Enọ Ahwo nọ A s’Ebe
Enọ Ahwo nọ A s’Ebe
Kọ u fo re oniọvo-ọmọtẹ ọ fare uzou nọ ọ tẹ be r’obọ f’otọ ẹme nọ a rrọ eplatfọmo ru kẹ enọ i diezọ?
Wọhọ epanọ ma riẹ, aye ọ rẹ fare uzou nọ o te bi ru iruo nọ u fo inọ ọzae riẹ hayo ọzae jọ evaọ ukoko na o re ru. Onana o rọwo kugbe ehri-uzi nọ Pọl ukọ na ọ fodẹ inọ “kaye kaye nọ ọ be lẹ hayo aroọruẹ nọ o [kpe] uzou fihọ yọ o si adhẹ no oma riẹ” keme “ọzae ọye o wo uzou aye riẹ.” (1 Kọr. 11:3-10) Oniọvo-ọmọtẹ ọ tẹ fare uzou riẹ kpatiẹ evaọ etoke otiọye na, yọ o bi dhesẹ omaurokpotọ kẹ ọruẹrẹfihotọ Ọghẹnẹ.—1 Tim. 2:11, 12. *
Kọ ẹvẹ otẹrọnọ oniọvo jọ ọ be kẹ ovuẹ yọ oniọvo-ọmọtẹ jọ ọ be r’obọ fa eme na kẹ enọ i diezọ? Ginọ uzẹme inọ oniọvo-ọmọtẹ na ọ be fa ẹme nọ oniọvo na ọ be ta na kẹ enọ i diezọ na ọvo. Koyehọ, oniọvo-ọmọzae na họ ọnọ o bi gine wuhrẹ enọ i diezọ na, orọnikọ oniọvo-ọmọtẹ na ha. Rekọ, re a r’obọ fa ẹme kẹ enọ i diezọ u wo ohẹriẹ no ẹme nọ a rẹ fa no ẹvẹrẹ jọ kpohọ ẹvẹrẹ ọfa. Evaọ ẹvẹrẹ nọ a rẹ rọ ezọ yo, ogbotu na a rẹ sae tẹrovi ọnọ o bi ru ẹme na yọ a be gaviezọ kẹ ọnọ ọ be fa ẹme na fihọ ẹvẹrẹ rai. Ofariẹ, wo ohẹriẹ no ẹvẹrẹ obọ rọ t’ẹme, inievo-emetẹ nọ e rẹ fa ẹme no ẹvẹrẹ jọ nọ a rẹ rọ ezọ yo kpohọ ọfa a rẹ jọ oria nọ ogbotu na a rẹ jọ tẹrovi ai gaga ha. Ẹsejọ a rẹ sae tubẹ keria dede, hayo otẹrọnọ a dikihẹ, a sae rẹriẹ ovao ku oniọvo nọ ọ be ta ẹme na, orọnikọ ogbotu na ha. Fikiere o rrọ ọgbahọ họ re oniọvo-ọmọtẹ ọ fare uzou nọ ọ tẹ be fa
ẹme no ẹvẹrẹ jọ nọ a rẹ rọ ezọ yo kpohọ ọfa.Fiba onana, fiki eware nọ a ku no nọ a rẹ jọ ruẹ ọnọ ọ be fa ẹme fihọ ẹvẹrẹ obọ rọ t’ẹme, ọnọ ọ be fa ẹme na họ ọnọ enọ i diezọ na a rẹ mae ruẹ. O sae jọnọ a be jọ itehe-ughe ilogbo ruẹ ọnọ ọ be r’obọ fa ẹme na, rekọ a be ruẹ oniọvo-ọmọzae nọ ọ be ta ẹme na ha. Fikiere u re fo re oniọvo-ọmọtẹ nọ ọ be fa ẹme na ọ fare uzou riẹ ro dhesẹ inọ orọnikọ ọye o wo ẹme na ha rekọ ọ be fae fihọ ẹvẹrẹ obọ rọ t’ẹme ọvo.
Ẹvẹ ọkpọvio ọkpokpọ nana o ti kpomahọ inievo-emetẹ nọ e be r’obọ fa eme nọ a bi ru evaọ Isukulu Odibọgba Esuo-Ọghẹnẹ, idhesẹvia, gbe uyo nọ a be kẹ evaọ Uwuhrẹ Ebaibol Ukoko, Ewuhrẹ Odibọgba, gbe Uwuhrẹ Uwou-Eroro Na? Kọ o rrọ ọgbahọ re oniọvo-ọmọtẹ nọ ọ be r’obọ fa ẹme nọ a bi ru evaọ Ọgwa Uvie ọ fare uzou? Ijo, keme enọ e rrọ ewuhrẹ na kpobi a riẹ inọ orọnikọ ọye o bi ru ewuhrẹ na ha. O rrọ ọgbahọ họ re ọ fare uzou nọ ọ tẹ be r’obọ fa uyo nọ ohwo jọ ọ be jọ ogbotu na kẹ, ẹme nọ oniọvo-ọmọtẹ jọ o bi ru, hayo idhesẹvia. Rekọ ọ tẹ be r’obọ fa ẹme nọ oniọvo-ọmọzae jọ o bi ru, ẹme nọ ọnọ o re ru Uwuhrẹ Uwou-Eroro hayo Uwuhrẹ Ebaibol Ukoko ọ be ta, hayo ọ tẹ be r’obọ fa ole nọ a be so, ọ rẹ fare uzou. Nọ a bi ru ewuhrẹ na, oniọvo-ọmọtẹ ọ sae r’obọ fa ẹme kẹ inievo-emezae, inievo-emetẹ, emaha, gbe ekpako ukoko. Fiki onana, o sae jọ oware areghẹ re ọ nwane fare uzou evaọ etoke ewuhrẹ na kpobi.
[Oruvẹ-obotọ]
^ edhe-ẹme 3 Rọkẹ ẹmeọta okokodo kpahe uzou nọ aye Oleleikristi ọ rẹ fare, rri obe na “Daji Uyoyou Ọghẹnẹ,” ẹwẹ-obe avọ 209 rite 212.