Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na.

• Ọmọ ọ tẹ jọ eva oni whu taure a te ti yẹi, kọ ma sai rẹro nọ a te kpare iẹe ze?

Nọ a te dieva ọmọ họ yọ uzuazọ u muhọ no. Jihova ọ rẹ sae kpare oghẹrẹ ohwo kpobi, te ekpako, te emaha, makọ enọ e jọ eva ini rai whu keme “Ọghẹnẹ ọ rẹ sai ru eware kpobi.” (Mak 10:27) Rekọ Ebaibol e ta ha sọ ọ te kpare emọ nọ e jọ eva oni whu.—4/15, ẹwẹ-obe avọ 12, 13.

• Eme ma rẹ sai wuhrẹ nọ ma te muẹrohọ emera, baja, ebaka, gbe ehọruwou?

Emama ene nana i wareghẹ. Fikiere, i dhesẹ via inọ Ọghẹnẹ o wo areghẹ gaga. (Itẹ 30:24-28)—4/15, ẹwẹ-obe avọ 16-19.

• Fikieme Ebaibol e rọ ta nnọ u fo re ohwo ọ fọ tou ẹsejọ?

Re a fọ tou u re dhesẹ adhẹẹ, fi obọ họ kẹ ohwo roro didi, yọ u re je dhesẹ nnọ ohwo o wo areghẹ gbe orimuo. (Ol. 37:7; 63:6; Itẹ 11:12)—5/15, ẹwẹ-obe avọ 3-5.

• Bro ivie Juda i dhesẹ obọdẹ ọwhọ kẹ uwou Ọghẹnẹ?

Ivie 19 i su Juda, yọ ene i wo obọdẹ ọwhọ: Asa, Jehoshafat, Hẹzikaya, gbe Josaya.—6/15, ẹwẹ-obe avọ 7-11.

• Kọ Ileleikristi nọ a wholo kpobi evaọ otọakpọ a bi wo obọ evaọ ẹghale emuore abọ-ẹzi?

Ijo. Enọ a rọ ẹzi Ọghẹnẹ wholo na họ otu ọrigbo areghẹ na, rekọ enọ i ru Ugboma Esuo na via na họ enọ e be rẹrote emuore abọ-ẹzi na.—6/15, ẹwẹ-obe avọ 22-24.

• Fikieme ma sae rọ ta nnọ uyoyou u ru Jesu wo ohẹriẹ no isu egagọ na evaọ oghẹrẹ nọ a ro yerikugbe ahwo?

Ukpenọ a re you iwhrori na, isu egagọ na a je rri rai vo. Ofariẹ, a wo uvi uyoyou kẹ Ọghẹnẹ hẹ. Jesu o you Ọsẹ riẹ yọ o wo ohrọ kẹ ahwo. (Mat. 9:36) Ọ jọ sasasa, avọ ororokẹ gbe ẹwo.—7/15, ẹwẹ-obe avọ 15.

• Fikieme araha ugho o sae rọ jọ use-abọ evaọ orọo, kọ eme o rẹ sai fi obọ họ kẹ imava-orọo fi use-abọ nana kparobọ?

Eware nọ e rẹ mae wha ẹwhọ kpahe ugho ze họ, ozọ hayo awaọruọ inọ ọdekọ ọ be riẹ ugho raha ha, gbe ọvuọ eriwo gbe uruemu nọ a wo kpahe ugho fiki oghẹrẹ uviuwou nọ a no ze. Eware ene jọ nọ i re fi obọ họ fi use-abọ nana kparobọ ena: Unu nọ a re ro kpotọ ta ẹme kpahe ugho, ọrọwokugbe kpahe oghẹrẹ nọ a re rri ugho kpobi nọ o be ziọ uwou na, omaa-ugho-oraha, gbe ohwo nọ ọ rẹ rẹrote araha sa-sa.—10/09, ẹwẹ-obe avọ 11-12.