Odibo Oruọzewọ Na Avọ Ugboma Esuo Riẹ
Odibo Oruọzewọ Na Avọ Ugboma Esuo Riẹ
“Kọ ono họ odibo [orieyero, “NW”] oruọzewọ avọ areghẹ, nọ, olori riẹ o fihọ nọ o ri uwou riẹ, re oke ute ọ rehọ emu kẹ ae na?”—LUK 12:42.
1, 2. Obọdẹ onọ vẹ Jesu ọ nọ okenọ ọ jẹ fodẹ eka edẹ urere na?
OKENỌ ọ jẹ fodẹ eka edẹ urere na, Jesu ọ nọ inọ: “Kọ ono họ odibo [ọrigbo, NW] oruọzewọ, nọ o wo areghẹ nọ olori riẹ o fihọ, nọ o riwi uwou riẹ, re nọ oke u te ọ rehọ emu kẹ ae na?” Jesu ọ tẹ ta haro nọ a te rehọ ọrigbo na mu ọnọ o wuzou ekwakwa Olori na kpobi fiki oruọzewọ riẹ.—Mat. 24:45-47.
2 Emerae buobu nọ i kpemu, Jesu ọ nọ oghẹrẹ onọ ovo na. (Se Luk 12:42-44.) O se ọrigbo na “odibo,” hayo orieyero, ọ tẹ jẹ ta ẹme te ahwo “uwou riẹ.” Orieyero yọ ohwo nọ ọ rẹ rẹrote uwou, ọnọ a ro mu re ọ sẹro idibo efa. Rekọ orieyero na yọ odibo re. Ono họ ọrigbo, hayo orieyero nana, kọ ẹvẹ ọ be rọ rehọ ‘emu kẹ evaọ ẹruoke’? O roja kẹ omai kpobi re ma riẹ epanọ emuore abọ-ẹzi o bi ro te omai obọ.
3. (a) Ẹvẹ enọ i kparo evaọ Kristẹndọm a daoma fa otọ ẹme nọ Jesu ọ ta kpahe “ọrigbo” na no? (b) Ono họ “orieyero” hayo “ọrigbo” na, kọ amono họ ‘enọ o fihọ re a ri uwou riẹ na,’ hayo ahwo “uwou riẹ”?
3 Enọ i kparo gaga no evaọ egagọ Kristẹndọm a re rri eme Jesu nana wọhọ ẹsenọ i kie kpahe enọ i wo ekwa evaọ udevie enọ i se oma rai Ileleikristi. Rekọ Jesu, “olori” nọ a fodẹ evaọ ọtadhesẹ na, ọ ta ha inọ irigbo na a te jọ buobu yọ a te jọ ichọche na kpobi. Ukpoye, ọ ta vevẹ inọ “orieyero” hayo “ọrigbo” ọvo o ti ro mu re ọ sẹro eware riẹ kpobi. Fikiere wọhọ epanọ emagazini nana ọ ta no unuẹse buobu na, odibo na họ “uthuru okakao” na, koyehọ Ileleikristi kpobi nọ a rọ ẹzi wholo na. Wọhọ epanọ Usiuwoma Luk u dhesẹ, Jesu ọ nwane ta ẹme kpahe “uthuru okakao” na no ọ rọ ta kpahe odibo oruọzewọ na. (Luk 12:32) A te je dhesẹ utu ahwo ọvo nana wọhọ ‘enọ olori na o fihọ re a ri uwou riẹ,’ hayo ahwo “uwou riẹ,” rekọ Jesu ọ be rehọ eme nana ro dhesẹ owha-iruo rai omomọvo. Emamọ onọ jọ nọ o roma via họ, Kọ omomọvo nọ o ru utu ọrigbo na via o bi wo obọ evaọ emu abọ-ẹzi nọ a be kẹ evaọ ẹruoke? Uyo na o rrọ vevẹ nọ ma tẹ kiẹ eme nọ Ikereakere na e ta riwi ziezi.
Odibo Jihova Evaọ Oke Anwae
4. Odẹ vẹ Jihova o ro se orẹwho Izrẹl, kọ eme u fo nọ ma rẹ riẹ kpahe orẹwho na?
4 Okenọ Jihova ọ jẹ ta ẹme kpahe ahwo riẹ, orẹwho Izrẹl, o se rai kpobi odibo. “’Whai họ isẹri mẹ,’ ere ỌNOWO na ọ tae, ‘gbe odibo mẹ nọ omẹ sanọ.’” (Aiz. 43:10) Ahwo orẹwho na kpobi o se odibo na. Rekọ o roja re ma riẹ nọ izerẹ gbe otu Livai na ọvo a je wuhrẹ ahwo orẹwho na izi Ọghẹnẹ.—2 Irv. 35:3; Mal. 2:7.
5. Wọhọ epanọ Jesu ọ ta, enwene ologbo vẹ ọ be te roma via?
5 Kọ orẹwho Izrẹl na họ ọrigbo nọ Jesu ọ ta ẹme kpahe na? Ijo. Ma riẹ onana fiki eme nọ Jesu ọ ta kẹ ahwo Ju erọ oke riẹ: “A re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ.” (Mat. 21:43) U re vevẹ, enwene ọ be te roma via. Jihova ọ te rehọ orẹwho okpokpọ ru iruo. Rekọ, rọ kpahe amọfa nọ a re wuhrẹ izi Ọghẹnẹ, iruo ọrigbo nọ Jesu ọ fodẹ na o wọhọ orọ ọnọ Ọghẹnẹ o se “odibo” na evaọ oke Izrẹl.
Ọrigbo Ẹrọwọ na Ọ Roma Via No
6. Orẹwho okpokpọ vẹ a yẹ eva Pẹntikọst 33 C.E., kọ amono a zihe ruọ ahwo orẹwho na?
6 Emọ Izrẹl abọ-ẹzi họ enọ i ru orẹwho okpokpọ na via, koyehọ ‘Izrẹl Ọghẹnẹ na.’ (Gal. 6:16; Rom 2:28, 29; 9:6) A yẹ orẹwho na okenọ Ọghẹnẹ o ku ẹzi riẹ ku ilele Jesu eva Pẹntikọst 33 C.E. No oke yena vrẹ, Ileleikristi nọ a rọ ẹzi wholo kpobi a te zihe ruọ ahwo orẹwho na, onọ o rrọ utu ọrigbo nọ Jesu Kristi, Olori na, o ro mu. A kẹ omomọvo orẹwho na iruo ewhowho emamọ usi na. (Mat. 28:19, 20) Kọ onana u dhesẹ nọ omomọvo rai ọ te nwani wo obọ evaọ emu abọ-ẹzi nọ a rẹ rọ kẹ ahwo Ọghẹnẹ eva ẹruoke? Joma rri epanọ Ikereakere na e kẹ uyo onọ nana.
7. Eme họ ugogo iruo ikọ na vẹre, kọ uwhremu na ẹvẹ a ro fiba iruo rai?
7 Okenọ Jesu ọ salọ ikọ 12 na, ugogo iruo nọ ọ kẹ rai họ re a ta usiuwoma. (Se Mak 3:13-15.) Iruo nana o rọwo kugbe ubiẹme Griki na apostolos, onọ otofa riẹ o rrọ “vi vrẹ.” Rekọ, nọ oke o be nyaharo na, kiọkọ omojọ re a rehọ ukoko Ileleikristi na mu, iruo ikọ na i te ti zihe ruọ ọkwa ẹruọsa.—Iruẹru 1:20-26.
8, 9. (a) Eme họ ugogo owha-iruo ikọ 12 na? (b) Amono ọfa ugboma esuo na o rọwo inọ a rehọ ewha-iruo efa kẹ?
8 Didi oware o mae jọ ikọ 12 na oja? Ma rẹ ruẹ uyo na evaọ eware nọ e via nọ oke Pẹntikọst o nwane vrẹ no. Okenọ ẹwhọ ọ roma via fiki emu nọ a jẹ ghale kẹ eyae-uku, ikọ 12 na a te se ilele na ẹgwae jẹ ta nọ: “Ufore ma siọ ẹme Ọghẹnẹ ba ma lele esi emuore he.” (Se Iruẹru Ikọ Na 6:1-6.) Ikọ na a tẹ rehọ inievo efa nọ i te ziezi mu re a rẹrote “iruo enana” nọ i wuzou na re ikọ na a ruẹse tẹrovi “usiuwoma o ta.” Jihova ọ ghale ọruẹrẹfihotọ nana keme “ẹme Ọghẹnẹ o te muhọ ẹvaha; otu ilele na a te dhe evievihọ eva Jerusalem.” (Iruẹru 6:7) Fikiere ikọ na họ enọ i wo ugogo owha-iruo ọrọ emu abọ-ẹzi nọ a rẹ rọ ko ahwo Ọghẹnẹ.—Iruẹru 2:42.
9 Nọ oke o be nyaharo na, a tẹ rọ ewha-iruo sa-sa kẹ amọfa. Ẹzi ọfuafo na o kpọ ukoko Antiọk re o vi Pọl avọ Banabas kpohọ iruo imishọnare. A tẹ jẹ riẹ ae wọhọ ikọ, dede nọ a jọ usu ikọ 12 ọsosuọ na ha. (Iruẹru 13:1-3; 14:14; Gal. 1:19) Ugboma esuo nọ o jọ obọ Jerusalẹm o rọwo kugbe onana. (Gal. 2:7-10) Nọ oyena o nwane vrẹ no, Pọl ọ tẹ jọ omọvo enọ e jẹ rọ emu abọ-ẹzi ko Ileleikristi. Oke nana ẹzi Ọghẹnẹ ọ rọ wọe kere ileta ọsosuọ riẹ.
10. Evaọ ikpe-udhusoi ọsosuọ na, kọ Ileleikristi nọ a wholo na kpobi a jẹ ruẹrẹ emuore abọ-ẹzi họ? Ru ẹme na vẹ.
10 Dede na, kọ Ileleikristi nọ a rọ ẹzi wholo na kpobi họ enọ i je wo obọ evaọ ẹruọsa iruo usiuwoma na gbe ẹruẹrẹkpahe emu abọ-ẹzi? Ijo. Pọl ukọ na ọ nọ inọ: “Kọ ai kpobi ikọ re? Ai kpobi a rọ eruẹaro? Ai kpobi a rọ iwuhrẹ? Ai kpobi a rọ iruiruo eware igbunu?” (1 Kọr. 12:29) Dede nọ Ileleikristi nọ a rọ ẹzi wholo na kpobi a jẹ ta usiuwoma, imaree evaọ usu rai ọvo Ọghẹnẹ ọ kẹ ẹzi kere ebe 27 erọ Ikereakere Griki Ileleikristi na.
Ọrigbo Ẹrọwọ na Evaọ Oke Mai Na
11. Ekwakwa vẹ a rehọ ọrigbo na mu re ọ rẹrote?
11 Eme ọ Jesu nọ e rrọ Matiu 24:45 i dhesẹ vevẹ inọ utu ọrigbo nọ o wo ẹrọwọ avọ areghẹ ọ te gbẹ jọ otọakpọ evaọ oke urere na. Eviavia 12:17 o dhesẹ enana wọhọ otu ubi aye na “nọ i kiọkọ.” Wọhọ ẹko, a rehọ enana nọ i kiọkọ na mu re a rẹrote ekwakwa Kristi nọ e rrọ otọakpọ. Ekwakwa “uwou” na nọ a rehọ odibo oruọzewọ na mu re ọ rẹrote na họ eware Olori na nọ e rrọ otọakpọ, enọ i kugbe idibo riẹ gbe ekwakwa nọ a be rọ wha emamọ usi na haro.
12, 13. Ẹvẹ Oleleikristi ọ rẹ rọ riẹ nnọ o wo use obọ odhiwu?
12 Ẹvẹ Oleleikristi ọ rẹ rọ riẹ sọ o wo ẹruore obọ odhiwu onọ u dhesẹ nnọ ọ rrọ omọvo okiọkotọ Izrẹl abọ-ẹzi na? A rẹ ruẹ uyo na evaọ eme nọ Pọl ukọ na o kere se ibe enọ i wo ẹruore obọ odhiwu na: “Utho ahwo kpobi nọ Ẹzi Ọghẹnẹ o re suo, ae họ emọ Ọghẹnẹ. Keme wha mi ẹzi igbo nọ owha rẹ rọ dhẹ ozọ họ; rekọ wha mi ẹzi nọ o ru owhai emọ, onọ ma je bo nọ, ‘Aba! Ọsẹ!’ Ukpuzou oma Ẹzi na ọvo ọrọ izi mai isẹri ese kẹ nọ mai arọ emọ Ọghẹnẹ. Ma tẹ rọ emọ, koyehọ ereuku; ereuku Ọghẹnẹ, ereuku kugbe Kristi; thakpinọ ma lele irie gbẹ ruẹ uye re ma gbe lele ie wo oruaro re.”—Rom 8:14-17.
13 Re ma tae lọlọhọ, Ọghẹnẹ ọ rọ ẹzi ọfuafo riẹ wholo ahwo nana, yọ a wo “use” obọ odhiwu. (Hib. 3:1) Ọghẹnẹ ọvo o se ahwo nana. Yọ a jẹ use na rehọ jẹ rọwo inọ a rẹ jọ emọ Ọghẹnẹ ababọ ozọ hayo iroro ivẹ. (Se 1 Jọn 2:20, 21.) Fikiere orọnikọ ae ọvo a salọ oma rai hi, rekọ Jihova ọ rọ ẹkwoma ẹzi ọfuafo na salọ ae.—2 Kọr. 1:21, 22; 1 Pita 1:3, 4.
Eriwo nọ Ọ Gba
14. Ẹvẹ otu nọ a rọ ẹzi wholo na a rri use rai?
14 Ẹvẹ u fo nnọ enọ a rọ ẹzi wholo na a re rri omobọ rai nọ a be hẹrẹ osohwa obọ odhiwu rai na? A riẹ inọ dede nọ Ọghẹnẹ ọ salọ e rai, osa na u ri te ai obọ họ. Re osa na u te ai obọ, a re kru ẹrọwọ rai rite uwhu. Avọ omaurokpotọ, a be raro kele Pọl ta nọ: “Imoni, me ri roro ie nọ me ru rie omẹ no ho; rekọ oware ovo no me re ruẹ, eware obọ emu e rẹ thọrọ omẹ ẹro, mẹ vẹ rẹriẹ ovao ku enọ erọ obaro. Me bi tunye haro ri obọ oba fiki [osohwa] ulogbo enọ Ọghẹnẹ o se eva Kristi Jesu.” (Fil. 3:13, 14) Okiọkotọ nọ a wholo na a rẹ daoma ruẹ nnọ ‘a nyate ziezi rọkẹ use nọ a se rai na, avọ udhedhẹ kpobi gbe omaurokpotọ,’ be rọ “ozọ-odhẹ avọ enuho” ru onana.—Ẹf. 4:1, 2; Fil. 2:12; 1 Tẹs. 2:12.
15. Ẹvẹ Ileleikristi a re rri enọ e rẹ re ebrẹdi jẹ da udi evaọ Ekareghẹhọ na, kọ ẹvẹ enọ a wholo na a re rri oma rai?
15 Evaọ abọdekọ riẹ, ẹvẹ Ileleikristi efa a re rri ohwo nọ ọ ta nọ a rọ ẹzi wholo iei, fikiere ọ tẹ be re ebrẹdi jẹ da udi evaọ Ekareghẹhọ na? A re gu ei ẹdhọ họ. Ọye avọ Jihova a wo ẹme na. (Rom 14:12) Rekọ Ileleikristi nọ a ginẹ rọ ẹzi wholo a rẹ gwọlọ nọ amọfa a ga ae he. A re roro ho inọ fikinọ a rọ ẹzi wholo ai, a riẹ vi inievo nọ i wo eriariẹ ziezi, enọ e rrọ usu “otu obuobu” na. (Evia. 7:9) A re roro ho inọ a wo ẹzi ọfuafo vi otu “igodẹ efa” na. (Jọn 10:16) A re rẹro nọ amọfa a te ga ae he; yọ a re ru oma wọhọ ẹsenọ a rro vi ekpako ukoko ho.
16-18. (a) Kọ enọ a rọ ẹzi wholo na kpobi a bi wo obọ evaọ eware ekpokpọ nọ a re wuhrẹ ahwo Ọghẹnẹ? Kẹ oriruo. (b) Fikieme u gbe du gwọlọ họ re Ugboma Esuo na o nọ mi omomọvo enọ a wholo na kpobi?
16 Kọ enọ a wholo kpobi nọ e rrọ otọakpọ na a be rọ edhere jọ ru iruo kugbe re a wuhrẹ ahwo Ọghẹnẹ eware ekpokpọ no Ebaibol na ze? Ijo. Dede nọ utu ọrigbo na kpobi a kẹ owha-iruo emu abọ-ẹzi nọ a rẹ rọ ko ahwo Ọghẹnẹ, orọnikọ oghẹrẹ iruo ọvo na aikpobi a wo ho. (Se 1 Ahwo Kọrint 12:14-18.) Wọhọ epanọ ma ta no ẹsejọ na, eva ikpe-udhusoi ọsosuọ, enọ a wholo na kpobi a jẹ ta usiuwoma. Rekọ ejọ rai ọvo Ọghẹnẹ o ro kere Ebaibol na jẹ rẹrote ukoko Ileleikristi na.
17 Wọhọ oriruo: Ikereakere na e jọ eria jọ dhesẹ nọ a rẹ sai tu ohwo ẹdhọ kpobọ ukoko na. (Mat. 18:17) Rekọ, ma tẹ gwọlọ otọ riẹ, ekpako ukoko na họ enọ e rẹ rehọ ohwo guẹdhọ. Ekpako na a rẹ nọ inievo na kpobi epanọ a roro tao ho re a te ti bruoziẹ. Iruo itienana a rehọ e rai mu kẹ; fikiere ukoko na soso a bi ru iruo na kẹ na.
18 Epọvo na re nẹnẹ, umutho ezae jọ ọvo evaọ usu enọ a wholo na a dikihẹ kẹ utu ọrigbo na. Ma riẹ rai wọhọ Ugboma Esuo Isẹri Jihova. Ezae nana nọ a rọ ẹzi wholo na a be rẹrote iruo Uvie na gbe ẹruẹrẹkpahe emu abọ-ẹzi. Nwane wọhọ epanọ o jọ evaọ ikpe-udhusoi ọsosuọ na, Ugboma Esuo na a rẹ nọ omomọvo utu ọrigbo na ha re a tẹ te jiroro jọ. (Se Iruẹru Ikọ Na 16:4, 5.) Ghele na enọ a rọ ẹzi wholo na kpobi a bi wo obọ ziezi evaọ obọdẹ iruo ivuẹvu nọ e rrọ otọ na. ‘Ọrigbo nọ o wo ẹrọwọ avọ areghẹ na’ ọ wọhọ ugboma ọvo, rekọ omomọvo rai o wo ọvuọ iruo riẹ.—1 Kọr. 12:19-26.
19, 20. Uvi eriwo vẹ otu obuobu na a wo kpahe ‘ọrigbo nọ o wo ẹrọwọ avọ areghẹ na’ gbe Ugboma Esuo riẹ?
19 Erere vẹ otu obuobu nọ o bi dhe evievihọ na, enọ i wo ẹruore uzuazọ ebẹdẹ bẹdẹ evaọ otọakpọ na, a rẹ sai wo no eme nọ ma ta no na ze? Wọhọ enọ e rrọ usu ekwakwa Ovie na, a be rọ evawere ru lele ọruẹrẹfihotọ Ugboma Esuo na, onọ u dikihẹ kẹ ‘ọrigbo nọ o wo ẹrọwọ avọ areghẹ na.’ Emu abọ-ẹzi nọ o bi no obọ Ugboma Esuo na ze ọ be were otu obuobu na. Yọ eva oke ovo na, nọ a be rọ adhẹẹ kẹ utu ọrigbo na, otu obuobu na a rẹ yọroma re a siọ ọghọ nọ o vrẹta ba ẹrọkẹ enọ a wholo na. Oleleikristi nọ Ọghẹnẹ ọ ginẹ rọ ẹzi riẹ wholo ọ rẹ gwọlọ hayo tube rẹro nọ a rehọ ọghọ ologbo otiọye na kẹe he.—Iruẹru 10:25, 26; 14:14, 15.
20 O tẹ make rọnọ usu ekwakwa “uwou” na ma rrọ, koyehọ enọ a wholo na, hayo ofẹ otu obuobu na ma rrọ, jọ o jọ ọtamuo mai re ma ru lele ọruẹrẹfihotọ kpobi nọ odibo oruọzewọ na avọ Ugboma Esuo riẹ a bi ru. Jọ mai omomọvo ọ ‘hai rroro’ re ma je kru ẹrọwọ mai rite urere.—Mat. 24:13, 42.
Kọ Whọ Kareghẹhọ?
• Ono họ ‘ọrigbo nọ o wo ẹrọwọ avọ areghẹ na,’ kọ amono họ eware uwou na?
• Ẹvẹ ohwo ọ rẹ rọ riẹ sọ o wo use obọ odhiwu?
• Amono a wo owha-iruo orọ iwuhrẹ ekpokpọ Ikereakere na nọ a rẹ rọ ko ahwo Ọghẹnẹ?
• Ẹvẹ Oleleikristi nọ a rọ ẹzi wholo o re rri oma riẹ?
[Enọ Uwuhrẹ]
[Uwoho nọ o rrọ ẹwẹ-obe avọ 23]
Nẹnẹ, Ugboma Esuo na u dikihẹ kẹ ‘ọrigbo nọ o wo ẹrọwọ avọ areghẹ na.’ Ere o jọ evaọ ikpe-udhusoi ọsosuọ