Siobọno Iruo kẹ Amọfa Fikieme, Kọ Ẹvẹ Ma Sai ro Ru Ere?

IRUO nọ a re siobọno kẹ amọfa yọ oware nọ u muhọ kri no taure a tẹ te ma otọakpọ na. Jihova ọ ma Ọmọ ọvo riẹ, ọ tẹ rehọ Ọmọ na ru iruo wọhọ “osu iruo” rọ ma ehrugbakpọ na. (Itẹ 8:22, 23, 30; Jọn 1:3) Okenọ Ọghẹnẹ ọ ma ọzae avọ aye ọsosuọ na, ọ ta kẹ ae nọ a ‘yẹ re a vọ akpọ na re a rẹro tei.’ (Emu. 1:28) Ọmemama na ọ kẹ ahwo-akpọ iruo re a ru otọakpọ na kpobi zihe ruọ Aparadase wọhọ ogba Idẹn. Ẹhẹ, no emuhọ ze Jihova o bi ro siobọno iruo kẹ amọfa, yọ epọvo na idibo riẹ a bi ru re.

Eme o gwọlọ re a siobọno iruo kẹ amọfa? Fikieme ekpako ukoko a rẹ rọ daoma siobọno iruo jọ kẹ inievo efa, kọ ẹvẹ a rẹ sai ro ru ere?

Eme U Dhesẹ re A Siobọno Iruo kẹ Amọfa?

Re a siobọno iruo kẹ amọfa u dhesẹ nnọ whọ rẹ rehọ abọjọ iruo ra kẹ amọfa. Fikiere, onana o gwọlọ nọ who re se amọfa re a kuomagbe owhẹ ru oware jọ. Onana o rẹ whae ze nọ who re ro siobọno iruo ra jọ.

Inievo nọ a kẹ iruo evaọ ukoko na a rẹ  daoma ru iruo rai ziezi, a rẹ niyẹrẹ oghẹrẹ nọ a ru te, yọ a sae jẹ nọ ohwo nọ ọ kẹ rai iruo na enọ otẹrọnọ oware jọ u vẹ rai ẹro ho. Rekọ owha-iruo na o gbẹ rrọ uzou ọnọ o siobọnoi kẹ ohwo ọdekọ na. Ọ rẹ nọ re ọ riẹ epanọ ohwo na o ru iruo na te no, ọ vẹ jẹ kẹe ohrẹ nọ u fo. Ghele na, ahwo jọ a rẹ sae nọ inọ, ‘Fikieme who je siobọno iruo kẹ amọfa otẹrọnọ whẹ ọvo ọ sai ru iruo na?’

Fikieme Ma je Siobọno Iruo?

Roro kpahe oriruo Jihova: okenọ ọ ma Ọmọ ọvo riẹ no ọ tẹ kẹe uvẹ re o wo obọ evaọ ẹma eware efa kpobi. Ẹhẹ, “eva riẹ a jẹ ma eware kpobi, enọ erọ evaọ odhiwu gbe akpọ, enọ a rẹ ruẹ gbe enọ a rẹ ruẹ hẹ kpobi.” (Kọl. 1:16) Ọmemama na ọvo ọ hẹ sae ma eware na kpobi, rekọ ọ gwọlọ nọ Ọmọ riẹ o wo oghọghọ orọ ẹma eware. (Itẹ 8:31) Onana u fi obọ họ kẹ Ọmọ na riẹ kpahe oghẹrẹ nọ Ọghẹnẹ ọ rrọ. Ọsẹ na ọ rehọ uvẹ yena je ro wuhrẹ Ọmọ riẹ.

Okenọ Jesu Kristi ọ jọ otọakpọ, ọ raro kele oghẹrẹ nọ Ọsẹ riẹ o ro siobọno iruo kẹ amọfa. Ọ rehọ ẹmẹrera wuhrẹ ilele riẹ. O vi ikọ 12 na karo kpohọ usiuwoma ota, uwhremu na o te vi ilele 70 efa. (Luk 9:1-6; 10:1-7) Okenọ Jesu o te ekwotọ yena, yọ ilele riẹ a ruẹrẹ idu ahwo na kpahe no. Nọ o je no otọakpọ, Jesu ọ tẹ kẹ ilele riẹ nọ o wuhrẹ no na owha-iruo ulogbo, onọ u kugbe ewhowho emamọ usi na.—Mat. 24:45-47; Iruẹru 1:8.

A rẹ jọ ukoko Ileleikristi na siobọno iruo kẹ amọfa gaga a ve je wuhrẹ ahwo. Pọl ukọ na ọ ta kẹ Timoti nọ: ‘Mu eware nana họ obọ ahwo nọ a fieva họ, re ae omarai a rehọ ai wuhrẹ amọfa.’ (2 Tim. 2:2) Ẹhẹ, enọ i wo eriariẹ ziezi a re wuhrẹ amọfa, enọ a wuhrẹ no na a ve je wuhrẹ amọfa.

Nọ ọkpako ukoko o te bi siobọno iruo riẹ jọ, onana u re ru eva were inievo efa fikinọ a bi wo obọ evaọ amọfa nọ a re wuhrẹ jẹ rẹrote evaọ ukoko na. Ekpako ukoko a rẹ kareghẹhọ nọ ohwo-akpọ ọvuọvo ọ riẹ re he, fikiere onana o rẹ tubẹ mae lẹliẹ ekpako ghale iruo kẹ amọfa. Ebaibol e ta nọ: “Areghẹ ọ rẹ jọ rọ kẹ enọ e rehọ oma kpotọ.” (Itẹ 11:2) Ohwo omaurokpotọ ọ rẹ riẹ epanọ ẹgba riẹ o mu. Whẹ ọvo whọ tẹ gwọlọ ru eware kpobi, who ti kp’oma ra no, who gbe ti je wo oke nọ whọ rẹ raha kugbe uviuwou ra ha. Fikiere o rrọ oware areghẹ re who siobọno iruo kẹ amọfa. Wọhọ oriruo, roro kpahe oniọvo nọ ọ rrọ ọnọ o re koko iruẹru ugboma ekpako na họ. Ọ rẹ sae ta kẹ ekpako efa re a kiẹ epanọ ukoko na o raha igho. Onana u ve fi obọ họ kẹ ekpako edekọ na riẹ epanọ ugho o be rọ ziọ ukoko na gbe epanọ a be raha iẹe.

Iruo nọ a re siobọno kẹ amọfa evaọ ukoko na u re fi obọ họ kẹ amọfa riẹ oghẹrẹ nọ a re ru eware evaọ ukoko na, o rẹ lẹliẹ oniọvo nọ o bi siobọno iruo na riẹ epanọ inievo efa a wo eriariẹ te. Fikiere, ekpako a rẹ rehọ iruo nọ a bi siobọno “jawo” idibo iruiruo sọ a te.—1 Tim. 3:10.

Ukuhọ riẹ, nọ ekpako a te siobọno iruo yọ a bi dhesẹ nnọ a fievahọ amọfa. Pọl ọ wha Timoti lele oma je wuhrẹ iẹe iruo  imishọnare na. Aimava na a tẹ te kẹle ohwohwo gaga. Pọl o se Timoti “ọmọ uzẹme mẹ eva orọwọ na.” (1 Tim. 1:2) Epọvo na re, usu Jihova avọ Jesu o ga thesiwa nọ a je ru iruo kugbe ma eware efa kpobi. Nọ ekpako a te bi siobọno iruo kẹ inievo efa, a ti wo usu okpekpe kugbe ai.

Oware nọ Otujọ A gbẹ rọ Gwọlọ Siobọno Iruo kẹ Amọfa Ha

Dede nọ a riẹ nọ irere e riẹ re a siobọno iruo kẹ amọfa, onana o rẹ jọ bẹbẹ kẹ ekpako ukoko jọ, ẹsejọhọ bi roro nọ a gbẹ te riẹ ae tere he. A re roro nọ a gbẹ rrọ obaro ho eware e te riẹ nya ha. Rekọ, kareghẹhọ nnọ taure Jesu o te ti zihe kpobọ odhiwu, ọ kẹ ilele riẹ owha-iruo ulogbo, ọ riẹ inọ a ti ru iruo nọ e rro vi enọ o ru!—Mat. 28:19, 20; Jọn 14:12.

Ekpako jọ a siobọno iruo kẹ amọfa evaọ okejọ, rekọ enọ a kẹ iruo na a ru rai ziezi hi. Ekpako itieye na a rẹ sai roro nọ a te mai ru iruo na woma jẹ vẹrẹ. Rekọ roro kpahe oriruo Pọl. Ọ riẹ nnọ erere ọ riẹ re o siobọno iruo kẹ amọfa, rekọ ọ tẹ jẹ riẹ nnọ enọ ọ kẹ iruo na a ti ru ei te ẹgwọlọ riẹ hẹ. Evaọ erẹ imishọnare ọsosuọ riẹ, Pọl o wuhrẹ Mak, ọnọ ọ wha lele oma. O da Pọl gaga nọ Mak ọ dhẹ siẹe ba zihe kpo. (Iruẹru 13:13; 15:37, 38) Rekọ Pọl o wuhrẹ amọfa ghele. Wọhọ epanọ ma fodẹ ẹsejọ na, ọ wha Timoti lele oma. Nọ o wuhrẹ Timoti ziezi no, ọ tẹ nya siẹe ba obọ Ẹfẹsọs jẹ kẹe udu nọ ọ rẹ rọ rehọ ekpako ukoko gbe idibo iruiruo mu.—1 Tim. 1:3; 3:1-10, 12, 13; 5:22.

Epọvo na re, ekpako ukoko nẹnẹ a re wuhrẹ amọfa o tẹ make rọnọ oniọvo jọ nọ a wuhrẹ no okejọ ọ riẹ ru hu. O roja o tẹ jẹ rrọ oware areghẹ re ma daoma fievahọ amọfa je wuhrẹ ai. Rekọ eme ekpako a rẹ kareghẹhọ nọ a te bi siobọno iruo kẹ amọfa?

Epanọ A re ro Siobọno Iruo kẹ Amọfa

Re who te siobọno iruo kẹ amọfa, roro kpahe epanọ inievo nọ who wo họ iroro na a woma te kẹ iruo na. Nọ ẹbẹbẹ o jọ ẹghale emuore evaọ Jerusalẹm, ikọ na a salọ “imahrẹ nọ a be fa odezi [rai], nọ Ẹzi avọ areghẹ e vọ oma.” (Iruẹru 6:3) Whọ tẹ rọ iruo kẹ ohwo nọ a re fievahọ họ, o ti ru iruo na ha. Fikiere kake rehọ iruo nọ e rro ho rọ kẹe. O te ru iruo na, ọ te sai ru iruo nọ e rro viere.

Rekọ eware efa e riẹ. Ahwo a rrọ epọvo ho. Yọ ejọ a wo eriariẹ vi ejọ. Oniọvo nọ ọ rẹ whẹtiẹ ahwo họ oma jẹ sasa oma ziezi o fo kẹ ọruẹrẹahwohọ, rekọ oniọvo nọ o re muẹrohọ otọ ziezi jẹ rrọ kpatiẹ ọ rẹ sai fi obọ họ kẹ okere-obe ukoko na. Oniọvo-ọmọtẹ nọ o re ru ona gaga ọ rẹ sai fi obọ họ ruẹrẹ idodo họ Ọgwa Uvie evaọ oke Emu Owọwọ.

Whọ tẹ be rehọ iruo kẹ ohwo, dhesẹ iruo na vevẹ kẹe. Taure Jọn Ọhọahwo-Ame na o te ti vi ilele riẹ bru Jesu, ọ ta kẹ ae oware nọ ọ gwọlọ riẹ gbe oghẹrẹ onọ nọ a rẹ nọ Jesu. (Luk 7:18-20) Evaọ abọdekọ riẹ, okenọ Jesu ọ ta kẹ ilele riẹ re a koko  emuore nọ ogbotu jọ ọ re kiọkọ, o dhesẹ oware nọ o wha riẹ ze vevẹ kẹ ae he. (Jọn 6:12, 13) Oghẹrẹ iruo na gbe epanọ ohwo na o wo eriariẹ whọ te rọ riẹ utho eme nọ whọ rẹ ta kẹe. Ọnọ a kẹ iruo na gbe ọnọ ọ kẹ riẹ iruo na a rẹ riẹ epanọ u fo nnọ a re ru iruo na woma te, gbe etoke nọ a rẹ hae rọ n’iyẹrẹ. Aimava na a rẹ riẹ eware nọ i fo nnọ ohwo nọ o bi ru iruo na ọ rẹ rehọ areghẹ obọ riẹ ru. Otẹrọnọ iruo na i wo oke, o te mai woma re imava na a rọwo kugbe ẹdẹ na ukpenọ a rẹ ta kẹ ohwo na ọvo nnọ ẹdẹ otiọnana o re ku iruo na họ.

Ohwo nọ a kẹ iruo na a rẹ kẹe ugho, ekwakwa, gbe obufihọ nọ ọ gwọlọ. U fo re amọfa a riẹ kpahe ohwo nọ whọ be rọ iruo na kẹ. Okenọ Jesu ọ kẹ Pita “isiavẹ uvie odhiwu,” o ru ere evaọ iraro ilele edekọ na. (Mat. 16:13-19) Epọvo na re, ẹsejọ u re woma re a ta kẹ ukoko na ahwo nọ a bi ru oghẹrẹ iruo jọ.

Oware ofa o riẹ nọ u fo nnọ ma rẹ jọ yọrọ oma. Whọ tẹ be gwọlọ je ru iruo nọ who siobọno kẹ omọfa, o wọhọ ẹsenọ whọ be ta kẹ ohwo na nọ, “Me fievahọ owhẹ tere he.” O ginẹ rrọ uzẹme inọ ẹsejọ ohwo na o ti ru iruo na woma te epanọ whọ gwọlọ họ. Ghele na, whọ tẹ kẹ ohwo na uvẹ ziezi, o rẹ lẹliẹe wo udu gbe eriariẹ evaọ iruo na. Orọnikọ onana u dhesẹ nnọ whọ rẹ gbẹ nwani wo isiuru kpahe ẹnyaharo iruo na ha ha. Dede nọ Jihova ọ kẹ Ọmọ riẹ iruo evaọ etoke emama, o dhomahọ iruo na ghele. Ọ ta kẹ Osu Iruo na nọ: ‘Joma ma ohwo wọhọ uwoho mai.’ (Emu. 1:26) Fikiere, whọ rẹ rehọ ẹmeunu gbe uruemu tha iruo na uke, who ve je jiri ohwo na kẹ omodawọ riẹ. O te ru iruo na te oria jọ no, kiẹ iruo na riwi. Otẹrọnọ ọ be riẹ iruo na ru ziezi hi, kẹe ohrẹ nọ u re fi obọ họ kẹe. Kareghẹhọ nọ o gbe ru iruo na woma ha, e rrọ owhẹ uzou.—Luk 12:48.

Inievo buobu a wo erere okenọ ekpako ukoko nọ i wo isiuru kpahe ae a rehọ iruo kẹ ae. Evaọ uzẹme, u fo re ekpako ukoko kpobi a raro kele Jihova evaọ iruo nọ a re siobọno kẹ amọfa.

[Ẹkpẹti nọ ọ rrọ ẹwẹ-obe avọ 29]

IRUO NỌ A RE SIOBỌNO KẸ AMỌFA

• u re fi obọ họ kẹ ai wo oghọghọ ọrọ oware nọ a rọ obọ rai ru

• o rẹ wha ẹnyaharo ze

• o rrọ oware areghẹ gbe omaurokpotọ

• yọ edhere nọ ma re ro wuhrẹ amọfa

• u re dhesẹ nnọ ma fievahọ ai

[Ẹkpẹti nọ ọ rrọ ẹwẹ-obe avọ 30]

EPANỌ A RE RO SIOBỌNO IRUO KẸ AMỌFA

• Salọ ahwo nọ a fo kẹ iruo na

• Dhesẹ iruo na kẹ ai vevẹ

• Dhesẹ epanọ a re ru iruo na woma te

• Kẹe eware nọ ọ gwọlọ kẹ iruo na

• Wo isiuru kpahe iruo na, je dhesẹ nnọ who fievahọ iẹe

• Riẹ nọ te iruo na i woma hayo i yoma, uzou ra e rrọ

[Uwoho nọ o rrọ ẹwẹ-obe avọ 31]

Whọ tẹ kẹ ohwo iruo no who re je wo isiuru kpahe ẹnyaharo iruo na