Rọ Uyoyou Wuhrẹ Ahwo Wọhọ Epanọ Jesu O ru
Rọ Uyoyou Wuhrẹ Ahwo Wọhọ Epanọ Jesu O ru
“Ohwo ọvo ọ re ta ẹme wọhọ ohwo ọnana ha!”—JỌN 7:46.
1. Ẹvẹ ewuhrẹ Jesu o jọ ahwo oma?
DAI roro epanọ oma o hae were owhẹ te orọnọ whọ jariẹ okenọ Jesu o je wuhrẹ! Ebaibol i dhesẹ epanọ iwuhrẹ riẹ i duobọhọ ahwo te. Wọhọ oriruo, Luk o kere inọ “eme aruoriwo nọ i no unu riẹ ze” i gbe ahwo ẹwho riẹ unu. Matiu o kere inọ okenọ Jesu o wuhrẹ ahwo no evaọ Ovuẹ obọ Ugbehru na, “ewuhrẹ riẹ o te gbe ahwo buobu na enu.” Yọ Jọn o kere inọ iletu nọ a vi re a nyai mu Jesu a zihe kpo ababọ, ta nọ: “Ohwo ọvo ọ re ta ẹme wọhọ ohwo ọnana ha!”—Luk 4:22; Mat. 7:28; Jọn 7:46.
2. Oghẹrẹ vẹ Jesu o je ro wuhrẹ ahwo?
2 Iletu yena a ta thọ họ. Ababọ avro, Jesu họ Owuhrẹ nọ ọ mae rro nọ ọ rria no. Iwuhrẹ riẹ e jọ vevẹ, lọlọhọ, jẹ jọ gbagba. Ọ rehọ enọ gbe ehare rọ ta ẹme avọ ona. Eme riẹ e jẹ jọ vevẹ kẹ oghẹrẹ ahwo kpobi nọ ọ nyaku, te ikpahwo te iwhrori. Ọ rehọ edhere ọlọlọhọ wuhrẹ ikpeware. Ghele na, orọnikọ eware nana ọvo i ru Jesu họ Owuhrẹ ologbo ho.
O Gwọlọ Uyoyou
3. Ẹvẹ Jesu o je ro wuhrẹ ahwo wo ohẹriẹ no isu egagọ oke riẹ?
3 Ikere-ebe gbe ahwo Farisi buobu e jariẹ nọ i wo eriariẹ gaga je wo ona nọ a re ro wuhrẹ amọfa. Rekọ eme o lẹliẹ oghẹrẹ nọ Jesu o je ro wuhrẹ wo ohẹriẹ no orai? Isu egagọ na a wo uyoyou kẹ iwhrori na ha. Rekọ a je rri rai vo wọhọ ahwo nọ ‘a bọwo ehao.’ (Jọn 7:49) Wo ohẹriẹ, ohrọ rai o re Jesu keme a jọ “oyoya, a tẹ jẹ vaha wọhọ igodẹ nọ i wo othuru hu.” (Mat. 9:36) Jesu ọ jọ sasasa, avọ ororokẹ gbe ẹwo. Ofariẹ, isu egagọ na a wo uvi uyoyou kẹ Ọghẹnẹ hẹ. (Jọn 5:42) Rekọ Jesu o you Ọsẹ riẹ yọ o jẹ were iẹe re o ru oreva riẹ. Isu egagọ na a jẹ hae gale ẹme Ọghẹnẹ uzou vi re u kiehọ ai oma, rekọ Jesu o you “ẹme Ọghẹnẹ”—ọ rehọ e riẹ wuhrẹ amọfa, ọ fa otọ riẹ, o dhesẹ eme na fihọ uzẹme, o te je koko ai. (Luk 11:28) Ẹhẹ, uyoyou u dhesẹ oma via evaọ eware kpobi nọ Kristi o ru, u kpomahọ eware nọ o wuhrẹ, epanọ o je ro yeri kugbe ahwo, gbe oghẹrẹ nọ o wuhrẹ i rai.
4, 5. (a) Fikieme u je wuzou re ma rọ uyoyou wuhrẹ ahwo? (b) Fikieme eriariẹ gbe ona e rọ roja nọ ma te bi wuhrẹ ahwo?
4 Kọ ẹvẹ kpahe omai? Fikinọ mai yọ ilele Jesu, ma rẹ raro kele iei evaọ odibọgba mai gbe uzuazọ mai. (1 Pita 2:21) Fikiere, isiuru mai orọnikọ re ma wuhrẹ ahwo eriariẹ Ebaibol na ọvo ho rekọ ma rẹ raro kele Jihova, maero evaọ uyoyou nọ ma re wo. Ma tẹ maki wo eriariẹ gaga hayo umutho, te ma wo ona ewuhrẹ gaga hayo ma wo tere he, uyoyou nọ ma bi dhesẹ o te lẹliẹ iwuhrẹ mai duobọte idu ahwo nọ ma be ta usiuwoma kẹ. Re ma sae nyaharo ziezi evaọ iruo usiuwoma ota mai, ma rẹ raro kele Jesu ẹkwoma uyoyou nọ ma re ro wuhrẹ ahwo.
5 Evaọ uzẹme, re ma sae jọ emamọ iwuhrẹ, ma rẹ riẹ oware nọ ma bi wuhrẹ ziezi ma ve je wo ona nọ ma re ro wuhrẹ ahwo. Jesu o fi obọ họ kẹ ilele riẹ wo eriariẹ gbe ona, yọ Jihova ọ be rọ ẹkwoma ukoko riẹ ru epọvo na kẹ omai nẹnẹ. (Se Aizaya 54:13; Luk 12:42.) Ghele na, ma re fi ọdawẹ ba ona nọ ma bi ro wuhrẹ ahwo. Nọ eriariẹ, ona gbe uyoyou i te kuomagbe, oware nọ u re noi ze u re woma gaga. Rekọ idhere vẹ ma re ro dhesẹ uyoyou nọ ma te bi wuhrẹ? Ẹvẹ Jesu avọ ilele riẹ a ro ru ere? Joma ruẹ.
Ma re You Jihova Hrọ
6. Ẹvẹ ma rẹ ta ẹme kpahe ohwo nọ ma you?
6 Ẹsikpobi ma rẹ gwọlọ ta ẹme kpahe eware nọ e rẹ were omai. Ma tẹ be ta ẹme kpahe eware nọ e rrọ ghaghae kẹ omai, ẹme na o re mu omai. O rẹ mae jọ ere maero nọ ma tẹ be ta ẹme kpahe ohwo nọ ma you. O rẹ were omai re ma gbiku epanọ ohwo na ọ rrọ kẹ amọfa. Ma re jiri ohwo na jẹ ta ẹme ezi riẹ. Ma re ru ere re ohwo na ọ were amọfa wọhọ epanọ ọ were omai na.
7. Eme uyoyou nọ Jesu o wo kẹ Ọghẹnẹ o wọ riẹ ru?
7 Re ma sai wuhrẹ amọfa re a you Jihova, ma rẹ riẹ Jihova ma ve je you rie tao. Onana o rrọ ere keme fikinọ ma you Ọghẹnẹ ma be rọ gọe. (Mat. 22:36-38) Jesu ọ rrọ obọdẹ oriruo kẹ omai. Ọ rehọ udu riẹ kpobi, iroro riẹ, ẹwẹ riẹ, gbe ẹgba riẹ you Jihova. Jesu ọ riẹ Ọsẹ riẹ ziezi keme ọ jọ obọ odhiwu rria kugbei ikpe nọ a rẹ sai kele he. Eme u no rie ze? Jesu ọ ta nọ: “Me you Ọsẹ na.” (Jọn 14:31) Uyoyou yena u dhesẹ oma via evaọ eware kpobi nọ Jesu o ru gbe eme nọ ọ ta. Uyoyou yena o wọ riẹ ru eware nọ e rẹ were Ọghẹnẹ ẹsikpobi. (Jọn 8:29) O wọ riẹ whọku isu egagọ na, enọ e jẹ rehọ eviẹhọ gọ Ọghẹnẹ. O tẹ jẹ wọe ta ẹme kpahe Jihova je fi obọ họ kẹ amọfa riẹ kpahe Ọghẹnẹ je you rie.
8. Eme uyoyou kẹ Ọghẹnẹ o wọ ilele Jesu ru?
8 Wọhọ Jesu, ilele ikpe-udhusoi ọsosuọ riẹ a you Jihova, yọ uyoyou nana o wọ rai rọ aruọwha gbe ajọwha whowho emamọ usi na. A rehọ iwuhrẹ rai vọ Jerusalẹm dede nọ isu egagọ nọ ahwo a jẹ dhozọ rai rororo a wọso ai. Ilele na a siọ eware nọ a ruẹ je yo ba ẹta kpahe he. (Iruẹru 4:20; 5:28) A riẹ inọ Jihova ọ rrọ kugbe ai gbe nnọ ọ te ghale ae, yọ ọ ginẹ ghale ae! Evaọ uzẹme, nọ Jesu o whu no, u te ikpe 30 ha, Pọl ukọ na o te kere inọ a ta usiuwoma na no “kẹ enọ a ma kpobi evaọ akpọ na.”—Kọl. 1:23.
9. Ẹvẹ ma rẹ sai ro ru uyoyou mai kẹ Ọghẹnẹ ga?
9 Ma tẹ gwọlọ jọ uvi iwuhrẹ, ma rẹ daoma ru uyoyou nọ ma wo kẹ Ọghẹnẹ ga. Ẹvẹ ma rẹ sai ro ru onana? Ẹkwoma olẹ nọ ma rẹ lẹ se Ọghẹnẹ. Ma re je ru uyoyou nọ ma wo kẹe ga ẹkwoma Ẹme riẹ nọ ma re wuhrẹ, ebe ukoko na nọ ma re se, gbe iwuhrẹ nọ ma rẹ nya. Nọ eriariẹ nọ ma wo kpahe Ọghẹnẹ i bi bu na, yọ uyoyou nọ ma wo kẹe o be ga re. Nọ ma be rọ ẹmeunu gbe uruemu dhesẹ nnọ ma you Ọghẹnẹ na, amọfa a ti muẹrohọ iẹe, oma o vẹ te wọ ae re a bru Jihova ze.—Se Olezi 104:33, 34.
Eware nọ Ma bi Wuhrẹ E rẹ Jọ Omai Oja
10. Eme a re ro vuhu emamọ owuhrẹ?
10 Oware nọ a re ro vuhu emamọ owuhrẹ họ eware nọ o bi wuhrẹ na e rẹ jariẹ oja. Ma rẹ rọwo inọ eme na uzẹme, e rrọ oja, gbe nnọ e rẹ kẹ erere. Owuhrẹ o te se eware nọ o bi wuhrẹ gboja, a rẹ jọ oma riẹ ruẹ ọwhọ, u ve kpomahọ ahwo nọ o bi wuhrẹ na. Evaọ abọdekọ riẹ, owuhrẹ o gbe se eware nọ o bi wuhrẹ amọfa gboja ha, ẹvẹ ọ sai ro rẹro nnọ enọ o bi wuhrẹ na a ti se eme na gboja? Oriruo ra wọhọ ọnọ o bi wuhrẹ amọfa ẹme Ọghẹnẹ o roja gaga. Jesu ọ ta nọ: “Ohwo kpobi nọ a wuhrẹ ziezi ọ rẹ jọ wọhọ [owuhrẹ] riẹ.”—Luk 6:40.
11. Fikieme Jesu o ro you eware nọ o je wuhrẹ?
11 Jesu o you eware nọ o je wuhrẹ ahwo. Ọ riẹ inọ eware nọ o bi wuhrẹ ahwo na e roja—uzẹme kpahe Ọsẹ obọ odhiwu riẹ, “ẹme Ọghẹnẹ” gbe “ẹme uzuazọ ebẹdẹ bẹdẹ.” (Jọn 3:34; 6:68) Wọhọ elo ọgaga, eware nọ Jesu o wuhrẹ o fere eware iyoma via je dhesẹ eware nọ i woma via. Iwuhrẹ riẹ e wha ẹruore gbe omosasọ se otu omaurokpotọ enọ isu egagọ a viẹhọ gbe enọ Ẹdhọ ọ jẹ lahiẹ. (Iruẹru 10:38) Uyoyou nọ Jesu o wo kẹ uzẹme na u dhesẹ oma via, orọnikọ evaọ iwuhrẹ riẹ ọvo ho rekọ te eware nọ o ru kpobi.
12. Ẹvẹ Pọl ukọ na o rri emamọ usi na?
12 Wọhọ Jesu, ilele riẹ a you je rri eware nọ a wuhrẹ kpahe Jihova avọ Kristi ghare te epanọ a jẹ rọ rehọ ai wuhrẹ amọfa ghelọ ọwọsuọ ewegrẹ rai. Pọl o kere se ibe Ileleikristi riẹ evaọ obọ Rom nọ: “O rọ eva mẹ kpobi nọ mẹ rẹ ta usiuwoma na . . . Mẹ sae vuọoma usiuwoma na ha: keme oye họ ogaga usiwo Ọghẹnẹ nọ u te enọ e rọwo.” (Rom 1:15, 16) Pọl ọ rehọ e riẹ wọhọ uvẹ-ọghọ re ọ vuẹ amọfa uzẹme na. O kere nọ: “Mẹ a rehọ aruoriwo ọnana kẹ, re mẹ vuẹ ovuẹ efe odidi Kristi na kẹ ahwo Egedhọ,” (Ẹf. 3:8) Ma rẹ sae ruẹ ọwhọ nọ Pọl o je ro wuhrẹ amọfa kpahe Jihova gbe ẹjiroro Riẹ.
13. Eware vẹ e rẹ lẹliẹ omai you usiuwoma na?
13 Emamọ usi nọ o rrọ Ebaibol na u re fi obọ họ kẹ omai riẹ Ọmemama na o vẹ jẹ lẹliẹ omai wo emamọ usu kugbei. Emamọ usi na u re fi obọ họ kẹ omai riẹ iyo enọ nọ i wuzou evaọ uzuazọ, u wo ẹgba nọ u re ro nwene uzuazọ mai, o rẹ lẹliẹ omai wo ẹruore, o vẹ jẹ kẹ omai ẹgba evaọ oke okpẹtu. O re je fi obọ họ kẹ omai riẹ epanọ ma re ro yeri uzuazọ onọ o te jọ bẹdẹ bẹdẹ. Eriariẹ ọvuọvo nọ e ghare je woma vi emamọ usi na o rrọ họ. O rrọ okẹ oghaghae nọ a kẹ omai, onọ o be kẹ omai oghọghọ ulogbo. O rẹ jẹ lẹliẹ omai wereva ziezi nọ ma tẹ be ta usiuwoma na kẹ amọfa.—Iruẹru 20:35.
14. Eme ma re ru re uyoyou mai kẹ eware nọ ma bi wuhrẹ amọfa o jọ gaga?
14 Eme o rẹ sai fi obọ họ kẹ owhẹ you emamọ usi na vi epanọ who you rie na? Who te bi se Ebaibol na, dhizu ẹsejọ re who roro kpahe oware nọ who se na. Wọhọ oriruo, dae rehọ iẹe nnọ whẹ avọ Jesu wha jọ usu okenọ ọ jẹ ta usiuwoma na, hayo inọ whẹ avọ Pọl ukọ na wha jọ usu. Dae rehọ iẹe nnọ whọ rrọ akpọ ọkpokpọ na, je roro epanọ uzuazọ u ti wo ohẹriẹ te. Roro kpahe eghale nọ i te owhẹ no fikinọ who bi koko izi Ebaibol. Who te you emamọ usi na ziezi, enọ who bi wuhrẹ a te jọ oma ra rue riẹ. Fiki onana, u fo re ma roro ziezi kpahe eware nọ ma bi wuhrẹ ma ve je muẹrohọ eware nọ ma bi wuhrẹ amọfa.—Se 1 Timoti 4:15, 16.
Ma re You Ahwo Hrọ
15. Fikieme owuhrẹ o je you enọ o bi wuhrẹ?
15 Emamọ owuhrẹ o re ru udu te enọ o bi wuhrẹ otọ re a ruẹse jọ sasasa jẹ rọ evawere ta oware nọ o rrọ eva rai. Owuhrẹ nọ ọ rrọ yoyou o re wuhrẹ emọ-uwuhrẹ riẹ eware nọ ọ riẹ keme o you rai. O re wuhrẹ ai eware nọ i re fi obọ họ kẹ ae, o ve je ru uwuhrẹ na lọhọ kẹ ae. Ọ rẹ riẹ ẹgba enọ o bi wuhrẹ na. Nọ owuhrẹ o te wo uyoyou utioye na, enọ o bi wuhrẹ na a rẹ riẹ, te owuhrẹ na gbe enọ o bi wuhrẹ na a vẹ reawere uwuhrẹ na.
16. Edhere vẹ Jesu o ro dhesẹ nnọ o you ahwo?
16 Uyoyou utioye na Jesu o dhesẹ. Uyoyou nọ o mae rro nọ o dhesẹ họ uzuazọ ogbagba riẹ nọ o siobọno re amọfa a ruẹse zọ. (Jọn 15:13) Evaọ etoke odibọgba riẹ, Jesu o je fi obọ họ kẹ ahwo ẹsikpobi, yọ o je wuhrẹ ai kpahe Ọghẹnẹ. Ukpenọ ọ rẹ keria oria ovo re ahwo a bru rie ze, ọ jẹ rọ owotọ nya emaele buobu re ọ ruẹse ta usiuwoma kẹ ae. (Mat. 4:23-25; Luk 8:1) Jesu o wo odiri, ọ tẹ jẹ riẹ oghẹrẹ ebẹbẹ nọ ahwo-akpọ a wo. Okenọ ilele riẹ a te ru thọ, ọ jẹ rọ uyoyou kpọ ae họ. (Mak 9:33-37) Ọ rọ etata ẹme riẹ kẹ ai imuẹro inọ a te ta usiuwoma na ziezi. Owuhrẹ nọ o wo uyoyou te Jesu ọ rrọ họ. Uyoyou nọ o wo kẹ ilele riẹ o wọ rai you rie je koko ijaje riẹ.—Se Jọn 14:15.
17. Ẹvẹ ilele Jesu a ro dhesẹ uyoyou kẹ amọfa?
17 Wọhọ Jesu, ilele riẹ a dhesẹ uvi uyoyou kẹ ahwo nọ a ta usiuwoma kẹ. Dede nọ a je kpokpo ai yọ a jẹ gwọlọ ai kpe, a gbodibo kẹ amọfa a tẹ jẹ ta usiuwoma na ziezi. A wo uyoyou udidi kẹ ahwo nọ a fi obọ họ kẹ kurẹriẹ. Eme nọ Pọl ukọ na o kere i mu urirẹ gaga. O kere nọ: “Ma rọ oma kpotọ eva udevie rai wọhọ epanọ ọyọre-ọmọ ọ rẹ sẹro emọ riẹ. Fiki epanọ ma guọlọ owhai eva uyoyou o tẹ ruọ omai nọ ma rẹ ghale ẹkẹ oma mai jọ kẹ owhai re, orọnọ eva usiuwoma Ọghẹnẹ ọvo ho, keme wha jọ obọ mai ghare hrọ.”—1 Tẹs. 2:7, 8.
18, 19. (a) Fikieme ma rẹ rọ gwọlọ lahiẹ oma ta usiuwoma na? (b) Fodẹ oriruo jọ onọ u dhesẹ inọ amọfa a bi muẹrohọ uyoyou nọ ma bi dhesẹ kẹ ai.
18 Epọvo na re, Isẹri Jihova nẹnẹ a be nya akpọ na duwu be gwọlọ enọ e gwọlọ riẹ Ọghẹnẹ re a jẹ gọe. Evaọ uzẹme, anwọ ikpe 17 nọ e vrẹ na, ma be hae raha bu vi euwa ima-odu kukpe kukpe rọ ta usiuwoma na je wuhrẹ ahwo, yọ ma gbẹ be ruabọhọ iruo na. Unevaze ma bi ro ru onana, dede nọ o gwọlọ nnọ ma rẹ raha oke mai, ẹgba mai, gbe igho. Wọhọ Jesu, ma riẹ nnọ Ọsẹ oyoyou obọ odhiwu mai ọ gwọlọ re ahwo a wo eriariẹ nọ i re su kpohọ uzuazọ ebẹdẹ bẹdẹ. (Jọn 17:3; 1 Tim. 2:3, 4) Uyoyou o rẹ wọ omai fi obọ họ kẹ ahwo evezi re a nyaze te riẹ Jihova je you rie wọhọ epanọ ma you rie na.
19 Amọfa a be ruẹ uyoyou nọ ma bi dhesẹ. Wọhọ oriruo, oniọvo-ọmọtẹ jọ nọ ọ rrọ ọkobaro evaọ obọ America o kere ileta re ọ rọ omosasọ kẹ enọ ahwo rai a whu. Ọzae jọ ọ za ileta oniọvo nana nọ: “Akpọ ọ kaki gbe omẹ unu inọ ohwo jọ ọ rẹ keria o ve kere ileta se ohwo nọ ọ riẹ hẹ re o fi obọ họ kẹe thihakọ. Ẹme nọ mẹ rẹ ta kpobi họ who you amọfa gbe Ọghẹnẹ nọ ọ be sẹro ahwo evaọ uzuazọ.”
20. Ẹvẹ u wuzou te re ma rọ uyoyou wuhrẹ ahwo?
20 Ọzae jọ ọ ta okejọ inọ ohwo o te ku uyoyou gbe ona ro ru oware, oware na u re woma gaga. Ma te bi wuhrẹ ahwo, ma rẹ gwọlọ fi obọ họ kẹ ae re a riẹ Jihova je you rie. Ẹhẹ, re ma jọ emamọ iwuhrẹ, u fo nnọ ma re you Ọghẹnẹ, you eware nọ ma bi wuhrẹ, ma ve je you ahwo. Nọ ma bi wuhrẹ oghẹrẹ uyoyou utioye na je dhesẹ iẹe evaọ odibọgba na, orọnikọ ma ti wo evawere inọ ma be ta usiuwoma kẹ ahwo ọvo ho rekọ eva e te were omai inọ ma be raro kele Jesu je ru Jihova eva were.
Ẹvẹ Whọ te k’Uyo?
• Nọ ma be ta usiuwoma kẹ ahwo na, fikieme u ro wuzou re ma wo . . .
uyoyou kẹ Ọghẹnẹ?
uyoyou kẹ eware nọ ma bi wuhrẹ ahwo?
uyoyou kẹ ahwo nọ ma bi wuhrẹ?
[Enọ Uwuhrẹ]
[Uwoho nọ o rrọ ẹwẹ-obe avọ 15]
Eme u ru ewuhrẹ Jesu wo ohẹriẹ no orọ otu ikere-ebe na gbe ahwo Farisi?
[Uwoho nọ o rrọ ẹwẹ-obe avọ 18]
Emamọ ewuhrẹ o gwọlọ nọ ma re wo eriariẹ, ona, jẹ mae rro, uyoyou