‘Ọnowo ọ Ghariẹ Ovao Riẹ Kẹ Ae’

IRIẸ nọ e rrọ ovao ohwo-akpọ i bu vi 30. Re ohwo ọ sai kp’ohwẹ kuagba, o gwọlọ iriẹ 14. Dai roro epanọ ẹmeọta-kugbe o rẹ jọ ababọ iriẹ nana. Kọ ẹmeọta-kugbe otiọye ọ rẹ were? Ijo. Rekọ rọ kẹ enọ i diezọ, iriẹ nọ e rrọ ovao na i wo obufihọ ọfa re. Nọ a tẹ be rọ abọ gbe oma kpobi ta ẹme, iriẹ nana i re fi obọ họ kẹ amọfa riẹ ẹme nọ a gwọlọ ta. U bi gbe ahwo buobu unu epanọ ohwo ọ sae rọ rehọ obọ rọ ta ẹme kpobi nọ o rrọ iroro riẹ.

Evaọ oke mai na, enọ i diezọ evaọ akpọ na kpobi a ruẹ ovao jọ no onọ u woma kpekufiẹ vi ovao ohwo-akpọ. Evaọ edhere ẹwoho, a ruẹ “ỌNOWO na” no. (Enu. 2:19) Orọnikọ onana u mu via ha. U kri gaga no nọ Jihova o bi ro dhesẹ uyoyou kẹ enọ i diezọ. O you rai makọ evaọ okenọ Mosis ọ jọ akpọ. (Izerẹ 19:14) Evaọ oke mai na, uyoyou nọ o wo kẹ enọ i diezọ u dhesẹ oma via vevẹ no. “[Ọghẹnẹ] ọ guọlọ re ahwo kpobi a wo usiwo, re a ze te riẹ uzẹme na.” (1 Tim. 2:4) Fikinọ a riẹ uzẹme na kpahe Ọghẹnẹ, o wọhọ ẹsenọ ibuobu nọ i diezọ a ruẹ ovao riẹ no. Ẹvẹ a sai ro wo eriariẹ nana ababọ ẹme nọ a bi yo? Re ma tẹ te kuyo onọ yena, joma ta ẹme kpahe oware nọ ẹvẹrẹ obọ rọ t’ẹme u ro wuzou gaga kẹ enọ i diezọ.

A be rọ Ibiaro Rai Wuhrẹ

Ahwo a wo iroro ethọthọ buobu kpahe enọ i diezọ gbe ẹvẹrẹ obọ rọ t’ẹme. Joma fodẹ eware jọ nọ e rrọ uzẹme kpahe enọ i diezọ. Ahwo nọ a diezọ a rẹ sae dhẹ omoto. A tẹ be maki rri owhẹ unu, o rẹ jọ bẹbẹ kẹ ae re a riẹ ẹme nọ whọ be ta. Ẹvẹrẹ obọ rọ t’ẹme u wo ohẹriẹ gaga no ebe ọ ahwo nọ a tuaro, yọ orọnikọ thakpinọ ohwo ọ rọ abọ t’ẹme ọvo ho. Evẹrẹ obọ rọ t’ẹme sa-sa e rrọ akpọ na. Ofariẹ, oghẹrẹ nọ otujọ nọ i diezọ a rẹ r’obọ t’ẹme u re wo ohẹriẹ no efa.

Kọ enọ i diezọ a rẹ sai se obe? Dede nọ ejọ rai a re se obe ziezi, o rẹ jọ bẹbẹ kẹ ibuobu rai re a se obe. Fikieme? Keme ẹme nọ ma be ta oye a re kere fihọ obe. Roro kpahe epanọ ọmọ o re ro wuhrẹ ẹvẹrẹ. A tẹ nwani yẹ ọmọ na no, ahwo nọ a be jẹ ẹrọunu ẹwho na a wariẹ e riẹ họ. Ẹmẹrera na, o ve ti mu ẹvẹrẹ na họ ẹjẹ. Nọ o bi yo ẹme nọ ahwo a be ta na, ere ọvo o re ro yo ẹvẹrẹ na. Fikiere, nọ emaha a te mu obe họ ese, a ve ti vuhumu inọ eme nọ a be jọ obe ruẹ na yọ eme nọ a riẹ no anwẹdẹ.

Dae rehọ iẹe nnọ whọ rrọ orẹwho ọfa, yọ a fi owhẹ họ uwou ighẹgbe nọ whọ be jọ ruẹ ahwo nọ e rrọ obọ otafe rekọ who bi yo ẹme nọ a be ta ha. A re jẹ ẹvẹrẹ na nọ who yo no ẹdọvo ho. Kẹdẹ kẹdẹ ahwo orẹwho na a re bru owhẹ ze a vẹ be gwọlọ ta  ẹme kẹ owhẹ no obọ otafe ze. Who bi yo ẹme nọ a be ta ha. Rekọ whọ riẹ nnọ a be ta ẹme. Nọ a riẹ nnọ who bi yo ẹme nọ a be ta ha, a te kere eme na fihọ obe, a tẹ jọ obọ otafe ughẹgbe na dhesẹ eme na kẹ owhẹ. A roro nọ who ti wo otoriẹ eme na. Kọ who roro nọ whọ sai ti wo otoriẹ eme na? Whọ te ruẹ nnọ o rrọ bẹbẹ gaga re whọ riẹ oware nọ o rrọ iroro ahwo na. Fikieme? Keme eme nọ a kere fihọ obe na yọ ẹvẹrẹ nọ who ri yo ẹdọvo ho. Onana họ ẹbẹbẹ nọ enọ i diezọ a wo.

Ẹvẹrẹ obọ rọ t’ẹme yọ emamọ edhere nọ enọ i diezọ a rẹ rọ ta oware nọ o re rai eva. Ohwo ọ rẹ rọ abọ riẹ ro dhesẹ ẹme nọ ọ gwọlọ ta. Oghẹrẹ nọ o bi ru abọ gbe ovao riẹ o rẹ rọwo kugbe oghẹrẹ nọ a ruẹrẹ ẹvẹrẹ obọ rọ t’ẹme na họ. Kọ enẹ ẹvẹrẹ nọ a re yo ho o rọ roma via, onọ u ru rie lọhọ re ohwo o wuhrẹ no oware nọ ọ be ruẹ ze.

Evaọ uzẹme, ohwo nọ o diezọ ọ tẹ be r’obọ t’ẹme, oghẹrẹ kpobi nọ o ru abọ, oma hayo ovao riẹ u wo otofa. Ẹjiroro nọ o re ro ru ovao na oghẹrẹ jọ orọnikọ re o ro fou ahwo họ ehwẹ hẹ. A re ru onana lele oghẹrẹ nọ a ruẹrẹ ẹvẹrẹ obọ rọ t’ẹme na họ. Wọhọ oriruo: Ohwo ọ tẹ nọ onọ o je go ikparo riẹ kpehru o rẹ sai dhesẹ nọ onọ na o gwọlọ uyo ho hayo o gwọlọ uyo e, hayo ijo. A te go ikparo kpotọ, o rẹ sai dhesẹ nọ ohwo ọ be nọ onọ wọhọ ono, eme, diẹse, okevẹ, fikieme, hayo oghẹrẹ vẹ. A te ru unu na oghẹrẹ jọ u re dhesẹ epanọ oware o rro te, hayo epanọ oware nọ o via o ga te. Oghẹrẹ nọ ohwo nọ o diezọ o ru uzou, ẹkoko, ibiegba, gbe etuaro riẹ i re fi oware jọ ba ẹme nọ ọ be ta.

Nọ enana kpobi i te kuomagbe i re fi obọ họ kẹ ọnọ o bi rri owhẹ reawere ẹme nọ whọ be rọ obọ ta na. Enọ i diezọ nọ e riẹ ẹvẹrẹ obọ rọ t’ẹme na ziezi a rẹ sae rọ ona ẹmeọta nana ro dhesẹ oware kpobi nọ o rrọ iroro rai.

Ebe gbe Ividio Erọ Ẹvẹrẹ Obọ rọ t’Ẹme I bi Fi Obọ Họ

Nọ a tẹ rọ ẹkwoma ẹvẹrẹ obọ rọ t’ẹme na wuhrẹ ohwo nọ o diezọ eriariẹ Jihova, ọ rẹ sae rọ enẹ yo ovuẹ Ebaibol na je ‘fi ẹrọwọ’ họ Ọnọ o wo ovuẹ na. Fikiere, evaọ akpọ na soso Isẹri Jihova a daoma gaga no re a ta usiuwoma kẹ enọ i diezọ je ru ebe gbe ividio nọ i re fi obọ họ kẹ ae. (Rom 10:14) Obọnana, itu efefafa 58 e rrọ eria sa-sa evaọ akpọ na nọ e be fa ebe mai fihọ ẹvẹrẹ obọ rọ t’ẹme, yọ a rehọ evẹrẹ obọ rọ t’ẹme nọ i bu te 40 ru ebe mai fihọ ividio no. Kọ irere jọ i no omodawọ nana ze no?

Jeremy, ọnọ te ọsẹ te oni riẹ a diezọ, ọ ta nọ: “Mẹ kareghẹhọ ẹdẹ nọ ọsẹ mẹ ọ raha  euwa buobu evaọ ubrukpẹ riẹ je se umutho idhe-eme jọ evaọ Uwou-Eroro Na, be daoma re o wo otoriẹ oware nọ o bi se na. Idudhe na ọ tẹ họrọ no ukpẹ riẹ ze avọ oma nọ u bi mu ei, ọ tẹ rọ obọ ta kẹ omẹ nọ: ‘Me wo otoriẹ ẹme na no! Me wo otoriẹ ẹme na no!’ Kẹsena ọ tẹ rọ obọ ta ẹme nọ o se na kẹ omẹ. Ikpe 12 ọvo mẹ jọ oke yena. Me te rri oria nọ o se na jẹ rọ obọ ta kẹe nọ: ‘Baba, o wọhọ nọ otofa ẹme na oye he. Ẹme na họ . . . ’ Ọ tẹ rọ obọ ta kẹ omẹ nọ mẹ fa otọ ẹme na kẹe he, o te zihe kpohọ obọ ubrukpẹ riẹ re ọ wariẹ se obe na. Mẹ jọ ovao riẹ ruẹ epanọ o kẹ riẹ uye te yọ eva e were omẹ nọ mẹ ruẹ nọ o zihe kpohọ ukpẹ riẹ re ọ wariẹ se obe na. Rekọ enẹna, ividio ẹvẹrẹ obọ rọ t’ẹme i fi obọ họ kẹe wo otoriẹ eme nọ e rrọ ebe mai ziezi. Eva e be were omẹ gaga nọ mẹ be ruẹ epanọ ovao riẹ o be ghariẹ nọ ọ tẹ be ta ẹme kpahe Jihova.”

Je roro kpahe oriruo Jessenia, uvovo aye obọ Chile jọ nọ o diezọ, ọnọ inievo jọ a ta usiuwoma kẹ. Nọ ọsẹgboni riẹ a kẹ inievo na uvẹ no re a dhesẹ ividio Obe Ikuigbe Ebaibol Mẹ kẹ Jessenia, onọ a rọ ẹvẹrẹ obọ rọ t’ẹme ahwo Chile ru, a tẹ ta nọ: “Nọ Jessenia o bi rri ividio na, o te muhọ ẹhwẹ, kẹsena ame o te su noi aro ze. Nọ oni riẹ ọ nọe oware nọ u bi fou rie họ oviẹ, ọ tẹ ta nọ oware nọ o bi rri na o were riẹ gaga. Oni riẹ ọ tẹ ruẹ nọ o wo otoriẹ eware kpobi nọ a jọ ividio na dhesẹ.”

Aye jọ nọ o diezọ nọ ọ be rria obọ Venezuela o yẹ ọmọ ọvo no, yọ o dieva ọmọ avivẹ họ. Tei te ọzae riẹ a tẹ gbẹgwae epanọ a te rọ kpare eva na keme a wo ugho nọ a te rọ rẹrote ọmọ na ha. Dede nọ inievo mai a riẹ kpahe onana ha, a te dhesẹ uzoẹme avọ 12 orọ ividio Eme Ọghẹnẹ Ọ Gwọlọ Mi Omai? nọ a rọ ẹvẹrẹ obọ rọ t’ẹme ahwo Venezuela ru rọ kẹ ọzae avọ aye nana. Uzoẹme nana o ta kpahe oghẹrẹ nọ Ọghẹnẹ o rri eva-ekparọ gbe ohwo-okpe. Uwhremu na, aye na ọ tẹ ta kẹ inievo mai inọ eva e were riẹ gaga fiki oware nọ o wuhrẹ evaọ uzoẹme yena. Ọ ta nọ oware nọ a wuhrẹ u fi obọ họ kẹ ae jiroro nnọ a rẹ siọ eva na ba ẹkpare. Ividio ẹvẹrẹ obọ rọ t’ẹme u siwi uzuazọ!

Lorraine oniọvo jọ nọ o diezọ, ọ ta nọ: “O jọ bẹbẹ kẹ omẹ gaga re me wo otoriẹ Ebaibol na. Eware buobu i je vo omẹ ẹro ho. Rekọ, nọ a ru iwuhrẹ Ebaibol na fihọ ẹvẹrẹ obọ rọ t’ẹme no, me te ti wo otoriẹ iwuhrẹ nana.” George, ọnọ o diezọ nọ ọ họ-ame te ikpe 38 no, ọ ta nọ: “Avro ọ riẹ hẹ inọ ohwo o te wo otoriẹ oware jọ kẹ omobọ riẹ, o rẹ lẹliẹe wo udu o ve je rri oma riẹ inọ o te ohwo. Mẹ riẹ nnọ ividio ẹvẹrẹ obọ rọ t’ẹme na u fi obọ họ kẹ omẹ wo ẹnyaharo abọ-ẹzi no.”

 “Ewuhrẹ Evaọ Ẹvẹrẹ Mẹ!”

U te no ividio ẹvẹrẹ obọ rọ t’ẹme na no, Isẹri Jihova a wo ikoko nọ a rẹ jọ rehọ ẹvẹrẹ obọ rọ t’ẹme ọvo ru iwuhrẹ. Ma be ta ẹme na ikoko itieye na i bu te odu ọvo gbe ẹgba ọvo (1,100) evaọ akpọ na. Evaọ ikoko nana, a re wuhrẹ enọ i diezọ na evaọ edhere nọ a rẹ sai ro wo otoriẹ eware nọ a bi wuhrẹ ai. A re wuhrẹ ai evaọ edhere nọ u re kpomovuọ họ ae oma ha.

Kọ irere jọ i no ikoko itieye na ze no? Roro kpahe oriruo ọrọ Cyril, ọnọ ọ họ-ame evaọ ukpe 1955. Ikpe buobu a wuhrẹ obe kugbei, yọ ọ jẹ hae kpohọ iwuhrẹ ẹsikpobi. Ẹsejọ ahwo jọ a rẹ jariẹ nọ a rẹ rọ obọ dhesẹ eware nọ a bi wuhrẹ na kẹe. Nọ ahwo tiọye na a gbẹ riẹ hẹ, inievo jọ a ve kere eme nọ a be jọ iwuhrẹ na ta fihọ obe kẹe. O ru onana ikpe 34 rite 1988, okenọ a rọ rehọ ukoko ẹvẹrẹ obọ rọ t’ẹme mu evaọ New York obọ America. Kọ ẹvẹ o jọ Cyril oma nọ a rọ ukoko na mu no? “O wọhọ ẹsenọ o no igbrẹwọ ze, hayo no ọgọdọ ebi ziọ elo. Ewuhrẹ evaọ ẹvẹrẹ mẹ!”

Ikoko ẹvẹrẹ obọ rọ t’ẹme yọ eria nọ ahwo nọ i diezọ a re jo kuomagbe ẹsikpobi re a wuhrẹ kpahe Ọghẹnẹ jẹ gọe. Yọ eria nọ ahwo Ọghẹnẹ a re je wo omosasọ. Evaọ akpọ nana nọ ahwo a re jo kuomagbe enọ i diezọ họ na, ikoko inievo mai nọ i diezọ yọ eria nọ a rẹ jọ whẹtiẹ ohwohwo họ oma. Enọ i diezọ a rẹ sae jọ ikoko enana wuhrẹ, jẹ gọ Jihova ziezi. Inievo mai buobu nọ i diezọ a bi ru ọkobaro oke-kpobi. Ejọ i kpohọ erẹwho efa no re a fi obọ họ kẹ amọfa nọ i diezọ wuhrẹ kpahe Jihova. Ezae Ileleikristi nọ i diezọ a be daoma re a jọ iwuhrẹ nọ i wo ona, enọ e rẹ ruẹrẹ eware fihọ, gbe ekpako ukoko, fikiere ibuobu a te kẹ ewha-iruo sa-sa no evaọ ukoko na.

Evaọ obọ America, ikoko enọ i diezọ i bu te udhusoi (100) yọ itu 80 efa e riẹ re. Evaọ obọ Brazil, ikoko enọ i diezọ i bu te oware wọhọ egba esa (300) yọ itu nọ i bu vi egba ene (400) e riẹ re. Evaọ obọ Mexico, ikoko enọ i diezọ e whoma bu te egba esa (300). Ikoko enọ i diezọ nọ e rrọ Russia i bu vi 30 yọ itu udhusoi gbe ikpegbesa (113) efa e riẹ re. Enana yọ umutho iriruo jọ erọ ẹvi nọ ọ be roma via evaọ akpọ na so-so.

Isẹri Jihova a re je ru ikokohọ evaọ ẹvẹrẹ obọ rọ t’ẹme. Ukpe n’ukpo ma jọ eria sa-sa evaọ akpọ na rehọ oghoghẹrẹ evẹrẹ obọ rọ t’ẹme ru ikokohọ nọ i bu vi udhozeza (120). Ikokohọ nana i fi obọ họ kẹ inievo nọ i diezọ ruẹ nọ a rrọ usu inievo akpọ so-so nọ i bi wo erere no emuore abọ-ẹzi ọrọ ẹruoke ze.

Leonard yọ oniọvo nọ o diezọ nọ o kurẹriẹ vrẹ ikpe 25 no. Ọ ta nọ: “Mẹ riẹ anwẹdẹ inọ Jihova họ Ọghẹnẹ uzẹme na. Rekọ, me ri vuhumu ziezi hi oware nọ ọ jẹ kuvẹ re ahwo a ruẹ-uye. Ẹsejọ, onana o rẹ lẹliẹ omẹ dheva kẹe. Rekọ ẹme jọ nọ a ru evaọ okokohọ ubrotọ orọ ẹvẹrẹ obọ rọ t’ẹme u fi obọ họ kẹ omẹ riẹ oware nọ o whariẹ ze. Nọ a ru ẹme na no, aye mẹ ọ tẹ ka eghilobọ họ omẹ, jẹ nọ omẹ nọ, ‘Ẹme na o vo owhẹ ẹro?’ Me te yo nọ E! Eva e were omẹ inọ me kiukeku Jihova ha anwọ ikpe 25 ze. Me you rie anwẹdẹ rekọ mẹ re riẹ oreva riẹ vọvọ họ. Nẹnẹ mẹ riẹ oreva riẹ no!”

Eva E Be Were Ai

Nọ enọ i diezọ a bi wuhrẹ kpahe Jihova na, eme a be jọ ovao riẹ ruẹ? Uyoyou, ohrọoriọ, ẹdhoguo-okiẹrẹe, ọtẹruo, uyoyou-ẹwo, gbe ekwakwa iwoma efa.

Inievo nọ i diezọ evaọ akpọ na kpobi a be ruẹ ovao Jihova yọ a te gbẹ rue riẹ vevẹ viere. Avọ uyoyou nọ o wo kẹ enọ i diezọ, ‘ỌNOWO ọ ghariẹ ovao riẹ kẹ ae’ no. (Ik. 6:25) Dai roro epanọ eva e be were enọ i diezọ te inọ a nyaze te riẹ Jihova!

[Uwoho nọ o rrọ ẹwẹ-obe avọ 25]

Ikoko enọ i diezọ nọ e rrọ akpọ na i bu vi odu ọvo gbe ẹgba ọvo (1,100)

[Uwoho nọ o rrọ ẹwẹ-obe avọ 26]

Ovao Jihova o ghariẹ kẹ enọ i diezọ