Me Duku Oware Nọ O Be Lẹliẹ Uzuazọ Were Omẹ

Ikuigbe ọ Gaspar Martínez

Ikuigbe mẹ yọ iku ọmọ oyogbere nọ akpọ o woma kẹ evaọ okpẹwho jọ. Rekọ whọ te ruẹ inọ efe nọ me rẹro riẹ hẹ oye me wo.

MẸ WHẸRO evaọ ofẹ Spain jọ nọ a re se Rioja evaọ etoke ikpe 1930. Fikinọ ma wo ugho ho, mẹ siọ isukulu ba okenọ mẹ jọ ikpe ikpe, rekọ evaọ oke yena yọ me wuhrẹ epanọ me re se je kere no. Mẹ avọ inievo ezeza mẹ ma jẹ hai thuru igodẹ yọ ma bi ru idhu esese jọ.

Fiki uvuhu, efe ọvo ma jẹ hai roro kpahe. Ma jẹ hae re enọ i fe vi omai ihri. Ghele na, ibishọpo ichọche mai ọ ta okejọ inọ “iwhre mai họ onọ o mai kru ichọche ga evaọ okogho riẹ.” Evaọ oke yena, ọ riẹ hẹ inọ ahwo buobu a te dhẹ no ichọche Kathọlik.

Ẹgwọlọ Oware nọ U Vi Efe

Mẹ jọ iwhre mai rehọ ọmọtẹ jọ nọ a re se Mercedes. U kri hi, o te yẹ ọmọzae. Evaọ 1957, mẹ avọ aye gbe ọmọ mẹ ma tẹ kwa kpohọ Logroño, uwhremu na ahwo uviuwou mẹ nọ i kiọkọ a tẹ kwa ze. Mẹ tẹ te ruẹ nnọ fikinọ me wuhrẹ iruo ho, o lọhọ họ re mẹ ruẹ emamọ iruo. Mẹ gbẹ riẹ onọ me re ru hu. Me te kpohọ uwou-ebe nọ o rrọ ẹwho mai sọ mẹ rẹ sai se ku oware jọ nọ u re fi obọ họ kẹ omẹ ruẹ iruo, dede na mẹ riẹ oware nọ mẹ be gwọlọ dẹẹ hẹ.

Uwhremu na me te yo kpahe ovuẹ jọ nọ a rẹ jọ irediyo whowho inọ ọruẹrẹfihotọ jọ ọ riẹ nọ a re ro wuhrẹ Ebaibol kugbe ohwo ẹkwoma ileta ikere. Nọ me wuhrẹ Ebaibol ziezi no, ahwo ichọche Protẹstant jọ a te weze bru omẹ ze. Nọ me kpọhọ ichọche rai unuẹse jọ no, mẹ tẹ ruẹ nnọ ẹwhọ ọ rrọ udevie ikpahwo rai. Me gbe zihe viere he, bi roro inọ ere egagọ kpobi e rrọ.

Egbẹ I Kie no Omẹ Aro

Evaọ 1964, ọmọzae jọ nọ a re se Eugenio ọ tẹ ziọ uwou mẹ. Ọ jọ omọvo Isẹri Jihova, egagọ nọ me ri yo kpahe ẹdọvo ho. Rekọ eva e were omẹ gaga re me lele ei ta ẹme kpahe Ebaibol. Me roro nnọ mẹ riẹ kpahe Ebaibol ziezi. Mẹ rehọ umutho eria Ebaibol nọ mẹ riẹ evaọ okenọ me je ro kpohọ isukulu Ebaibol na kpahe ẹme kẹe. Dede nọ mẹ jẹ daoma thọ iwuhrẹ Protẹstant jọ, mẹ jọ udu mẹ rọwo iwuhrẹ na ha.

 Nọ mẹ avọ Eugenio ma ta ẹme isiava no, me te vuhumu inọ ọ ginẹ riẹ Ebaibol na totọ. U gb’omẹ unu epanọ o bi ro rovie eria sa-sa evaọ Ebaibol na ọ vẹ jẹ fa otọ rai, dede nọ o kpohọ isukulu te omẹ hẹ. Eugenio ọ jọ Ebaibol dhesẹ kẹ omẹ inọ edẹ urere na ma be rria na gbe nnọ kẹle na Uvie Ọghẹnẹ o ti zihe otọakpọ na ruọ aparadase. Akpọ o gb’omẹ unu.—Ol. 37:11, 29; Aiz. 9:6, 7; Mat. 6:9, 10.

Mẹ tẹ nwane rọwo inọ ọ hae nyaze ti wuhrẹ Ebaibol kugbe omẹ. Enwenọ eware nọ o je wuhrẹ omẹ kpobi e jọ ekpokpọ, yọ i je duobọte udu mẹ. Oma eware nọ me je wuhrẹ i je mu omẹ. Me duku egagọ uzẹme na no. Efe nọ mẹ jẹ gwọlọ vẹre o gbẹ j’omẹ oja ha, yọ emamọ iruo nọ mẹ jẹ ruẹ hẹ o gbẹ jẹ k’omẹ uye he. Ẹyao gbe uwhu dede i ti n’otọ.—Aiz. 33:24; 35:5, 6; Evia. 21:4.

Mẹ tẹ nwani muọ eware nọ me je wuhrẹ họ ẹtakẹ imoni mẹ, be rọ ọwhọ dhesẹ kẹ ai inọ Ọghẹnẹ ọ ya eyaa aparadase otọakpọ, oria nọ enọ e gọ riẹ a te rria bẹdẹ bẹdẹ.

Ahwo Uviuwou Mẹ A Kurẹriẹ

U kri hi, ma te ti te oware wọhọ ahwo 12 nọ e jẹ hai kokohọ uvo Ẹdoka kpobi evaọ uwou oniọvo ọsẹ mẹ re ma ta ẹme kpahe eyaa Ebaibol. Ma jẹ hae raha euwa ivẹ hayo esa k’oka k’oka. Nọ Eugenio ọ ruẹ nnọ imoni mẹ buobu a wo isiuru kpahe Ebaibol na, ọ tẹ jiroro inọ ọ te hai weze bru k’uviuwou k’uviuwou.

Imoni mẹ efa e be rria Durango, ẹwho ọsese jọ nọ Isẹri Jihova a rrọ họ, onọ o rehọ emaele 80 thabọ no ẹwho nọ mẹ be rria. Nọ emerae esa e ruọ emu no, mẹ tẹ jọ oria iruo mẹ mi uvẹ re me weze bru rai jẹ ta kẹ ae kpahe egagọ ekpokpọ nọ mẹ rrọ. Nọ mẹ nya, k’owọwọ k’owọwọ ahwo wọhọ imakpe a jẹ hai kokohọ, ma vẹ ta ẹme rite irioke. Oma o jẹ hae were ai re a gaviezọ. Nọ oke ukpo mẹ u te no, mẹ tẹ nya siọ Ebaibol gbe ebe jọ ba kẹ ai. No oke yena vrẹ, ma jẹ hai yo unu ohwohwo.

Okenọ Isẹri Jihova jọ a kpohọ Durango, oria nọ uvumọ ohwo ọ re jọ ta usiuwoma ha, a tẹ ruẹ ahwo 18 nọ e rọ ọwhọ be hẹrẹ uwuhrẹ Ebaibol. Eva e were Isẹri na re a wuhrẹ Ebaibol kugbe uviuwou kpobi.

Evaọ oke nana kpobi, aye mẹ Mercedes, o ri kurẹriẹ hẹ, orọnikọ fiki oyẹlẹ nọ o re ro wuhrẹ Ebaibol ọvo ho rekọ maero fiki ozodhẹ ahwo. Evaọ oke yena a whaha iruo Isẹri Jihova, fikiere o roro inọ egọmeti o ti le emọ ivẹ mai no isukulu a ve je mu omai kpobi imuẹwho. Rekọ nọ ọ ruẹ nnọ uviuwou na soso u bi kurẹriẹ re no, ọ tẹ gwọlọ inọ a wuhrẹ Ebaibol kugbei.

Evaọ ikpe ivẹ, imoni mẹ nọ i kurẹriẹ jẹ họ-ame a bu te 40. Ẹhẹ, imoni mẹ a lele ithihi mẹ. Mẹ riẹ inọ me le oware ulogbo jọ t’obọ no. Efe abọ-ẹzi nọ Ọghẹnẹ ọ rọ ghale omai no a re gbiku rai hi.

Nọ Mẹ Be Kpako na Yọ Evawere Mẹ I Bi Vihọ

Evaọ ikpe 20 nọ i lele i rie, mẹ tẹrovi epanọ mẹ rẹ rọ rẹrote emezae ivẹ mẹ je fi obọ họ kẹ ukoko nọ mẹ rrọ. Okenọ mẹ avọ aye mẹ Mercedes ma kwa kpohọ Logroño, Isẹri Jihova 20 ọvo e jọ ẹwho yena nọ ahwo nọ a bu te idu udhusoi (100,000) a rrọ na. U kri hi, me te ti wo ekwa-iruo buobu evaọ ukoko na.

Okenọ mẹ kpako te ikpe 56 no, ekọmpene nọ mẹ jọ o te kie, fikiere me gbe wo iruo ho. O jọ isiuru mẹ anwẹdẹ re mẹ jọ ọkobaro oke-kpobi, fikiere mẹ tẹ rọ uvẹ nana mu iruo ọkobaro họ. Ugho nọ ekọmpene na o k’omẹ o je te oware ovo ru hu. Fiki onana, Mercedes o te mu iruo họ. Ma jẹ sae ko  uviuwou mai, eware nọ e ginẹ roja e kare omai hi. Mẹ gbẹ rrọ ọkobaro, yọ aye mẹ o re ru ọkobaro obufihọ n’oke ruoke, ọ be reawere usiuwoma ota na ziezi.

Imikpe jọ nọ i kpemu, Mercedes ọ jẹ hae rehọ emagazini se ọmọtẹ jọ nọ a re se Merche, ọnọ o je wuhrẹ Ebaibol okenọ ọ jọ ọmaha. Ebe mai e jẹ hae were Merche ese gaga, yọ Mercedes o te muẹrohọ inọ o gbe wo isiuru kpahe Ebaibol. Ukuhọ riẹ, Merche ọ tẹ rọwo inọ a wuhrẹ Ebaibol kugbei, o te ti wo ẹnyaharo ziezi. Rekọ Vicente ọzae riẹ ọ jẹ da idi gaga, fikiere ọ jẹ sai kru iruo dhobọ họ. Fiki onana, o wo ugho ọvo nọ ọ jẹ hai ro fi obọ họ kẹe he; idieda riẹ o jẹ te lẹliẹ orọo rai fa.

Aye mẹ ọ ta kẹ Merche inọ ọ ta kẹ ọzae riẹ re ọ nya bru omẹ ze ma t’ẹme, yọ o gine ru ere. Nọ ma ta ẹme unuẹse buobu no, ọ tẹ rọwo inọ me wuhrẹ Ebaibol kugbei. Vicente o te muhọ enwene, ọ rẹ kae udi t’unu hu edẹ buobu. Ẹsejọ ọ rẹ siọ udi ba oka ọvo hayo vrẹ ere. Uwhremu na, ọ tẹ siọ udi ba riẹriẹriẹ. Oma riẹ o te ti nwene no wowoma, evawere e tẹ ruọ uviuwou riẹ. Uviuwou riẹ soso a je fi obọ họ gaga kẹ ukoko osese nọ o rrọ Canary Islands, oria nọ a be rria enẹna.

Eroro Kpahe Emamọ Uzuazọ nọ Me Yeri No

Dede nọ imoni mẹ jọ nọ i kurẹriẹ ikpe buobu nọ e vrẹ a whu no, uviuwou na o gbẹ be rro, yọ Ọghẹnẹ ọ ghale omai gaga no. (Itẹ 10:22) O rrọ oware evawere nọ mẹ rọ ruẹ nọ enwenọ ahwo kpobi nọ a je wuhrẹ Ebaibol ikpe 40 nọ e vrẹ, te emọ rai gbe emọ-iruọmọ rai, a gbẹ be gọ Jihova.

Imoni mẹ buobu nẹnẹ a rrọ ukoko na, ibuobu rai ekpako, idibo iruiruo, gbe ekobaro. Ọmọzae ọkpako mẹ avọ aye riẹ a bi ru iruo evaọ Ebẹtẹle nọ ọ rrọ Madrid evaọ Spain. Okenọ me kurẹriẹ, Isẹri Jihova nọ e jọ Spain a bu te oware wọhọ idu esa (3,000). Enẹna ma bu vi idu udhusoi (100,000) no. Mẹ be reawere iruo odibọgba oke-kpobi na gaga, yọ me yere Ọghẹnẹ ziezi kẹ uzuazọ nọ mẹ reawere riẹ no evaọ ukoko na. Dede nọ me kpohọ isukulu tere he, mẹ be hai ru iruo n’oke ruoke wọhọ ethabọ ọsẹro okogho.

Imikpe jọ nọ e vrẹ, me yo inọ enwenọ ahwo kpobi a kwa no iwhre nọ mẹ jọ whẹro no. Fiki uvuhu, ahwo a dhẹ siọ idhu gbe iwou rai ba kpohọ ukane. Ahwo nana buobu, te omẹ te, ma ruẹ efe abọ-ẹzi no. Ma ruẹ no inọ uzuazọ u wo ẹjiroro gbe nọ re a gọ Jihova o rẹ wha oghọghọ ulogbo ze.

[Uwoho nọ o rrọ ẹwẹ-obe avọ 32]

Enwenọ ahwo uviuwou Brọda Martínez kpobi nọ e rrọ ukoko na