Iruo nọ A re Ru Kugbe O rẹ Wha Ẹnyaharo Abọ-Ẹzi Ze

AHWO nọ a gwọlọ wo uviuwou nọ u se eware abọ-ẹzi gboja a re ru iruo kugbe. Okenọ Jihova ọ ma ọzae avọ aye ọsosuọ na, o fiẹgba họ epanọ u wuzou te re a ru iruo kugbe. Ivi o re ru iruo kugbe Adamu wọhọ “ofiobọhọ” riẹ. (Emu. 2:18) Ọzae avọ aye a rẹ jọ orọo fi obọ họ kẹ ohwohwo. (Ọtausi. 4:9-12) Re esẹgbini gbe emọ a sai ru iruo nọ Jihova ọ kẹ rai gba, a re ru iruo kugbe.

Uwuhrẹ Ebaibol Uviuwou

Barry avọ Heidi a yẹ emọ isoi. A ruẹ nnọ uwuhrẹ uviuwou nọ aikpobi a be daoma ru u bi fi obọ họ kẹ ai wo ẹnyaharo. Barry ọ ta nọ: “Mẹ rẹ kẹ emọ na ẹme nọ a rẹ ruẹrẹ kpahe evaọ uwuhrẹ uviuwou mai. Mẹ rẹ ta kẹ ai re a ruẹrẹ eme fihọ nọ a te ta kpahe uzoẹme jọ evaọ Awake! Ma re je ru odhesẹvia evaọ oma oruẹrẹhọ kẹ usiuwoma ota re ọmọ kpobi ọ sai wo ẹme nọ ọ rẹ ta nọ ma te kpohọ usiuwoma.” Heidi o fibae nọ: “Mai kpobi ma wo obe nọ ma kere itee abọ-ẹzi nọ ma gwọlọ le te obọ fihọ, yọ noke ruọ oke ma rẹ kiẹ obe na riwi evaọ uwuhrẹ uviuwou mai re ma ruẹ epanọ ma be nyaharo te.” Ọzae avọ aye nana a fi edẹ jọ họ nọ a re rri etehe-ughe he evaọ aso re uviuwou na soso o sai wo uvẹ nọ a re ro se obe.

Iwuhrẹ Ukoko

Mike avọ Denise a yẹ emọ ene. Didi erere a wo no fikinọ a bi ru iruo kugbe? Mike ọ ta nọ: “Ẹsejọ ma rẹ ruẹ nnọ ma tẹ make momaa ziezi re ma kaki te obọ ewuhrẹ, o rẹ jọ bẹbẹ ghele, rekọ ma te fi obọ họ kẹ ohwohwo ma rẹ kaki te obọ ewuhrẹ.” Denise ọ ta nọ: “Okenọ emọ na e jẹ rro, ma ghale iruo kẹ ae omomọvo. Kim, ọmọtẹ mai, ọye o je there emu jẹ wọ emu na fihọ emẹjẹ.” Michael, ọmọzae rai, ọ kareghẹhọ nọ: “Evaọ Edivẹ-Oka a rẹ jọ uwou mai ru ewuhrẹ obe ukoko. Fikiere ma re ru uwou na fo je ririe egbara na.” Ọmọ rai ọfa nọ a re se Matthew o fibae nọ: “Ọsẹ mai ọ rẹ ruẹ nnọ ọ kaki no iruo ze fiki ewuhrẹ na re ọ ruẹrẹ omai kpahe.” Eme u no enana kpobi ze?

Irere I no Rie Ze

Mike ọ ta nọ: “Evaọ 1987, mẹ avọ aye mẹ Denise ma te mu iruo ọkobaro họ. Eva oke yena, emọ esa e gbẹ jọ uwou mai. Ivẹ i zihe ruọ ekobaro, emọ nọ i kiọkọ a ru iruo ebabọ evaọ obọ Ebẹtẹle. Oware jọ nọ o wha evawere se uviuwou mai no họ ma fi obọ họ kẹ ahwo 40 te kẹ ame-ọhọ. Yọ uviuwou mai u kpohọ iruo ebabọ no, ẹsejọ makọ evaọ erẹwho efa.”

Evaọ uzẹme, erere ọ riẹ gaga re uviuwou u ru iruo kugbe. Kọ wha sai roro kpahe idhere efa nọ wha rẹ sai jo fi obọ họ kẹ ohwohwo evaọ uviuwou rai? O rẹ sai mu owhai ẹro inọ wha te wo ẹzi obufihọ kẹ ohwohwo wha re ti wo ẹnyaharo abọ-ẹzi.

[Uwoho nọ o rrọ ẹwẹ-obe avọ 28]

Oma oruẹrẹkpahe o rẹ lẹliẹ owhai wo ẹnyaharo evaọ odibọgba na