riẹ ta nnọ Devidi ọvo o re lele. Dede nọ ọ jọ ọrara gbe ọnọ ọ dhẹ no obọ Filistia ziọ Izrẹl, Itai ọ riẹ inọ Jihova họ Ọghẹnẹ uzuazọ na gbe nnọ Devidi họ ọnọ Jihova o ro mu. Itai ọ daezọ egrẹ nọ ọ rrọ udevie emọ Izrẹl avọ Filistia ha. Itai ọ jọ oma Devidi ruẹ oware ezi jọ dede nọ ọ riẹ inọ Devidi họ ọnọ o kpe Goliat ọgwara ahwo Filistia na gbe ahwo ẹwho riẹ buobu. (1 Sam. 18:6, 7) Itai o rri Devidi wọhọ ohwo nọ o you Jihova yọ ababọ avro, o muẹrohọ uruemu ezi nọ Devidi o wo. Devidi omariẹ o te rri Itai ghare gaga. Whaọ, okenọ egbaẹmo Devidi avọ egbaẹmo Absalọm a jẹ họre, Devidi ọ rehọ Itai mu uzou abọvo abasa egbaẹmo riẹ.—2 Sam. 18:2.

U re woma re ma ruẹ ewoma nọ o rrọ amọfa oma, makọ uyẹ rai, ẹwho rai, hayo  ẹvẹrẹ rai, o tẹ make rọnọ egrẹ jọ ọ rrọ udevie ẹwho mai avọ ẹwho ahwo edekọ na. Epanọ usu Devidi avọ Itai o ga te u dhesẹ inọ ma rẹ sai fi ezadhe itieye na kparobọ nọ ma riẹ Jihova je you rie no na.

Nọ ma bi roro kpahe oriruo Itai na, ma rẹ sae nọ oma mai nọ: ‘Kọ me wo usu okpekpe utioye kugbe Kristi Jesu, Devidi Ologbo na? Kọ me bi dhesẹ inọ ọye ọvo me re lele ẹkwoma ọwhọ nọ me bi ro whowho usi Uvie na je ru ilele?’ (Mat. 24:14; 28:19, 20) ‘Eware vẹ mẹ te gwọlọ thihakọ rai re mẹ sai dhesẹ inọ ọye ọvo me bi lele?’

Enọ i wuzou uviuwou a rẹ sai je wo erere no oriruo Itai ze. Oma nọ o ro kpotọ kẹ Devidi avọ ẹjiroro riẹ re o lele ovie nọ Ọghẹnẹ o ro mu na u kpomahọ ahwo Itai. Epọvo na re, eware nọ enọ i wuzou uviuwou a jiroro nọ a re ru re a sae gọ Ọghẹnẹ ziezi i re kpomahọ uviuwou rai jẹ sae tubẹ wha ọbẹwẹ ubroke ze dede. Ghele na, ma wo imuẹro nana: “Enọ i wo ohrọoriọ eye [Jihova] rẹ re ohrọ rai.”—Ol. 18:25.

Nọ Devidi avọ Absalọm a fi ẹmo no, Ikereakere na e gbẹ ta ẹme kpahe Itai viere he. Rekọ umutho eme nọ Ebaibol e ta kpahe iẹe i dhesẹ oghẹrẹ ohwo nọ ọ jọ evaọ oke yena nọ akpọ ọ jẹ bẹ Devidi na. Odẹ Itai nọ a fihọ Ebaibol na u dhesẹ inọ Jihova o re muẹrohọ jẹ hwosa kẹ ohwo ẹgbakiete.—Hib. 6:10.