Uyoyou Kristi O Rẹ Wọ Omai You Amọfa
Uyoyou Kristi O Rẹ Wọ Omai You Amọfa
“Epanọ [Jesu]o you erọ obọ riẹ nerọ evaọ akpọ na, o te you ai te umuo.”—JỌN 13:1.
1, 2. (a) Ẹvẹ uyoyou Jesu o re ro dhesẹ oma via? (b) Abọ uyoyou vẹ ma te jọ uzoẹme nana ta ẹme kpahe?
JESU ọ rrọ obọdẹ oriruo kẹ omai evaọ amọfa nọ o you. Evaọ uzuazọ riẹ kpobi, ọ rehọ uruemu gbe etata ẹme riẹ, iwuhrẹ gbe uwhu idheidhe riẹ dhesẹ inọ o you amọfa. Rite ẹdẹ uwhu riẹ, Jesu o you amọfa, maero kọ ilele riẹ.
2 Jesu ọ rehọ oriruo riẹ dhesẹ epanọ uyoyou nọ ilele riẹ a re wo u re diwi te. Oriruo riẹ o re je fi obọ họ kẹ omai you enọ ma gbẹ rrọ ukoko na jegbe amọfa. Ma te jọ uzoẹme nana ta kpahe oware nọ ekpako ukoko a rẹ sai wuhrẹ mi Jesu kpahe eyou enọ e raha uzi, makọ enọ e raha uzi ologbo. Ma te jẹ ta kpahe epanọ uyoyou nọ Jesu o wo o rẹ rọ wọ Ileleikristi dhogbo bru enọ ọbẹwẹ ọ rrọ oma, enọ eware okpẹtu e via kẹ, gbe enọ e be mọ.
3. Dede nọ Pita o ruthọ gaga, ẹvẹ Jesu o rri rie?
3 Taure Jesu o te ti whu, Pita ukọ riẹ ọ vro riẹ isiasa. (Mak 14:66-72) Rekọ nọ Pita o kurẹriẹ no, wọhọ epanọ Jesu ọ ruẹaro nọ o ti ru na, Jesu ọ rọ vrẹ riẹ. Jesu ọ tẹ rehọ ewha-iruo ilogbo buobu kẹ Pita. (Luk 22:32; Iruẹru 2:14; 8:14-17; 10:44, 45) Eme ma jọ oma Jesu wuhrẹ kpahe oghẹrẹ nọ o yerikugbe enọ i ruthọ gaga?
Wo Ọkpọ Eriwo Kristi Kpahe Enọ I Ruthọ
4. Uyero vẹ o rẹ mae jọ gwọlọ re a dhesẹ ọkpọ uruemu Kristi?
4 Iyero buobu e riẹ nọ ma re jo dhesẹ ọkpọ eriwo Kristi, rekọ onọ o mae ga họ nọ amọfa a tẹ raha izi ilogbo, evaọ uviuwou mai hayo evaọ ukoko na. U yoma gaga inọ nọ uyerakpọ Setan u bi te ekuhọ na, ẹzi akpọ na o bi wholo ahwo vi epaọ anwẹdẹ. Uruemu uyoma akpọ na o rẹ sai wholo te ekpako te emaha, onọ u bi ru ei bẹbẹ kẹ ahwo buobu re a dadamu inọ a re ru oware nọ u woma. Evaọ ikpe-udhusoi ọsosuọ, a si ejọ no ukoko, a tẹ whọku amọfa. Epọvo na o rrọ nẹnẹ. (1 Kọr. 5:11-13; 1 Tim. 5:20) Rekọ nọ ekpako nọ e be rehọ ahwo itieye na keria a te dhesẹ ọkpọ uyoyou Kristi, o rẹ sai duobọte ọnọ ọ raha uzi na.
5. Ẹvẹ ekpako a rẹ rọ raro kele Kristi nọ amọfa a te ruthọ?
5 Wọhọ Jesu, ekpako na a rẹ ruẹ ohwo nọ ọ be raha izi Jihova a ve ku ovao fiẹ hẹ. Dede na, a re dhesẹ ẹwo gbe uyoyou Jihova. Ohwo o te gine kurẹriẹ, nọ oware nọ o ru ‘o tẹ dae te ẹzi,’ o sae jọ bẹbẹ hẹ re ekpako na a “rehọ ẹzi oma-urokpotọ se ohwo otiọye ziheze.” (Ol. 34:18; Gal. 6:1) Rekọ ẹvẹ otẹrọnọ o bi veghe uzou yọ oware nọ o ruthọ na o da riẹ hẹ?
6. Eme ekpako a re ru hu nọ a te bi fi obọ họ kẹ ọnọ o ruthọ, kọ fikieme?
6 Nọ ohwo nọ o ruthọ ọ tẹ siọ ohrẹ nọ u no Ebaibol ze hayo o bi gu unoma, onana o sae kẹ ekpako na gbe amọfa uye. Ebẹbẹ nọ iruthọ riẹ e wha ze o sai ru nọ ekpako na gbe inievo efa a re ro muofu kẹe. Rekọ ofu ọ rẹ wha oware uwoma ze he, yọ u re dhesẹ “iroro Kristi” hi. (1 Kọr. 2:16; se Jemis 1:19, 20.) Jesu ọ vẹvẹ ahwo jọ evaọ oke riẹ unu, ghele na ọ rehọ ofu ta ẹme kẹ ae he. (1 Pita 2:23) Ikpoye, o dhesẹ nọ o lọhọ re irumuomu a kurẹriẹ je wo ọjẹrehọ Jihova. Evaọ uzẹme, ẹjiroro jọ nọ Jesu ọ rọ ziọ akpọ họ re o “siwi erahaizi.”—1 Tim. 1:15.
7, 8. Eme u re fi obọ họ kẹ ekpako na nọ a tẹ be rọ ohwo guẹdhọ?
7 Ẹvẹ oriruo Jesu o sai ro fi obọ họ kẹ omai nọ o tẹ gwọlọ nọ a rẹ whọku hayo si ohwo jọ no ukoko? Kareghẹhọ nnọ re a whọku hayo si ohwo no ukoko yọ ọruẹrẹfihotọ nọ u no Ikereakere na ze onọ o rẹ thọ ukoko na je fi obọ họ kẹ ọnọ o ruthọ na kurẹriẹ. (2 Kọr. 2:6-8) O da omai gaga inọ ejọ nọ i ruthọ a gwọlọ kurẹriẹ hẹ fikiere a ve si ai no ukoko, rekọ eva e were omai inọ ibuobu ahwo itioye na a re zihe ziọ ukoko na. Nọ ekpako na a te bi dhesẹ uruemu Kristi u re ru ei lọhọ kẹ ọnọ o ruthọ na kurẹriẹ. Evaọ obaro, dede nọ ejọ nọ i kurẹriẹ a te kareghẹhọ ehrẹ kpobi nọ ekpako na a kẹ rai no Ebaibol ze he, a te kareghẹhọ adhẹẹ gbe uyoyou nọ ekpako na a dhesẹ kẹ ae.
8 Fikiere, ekpako na a re dhesẹ “ubi Ẹzi” na maero kọ ọkpọ uyoyou Kristi, o tẹ make rọ nọ ọnọ o ruthọ na o bi veghe uzou. (Gal. 5:22, 23) U fo ho re ekpako na a rọ okpakpa si ohwo nọ o ruthọ no ukoko. A re dhesẹ nọ a gwọlọ re enọ i ruthọ a zihe bru Jihova ze. Fikiere nọ orumuomu o te kurẹriẹ uwhremu na wọhọ epanọ o rẹ jọ ẹsibuobu na, o ti yere Jihova gbe ‘ekẹ ahwo’ nọ i ru rie lọhọ kẹe re o zihe ziọ ukoko na.—Ẹf. 4:8, 11, 12.
Dhesẹ Ọkpọ Uyoyou Kristi Evaọ Oke Urere Nana
9. Kẹ oriruo epanọ Jesu o ro dhesẹ uyoyou kẹ ilele riẹ.
9 Luk o kere kpahe obọdẹ edhere jọ nọ Jesu o ro dhesẹ uyoyou kẹ ilele riẹ. Fikinọ ọ riẹ nọ oke o be tha nọ egbaẹmo Rom a te wariẹ Jerusalẹm họ, Jesu ọ tẹ vẹvẹ ilele riẹ unu nọ: “Nọ wha rẹ te ruẹ Jerusalem nọ itu ẹmo e wariẹ họ, kẹsena wha rẹ riẹ nọ ẹraha riẹ ọkẹle ino. Kẹsena e nọ e rọ evaọ Judia evẹ dhẹ kpo igbehru, e nọ e rọ evaọ ewho a ru re a noi hi, te enọ e rọ ẹwho ho a gbẹ ruọ eva riẹ hẹ. Keme enana họ edẹ orukele, re eware kpobi nọ a kere e gba.” (Luk 21:20-22) Nọ egbaẹmo Rom a wariẹ Jerusalẹm họ evaọ 66 C.E., enọ i yoẹme a te ru epanọ Jesu ọ ta na.
10, 11. Ẹvẹ oriruo Ileleikristi nọ e dhẹ no Jerusalẹm o sai ro fi obọ họ kẹ omai ruẹrẹ oma kpahe kẹ ‘uye ulogbo’ na?
10 Okenọ a jẹ dhẹ no Jerusalẹm, o gwọlọ nnọ Ileleikristi a re dhesẹ uyoyou kẹ ohwohwo wọhọ epanọ Kristi o dhesẹ kẹ ae na. O gwọlọ nọ a re fi obọ họ kẹ ohwohwo. Rekọ u te no ọraha Jerusalẹm no, eruẹaruẹ Jesu i wo orugba logbo evaọ obaro. Ọ ta nnọ: “Uye obẹbẹ ruaro o rẹ te jọ, u tioye o te jọ no emuhọ akpọ na ze ri te enẹ hẹ, ijo, o gbẹ sae jọ ofa ha.” (Mat. 24:17, 18, 21) Evaọ enẹna gbe okenọ ‘uye ulogbo’ na u te muhọ no, ebẹbẹ buobu e rẹ sai te omai. Ma te wo ọkpọ uruemu Kristi u ti fi obọ họ kẹ omai fi ebẹbẹ yena kparobọ.
11 Eva oke yena, o te gwọlọ nọ ma raro kele Jesu re ma dhesẹ uyoyou nọ o kare oriobọ. Fiki onana Pọl o kere nọ: “Wha jo mai kohwo kohwo o ru ọrivẹ riẹ evawere kẹ ewoma riẹ re o ru ei ro. Keme Kristi ọ rọ awere kẹ omaobọ riẹ hẹ . . . Jọ Ọghẹnẹ odiri gbe eri o ru owhai re wha jọ eva okugbe ọvo, wọhọ epa Jesu Kristi.”—Rom 15:2, 3, 5.
12. Didi oghẹrẹ uyoyou u fo nọ ma re wo enẹna, kọ fikieme?
12 Pita omọvo enọ Jesu o you ọ ta udu họ Ileleikristi awọ re a wo “uvi uyoyou” je dhesẹ “ẹme-oyo.” U fo nọ a re je ‘you ohwohwo no eva ze.’ (1 Pita 1:22) Nẹnẹ o mai fo re ma dhesẹ oghẹrẹ uruemu Kristi. Ma be t’ẹme na, ebẹbẹ nọ ahwo Ọghẹnẹ a rẹriẹ ovao ku i bi dhe ẹgẹga. Yọ uvumọ ohwo o re fi udu riẹ họ akpọ anwae nana ha, wọhọ epanọ iyẹrẹ ahwo nọ a bi sino iruo kẹle na gbe enọ i bi ku igho rai fiẹ evaọ ebanke i bi dhesẹ vevẹ na. (Se 1 Jọn 2:15-17.) Ukpoye, nọ urere uyerakpọ nana o be kẹle gaga na, u fo re ma sikẹle Ọghẹnẹ, sikẹle inievo mai, je wo uvi egbẹnyusu evaọ ukoko na. Pọl ọ kẹ ohrẹ nọ: “Whai ohwo ọ rehọ uyoyou oniọvo you ohwo, whai ohwo ọ kẹ ohwo adhẹẹ.” (Rom 12:10) Pita o fiẹgba họ ẹme na viere nọ ọ ta nọ: “Onọ omae rọ aro whai ohwo ọ rọ uyoyou nọ o rẹ hiẹ hẹ you ohwo, epanọ uyoyou u re rurẹ eware iyoma ibuobu.”—1 Pita 4:8.
13-15. Nọ eware okpẹtu jọ e via, ẹvẹ inievo jọ a ro dhesẹ ọkpọ uyoyou Kristi?
13 Nya akpọ na wariẹ, a riẹ Isẹri Jihova inọ a be hai dhesẹ ọkpọ uyoyou Kristi. Rehọ oriruo Isẹri nọ e dhogbo bru inievo rai okenọ ame ọ jọ America raha eria buobu evaọ 2005. Be raro kele oriruo Jesu, ahwo nọ a bu vi idu udhe (20,000) e fialoma lahwe, ibuobu e nya siọ emamọ iwou gbe iruo rai ba re a ti fi obọ họ kẹ inievo rai.
14 Evaọ oria jọ, ame na o ku oria nọ o kẹre te emaele 50, yọ ame na o diwi te ozae. Nọ ame na ọ kpọ no, abọvo abasa iwou nọ ame na o ku na kpobi e raha muotọ. Isẹri nọ i wo ona ebabọ e fialoma no erẹwho sa-sa ziọ eria nọ ame o ku na, ejọ e wha ekwakwa nọ a rẹ rọ bọ iwou ze, yọ a je ru oghẹrẹ iruo nọ a kẹ rai kpobi. Inievo-emetẹ ivẹ, enọ ọsẹgboni ọvo a yẹ, nọ e rrọ eyae-uku, a kwa ewha fihọ omoto, a tẹ dhẹ vrẹ emaele idu ivẹ (2,000, koyehọ no epaọ Isoko te obọ Eko asia ezeza soso) re a fi obọ họ. Oniọvo nana jọ ọ gbẹ rrọ ẹwho na ru iruo kugbe inievo nọ e dhogbo ze ti fi obọ họ na, yọ o bi ru ọkobaro oke-kpobi.
15 Iwou nọ a wariẹ bọ hayo ruẹrẹ i bu vi idu isoi gbe egba ezeza (5,600) erọ inievo na gbe erọ amọfa. Ẹvẹ inievo nọ a fi obọ họ kẹ na a rri uyoyou nọ inievo nana a dhesẹ na? Oniọvo-ọmọtẹ jọ nọ uwou riẹ o raha ọ kwa kpohọ umuwou jọ nọ o je fi yọ istovu nọ ọ rrọ uwou na o woma ha. Inievo na a tẹ bọ emamọ uwou ọsese jọ kẹe. Nọ o dikihẹ aro uwou ọkpokpọ riẹ, o te muhọ ẹviẹ fiki evawere bi yere Jihova gbe inievo riẹ. Nọ a bọ iwou kẹ inievo jọ no, o vrẹ ukpe ọvo re a tẹ te kwa kpohọ iwou ekpokpọ na. Fikieme? Re inievo nọ e dhogbo ze na a wohọ iwou na. Nọ obọdẹ oriruo ọrọ oghẹrẹ uruemu Kristi.
Dhesẹ Ọkpọ Uruemu Kristi kẹ Enọ E Be Mọ
16, 17. Idhere vẹ ma re ro dhesẹ ọkpọ uruemu Kristi kpahe enọ e be mọ?
16 Inievo nọ e ruẹ uye no fiki etọ nọ i nuhu, enọ ame o ku eware rai, gbe enọ eware itieye na e via kẹ no a bu hu. Rekọ ẹyao o bi kpomahọ omai kpobi hayo ohwo jọ evaọ uviuwou mai. Uruemu Jesu kpahe enọ e be mọ o rrọ oriruo k’omai. Uyoyou o wọ riẹ re ohrọ rai. Okenọ a rehọ enọ e be mọ sei, ‘o te siwi ai kpobi.’—Mat. 8:16; 14:14.
17 Ileleikristi nẹnẹ a wo ọkpọ ogaga Jesu hu onọ a re ro siwi ahwo, rekọ wọhọ Jesu a rẹ sae re ohrọ enọ e be mọ. Ẹvẹ ma rẹ sai ro dhesẹ onana? Ekpako ukoko a rẹ sai dhesẹ inọ a wo ọkpọ uruemu Kristi ẹkwoma ọruẹrẹfihotọ nọ a re ro fi obọ họ kẹ enọ e be mọ evaọ ukoko na, a vẹ rọ ere ru ẹme nọ Jesu ọ ta eva Matiu 25:39, 40 na gba. * (Sei.)
18. Ẹvẹ inievo-emetẹ ivẹ jọ a ro dhesẹ uvi uyoyou kẹ amọfa, kọ eme o no rie ze?
18 Dede na, orọnikọ ohwo ọ rẹ jọ ọkpako ukoko re o te ru ewoma kẹ amọfa ha. Rehọ oriruo Charlene, oniọvo-ọmọtẹ nọ ọ jọ ikpe 44, ọnọ o wo ẹyao ọta nọ a ta kẹ inọ edẹ ikpe i kiọkọ re o te whu. Nọ a ruẹ ẹbẹbẹ nọ o wo gbe uye nọ o be bẹ ọzae riẹ nọ ọ be rẹro tei, inievo-emetẹ ivẹ jọ, Sharon avọ Nicolette, a tẹ ta nnọ a rẹ rẹrote oniọvo nana bọwo ẹdẹ nọ o re whu. Amara ọvo gbe ubro oniọvo nana ọ rria taure o te ti whu, rekọ inievo-emetẹ ivẹ na a rẹro tei rite ẹdẹ uwhu riẹ. Sharon ọ ta nọ: “O re bẹbẹ nọ whọ tẹ riẹ nnọ ohwo na ọ te zọ họ. Ghele na, Jihova ọ k’omai ẹgba. Oware nọ o via na u ru omai sikẹle Jihova je sikẹle ohwohwo.” Ọzae Charlene ọ ta nọ: “Obufihọ inievo-emetẹ ivẹ nana o rẹ thọrọ omẹ ẹro ho. Eva rai kpobi nọ a je ro fi obọ họ u ru rie lọhọ kẹ aye oyoyou mẹ re o thihakọ ẹyao na, o tẹ jẹ lẹliẹ oma fọ omẹ omojọ. Oware nọ a ru o te thọrọ omẹ ẹro ho bẹdẹ bẹdẹ. Obufihọ rai o lẹliẹ ẹrọwọ nọ me fihọ Jihova ga gbe uyoyou nọ me wo kẹ usu inievo mai kpobi.”
19, 20. (a) Eware isoi vẹ ma t’ẹme te no kpahe uruemu nọ Kristi o wo? (b) Eme họ ọtamuo ra?
19 Evaọ izoẹme esa nana nọ e kpahe ohwohwo na, ma ta ẹme te eware isoi jọ evaọ oghẹrẹ nọ Jesu o ro yeri kugbe amọfa, gbe epanọ ma rẹ sae rọ raro kele iei. Joma jọ “wowolẹ jegbọ eva i ro kpotọ” wọhọ epanọ Jesu ọ jọ. (Mat. 11:29) Joma daoma rehọ ẹwo yeri kugbe amọfa, o tẹ make rọnọ ethobọ rai i kpoma fihọ. Avọ aruọwha, joma koko izi Jihova kpobi nọ ma tẹ make rẹriẹ ovao ku edawọ.
20 Orọ urere, joma dhesẹ ọkpọ uyoyou Kristi kẹ inievo mai, wọhọ epanọ Kristi o you ilele riẹ “te umuo” na. Uyoyou utioye na a rẹ rọ riẹ inọ mai yọ ilele Jesu. (Jọn 13:1, 34, 35) Ẹhẹ, wha siọ “uyoyou inievo rai ba ha.” (Hib. 13:1) O b’owhẹ hẹ. Rehọ uzuazọ ra jiri Jihova je fi obọ họ kẹ amọfa. Jihova ọ te ghale uvi omodawọ ra.
[Oruvẹ-obotọ]
^ edhe-ẹme 17 Rri uzoẹme na “Whọ Ta Ọvo Ho Inọ: ‘Wha Sasa Oma jẹ Re Eva Vọ,’” evaọ Uwou-Eroro Na ọrọ October 15, 1986, ọrọ Oyibo.
Kọ Whọ Sae k’Iyo Enọ Nana Vevẹ?
• Ẹvẹ ekpako ukoko a sai ro dhesẹ ọkpọ uruemu Kristi kẹ enọ i ruthọ?
• Fikieme aruorokele uyoyou Kristi o mai ro wuzou evaọ oke urere nana?
• Ẹvẹ ma re ro dhesẹ ọkpọ uruemu Kristi kẹ enọ e be mọ?
[Enọ Uwuhrẹ]
[Uwoho nọ o rrọ ẹwẹ-obe avọ 17]
Ekpako ukoko a gwọlọ re enọ i ruthọ a zihe bru Jihova ze
[Uwoho nọ o rrọ ẹwẹ-obe avọ 18]
Ẹvẹ Ileleikristi nọ e jẹ dhẹ no Jerusalẹm a ro dhesẹ ọkpọ uruemu Kristi?
[Uwoho nọ o rrọ ẹwẹ-obe avọ 19]
A riẹ Isẹri Jihova kẹ uvi uyoyou nọ a wo kẹ ohwohwo