Egagọ Mẹ Ọvo Mẹ Salọ Onọ Mẹ Rrọ na Manikọ Ọsẹgboni Mẹ?
Egagọ Mẹ Ọvo Mẹ Salọ Onọ Mẹ Rrọ na Manikọ Ọsẹgboni Mẹ?
EVAỌ obọ Poland, ahwo buobu a rẹ ta kẹ Isẹri Jihova nọ, “A yẹ omẹ fihọ egagọ mẹ, yọ etẹe me ti whu fihọ.” Oyena u dhesẹ inọ, evaọ iroro rai, egagọ nọ esẹgbini a rrọ oye emọ rai a rẹ jọ. Kọ ere ahwo a rehọ egagọ evaọ oria ra? Eme o re no eriwo otiọye na ze? Ahwo a rẹ thakpe jọ egagọ jọ fikinọ etẹe ahwo uviuwou rai a rrọ. Kọ onana o sae via kẹ Isẹri Jihova, enọ i wuhrẹ uzẹme na mi esẹgbini hayo esẹgbini ilogbo rai?
O jọ ere kẹ Timoti hi, ọnọ oni gbe oniode riẹ a wuhrẹ re ọ rọwo je you Ọghẹnẹ uzẹme na. Timoti ọ riẹ ikere efuafo na no “oke emaha ze.” Uwhremu na, Timoti o te kuomagbe oni gbe oniode riẹ rọwo inọ Egagọ-Ileleikristi họ egagọ uzẹme. Taure ọ tẹ te rọwo eware nọ a jọ Ikereakere na wuhrẹ iẹe kpahe Jesu Kristi, a dhesẹ i rai kẹe vevẹ. (2 Tim. 1:5; 3:14, 15) Fikiere, dede nọ esẹgbini Ileleikristi nẹnẹ a rẹ daoma ziezi re a fi obọ họ kẹ emọ rai jọ idibo Jihova, u re woma re u no emọ na eva ze re a gọ Ọghẹnẹ.—Mak 8:34.
Re ohwo ọ sae rọ uyoyou gọ Jihova je kru ẹgbakiete riẹ ghelọ oware nọ o rẹ via kpobi, a re wuhrẹ iẹe ziezi, ọ vẹ jẹ rọwo eware nọ a bi wuhrẹ iẹe na. Ẹrọwọ riẹ o vẹ jọ gaga.—Ẹf. 3:17; Kọl. 2:6, 7.
Oware nọ Emọ A re Ru
Albert, * ọnọ ọ whẹro evaọ uviuwou Isẹri Jihova ọ ta nọ: “Mẹ riẹ no otọ ze inọ Isẹri Jihova họ egagọ uzẹme na, rekọ o jẹ bẹ omẹ re mẹ rọwo inọ epanọ a bi wuhrẹ na ere me re yeri uzuazọ mẹ.” Whọ tẹ rrọ uzoge, ẹsejọhọ epọvo na who bi roro. Kọ eme whọ gbẹ daoma ha re whọ riẹ oghẹrẹ nọ Ọghẹnẹ ọ gwọlọ nọ ma yeri re whọ jẹ ruẹ omaweromẹ evaọ eruo oreva riẹ! (Ol. 40:8) Albert ọ ta nọ: “Me te muhọ ẹlẹ. Oke ọsosuọ, o jọ bẹbẹ k’omẹ. Mẹ jẹ gba oma mẹ họ lẹ. Rekọ u kri hi, mẹ tẹ riẹ nnọ mẹ sae jọ emamọ ohwo evaọ aro Ọghẹnẹ otẹrọnọ mẹ daoma ru oware nọ u woma. Onana o tẹ kẹ omẹ ẹgba ru inwene nọ i fo.” Whọ tẹ be daoma re who wo usu okpekpe kugbe Jihova, whọ rẹ sai wo isiuru nọ who re ro ru oware nọ ọ gwọlọ mi omai.—Ol. 25:14; Jem. 4:8.
Dai roro kpahe ezaharo jọ nọ e rẹ were owhẹ gaga, wọhọ apele hayo ọludo. Whọ gbẹ riẹ kpahe arozaha nana ha, e rẹ jọ owhẹ oma eheho. Rekọ whọ tẹ riẹ epanọ a re te apele hayo fi ọludo ziezi, o re si owhẹ urru. Epọvo na ukoko na o rrọ. Fikiere hae ruẹrẹ oma kpahe kẹ iwuhrẹ ukoko na. Jarai wo obọ. Whọ tẹ make rrọ ọmaha, whọ sae rọ uruemu ra tuduhọ amọfa awọ.—Hib. 10:24, 25.
Epọvo na o rrọ nọ whọ tẹ be ta kẹ amọfa kpahe eware nọ whọ rọwo. Uyoyou who re ro ru onana re orọnikọ ọgbahọ họ. Nọ oma ra nọ: ‘Fikieme mẹ rọ gwọlọ vuẹ amọfa kpahe Jihova? Fikieme me ro you rie?’ U fo re whọ riẹ Jihova wọhọ Ọsẹ oyoyou. Ọ rehọ ẹkwoma Jerimaya ta nọ: “Wha rẹ te gwọlọ omẹ ruẹ.” (Jeri. 29:13, 14) Kọ eme onana o gwọlọ mi owhẹ? Jakub ọ ta nọ: “Me nwene oghẹrẹ nọ mẹ jẹ hai roro. No emaha ze mẹ be hai kpohọ iwuhrẹ gbe usiuwoma, rekọ i je no omẹ udu ze he. Nọ mẹ te riẹ Jihova ziezi no je wo usu okpekpe kugbe ei no ẹsiẹ uzẹme na u ro te omẹ udu.”
Emamọ egbẹnyusu nọ who re wo i re fi obọ họ kẹ owhẹ reawere usiuwoma ota. Ebaibol e ta nọ: “Ọnọ ọ nya lele ahwo owareghẹ o re wo areghẹ.” (Itẹ 13:20) Fikiere nya usu kugbe ahwo nọ i kru ukoko na ga jẹ be gọ Jihova avọ evawere. Jola ọ ta nọ: “Usu kugbe izoge nọ i kru ukoko na ga o kẹ omẹ uduotahawọ. Me te mu usiuwoma họ ẹnya kẹse kẹse avọ evawere.”
Oware nọ Esẹgbini A re Ru
Jola ọ ta nọ: “Me yere ọsẹgboni mẹ gaga nọ a ro wuhrẹ omẹ kpahe Jihova.” Ẹhẹ, esẹgbini a rẹ sai fi obọ họ gaga re emọ rai a salọ sọ a rẹ gọ Ọghẹnẹ. Pọl ukọ na o kere nọ: “Whai esẹ, wha . . . ru [emọ rai] re a yo ẹme je wuhrẹ ai orọ Ọnowo na.” (Ẹf. 6:4) Ohrẹ nana u dhesẹ vevẹ inọ esẹgbini a re wuhrẹ emọ rai izi Jihova orọnikọ erọ obọrai hi. Ukpenọ who wuhrẹ emọ ra re a yeri uzuazọ nọ whọ gwọlọ, ẹvẹ u re woma te re who fi obọ họ kẹ ai yeri uzuazọ nọ o rọwokugbe ẹjiroro Jihova!
Whọ rẹ sai fi eme Jihova họ udu emọ ra jẹ “rehọ ae gbe-iku no wha keria eva iwou rai, no wha be nya eva edhere, gbe okenọ wha kiẹzẹ, gbe okenọ wha rọo ze.” (Izie. 6:6, 7) Ọzae avọ aye jọ nọ a re se Ewa avọ Ryszard, nọ a yẹ emezae esa a ta nọ: “Kẹse kẹse ma jẹ hai lele emọ mai gbiku kpahe abọ sa-sa iruo odibọgba oke-kpobi na.” Eme u no rie ze? “Okenọ emọ na a gbẹ jọ emaha a te wo isiuru inọ a rẹ jọ Isukulu Odibọgba Esuo-Ọghẹnẹ na ru ẹme, a tẹ te jọ iwhowho-uvie, uwhremu na a tẹ gwọlọ nnọ a rẹ họ-ame. Kẹsena aikpobi a te mu odibọgba oke-kpobi họ.”
Luk 6:40) Emọ ra a re muẹrohọ uzuazọ nọ who bi yeri kẹdẹ kẹdẹ jẹ riẹ sọ ohẹriẹ o rrọ ẹme gbe uruemu ra.
Emamọ oriruo nọ esẹgbini a re fihọ otọ u wuzou. Ryszard ọ ta nọ, “Ma gba riẹ mu nnọ ma re yeri uzuazọ agbava ha, koyehọ re epanọ ma re ru nọ ma tẹ rrọ kugbe inievo na u wo ohẹriẹ no uruemu nọ ma rẹ jọ obọ uwou dhesẹ.” Fikiere, nọ oma ra nọ: ‘Eme emọ mẹ a be jọ oma mẹ ruẹ? Kọ a be ruẹ nnọ me wo uvi uyoyou kẹ Jihova? Kọ uyoyou nana u bi dhesẹ oma via evaọ elẹ mẹ gbe uwuhrẹ omobọ mẹ nọ me bi ru kẹse kẹse? Kọ a be ruẹ uyoyou nana evaọ uruemu nọ me wo kpahe usiuwoma ota, eware omosasọ, ekwakwa eyero akpọ, gbe ẹme nọ mẹ be hae ta kpahe inievo ukoko na?’ (Ọwhọkuo u wo abọ ologbo evaọ ẹyọrọ emọ. Ghele na, Ebaibol e ta kẹ omai inọ ma ‘wuhrẹ ọmọ edhere nọ ọ rẹ nya.’ (Itẹ 22:6) Ewa avọ Ryszard a ta nọ, “Ma roma totọ wuhrẹ Ebaibol kugbe emọ mai omomọvo.” Ẹhẹ, esẹgbini na ọvo a rẹ jiroro na sọ a re wuhrẹ emọ rai omomọvo. Oghẹrẹ nọ o rrọ kpobi, u fo re a muẹrohọ ẹgwọlọ ọmọ ọvuọvo. Onana o gwọlọ nọ esẹgbini a re yeri kugbe emọ rai kpobi oghẹrẹ ovo na ha, a ve je dhesẹ ororokẹ. Wọhọ oriruo, ukpenọ whọ rẹ ta kẹ emọ ra inọ oghẹrẹ ile jọ i woma ha, kọ who gbe dhesẹ kẹ ae oghẹrẹ nọ a rẹ rọ salọ emamọ ile gbe izi Ebaibol nọ i wo obọ kpahe onana?
Emọ ra a rẹ sae riẹ oware nọ whọ gwọlọ mi ai o vẹ jẹ wọhọ nnọ a bi ru oware nọ whọ gwọlọ. Ghele na, u fo nnọ whọ rẹ riẹ oware nọ o rrọ udu rai. Kareghẹhọ, “iroro nọ e rọ eva ohwo e wọhọ edidi ame, rekọ ohwo nọ ọ rẹ riẹ otọ oware ọ rẹ rehọ iroro na via.” (Itẹ 20:5) Jọ oma emọ ra muẹrohọ eware nọ i re dhesẹ inọ a wo ebẹbẹ jọ, re who ru oware jọ kpahe iẹe ababọ okioraha. Ababọ ẹwhọ, jae riẹ oware nọ o be kẹ owhẹ uye, whọ vẹ jẹ nọ enọ nọ i fo. Rekọ whọ nọ enọ bu hrọ họ. Uvi ọdawẹ ra u ti te udu rai jẹ wọ owhẹ fi obọ họ kẹ ae.
Oware nọ Ukoko na U re Ru
Kọ whọ sai fi obọ họ kẹ izoge nọ e rrọ ukoko ra wo ovuhumuo kẹ oghale nọ a wo nọ a ro wo esẹgbini nọ e rrọ ukoko na? Dede nọ o rrọ owha-iruo esẹgbini re a wuhrẹ emọ rai, amọfa evaọ ukoko na, maero kọ ekpako na, a rẹ sai fi obọ họ. O mae roja re a muẹrohọ izoge nọ e rrọ iviuwou nọ ahwo a jọ rrọ egagọ sa-sa.
Eme ekpako a rẹ sai ru ro fi obọ họ kẹ izoge you Jihova re a jẹ riẹ nnọ a rrọ ghaghae? Mariusz, ọnọ ọ rrọ ọkpako evaọ ukoko jọ evaọ obọ Poland, ọ ta nọ: “U fo re ekpako na a lele izoge na ta ẹme ẹsikpobi. A re ru onana orọnikọ nọ ebẹbẹ e tẹ roma via ọvo ho rekọ evaọ oke ofa re, nọ a tẹ rrọ usiuwoma, nọ iwuhrẹ i te kuhọ no, hayo etoke efa kpobi.” Kọ whọ gbẹ nọ izoge na epanọ a rri ukoko na? Ẹmeọta-kugbe otiọye na o re si izoge na kẹle ukoko na je fi obọ họ kẹ ae riẹ nnọ a rri rai ghaghae evaọ ukoko na.
Whọ tẹ rrọ ọkpako ukoko, kọ whọ be daoma re whọ riẹ izoge nọ e rrọ ukoko ra? Dede nọ Albert nọ ma fodẹ ẹsejọ na ọ rrọ ọkpako ukoko enẹna, ọ nyaku edawọ buobu evaọ okenọ ọ jọ uzoge. Ọ ta nọ, “Evaọ oke yena mẹ gwọlọ inọ ekpako na a re weze bru omẹ ze.” Ekpako a rẹ sai je dhesẹ isiuru kpahe izoge na ẹkwoma olẹ nọ a rẹ lẹ inọ jọ a kruga evaọ ukoko na.—2 Tim. 1:3.
O rrọ ziezi re izoge na a dhomahọ iruẹru ukoko na. Ogbẹrọ ere he, a ve ti mu itee akpọ họ ele. Kọ whai enọ e kpako no, wha sae whai lele oma evaọ usiuwoma je si rai gboma? Hae raha oke kugbe ai, je ru re a rehọ owhẹ wọhọ ogbẹnyusu nọ a rẹ sai fievahọ. Jola ọ ta nọ: “Oniọvo-ọmọtẹ jọ nọ ọ rrọ ọkobaro o te si omẹ gboma. Ọye me lele kpohọ usiuwoma orọ ọsosuọ nọ u no omẹ eva ze.”
Oware nọ Whọ rẹ Salọ kẹ Omobọ Ra
Izoge na, wha nọ oma rai nọ: ‘Eme họ itee mẹ? Otẹrọnọ mẹ re họ-ame he, kọ ame-ọhọ o rrọ utee mẹ?’ Uyoyou nọ ohwo o wo kẹ Jihova oye o rẹ wọe họ-ame, orọnikọ fikinọ imoni riẹ e rrọ ukoko na ha.
Ẹhẹ, ajọ Jihova ọ jọ uvi Ogbẹnyusu ra, re ukoko na o jẹ jọ owhẹ oja. Jihova ọ rehọ ẹkwoma Aizaya ọruẹaro na ta nọ: “Who nyuhẹ hẹ, keme mẹ họ Ọghẹnẹ ra.” Epanọ whọ gọ Jihova kri te ere ọ te jọ ogbẹnyusu ra kri te. Ọ te ginẹ k’owhẹ ẹgba jẹ “rehọ obokparọ [riẹ] kru owhẹ dikihẹ.”—Aiz. 41:10.
[Oruvẹ-obotọ]
^ edhe-ẹme 6 A nwene edẹ na jọ no.
[Uwoho nọ o rrọ ẹwẹ-obe avọ 4]
Daoma riẹ oware nọ o rrọ udu ọmọ ra
[Uwoho nọ o rrọ ẹwẹ-obe avọ 6]
Uyoyou nọ who wo kẹ Jihova o rẹ wọ owhẹ họ-ame