Usi Uvie Na U Te Ewho Nọ I Sioma no

ORIA nọ a re se Tuva Republic evaọ Russia o kẹle Siberia evaọ ofẹ jọ, Mongolia o tẹ rrọ ofẹ odekọ. Ahwo buobu evaọ Tuva a be rria ewho nọ i sioma no, yọ o rẹ jọ bẹbẹ gaga re a rọ usiuwoma na te ai oma. Rekọ oke jọ nọ u kpemu, ahwo a no ibienẹ sa-sa erọ Tuva ze ziọ ẹgwae evaọ Kyzyl, okpẹwho esuo riẹ. Maria, ọkobaro jọ nọ ọ rrọ Kyzyl, o yo inọ ahwo jọ a no ewho yena nọ i sioma no na ziọ ẹgwae na, ọ tẹ ruẹ nnọ onana yọ obọdẹ uvẹ nọ ọ sae rọ ta usiuwoma kẹ ahwo na.

Maria o gbiku oware nọ o via: “Isukulu nọ mẹ jọ je wuhrẹ a se ẹgwae jọ re a ta ẹme kpahe enwoma idi nọ a rẹ da vrẹta, imu egaga nọ a rẹ lọ, gbe ivovavovo. Ahwo 50 a ti no ibiezọ Tuva ze ziọ ẹgwae na. Usu enọ e te nyaze họ iticha, enọ i wuhrẹ kpahe uruemu ohwo-akpọ, enọ e rẹ họre kẹ ewoma emaha, gbe amọfa.” Maria o rri onana wọhọ uvẹ nọ ọ rẹ rọ ta usiuwoma, rekọ ọ riẹ nnọ o te jọ bẹbẹ kẹe. Ọ ta nọ: “Mẹ rẹ dhomovuọ gaga, yọ o rẹ jọ omẹ obọ gaga re mẹ ta usiuwoma evaọ oke-gheghe. Rekọ mẹ lẹ se Jihova re ọ kẹ omẹ udu nọ mẹ rẹ rọ ta usiuwoma kẹ ahwo nana.” Kọ ọ sai ru ere?

Maria ọ ta haro nọ: “Mẹ ruẹ Awake! jọ nọ ọ ta ẹme kpahe ozodhẹ. Iroro mẹ ta kẹ omẹ nọ ‘emagazini nana ọ te were ohwo nọ o wuhrẹ kpahe uruemu ohwo-akpọ,’ fikiere mẹ tẹ wha emagazini na lele oma kpohọ isukulu. Ẹdẹ yena, iticha jọ nọ ọ ziọ ẹgwae na ọ tẹ ziọ ọfisi mẹ, mẹ tẹ kẹe emagazini na. O te mi omẹ avọ evawere. Ọ tubẹ ta kẹ omẹ nnọ ozọ u re mu ei gaga. Okiokiọ riẹ, mẹ tẹ wha obe ọ Questions Young People Ask—Answers That Work, Uko ọsosuọ na sei. O te je mi omẹ obe na avọ evawere. Fiki evawere riẹ, me te roro nnọ obe na o te were iticha efa re. Fikiere mẹ tẹ wha ekatọno obe ọ Young People Ask na avọ ebe efa lele oma kpohọ isukulu.” Me je ti rri hi, ebe na i re muotọ no. Maria ọ ta oware nọ o via: “Egbẹnyusu ọ iticha nọ mẹ kẹ ebe Young People Ask na a ziọ ọfisi mẹ jẹ nọ inọ: ‘Diẹse a be jọ ghale ebe na?’” Nwanọ oria na a rrọ na!

Ẹdẹ urere ẹgwae na họ Ẹdẹ-Ọmaha. Maria o ti ru iruo ẹdẹ yena ha, fikiere ọ tẹ kwa ebe fihọ emẹjẹ buobu nọ e rrọ ọfisi riẹ. O te kere fihọ akpala jọ nọ: “Iticha Eghaghae! Wha sae rehọ ebe jọ kẹ oma rai gbe egbẹnyusu rai. Emamọ ebe nana i ti fi obọ họ kẹ owhai evaọ iruo rai, je fi obọ họ kẹ iviuwou rai.” Eme ọ via? “Nọ me te ọfisi mẹ ẹdẹ yena, a rehọ enwenọ ebe na kpobi no. Mẹ tẹ nyae rehọ ebe gbe emagazini efa ovovẹrẹ.” Re ẹgwae na o te ti kuhọ, Maria ọ kẹ ahwo emagazini 380, ebe 173, gbe ibroshọ 34. Okenọ ahwo na a zihe kpohọ ewho nọ a no ze, a wha ebe na lele oma. Maria ọ ta nọ: “Eva e were omẹ gaga inọ ovuẹ uvie na u te imivu Tuva no!”—Ọtausi. 11:6.

[Udhesẹ-oria nọ o rrọ ẹwẹ-obe avọ 32]

(Rọkẹ onọ a ruẹrẹhọ ziezi, rri obe na)

RUSSIA

TUVA REPUBLIC