Eduku Efe nọ O Siomano

KỌ WHO duku efe nọ o siomano ẹdẹjọ evaọ oria nọ who rẹro nọ whọ rẹ jọ ruẹ oware otiọye na ha? Evaọ March 27, 2005, Ivo Laud, omọvo Isẹri Jihova nọ ọ be rria Estonia, ọ ruẹ oware otiọye na. O je fi obọ họ kẹ oniọvo jọ nọ a re se Alma Vardja, kporo oria jọ nọ ọ rrọ uwou riẹ. Nọ a bi kporo ugbẹhẹ na, a tẹ ruẹ ẹwẹ akpala jọ. Nọ a si ẹwẹ akpala na no, a tẹ ruẹ eghogho jọ nọ ọ kẹre te ubro irula ha, nọ o kodo te ubro irula ha, rekiyọ o theri te irula ene, yọ a rọ ẹwẹ akpala jọ ruru ei. Orọ ọsosuọ: Eghogho nọ eware eghaghae e vọ! Eware eghaghae vẹ e jọ eghogho na? Kọ ono o si rai no họ etẹe?

 Eware buobu nọ a rehọ ebe ko e jọ eghogho na. Orọ avivẹ: Nọ a fariẹ iko na, a tẹ ruẹ ebe Isẹri Jihova, maero kọ izoeme uwuhrẹ nọ a rehọ no Uwou-Eroro na ze, ejọ rai erọ 1947. Orọ avesa: A nabe rọ obọ kere ai evaọ ẹvẹrẹ Estonia. Ma jọ iko na jọ ruẹ eware nọ e lẹliẹ omai riẹ ohwo nọ o si ebe na no họ etẹe. Ma jọ evaọ iko na ruẹ enọ nọ a nọ Villem Vardja, ọzae Alma. Eware efa nọ ma jọ iko na ruẹ họ ovuẹ kpahe ikpe nọ ọ jọ uwou-odi. Fikieme a ro fi ei họ uwou-odi?

Villem Vardja ọ jọ omọvo enọ e jẹ rẹrote Isẹri Jihova evaọ ukoko Tartu, uwhremu na ọ tẹ jẹ jọ ukoko Otepää evaọ Estonia, usu erẹwho nọ e jọ otọ esuo Soviet Socialist Republics. O kurẹriẹ taure Ẹmo Akpọ II o te ti fi. Nọ imikpe jọ e vrẹ no, evaọ December 24, 1948, a te mu Brọda Vardja fikinọ ọ jọ omọvo Isẹri Jihova. Iporisi a nọ riẹ enọ a te je gboja kẹe re ọ ruẹse fodẹ amọfa nọ a rrọ Isẹri Jihova. A kẹ riẹ uvẹ hẹ inọ ọ rẹ sae rehọ elọya nọ o re dikihẹ kẹe, rekọ a bru kpei inọ o re kpohọ uwou-odi ikpe ikpe evaọ Russia.

Villem Vardja o kru ẹrọwọ riẹ rite ẹdẹ uwhu riẹ evaọ March 6, 1990. Aye riẹ ọ riẹ hẹ inọ ebe itieye na e rrọ uwou na. Ọ gwọlọ thọ aye riẹ otẹrọnọ iporisi a nyaze te nọe enọ. Fikieme o ro si ebe na no? O si rai no keme iporisi orẹwho na a rẹ rọ idudhe nya ruọ iwou Isẹri Jihova, be gwọlọ ebe rai. Ẹsejọhọ brọda Vardja o si ebe na no re otẹrọnọ iporisi na a mi omai ebe mai kpobi no, emu abọ-ẹzi o gbẹ kare inievo na riẹriẹriẹ hẹ. A duku ighogho efa nọ a si ebe mai no họ evaọ oke-uvewhru ọrọ ukpe 1990. A duku ọjọ evaọ Tartu, ofẹ obọze ovatha-ọre Estonia. Villem Vardja họ ọnọ o si rai no re.

Fikieme ma ro se ebe nana efe? Keme ebe nana nọ a nabe rọ obọ kere nọ a sino ziezi na i dhesẹ ovuhumuo nọ Isẹri na a wo kẹ emu abọ-ẹzi nọ o jariẹ evaọ oke yena. (Mat. 24:45) Kọ who bi rri emu abọ-ẹzi nọ i bi te owhẹ obọ na ghaghae? Usu rai họ Uwou-Eroro Na evaọ ẹvẹrẹ Estonian gbe evaọ evẹrẹ nọ i bu vi udhoree gbe ikpe (170).