Whaha Eware nọ E rẹ Rehọ Oke Ohwo Evaọ “Ẹdẹ Usi Oghọghọ” Nana

EMOTI ene na a be jẹ iroro kugbe. Ohwo ọvo o bi ru ai ọghọ họ eva unuẹthẹ okpẹwho nọ a rrọ na. Fikinọ egbaẹmo Siria a wariẹ okpẹwho na họ, ohọwo u bi kpe ahwo Sameria. A be raha oke rai gheghe a tẹ ruọ okpẹwho na; a be sae dẹ emuore n’otọ họ. Aye jọ o tube there ọmọ obọ riẹ re no.—2 Iv. 6:24-29.

Emoti na a te je roro nọ: ‘Kọ ma gbe kpohọ evuẹ Siria na? Kọ nọ uzuazọ ma rrọ na?’ Evaọ aso, a tẹ ruọ edhere. Nọ a te evuẹ na, oria kpobi jọ fọfọ. Iroiro e jariẹ hẹ. A thuru enyenya avọ eketekete fihọ eria, rekọ elakpa-ẹmo e riẹ hẹ. Emoti ene na a te rri evaọ uwou-udhu jọ. Ohwo ọvo ọ rrọ eva riẹ hẹ, rekọ emuore gbe idi e vọ riẹ. A tẹ keria, a te muhọ ẹre yọ a da. Emoti na a tẹ jẹ ruẹ igoru, isiliva, iwu, gbe eware eghaghae efa. A tẹ kwa ejọ, si ai no, a te zihe ze te kwa efa. Egbaẹmo na kpobi a dhẹ no. Evaọ edhere igbunu, Jihova o ru nọ ahwo Siria a ro yo edo egbaẹmo. Nọ a roro nnọ a ko rai họ no, ahwo Siria a tẹ dhẹ. A dhẹ siọ eware rai kpobi ba.

Emoti na a be kwa eware sino ọvo. Rekọ udu u te je brukpe ai inọ ahwo Sameria ibe rai a riẹ nọ a be ruẹ emu re he. A te muọ ohwohwo họ ẹta kẹ nọ: “Ma riẹ ru hu. Ẹdẹ inẹnẹ na ẹdẹ usi oghọghọ.” Emoti na a tẹ dhẹ zihe kpohọ Sameria, a te whowho emamọ usi oware nọ a ruẹ.—2 Iv. 7:1-11.

Ma rẹ sai se etoke nọ ma be rria na “ẹdẹ usi oghọghọ.” Nọ ọ jẹ fodẹ abọ ologbo jọ ọrọ “oka . . . urere akpọ na,” Jesu ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Mat. 24:3, 14) Ẹvẹ oyena u re kpomahọ omai?

Awaọruọ O rẹ Sae Wha Ọkora Ze

Avọ oghọghọ fiki eware nọ a ruẹ, Sameria ọ thọrọ emoti na ẹro evaọ oke ọsosuọ. A tẹrovi eware nọ a jẹ kwa. Kọ oware utioye na o rẹ sae via kẹ omai? “Ohọo” yọ abọjọ oka nọ a te rọ riẹ ekuhọ uyerakpọ na. (Luk 21:7, 11) Jesu ọ vẹvẹ ilele riẹ unu nọ: “Wha yọrọ oma rai ogbẹrọ ere he emuọriọ obuobu gbe edada ibuobu, gbe iroro akpọ na, i ve ti ru owhai zoruẹ.” (Luk 21:34) Mai Ileleikristi ma rẹ kuvẹ hẹ re awaọruọ uzuazọ i ru omai kpairoro vrẹ nnọ “ẹdẹ usi oghọghọ” ma be rria na.

Oleleikristi jọ nọ a re se Blessing ọ kuvẹ hẹ re isiuru obọ riẹ e rehọ oke riẹ kpobi. Ọkobaro ọ jọ, o te je nwrotọ no isukulu, uwhremu na ohwo nọ ọ rrọ Ebẹtẹle ru iruo ọ tẹ rehọ iẹe, a te zizie ei kpohọ uviuwou Ebẹtẹle nọ o rrọ obọ Benin Republic. Ọ ta nọ: “Mẹ be rẹrote iwou, yọ iruo e be were omẹ oma gaga.” Anwọ ikpe 12 na Blessing ọ rọ rrọ iruo odibọgba oke-kpobi na, yọ eva e be were iẹe inọ ọ tẹrovi “ẹdẹ usi oghọghọ” nọ ma be rria na.

 Yọroma kẹ Eware nọ E rẹ Rehọ Oke Ohwo

Okenọ o je vi ilele 70 riẹ vrẹ, Jesu ọ ta nọ: “Ivuẹvu na i ghine bu, rekọ iruiruo e rẹ kakao; fikiere wha lẹ Olori ivuẹvu na re o vi iruiruo kpo obọ ivuẹvu riẹ.” (Luk 10:2) Wọhọ epanọ ekakọ i re whu na nọ a gbe kru obọ ga evaọ oke ivuẹvu hu na, ere ahwo jọ a ti whu nọ ma te gbabọkẹ iruo usiuwoma ota na. Fikiere Jesu o fibae nọ: “Wha yere ohwo ọvo eva edhere he.” (Luk 10:4) Uyere nọ a jọ etenẹ fodẹ na orọnikọ orọ “wha do” hayo “wha kodẹ” hẹ. O sai je kugbe eme ithethei nọ a re lele ogbẹnyusu nọ a nyaku ta. Fikiere Jesu ọ be ta kẹ ilele riẹ inọ a whaha eware nọ i fioka ha nọ e rẹ rehọ oke rai, re a jẹ rehọ oke rai ru iruo ziezi. Usiuwoma ota rai o rrọ kpata kpata.

Dai roro kpahe unuoke nọ ohwo ọ rẹ sae raha kufiẹ. U kri gaga no nọ etehe-ughe o rọ rrọ oware nọ o be mae rehọ oke ahwo. Kọ ẹvẹ kpahe ifonu gbe kọmputa? Nọ a kiẹ uzuazọ ahwo nọ a bu te odu ọvo (1,000) riwi evaọ Britain, u dhesẹ inọ “a tẹ ghale iẹe, a be raha auwa ọvo gbe iminiti 18 kẹdẹ kẹdẹ evaọ ifonu nọ o wo ufi, be raha auwa ọvo gbe iminiti 2 evaọ ifonu nọ o wo ufi hi, be raha iminiti 53 rọ rehọ kọmputa vi uwou, jẹ be raha iminiti 22 rọ rehọ ifonu vi uwou.” Oke nọ a be raha o rehọ akuava bu vi oke nọ ọkobaro obufihọ ọ be raha rọ ta usiuwoma kẹdẹ kẹdẹ! Ẹvẹ whọ be daoma te evaọ abọ nana?

Ernst avọ Hildegard Seliger a jẹ yọroma kpahe oghẹrẹ nọ a rẹ rọ oke rai ru iruo. Aimava a raha ikpe 40 evaọ iwou-odi nọ e rrọ Germany gbe Russia. Nọ a siobọno ai no, a te je ru iruo ọkobaro bẹsenọ a ro ku iruo otọakpọ rai họ.

Ahwo buobu a gwọlọ kere ileta se ọzae avọ aye nana. A hae raha oke owọwọ rai ro se je kere ileta. Rekọ eware abọ-ẹzi a rọ karo.

O thọ họ re mai kpobi ma gwọlọ kere ileta hayo rọ ifonu se enọ ma you. O rẹ tubẹ lẹliẹ oma sasa omai. Rekọ o rẹ jọ oware areghẹ re ma yọroma kẹ eware nọ e rẹ rehọ oke ohwo evaọ ezi usiuwoma ota nana.

Hai Whowho Emamọ Usi na Ziezi

Oghale riẹ o rrọ ruaro nọ ma be rọ rria “ẹdẹ usi oghọghọ” nana. Ajọ ma jọ wọhọ emoti ene na ha, enọ e kake kpairoro vrẹ oware nọ u fo eruo fiki ekwakwa efe. Kareghẹhọ inọ a ta kẹ oma rai nọ: “Ma riẹ ru hu.” Epọvo na re, ma rẹ sae ta nnọ ma be riẹ ru hu ma tẹ be kuvẹ re ilale eware omobọ mai hayo eware nọ e rẹ rehọ oke ohwo e whaha omai obọ nọ ma re wo vọvọ evaọ odibọgba na.

Evaọ ẹme nana, ma wo obọdẹ oriruo nọ ma re lele. Nọ o roro kpemu kpohọ ikpe 20 nọ ọ kake raha evaọ odibọgba na, Pọl ukọ na o kere nọ: ‘Me woro usiuwoma Kristi na gbagba.’ (Rom 15:19) Pọl ọ kuvẹ hẹ re oware jọ o raha ọwhọ riẹ. Wọhọ Pọl, joma rehọ ọwhọ whowho ovuẹ Uvie na evaọ “ẹdẹ usi oghọghọ” nana.

[Uwoho nọ o rrọ ẹwẹ-obe avọ 28]

Blessing ọ kuvẹ hẹ re ilale obọ riẹ i kpomahọ odibọgba riẹ

[Uwoho nọ o rrọ ẹwẹ-obe avọ 29]

Brọda Seliger avọ aye riẹ a rehọ oke rai ru iruo ziezi