Oghẹrẹ Ohwo Vẹ Elẹ Ra I Bi Dhesẹ Owhẹ Fihọ?
Oghẹrẹ Ohwo Vẹ Elẹ Ra I Bi Dhesẹ Owhẹ Fihọ?
“O whẹ họ ọnọ o re yo elẹ! Whẹ họ ọnọ ahwo kpobi a re bru tha.”—OL. 65:2.
1, 2. Fikieme idibo Jihova a jẹ lẹ sei avọ evaifihọ?
JIHOVA o re kiuke ku ayare idibo riẹ vievie he. Ma wo imuẹro inọ ọ rẹ gaviezọ kẹ omai. O tẹ make rọnọ ima Isẹri riẹ buobu a lẹ sei oke ọvona, o rẹ jọ bẹbẹ kẹe he re ọ gaviezọ kẹ ayare omomọvo.
2 Fikinọ u mu Devidi ọso-ilezi na ẹro inọ Ọghẹnẹ o yo elẹ riẹ, o te kere nọ: “O whẹ họ ọnọ o re yo elẹ! Whẹ họ ọnọ ahwo kpobi a re bru tha.” (Ol. 65:2) A yo elẹ Devidi keme o je yoẹme kẹ Jihova. Ma rẹ sae nọ oma mai inọ: ‘Kọ elẹ mẹ i bi dhesẹ nọ me fievahọ Jihova jegbe nọ mẹ be rọ egagọ riẹ karo? Eme elẹ mẹ i bi dhesẹ kpahe omẹ?’
Lẹ Se Jihova avọ Omaurokpotọ
3, 4. (a) Oghẹrẹ oma vẹ ma rẹ rọ lẹ se Ọghẹnẹ? (b) Eme ma re ru nọ ‘iroro’ i te bi brukpe omai fiki uzioraha ulogbo jọ?
3 Re Ọghẹnẹ ọ sai yo elẹ mai, ma rẹ lẹ sei avọ omaurokpotọ. (Ol. 138:6) Ma rẹ yare Jihova re ọ kiẹ omai riwi, wọhọ epanọ Devidi o ru nọ ọ ta nọ: “Gwọlọ omẹ, O Ọghẹnẹ, re whọ riẹ iroro udu mẹ! Dawo omẹ re whọ riẹ ẹjiroro mẹ! Re who vuhu mu sọ mẹ rọ eva edhere umuomu, re who je su omẹ eva edhere ebẹdẹ!” (Ol. 139:23, 24) Orọnikọ ma rẹ lẹ ọvo ho rekọ ma rẹ rehọ Ẹme Ọghẹnẹ rọ kiẹ oma mai riwi. Jihova ọ rẹ sai su omai eva “edhere ebẹdẹ,” ẹkwoma obọ nọ o re fihọ kẹ omai re ma ru eware nọ i re su kpohọ uzuazọ ebẹdẹ bẹdẹ.
4 Kọ ẹvẹ otẹrọnọ ‘iroro’ mai i bi brukpe omai fiki uzioraha ulogbo jọ? (Se Olezi 32:1-5.) Ma te bi gbolo aro kẹ udu nọ u bi brukpe omai, ma rẹ te dọ no wọhọ ure nọ o ya fia fiki uvo ogaga. Fiki uzi nọ Devidi ọ raha, ọ tẹ jọ ọkora je kie ẹyao. Rekọ, nọ ọ feva kẹ Ọghẹnẹ no o te wo omosasọ. Dai roro epanọ Devidi ọ ghọghọ te nọ ọ ruẹ nọ Jihova ọ ‘rehọ izieraha riẹ vrẹ riẹ no.’ Ma tẹ feva kẹ Ọghẹnẹ o rẹ wha omosasọ ze, yọ obufihọ ekpako o rẹ sae whae ze nọ ohwo ọ rẹ rọ wariẹ wo emamọ usu kugbe Ọghẹnẹ.—Itẹ 28:13; Jem. 5:13-16.
Yare je Yere Ọghẹnẹ
5. Oke vẹ o mae gwọlọ nọ ma rẹ rọ yare Jihova kẹ obufihọ?
5 Otẹrọnọ ma be ruawa gaga fiki oware jọ, joma fi ohrẹ Pọl na họ iruo: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ.” (Fil. 4:6) Maero nọ ma tẹ rẹriẹ ovao ku okpẹtu hayo ukpokpoma, u fo nọ ma rẹ lẹ se Jihova gaga kẹ obufihọ gbe ọkpọvio.
6, 7. Fikieme ma je fi uyere ba elẹ mai?
6 Kọ otẹrọnọ okenọ ma gwọlọ oware jọ ọvo ma rẹ lẹ, oghẹrẹ ohwo vẹ onana u ti dhesẹ omai fihọ? Pọl ọ ta nọ ma rẹ n’iyẹi epanọ ma gwọlọ kẹ Ọghẹnẹ avọ “uyere-okẹ.” Ma wo ẹjiroro nọ ma sae rọ ta wọhọ Devidi inọ: “O ra, O ỌNOWO, oruaro, ogaga, gbe oro gbe obokparọ gbe udu-ogaga; keme e nọ e rọ obọ idhiwu gbe evaọ akpọ na e ra; uvie na o ra, O ỌNOWO, jọ a kpare owhẹ kpehru wọhọ ọnọ o wuzou vi ai kpobi. . . . Whaọ enẹna ma yere owhẹ, Ọghẹnẹ mai, ma te je jiri odẹ oruaro ra.” (1 Irv. 29:11-13)
7 Jesu o yere Ọghẹnẹ kẹ emu, ebrẹdi, gbe udi nọ a ro ru Emu Owọwọ Olori na. (Mat. 15:36; Mak 14:22, 23) Wọhọ Jesu, ma re yere Ọghẹnẹ kẹ emuore okpẹdẹ mai, ma ve je yere iei kẹ “iruo urirẹ riẹ rọ kẹ emọ ahwo,” ‘ijaje riẹ nọ i kiete’ gbe eme riẹ nọ e rrọ Ebaibol na.—Ol. 107:15; 119:62, 105.
Lẹ Roro Amọfa
8, 9. Fikieme u ro fo re ma lẹ roro inievo mai?
8 Ababọ avro, ma rẹ lẹ kẹ omobọ mai, rekọ u fo re ma lẹ roro amọfa re, makọ ileleikristi nọ ma riẹ edẹ rai hi. Dede nọ ẹsejọhọ Pọl ukọ na ọ riẹ imoni nọ e jọ obọ Kọlọsi kpobi hi, o kere nọ: “Ma be hẹ [kẹ] Ọghẹnẹ Ọsẹ Jesu Kristi Ọnowo mai uyere kẹse kẹse, evaọ oke nọ ma be lẹ kẹ owhai, keme ma yo kpahọ orọwọ rai nọ o rọ evaọ Kristi Jesu gbe uyoyou nọ wha wo kẹ erezi na.” (Kọl. 1:3, 4) Pọl ọ tẹ jẹ lẹ roro ileleikristi nọ e jọ obọ Tẹsalonika. (2 Tẹs. 1:11, 12) Elẹ itieye na i re dhesẹ oghẹrẹ ohwo nọ ma rọ gbe iroro nọ ma wo kpahe inievo mai.
9 Nọ ma be lẹ roro Ileleikristi nọ a wholo gbe “igodẹ efa” na yọ ma bi dhesẹ nọ ma wo ọdawẹ kẹ ukoko Ọghẹnẹ. (Jọn 10:16) Pọl o kere se ibe ileleikristi riẹ inọ a lẹ re ọye omariẹ ọ ‘ruẹsi rovie unu riẹ vevẹ dhesẹ eware ididi usiuwoma na via.’ (Ẹf. 6:17-20) Kọ ma be hae lẹ roro Ileleikristi efa?
10. Eme ọ rẹ via nọ ma tẹ be hae lẹ roro amọfa?
10 Ma tẹ be lẹ roro amọfa, u re ru omai nwene iroro mai kpahe ae. Otẹrọnọ ma be lẹ roro ohwo jọ nọ ọ rẹ were omai tere he, iroro mai kpahe ohwo ọyena e sai nwene. (1 Jọn 4:20, 21) Elẹ itienana e rẹ wha ọbọga ze jẹ tua okugbe nọ o rrọ udevie mai. Ofariẹ, elẹ itieye na i re dhesẹ nọ ma wo oghẹrẹ uyoyou Kristi. (Jọn 13:34, 35) Uruemu oyena yọ abọjọ orọ ubi ẹzi Ọghẹnẹ. Kọ whọ be hae lẹ kẹ ẹzi ọfuafo na, re Jihova o fi obọ họ kẹ owhẹ dhesẹ uyoyou, oghọghọ, udhedhẹ, uye-oruẹ-krẹkri, ẹwo, ewoma, ẹrọwọ, ẹwolẹ gbe oma-oriẹsuo? (Luk 11:13; Gal. 5:22, 23) Otẹrọ ere, ẹmeunu gbe uruemu mai i re dhesẹ nọ ma be nya jẹ rria evaọ Ẹzi.—Se Ahwo Galesha 5:16, 25.
11. Ẹvẹ ma rọ riẹ nọ o thọ họ re ma ta kẹ amọfa re a lẹ roro omai?
11 Ma tẹ ruẹ nọ a rẹ jọ isukulu nọ emọ mai a rọ thuji ẹdawọ, u fo re ma lẹ roro ai jẹ rehọ Ebaibol fi obọ họ kẹ ae re a siọ oware uyoma ba eruo. Pọl ọ ta kẹ Ileleikristi obọ Kọrint inọ: “Ma lẹ Ọghẹnẹ re wha seba eruthọ.” (2 Kọr. 13:7) Elẹ omaurokpotọ tioye na e rẹ were Jihova je dhesẹ omai fihọ emamọ ahwo. (Se Itẹ 15:8.) Ma rẹ sae ta kẹ amọfa re a lẹ roro omai, wọhọ epanọ Pọl ukọ na o ru. O kere nọ: “Wha hẹ lẹ olẹ kẹ omai, keme u mu omai ẹro nọ iroro mai e rẹ fuafo be guọlọ epanọ ma re ro ru eware na kpobi ziezi.”—Hib. 13:18.
Eware Efa nọ Elẹ Mai I re Dhesẹ Kpahe Omai
12. Eware vẹ e mai wuzou nọ ma rẹ lẹ kpahe?
12 Kọ elẹ mai i bi dhesẹ nọ mai yọ ahwo nọ a be rọ evawere gbe ajọwha se isẹi kẹ Jihova? Kọ ma be hae lẹ kpahe eruo oreva Ọghẹnẹ, ẹta usiuwoma Uvie na, ẹkpare kpehru esuo Jihova gbe erufuọ odẹ riẹ? Enana họ eware nọ e mai wuzou nọ ma rẹ lẹ kpahe wọhọ epanọ olẹ oriruo nọ Jesu o wuhrẹ omai na u dhesẹ onọ u muhọ inọ: “Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”—Mat. 6:9, 10.
13, 14. Eme elẹ mai i re dhesẹ kpahe omai?
13 Elẹ mai se Ọghẹnẹ i re dhesẹ iroro mai, isiuru gbe ẹgwọlọ mai via. Jihova ọ riẹ oghẹrẹ ahwo nọ ma rrọ. Itẹ 17:3 o ta nọ: “Ẹbẹro a rẹ rọ ghra isiliva, a vẹ rehọ ebrerae rọ ghra oro, [rekọ] ỌNOWO na ọ rẹ dawo ibiudu.” Ọghẹnẹ ọ rẹ ruẹ oware nọ o rrọ udu mai. (1 Sam. 16:7) Ọ riẹ oghẹrẹ nọ ma bi rri iwuhrẹ mai, usiuwoma ota gbe inievo mai nọ e rrọ ukoko na. Jihova ọ riẹ oghẹrẹ nọ ma bi rri “imoni” Kristi. (Mat. 25:40) Ọ riẹ sọ eware nọ ma be lẹ kpahe na i no omai eva ze hayo ma be fake wariẹ eme jọ nọ ma riẹ fihọ uzou gheghe. Jesu ọ ta nọ: “No wha te lẹ wha ta eme nọ iwo otọ họ wọhọ epanọ egedhọ na a rẹ ta ha; keme a roro [thọ] nọ a re ti yo ẹme rai fiki ọtabuo rai.”—Mat. 6:7.
14 Elẹ mai i re je dhesẹ epanọ ma rẹroso Ọghẹnẹ te. Devidi ọ ta nọ: “Whẹ [Jihova] họ ọthothọ mẹ, oria-adhẹzọ mẹ no obọ ọwegrẹ na. Jọ omẹ ria uwou-owhre ra ri bẹdẹ! re me wo omofọwẹ eva otọ uwoho ibekpe ra!” (Ol. 61:3, 4) Ọghẹnẹ ọ tẹ “rehọ uwoho riẹ ruru” omai, ma rẹ te reawere ufuoma gbe ẹruọsa riẹ. (Evia. 7:15) O rrọ oware omosasọ gaga nọ ma ro wo imuẹro inọ, nọ ma bi si kẹle Jihova evaọ olẹ na, ọ te jọ ‘abọ mai’ evaọ okenọ ma rrọ otọ edawọ.—Se Olezi 118:5-9.
15, 16. Eme olẹ u re fi obọ họ kẹ omai vuhumu kpahe isiuru mai re ma wo uvẹ-iruo evaọ ukoko na?
15 Ma tẹ be lẹ re Jihova o fi obọ họ kẹ omai kiẹ iroro mai, onana u re fi obọ họ kẹ omai riẹ oware nọ o be lẹliẹ omai le oghẹrẹ utee jọ. Wọhọ oriruo, ma te bi le uvẹ-iruo jọ evaọ ukoko na, kọ ma bi ru ere fikinọ ma gwọlọ fi obọ họ kẹ inievo na je ru uthoma mai evaọ ukoko na? Manikọ ma gwọlọ rehọ oma mai “dhe aro” hayo “rọ oma ru ikpahwo” kẹ amọfa? Ere u fo nọ o rẹ jọ họ evaọ ukoko Jihova. (Se 3 Jọn 9, 10; Luk 22:24-27.) Ma tẹ be rọ eva mai kpobi lẹ se Jihova, u re fi obọ họ kẹ omai si isiuru ethọthọ itieye no taure e tẹ te t’awọ muotọ evaọ udu mai.
16 Eyae ileleikristi a rẹ sae gwọlọ nọ ezae rai a jọ idibo iruiruo hayo esẹro. Eyae nana a rẹ sai ru lele elẹ rai ẹkwoma emamọ uruemu nọ a rẹ daoma wo. Onana o roja keme ẹmeunu gbe uruemu orọ uviuwou ọzae u re kpomahọ oghẹrẹ nọ a re rri rie evaọ ukoko na.
Who te bi Su Amọfa Evaọ Olẹ
17. Fikieme u ro fo re ma jọ oria ofọfọ lẹ olẹ obọmai?
17 Jesu ọ jẹ hai kpohọ oria nọ u siomano re ọ lẹ se Ọsẹ riẹ. (Mat. 14:13; Luk 5:16; 6:12) U fo re ma ru ere re. Nọ ma tẹ be lẹ evaọ oria nọ o rọ fọfọ, u re fi obọ họ kẹ omai lẹ kpahe eware nọ e rẹ were Jihova gbe enọ i re fi obọ họ kẹ omai gọe ziezi. Ghele na, Jesu ọ jọ ẹgbede lẹ yọ u woma re ma riẹ epanọ u fo nọ ma re ro ru onana.
18. Eme u fo nọ inievo-emezae a rẹ kareghẹhọ nọ a te bi su amọfa evaọ olẹ ogbotu?
18 Eva obọ iwuhrẹ mai, ezae ẹrọwọ a re su omai evaọ olẹ. (1 Tim. 2:8) Ọnọ ọ be lẹ na o re ru ere evaọ edhere nọ enọ e be gaviezọ a sai ro yo nọ “ami,” koyehọ “ere o rẹ jọ” evaọ ukuhọ olẹ na. Rekọ re a sai yo ere, a rẹ rọwo kugbe olẹ na. Evaọ olẹ nọ Jesu o wuhrẹ omai na, ma rẹ jariẹ ruẹ ẹme nọ o re tu ohwo oma ha. (Luk 11:2-4) Ofariẹ, ọ lẹ kpahe ebẹbẹ kpobi nọ ahwo nọ a jọ etẹe a wo ho. Olẹ obọmai ma rẹ jọ fodẹ eware nọ e rrọ omai oja orọnikọ olẹ ogbotu hu. Yọ ma te bi su amọfa evaọ olẹ, ma rẹ whaha eme nọ i fo nọ a rẹ ko dhere.
19. Uruemu vẹ u fo nọ ma re dhesẹ evaọ olẹ ogbotu?
19 Ma tẹ rrọ udevie ogbotu nọ omọvo o bi jo su omai evaọ olẹ, u fo re ma dhesẹ nọ ma be “dhozọ Ọghẹnẹ.” (1 Pita 2:17) Iruemu jọ nọ i re kiehọ evaọ eria jọ i re fo ho evaọ obọ iwuhrẹ mai. (Ọtausi. 3:1) Wọhọ oriruo, ma rehọ iẹe nọ ohwo nọ ọ be lẹ na ọ ta nọ enọ e rrọ ogbotu na kpobi a kru obọ evaọ etoke olẹ na. Onana o rẹ sae dha ahwo jọ eva hayo lẹliẹ otujọ, makọ enọ a zizie ze iwuhrẹ mai si iroro no olẹ na. Erivẹ-orọo jọ a rẹ sae rọ areghẹ kru obọ, rekọ a tẹ gbalọ ohwohwo evaọ olẹ ẹgbede, o rẹ sae lẹliẹ enọ i gbẹroku ai zoruẹ. Amọfa a rẹ sai roro nọ ọzae avọ aye nana a bi roro kpahe isiuru nọ a wo kẹ ohwohwo viọ adhẹẹ nọ a rẹ rọ kẹ Jihova. Joma rehọ fiki adhẹẹ nọ ma wo kẹ Jihova ‘ru eware kpobi rọ kẹe oruaro’ re ma whaha uruemu nọ o rẹ wha evedha hayo ezoruẹ se amọfa.—1 Kọr. 10:31, 32; 2 Kọr. 6:3.
Eme Ma rẹ Lẹ Kẹ?
20. Ẹvẹ whọ sae fotọ Ahwo Rom 8:26, 27?
20 Ẹsejọ ma rẹ riẹ oware nọ ma rẹ lẹ kẹ hẹ evaọ olẹ obọmai. Pọl o kere nọ: “Ma sae be riẹ lẹ te epanọ ma hẹ lẹ te he, rekọ Ẹzi [ọfuafo] na ọvo ọ rọ omai ẹ lẹ kẹ, avọ imidio nọ a sae ta ha. Whaọ [Ọghẹnẹ] nọ ọbe guọlọ otọ eva, ọ riẹ onọ Ẹzi ore roro.” (Rom 8:26, 27) Jihova o ru re a kere elẹ buobu fihọ Ebaibol na. Ọ rẹ jẹ elẹ enana rehọ wọhọ elẹ mai, o ve ru ai gba kẹ omai. Ọghẹnẹ ọ riẹ omai ziezi, ọ tẹ jẹ riẹ eware nọ ọ rọ ẹzi riẹ fi obọ họ kẹ ahwo kere fihọ Ebaibol na. Jihova ọ rẹ kuyo ayare mai oke nọ ẹzi na ọ tẹ be lẹ kẹ omai. Rekọ nọ eriariẹ mai i bi vihọ na, ma rẹ te riẹ eware nọ ma rẹ lẹ kpahe.
21. Eme ma ti wuhrẹ kpahe evaọ uzoẹme nọ o rrọ aro na?
21 Wọhọ epanọ ma wuhrẹ no na, elẹ mai i re dhesẹ oghẹrẹ ohwo nọ ma rrọ. Wọhọ oriruo, elẹ mai i re dhesẹ epanọ ma si kẹle Jihova te no gbe epanọ ma riẹ Ebaibol na te no. (Jem. 4:8) Evaọ uzoẹme nọ o rrọ aro na, ma te kiẹ elẹ jọ nọ e rrọ Ebaibol na riwi. Ẹvẹ ọkiẹriwo otiọye na o sai ro kpomahọ elẹ mai?
Ẹvẹ Whọ te k’Uyo?
• Okwakwa ezi vẹ u fo nọ ma re dhesẹ nọ ma tẹ be lẹ se Jihova?
• Fikieme ma jẹ lẹ roro inievo mai?
• Eme elẹ mai e rẹ ta kpahe omai gbe iroro mai?
• Oghẹrẹ vẹ u fo nọ ma re ru nọ a tẹ be lẹ evaọ ogbotu?
[Enọ Uwuhrẹ]
[Uwoho nọ o rrọ ẹwẹ-obe avọ 4]
Kọ whọ be hai yere Jihova ẹsikpobi?
[Uwoho nọ o rrọ ẹwẹ-obe avọ 6]
U fo nọ ma re dhesẹ uruemu nọ o rẹ wha ọghọ se Jihova ẹsikpobi nọ a tẹ be lẹ evaọ ogbotu