Enọ Ahwo nọ A s’Ebe

Jesu ọ ta usiuwoma nya ẹkwotọ na kpobi wariẹ. Kọ fikieme Pita ukọ na ọ rọ ta nnọ “ogbori” ahwo Ju gbe isu rai a ro kpei?—Iruẹru 3:17.

Okenọ ọ jẹ ta ẹme kẹ ogbotu ahwo Ju kpahe obọ nọ a wo evaọ uwhu Mesaya na, Pita ukọ na ọ ta nọ: “Mẹ riẹ no nọ ogbori wha ro ru oware na, wọhọ epanọ isu rai iru re na.” (Iruẹru 3:14-17) Ẹsejọhọ ahwo Ju jọ a riẹ hẹ inọ Jesu họ Mesaya na, yọ a wo otoriẹ iwuhrẹ riẹ gbe he. Rọkẹ ahwo Ju efa, oware nọ o lẹliẹ e rai jọ ogbori họ fikinọ a gwọlọ ru oreva Ọghẹnẹ hẹ, a te je wo eva iyoma, ihri-eriọ, gbe egrẹ.

Dai roro oghẹrẹ nọ ababọ isiuru nọ ibuobu a wo kpahe eruo oreva Jihova u kpomahọ oghẹrẹ nọ a rri iwuhrẹ Jesu. Jesu ọ jẹ rọ ehare wuhrẹ ahwo, yọ ọ jẹ fa otọ rai kẹ enọ e gwọlọ wo otoriẹ rai. Rekọ otu rai jọ a te yo no a vẹ nya vrẹ ọvo, a jẹ daoma re a wo otoriẹ eme nọ a yo na ha. Ẹdẹjọ, eva e tubẹ dha ilele riẹ jọ fiki eme jọ nọ Jesu ọ ta. (Jọn 6:52-66) Ahwo otiọye na a riẹ hẹ inọ Jesu ọ gwọlọ rehọ ehare na rọ riẹ sọ u no rai eva ze re a nwene iroro gbe owojẹ rai. (Aiz. 6:9, 10; 44:18; Mat. 13:10-15) A tubẹ daezọ họ inọ Ikereakere na e ruẹaro anwẹdẹ inọ Mesaya na ọ te rọ ehare wuhrẹ ahwo.—Ol. 78:2.

Ahwo jọ a siọ iwuhrẹ Jesu fiki eva iyoma rai. Okenọ ọ jọ uwou-egagọ wuhrẹ evaọ otẹwho riẹ, Nazarẹt, akpọ u gbe ahwo na “enu.” Rekọ ukpenọ a jẹ Jesu rehọ wọhọ Mesaya na, a tẹ jẹ nọ enọ kpahe uviuwou nọ o no ze: “Bovẹ ohwo ọnana o je wo eware enana? . . . Ọnana họ ọwena na ha, ọmọ Meri omoni Jemis gbe Josẹf gbe Judas gbe Saimọn, gbe imoni emetẹ riẹ ma gbẹ rọ etenẹ?” (Mak 6:1-3) Rọ kẹ ahwo Nazarẹt, iwuhrẹ riẹ i fioka ha fiki oghẹrẹ uviuwou nọ o no ze.

Kọ ẹvẹ kpahe isu egagọ na? Ibuobu rai a je se eme riẹ gboja ha fikinọ a rri rie kuẹku. (Jọn 7:47-52) A tẹ jẹ siọ iwuhrẹ riẹ fiki ihri-eriọ inọ ahwo kpobi a be dhẹ lele iei. (Mak 15:10) Yọ okenọ ọ whọku ikpahwo egagọ fiki eviẹhọ rai, eva e dha ibuobu rai. (Mat. 23:13-36) Jesu ọ whọku ai fikinọ a gwọlọ riẹ uzẹme na ha, ta nọ: “O da omẹ kẹ owhai eriẹizi! Keme wha tọlọ usiavẹ [eriariẹ] vrẹ; whai omarai wha rueva ha, enọ ejẹ ruẹe wha whahe rae.”—Luk 11:37-52.

Jesu ọ jọ ẹkwotọ na ta usiuwoma ikpe esa gbe ubro. O te je wuhrẹ ahwo buobu fihọ iruo usiuwoma ota na. (Luk 9:1, 2; 10:1, 16, 17) Jesu avọ ilele riẹ a ta usiuwoma na kẹre te epanọ otu Farisi na a jẹ rọ ta nọ: “Ahwo kpobi a dhẹ lele iei no.” (Jọn 12:19) Fikiere o nwane rọnọ ahwo Ju buobu a kare eriariẹ hẹ. Rekọ a ru oma rai họ “ogbori” keme a rọwo ho inọ Jesu họ Mesaya na. A wo uvẹ nọ a hai ro wuhrẹ re a riẹ nnọ ọye họ Mesaya na, a ve you rie, rekọ a daezọ họ. Ejọ i tube wo obọ evaọ uwhu Jesu. Oye jabọ nọ Pita ukọ na ọ rọ tuduhọ ibuobu rai awọ nọ: “Fikiere wha kuevarẹriẹ, wha je ziheze, re a ruẹse voro izieraha rai no, re ẹzi aruodhidhivio ono obọ Ọnowo na ze, jegbe re o vi Kristi na nọ a ro mu kẹ owhai ze, Jesu na.” (Iruẹru 3:19, 20) Rekọ u woma kẹhẹ inọ uwhremu na, ahwo Ju buobu, te “otu izerẹ buobu,” a gaviezọ. A gbẹ jọ ogbori hi. Ukpoye a te kurẹriẹ je wo aruoriwo Jihova.—Iruẹru 2:41; 4:4; 5:14; 6:7.